Tag: ظل شاہ

لاہور : پی ٹی آئی کارکن علی بلال عرف ظل شاہ کی ہلاکت پر جوڈیشل کمیشن بنانے کے لیے درخواست دائر کردی گئی ، جس میں کہا ہے کہ ظل شاہ کی ہلاکت اہم نوعیت کا معاملہ ہے جس کی تحقیقات ہونا ضروری ہیں۔

تفصیلات کے مطابق لاہور ہائی کورٹ میں پی ٹی آئی کارکن علی بلال عرف ظل شاہ کی ہلاکت پر جوڈیشل کمیشن بنانے کے لیے درخواست دائر کردی گئی۔

درخواست ایڈوکیٹ ندیم سرور نے دائر کی، جس میں پنجاب حکومت، آئی جی اور ڈپٹی کمشنرسمیت دیگر کو فریق بنایا گیا ہے۔

درخواست میں مؤقف اختیار کیا گیا ہے کہ سیاسی ورکر علی بلال عرف ظل شاہ کو قتل کر کے سروس اسپتال چھوڑ دیا گیا، پوسٹ مارٹم رپورٹ میں ظل شاہ پر بدترین تشدد کے نشانات سامنے آئے ہیں۔

درخواست میں کہا گیا ہے کہ ظل شاہ کو آخری بار پولیس قیدیوں کی وین میں دیکھا گیا جبکہ پولیس کے مطابق ظل شاہ کی ہلاکت کالے رنگ کی گاڑی کی ٹکر سے ہوئی۔

درخواست گزار کا کہنا تھا کہ ظل شاہ کی ہلاکت اہم نوعیت کا معاملہ ہے جس کی تحقیقات ہونا ضروری ہیں، آئین کا آرٹیکل 9 عوام کی جانوں کی حفاظت کی گارنٹی دیتا ہے۔

درخواست میں استدعا کی گئی کہ لاہور ہائیکورٹ ظل شاہ کی ہلاکت کی تحقیقات کے لیے کمیشن بنانے کا حکم دے اور عدالت کمیشن کی کارروائی کی خود نگرانی بھی کرے۔

لاہور: گذشتہ روز پی ٹی آئی کی عدلیہ بچاؤ مہم میں پولیس کے مبینہ تشدد سے جاں بحق ہونے والے کارکن علی بلال کی نمازجنازہ ادا کردی گئی ہے۔

تفصیلات کے مطابق پی ٹی آئی کارکن علی بلال عرف ظل شاہ کی نمازہ جنازہ بابا گراؤنڈ میں ادا کی گئی،نماز جنازہ میں اعجاز چوہدری، شفقت محمود، فرخ حبیب، محمود الرشید، اسلم اقبال، حماد اظہر، عمر سرفراز چیمہ، اعظم سواتی سمیت کارکنان کی بڑی تعداد نے شرکت کی۔

اس کے علاوہ وکلا، سول سوسائٹی کے نمائندے اور عوام الناس کی کثیر تعداد نے نمازجنازہ میں شرکت کی، نمازجنازہ کے موقع پر رقت آمیز مناظر دیکھنے کو ملے، ظل شاہ کے اہلخانہ اور قریبی دوست شدت غم سے نڈھال نظر آّئے اور بلک بلک کر ساتھی کی یاد میں روتے رہے۔

نمازجنازہ کے موقع پر چند مشتعل پی ٹی آئی کارکنان نے حکومت کے خلاف سخت نعرے بازی بھی کی، بعد ازاں علی بلال کو مقامی قبرستان میں سپردخاک کردیا گیا۔

یہ بھی پڑھیں: پی ٹی آئی کارکن علی بلال کا پوسٹ مارٹم مکمل، میت گھر پہنچا دی گئی

ملک بھر میں ظل شاہ کی غائبانہ نمازجنازہ کی ادائیگی

پی ٹی آئی قیادت کی جانب سے علی بلال عرف ظل شاہ کی شہادت پر ملک بھر میں غائبانہ نمازجنازہ کی اپیل کی گئی تھی، یہ اپیل چیئرمین عمران خان کی جانب سے کارکنان اور عوام الناس کو دی گئی۔

پارٹی ہدایت پر ملک بھر میں علی بلال کی غائبانہ نمازجنازہ ادا کی گئی، جس میں پی ٹی آئی کارکنان سمیت عوام الناس کی بڑی تعداد نے شرکت کی۔

واضح رہے کہ گذشتہ روز پی ٹی آئی کی ریلی پر پولیس کی شیلنگ اور تشدد سے ایک کارکن جاں بحق ہوگیا تھا۔

رہنما پی ٹی آئی اور سابق ترجمان پنجاب حکومت مسرت جمشید چیمہ نے کارکن کے جاں بحق ہونے کی تصدیق کرتے ہوئے بتایا تھا کہ پولیس گردی سے ایک کارکن علی بلال شہید ہوا ہے۔

انہوں نے بتایا تھا کہ علی بلال کو آنسو گیس کا شیل لگا جبکہ پولیس نے اس پربدترین تشدد بھی کیا۔