کراچی: پاکستان انٹرنیشنل ایئرلائنز (پی آئی اے) کی سکھر جانے والی پرواز ڈرون سے بال بال بچ گئی، ڈرون پی آئی اے کی پرواز سے 100 فٹ کی بلندی پر موجود تھا۔
تفصیلات کے مطابق پی آئی اے کی سکھر جانے والی پرواز حادثے سے بال بال بچ گئی، ذرائع کے مطابق ڈرون پی آئی اے کے اے ٹی آر طیارے کے انتہائی قریب آگیا تھا، پرواز پی کے 536 شام 5 بج کر 24 منٹ پر سکھر کے لیے روانہ ہوئی تھی۔
[bs-quote quote=”ڈرون سپر ہائی وے کے اطراف سے اُڑایا گیا، سرچ آپریشن شروع کردیا گیا ہے” style=”style-7″ align=”left” author_name=”ایس ایس پی ملیر”][/bs-quote]
ذرائع کے مطابق طیارے، ڈرون کا سامنا کراچی سے 4.7 ناٹیکل مائل پر مشرق کی جانب ہوا، ایئر شپ کی شکل کا ڈرون گرے پرپل رنگ کا تھا، پی کے 536 شام 6 بج کر 10 منٹ پر باحفاظت سکھر اتر گئی۔
ترجمان پی آئی اے کے مطابق پرواز واپس آئے گی تو پائلٹ سے ڈرون کے حوالے سے مزید معلومات لی جائیں گی۔
مزید پڑھیں: طیاروں کو زمین سے لیزر لائٹ مارنے کے واقعات میں تشویشناک حد تک اضافہ
سی اے اے ذرائع کے مطابق ایئرپورٹ اور اطراف کے علاقوں میں ڈرون اُڑانے پر پابندی ہے، سی اے اے نے واقعے کا نوٹس لیتے ہوئے متعلقہ حکام کو کارروائی کی ہدایت کردی۔
ایس ایس پی ملیر عرفان علی بہادر کے مطابق 5 بجکر 27 منٹ پر پی آئی اے طیارے کے قریب سے ڈرون گزرا، واقعے کی اطلاع سول ایوی ایشن حکام کی جانب سے دی گئی تھی۔
ایس ایس پی ملیر کا کہنا ہے کہ ڈرون سپر ہائی وے کے اطراف سے اُڑایا گیا، سپرہائی وے کے اطراف کے علاقوں میں سرچ آپریشن شروع کردیا گیا ہے۔
واضح رہے کہ گزشتہ سال 27 دسمبر کو طیاروں کو زمین سے لیزر لائٹیں مارنے کے واقعات میں تشویش ناک حد تک اضافہ ہوگیا تھا، گزشتہ سال طیاروں پر لیزر لائٹیں مارنے کے 58 سے زائد واقعات رپورٹ ہوئے لیزر لائٹ پڑنے سے جہازوں کے تحفظات کو خطرات لاحق ہوگئے۔
ایئرپورٹ انتظامیہ کا کہنا ہے کہ سہراب گوٹھ اور ہائی وے پر بنے ریسٹورنٹ پر لگی بڑی لائٹس بھی جہازوں کیلئے مشکلات کاسبب بنی، لیزر لائٹس کے واقعات کے حوالے سے کمشنر کراچی اور پولیس انتظامیہ کو تحریری طور پر آگاہ کیا گیا۔