اسلام آباد : حکومت نے ظاہر شاہ کو قائم مقام چیئرمین نیب تعینات کر دیا، نئے چیئرمین نیب کی تقرری تک ظاہر شاہ چیئرمین نیب ہوں گے۔
تفصیلات کے مطابق حکومت نے ڈپٹی چیئرمین نیب ظاہر شاہ کو چیئرمین نیب کا اضافی چارج دے دیا۔
نیب نے ظاہر شاہ کی بطور قائم مقام چیئرمین نیب تقرری کا نوٹیفکیشن جاری کر دیا، جس میں کہا ہے کہ نئے چیئرمین نیب کی تقرری تک ظاہر شاہ چیئرمین نیب ہوں گے۔
ظاہر شاہ اس سے پہلے نیب میں ایڈیشنل ڈائریکٹر کے عہدے پرخدمات انجام دے رہے تھے۔
یاد رہے 22 فروری کو آفتاب سلطان نے ذاتی وجوہات کی بناء پر قومی احتساب بیورو (نیب) کے چیئرمین کے عہدے سے استعفیٰ دے دیا۔ سلطان نے اپنا استعفیٰ وزیراعظم شہباز شریف کو پیش کیا تھا۔
“وزیراعظم نے آفتاب سلطان کی خدمات کو سراہا اور ان کی ایمانداری اور راست بازی کو سراہا۔
ذرائع نے انکشاف کیا تھا کہ سلطان کو قومی احتساب (ترمیمی) ایکٹ 2022 پر کچھ تحفظات تھے جس نے اینٹی کرپشن واچ ڈاگ کے اختیارات کو محدود کردیا ہے۔
انٹیلی جنس بیورو (آئی بی) کے سابق ڈائریکٹر جنرل (ڈی جی) آفتاب سلطان کو گزشتہ سال جولائی میں پی ڈی ایم حکومت نے قومی احتساب بیورو کا چیئرمین مقرر کیا تھا۔ انہوں نے جسٹس (ر) جاوید اقبال کی جگہ لی تھی جو چار سال تین ماہ تک چیئرمین نیب رہے۔
