ARYNews.tv | Urdu – Har Lamha Bakhabar

Tag: طوفانی بارشیں

  • بونیر میں طوفانی بارشیں، آسمانی بجلی گرنے سے بچہ جاں بحق، چار افراد زخمی

    بونیر میں طوفانی بارشیں، آسمانی بجلی گرنے سے بچہ جاں بحق، چار افراد زخمی

    بونیر: خیبر پختونخوا کے ضلع بونیر میں آسمانی بجلی گرنے سے ایک بچہ جاں بحق اور چار افراد زخمی ہوگئے تاہم زخمیوں کواسپتال منتقل کر دیا گیا ہے۔

    تفصیلات کے مطابق خیبر پختونخوا کے ضلع بونیر میں شدید بارشوں اور کلاؤڈ برسٹ نے تباہی مچا دی۔ گیرو بگڑا میں آسمانی بجلی گرنے سے ایک بچہ جاں بحق جبکہ چار افراد زخمی ہوگئے، جنہیں ڈسٹرکٹ ہسپتال ڈگر منتقل کر دیا گیا ہے۔

    پولیس نے بتایا کہ گزشتہ رات ہونے والی طوفانی بارش کے باعث پیربابا میں سیلابی ریلے گھروں اور دکانوں میں داخل ہوگئے، جبکہ قادر نگر اور ٹانثابٹئی سمیت متعدد علاقوں میں پانی کا تیز بہاؤ جاری ہے، پیربابا بازار اور ملحقہ علاقے سب سے زیادہ متاثر ہوئے۔

    ضلعی انتظامیہ کا کہنا تھا کہ غازی خانہ اور سلطان وس کے مقام سے گزرنے والے ریلے کے بعد سڑک ٹریفک کے لیے کھول دی گئی ہے، تاہم چغرزی بامے روڈ پر لینڈ سلائیڈنگ کے باعث آمدورفت متاثر ہوئی۔

    ڈپٹی کمشنر کاشف قیوم نے بتایا کہ ضلع بھر میں مسلسل بارشوں کے بعد ہائی الرٹ جاری ہے، پیربابا کھوڑ میں پانی کی سطح بلند ہو کر مرکزی بازار کے عقب اور سڑک تک پہنچ گئی ہے جبکہ مساجد اور لاؤڈ اسپیکرز کے ذریعے محفوظ مقامات پر منتقل ہونے کے اعلانات جاری ہیں۔

    انتظامیہ کے مطابق ریسکیو 1122، سول ڈیفنس، پولیس اور دیگر ادارے فیلڈ میں متحرک ہیں جبکہ سرکاری رہائش گاہوں کو ہنگامی پناہ گاہوں میں تبدیل کر دیا گیا ہے، عوام سے اپیل کی گئی ہے کہ غیر ضروری طور پر گھروں سے باہر نہ نکلیں۔

  • بھارت و نیپال میں طوفانی بارشیں، 100 سے زائد ہلاک

    بھارت و نیپال میں طوفانی بارشیں، 100 سے زائد ہلاک

    بھارت اور نیپال کے مختلف علاقوں میں شدید بارشوں سے بڑے پیمانے پر تباہی کی اطلاعات سامنے آرہی ہیں، بدھ سے اب تک مختلف حادثات میں 100 افراد لقمہ اجل بن چکے ہیں۔

    بین الاقوامی خبر رساں ادارے کی رپورٹ کے مطابق بھارتی ریاست بہار میں بدھ سے اب تک بارش کے سبب مختلف حادثات میں 64 جان کی بازی ہار گئے۔

    بھارتی ریاست اتر پردیش میں بارشوں اور آندھی سے 22 افراد ہلاک ہوئے جبکہ نیپال میں شدید بارشوں اور بجلی گرنے سے کم از کم 8 افراد موت کے منہ میں چلے گئے۔

    بھارتی محکمہ موسمیات نے متاثرہ علاقوں میں ہفتے تک مزید غیر موسمی بارش کی پیش گوئی کر رکھی ہے۔

    واضح رہے کہ بھارتی محکمہ موسمیات نے پہلے ہی بدھ کے روز ملک کے لیے ایک بڑے خطرے کی وارننگ جاری کر رکھی تھی، جس میں مغربی حصوں میں ہیٹ ویو کی صورتِ حال اور مشرقی و وسطی علاقوں میں گرج چمک کے ساتھ طوفانی ہواؤں و بارشوں کی پیش گوئی کی گئی تھی۔

    گزشتہ روز بھی بھارت میں محکمہ موسمیات نے شدید گرمی کے پیش نظر یلو الرٹ جاری کیا تھا، دہلی میں پارہ 41 ڈگری کو چھو گیا تھا۔

    ریاست گجرات میں درجہ حرارت 45.6 ڈگری سے تجاوز کر گیا جبکہ راجھستان میں درجہ حرارت 46 ڈگری کو چھو گیا تھا۔

    محکمہ موسمیات کا کہنا تھا ہے کہ مہارشٹرا اور مدھیہ پردیش میں بھی پارہ 43 ڈگری تک ریکارڈ کیا گیا ہے، جبکہ ہیٹ ویو سے متاثرہ ریاستوں میں درجہ حرارت معمول سے 6 سے 8 ڈگری زائد رہا۔

    نیویارک : ہسپانوی سیاح خاندان کا ہیلی کاپٹر دریائے ہڈسن میں گر کر تباہ، 6 افراد ہلاک

    محکمہ موسمیات نے مدھیہ پردیش اور گجرات میں آج سے بارش کا امکان ظاہر کیا تھا، ہریانہ اور راجھستان میں 14 اپریل سے ہیٹ ویو کی پیش گوئی کی گئی ہے۔

  • شہری تیار ہوجائیں ! طوفانی بارشیں برسانے والا طاقتور سسٹم کراچی کی جانب بڑھنے لگا

    شہری تیار ہوجائیں ! طوفانی بارشیں برسانے والا طاقتور سسٹم کراچی کی جانب بڑھنے لگا

    کراچی : طوفانی بارشیں برسانے والا طاقتور سسٹم کراچی کی جانب بڑھنے لگا، جس کے تحت آج شام سے گرج چمک کے ساتھ بارش کا امکان ہے۔

    تفصیلات کے مطابق محکمہ موسمیات نے کراچی میں موسم کی صورتحال کے حوالے بیان میں کہا ہے کہ آج شام سے کراچی میں بارش برسانے والا مغربی سسٹم داخل ہوگا، جس کے باعث آج سے 19 اپریل تک ملک بھر میں کہیں ہلکی تو کہیں درمیانے درجےکی بارش متوقع ہے۔

    محکمہ موسمیات کا کہنا ہے کہ سسٹم کے زیر اثر سندھ کے دیگرعلاقوں میں بارش کاسلسلہ آج بھی جاری رہے گا، شہر کا کم سے کم درجہ حرارت 25.5 ڈگری ریکارڈ کیا گیا جبکہ آج درجہ حرارت 30 سے 32 ڈگری رہنے کا امکان ہے اور ہوا میں نمی کا تناسب 77 فیصد ہے۔

    دوسری جانب بارش برسانے والے طاقتور سسٹم ایران سے بلوچستان میں داخل ہوگیا ہے، پی ڈی ایم اے کا کہنا ہے بلوچستان میں آج رات سے 19 اپریل تک مختلف اضلاع میں بارشیں ہوں گی۔

    محکمہ موسمیات کے مطابق گوادر، چاغی، پنجگور اور خضدار میں گرج چمک کیساتھ بارش کا نیا سلسلہ شروع ہوگیا ہے، موسلادھاربارش سے نشیبی علاقے زیرآب اور برساتی نالوں میں طغیانی آگئی ہے۔

    بارش کے نئے سسٹم کے تحت حیدرآباد، دادو اور لاڑکانہ سمیت متعدد اضلاع میں آج رات سے تیز ہواؤں اور گرج چمک کے ساتھ بارش کا امکان ہے جبکہ اسلام آباد، کشمیر اور گلگت بلتستان سمیت ملک کے بیشتر علاقوں میں موسم خشک اور مطلع جزوی طور پر ابرآلود رہے گا۔

    موسمیاتی تبدیلیوں کے اثرات

    خیال رہے پاکستان کا صوبہ بلوچستان ہو یا خیبرپختونخوا ، یو اے ای، عمان، بحرین سمیت کئی خلیجی ریاستوں میں ایک کے بعد ایک غیرمتوقع اورمعمول کے برخلاف طوفانی بارشوں کےسسٹم اثرانداز ہو رہےہیں ، جس سے بڑے پیمانے پر تباہ کاریاں بھی دیکھی جارہی ہیں۔

  • طوفانی بارشوں کے باعث ٹریفک کے لیے بند اکثر سڑکیں کھول دی گئیں

    طوفانی بارشوں کے باعث ٹریفک کے لیے بند اکثر سڑکیں کھول دی گئیں

    اسلام آباد: این ایچ اے کا کہنا ہے کہ حالیہ طوفانی بارشوں کے باعث ٹریفک کے لیے بند اکثر سڑکیں کھول دی گئی ہیں۔

    ترجمان این ایچ اے کے مطابق انتظامیہ اور فیلڈ اسٹاف کی ان تھک محنت سے گلگت بلتستان اور خیبر پختونخوا میں اکثر شاہراہوں پر ٹریفک رواں دواں ہو گیا ہے۔

    ترجمان نے کہا کہ گلگت بلتستان میں گیتی داس اور رائے کوٹ میں شدید برفباری اور لینڈ سلائیڈنگ کے ملبے کو تیزی سے صاف کیا جا رہا ہے، جلد ہی یہ دو شاہراہیں بھی ٹریفک کے لیے کھل جائیں گی۔

    خیبر پختونخوا میں زیادہ تر روڈ نیٹ ورک ٹریفک کے لیے رواں ہے اور موسم صاف ہے، تالاش- خوڑ شمشی خان کے قریب N-45 ٹریفک کے لیے جزوی طور پر کھلی ہے، اور اس پر کام ہو رہا ہے۔ شاہراہِ قراقرم پر پتن اور بشام، داسو کے مقامات پر لینڈ سلائیڈنگ کے ملبے کو بھی ہٹایا جا رہا ہے۔

    ترجمان نے کہا کہ قراقرم ہائی وے پر دو طرفہ ٹریفک بحال رکھنے کے لیے مسلسل ضروری اقدامات کیے جا رہے ہیں، این ایچ اے اچانک خراب موسمی صورت حال سے نمٹنے کے لیے مستعد و فعال ہے، تمام حساس مقامات پر مشینری اور عملہ پہنچ چکا ہے، موسمیاتی تبدیلی کے باعث سیلاب اور برفباری کی غیر یقینی صورت حال پیدا ہو رہی ہے۔

    این ایچ اے نے عوام سے اپیل کی ہے کہ سفر سے قبل موسمی صورت حال سے آگاہی ضرور حاصل کریں۔

  • گجرات میں طوفانی بارشیں، آسمانی بجلی گرنے سے 24 افراد ہلاک

    گجرات میں طوفانی بارشیں، آسمانی بجلی گرنے سے 24 افراد ہلاک

    بھارتی ریاست گجرات میں گزشتہ 2 دنوں کے دوران ہونے والی ژالہ باری اور آسمانی بجلی گرنے سے 24 افراد لقمہ اجل بن گئے۔

    بین الاقوامی خبر رساں ادارے کا اس حوالے سے کہنا ہے کہ بھارتی ریاست گجرات میں اتوار سے شروع ہونے والی بارش کے دوران آسمانی بجلی گرنے اور ژالہ باری سے کم از کم 24 افراد ہلاک ہوگئے۔

    بھارتی حکام کے مطابق اتوار سے ریاست میں شروع ہونے والی شدید بارشوں کے دوران ہلاک ہونے والے 24 افراد میں سے 18 اموات آسمانی بجلی گرنے سے ہوئیں۔

    محکمہ موسمیات کا کہنا ہے کہ موسم سرما کے دوران گجرات میں طوفان غیر معمولی ہیں، یہی وجہ ہے کہ شدید بارشیں اس سال بھی بہت سے افراد کے لئے جان لیوا ثابت ہوئی ہیں۔

    اس کے علاوہ مغربی ریاست گجرات میں خراب موسم نے کئی مکانات کو نقصان پہنچایا جبکہ کئی مویشی بھی ہلاک ہوگئے۔

    بھارت کے وزیر داخلہ امیت شاہ نے طوفانی بارشوں اور آسمانی بجلی گرنے سے ہونے والی شہریوں کی اموات پر گہرے دکھ کا اظہار کرتے ہوئے مقامی حکام کو امدادی کاموں میں تیزی لانے کی ہدایات دی ہیں۔

    کرین آپریٹر کی جلتی عمارت سے مزدور کو بچانے کی ویڈیو وائرل

    سائنسدانوں کا کہنا ہے کہ عالمی درجہ حرارت میں اضافہ انتہائی موسمی تباہ کاریوں میں اضافے کی وجہ بن رہا ہے۔بھارت میں ہر سال سیلاب اور آسمانی بجلی گرنے سے ہزاروں افراد موت کی وادی میں چلے جاتے ہیں۔

  • طوفانی بارشوں سے دریاؤں میں پانی کی سطح میں مسلسل اضافہ

    طوفانی بارشوں سے دریاؤں میں پانی کی سطح میں مسلسل اضافہ

    لاہور: پنجاب کےمختلف اضلاع میں طوفانی بارشوں کاامکان ہے جب کہ طوفانی بارشوں سے دریاؤں میں پانی کی سطح میں مسلسل اضافہ ہو رہا ہے۔

    ترجمان پی ڈی ایم اے کا کہنا ہے کہ طوفانی بارشوں سے دریاؤں میں پانی کی سطح میں مسلسل اضافہ ہو رہا ہے جب کہ پنچاب میں تیز بارشوں کے نتیجے میں اربن فلڈنگ کے خدشات بھی ہیں۔

    پی ڈی ایم اے کے مطابق دریائے راوی میں بلوکی کے مقام پر نچلے درجے کا سیلاب ہے، بلوکی ہیڈ پر پانی کی آمد 58 ہزار 830 اور اخراج 42030 کیوسک ہے۔

    دریائے سندھ میں تونسہ کے مقام پر درمیانے درجے کا سیلاب ہے، تونسہ بیراج پرپانی کی آمد 387587 جب کہ اخراج 387587 کیوسک ہے، تربیلہ چشمہ اور کالا باغ کے مقام پر نچلے درجے کا سیلاب ہے۔

    پی ڈی ایم اے کا کہنا ہے کہ ستلج میں سلیمانکی کے مقام پر درمیانے درجے، گنڈا سنگھ والا کے مقام پر نچلے درجے کا سیلاب ہے، دریائے ستلج میں ہیڈ سلیمانکی کے مقام پر پانی کا بہاؤ 84 ہزار 430 کیوسک ہے۔

    ترجمان کا کہنا ہے کہ پنجاب کی تمام ڈویژنل انتظامیہ کو ضروری اقدامات کی ہدایات جاری کی جاچکی ہیں، ڈی جی پی ڈی ایم اےعمران قریشی نے انتظامیہ کوالرٹ رہنے کی ہدایات کی ہے۔

  • پنجاب ، خیبر پختونخوا اور بلوچستان میں طوفانی بارشیں : مختلف حادثات میں بچوں سمیت 29 افراد جاں بحق

    پنجاب ، خیبر پختونخوا اور بلوچستان میں طوفانی بارشیں : مختلف حادثات میں بچوں سمیت 29 افراد جاں بحق

    لاہور/ پشاور: پنجاب ، خیبر پختونخوا اوربلوچستان میں طوفانی بارشوں کے باعث مختلف حادثات میں بچوں سمیت 29 افراد جان سے گئے۔ 

    تفصیلات کے مطابق ملک بھر میں مون سون سسٹم مزید شدت اختیار کر گیا ، پنجاب ، خیبر پختونخوا اوربلوچستان میں وقفے وقفے سے طوفانی بارشیں جاری ہیں۔

    دو روز میں بارشوں کے باعث مختلف حادثات میں بچوں سمیت انتیس افراد جان سے گئے جبکہ پچاس سے زائد زخمی ہیں، آندھی اور تیز ہواؤں سے چھتیں، دیواریں گرنے اور کرنٹ لگنے سے اموات رپورٹ ہوئیں۔

    لاہور میں دوسرے اسپیل کے بعد بھی شاہراہیں پانی پانی ہوگئیں، گلی محلے ڈوب گئے، گھروں اور اسپتالوں میں ایک بار پھر پانی داخل ہوگیا۔

    خیبرپختونخوا اور بلوچستان میں بھی مون سون نے ڈیرے ڈال لیے ہیں، شدید بارشوں سےندی نالے بپھرگئے۔

    محکمہ موسمیات کے مطابق شدید بارشوں سے پہاڑی علاقوں میں لینڈ سلائیڈنگ اور مختلف شہروں میں اربن فلڈنگ کا خطرہ ہے جبکہ بھارت کی جانب سے پانی چھوڑنے جانے کے خدشے کے بعد پی ڈی ایم اے نے دریائے راوی ، ستلج، جہلم میں اونچے درجے کے سیلاب کا الرٹ بھی جاری کردیا ہے۔

  • طوفانی بارشوں میں بنوں سب سے زیادہ متاثر، متاثرین کے لیے امداد کا اعلان

    طوفانی بارشوں میں بنوں سب سے زیادہ متاثر، متاثرین کے لیے امداد کا اعلان

    بنوں: حالیہ طوفانی بارشوں میں خیبر پختون خوا کا شہر بنوں سب سے زیادہ متاثر ہوا ہے، ڈپٹی کمشنر نے بارشوں کے متاثرین کے لیے امداد کا اعلان کر دیا ہے۔

    تفصیلات کے مطابق بنوں کے ڈپٹی کمشنر منظور آفریدی نے ایک اجلاس میں کہا کہ حالیہ طوفانی بارش سے بنوں سب سے زیادہ متاثر ہوا ہے، جہاں دیواریں اور چھتیں گرنے سے خواتین اور بچوں سمیت 16 افراد جاں بحق ہوئے۔

    انھوں نے نقصانات کی تفصیل بتاتے ہوئے کہا ’’بارشوں میں تقریباً 175 افراد زخمی ہوئے، جنھیں خلیفہ گلنواز اور ڈی ایچ کیو اسپتال لایا گیا، 68 گھروں کو جزوی نقصان پہنچا، اور سیکڑوں سولر پلانٹ تباہ ہوئے، 100 سے زائد مال مویشی ہلاک اور درجنوں زخمی ہوئے۔‘‘

    انھوں نے بارشوں میں جاں بحق ہونے والوں کے لواحقین کے لیے 10 لاکھ، شدید زخمیوں کے لیے 3 لاکھ اور معمولی زخمیوں کے لیے 50 ہزار امداد کا اعلان کیا۔

    منظور آفریدی نے کہا وزیر اعظم کے خصوصی احکامات پر متاثرہ خاندانوں کو امداد فراہم کی گئی ہے، بنوں میں جاں بحق تمام 16 افراد کے لواحقین کو امدادی چیک حوالے کر دیے گئے ہیں۔

    انھوں نے کہا گھروں کے نقصانات کا سروے مکمل ہونے کے بعد ان کو امداد دی جائے گی۔

  • طوفانی بارشوں سے قلعہ عبداللہ میں 2 مزید ڈیم ٹوٹ گئے، سیکڑوں مکانات منہدم

    طوفانی بارشوں سے قلعہ عبداللہ میں 2 مزید ڈیم ٹوٹ گئے، سیکڑوں مکانات منہدم

    چمن: طوفانی بارشوں سے قلعہ عبداللہ میں 2 مزید ڈیم ٹوٹ گئے، جس سے سیکڑوں مکانات منہدم ہو گئے ہیں۔

    تفصیلات کے مطابق بلوچستان کے علاقوں چمن اور قلعہ عبداللہ میں وقفے وقفے سے بارش جاری ہے، جب کہ دوبندی میں طوفانی بارش ہوئی جس سے ندی نالوں میں طغیانی آ گئی۔

    دوبندی کی یونین کونسل جلگاہ میں 2 ڈیم بھی ٹوٹ گئے، امرت اور برج ڈیم ٹوٹنے سے ریلوں کی زد میں آ کر بڑے پیمانے پر مکانات منہدم ہو گئے۔

    سیلابی ریلے فصلوں اور باغات کو بھی بہا کر لے گئے ہیں، اور دوبندی کے مختلف دیہات کا زمینی رابطہ منقطع ہو گیا ہے۔ ڈپٹی کمشنر منیر احمد کا کہنا ہے کہ جلگاہ کے رہائشیوں کو محفوظ مقامات پر منتقل کر دیا گیا ہے۔

    اسکول سے گھر جاتے بچے آبی ریلے میں بہہ کر جاں‌ بحق

    ضلع قلعہ عبداللہ میں بارشوں سے ٹوٹنے والے ڈیمز کی تعداد 18 ہو گئی ہے۔

    ادھر سبی شہر میں بھی موسلادھار بارش سے نشیبی علاقے زیر آب آ گئے ہیں، اور پانی گھروں میں داخل ہو گیا، الله آباد، غریب آباد، چار موری کی سڑکوں پر3 فٹ بارش کا پانی جمع ہو گیا ہے، ناڑی بینک کے کنارے آباد سیلاب متاثرین کو بارش سے مشکلات کا سامنا ہے، وہ کھلے آسمان تلے حکومتی امداد کے منتظر ہیں۔

  • شہری تیار ہوجائیں ! طوفانی بارشیں برسانے والا طاقتور سسٹم کراچی کی جانب بڑھنے لگا

    شہری تیار ہوجائیں ! طوفانی بارشیں برسانے والا طاقتور سسٹم کراچی کی جانب بڑھنے لگا

    کراچی : سندھ میں طوفانی بارشیں برسانے والا طاقتور سسٹم آج رات داخل ہوگا، جس کے باعث کراچی میں طوفانی بارش کا امکان ہے۔

    تفصیلات کے مطابق طوفانی بارشیں برسانے والا طاقتور سسٹم کراچی کی جانب بڑھنے لگا، محکمہ موسمیات کی جانب سے کہا گیا ہے کہ سندھ میں آج رات سے مون سون کی تیز ہواؤں کے داخل ہونے کا امکان ہے۔

    چیف میٹرولوجسٹ نے کہا کہ مون سون کا یہ سلسلہ 24 جولائی سے 26 جولائی تک برقرار رہنے کی توقع ہے۔

    کراچی ڈویژن میں 24 جولائی سے 26 جولائی کے دوران موسلادھار بارش کا امکان ہے ، جس کے باعث کراچی سمیت نشیبی علاقے زیر آب آسکتے ہیں۔

    محکمہ موسمیات کے مطابق دادو ، جامشورو میں نشیبی علاقوں میں سیلابی ریلے آنے کا امکان ہے۔

    تیسرے اسپیل کےزیراثر علاقوں میں تھرپارکر ، بدین ، عمر کورٹ ، میرپور خاص شامل ہیں جبکہ ٹنڈومحمد خان ، ٹنڈو الہ یار، مٹیاری اور حیدر آباد سمیت دیگراضلاع متاثر رہیں گے۔

    دوسری جانب کراچی میں ہلکی بارش کا سلسلہ وقفے وقفے سے جاری رہے گا جبکہ رات کے وقت درمیانے درجے یا تیز بارش کا امکان ہے۔