لاہور: سیشن عدالت نے سی سی پی او لاہور کو عائشہ احد کو فوری طور پر سکیورٹی فراہم کرنے کا حکم دے دیا۔
تفصیلات کے مطابق لاہور سیشن عدالت میں عائشہ احد کی وزیر قانون پنجاب رانا ثناء اللہ کیخلاف ہراساں کرنے کی درخواست کی سماعت ہوئی۔
درخواست گزار کی جانب سے مؤقف اختیار کیا گیا کہ عدالتی حکم کے باوجود پولیس حکام نے اسے سکیورٹی فراہم نہیں کی، صوبائی وزیر قانون رانا ثناءاللہ خان کی ایما پر اسے ہراساں بھی کیا جا رہا ہے، وردی اور سفید لباس والے افراد گھر باہر نگرانی اور تعاقب کرتے ہیں۔
استدعا ہے کہ صوبائی وزیر قانون کو ہراساں کرنے سے روکا جائے اور سیکیورٹی فراہم کی جائے۔
دلائل کے بعد عدالت نے سی سی پی او لاہور کو عائشہ احد کو فوری طور پر سکیورٹی فراہم کرنے کا حکم دے دیا۔
مزید پڑھیں : مجھے کچھ ہوا توحمزہ شہباز ذمہ دارہوں گے،عائشہ احد
اس سے قبل وزیر اعلیٰ پنجاب کے صاحبزادے حمزہ شہبازشریف کی مبینہ اہلیہ عائشہ احد نے اپنی جان کو خطرات کے پیش نظر ایس پی سیکیورٹی کو درخواست دے دی اور کہا کہ حمزہ شہباز نے میرے پیچھے غنڈے لگا دئیے ہیں، مجھے کچھ ہوا توحمزہ شہباز ذمہ دارہوں گے۔
یاد رہے وزیراعلیٰ پنجاب کے بیٹے اور مسلم لیگ ن کے رہنما ءحمزہ شہباز کی مبینہ بیوی عائشہ احد نے ہتک آمیز بیان دینے پر رانا ثنااللہ کو لیگل نوٹس بھجوادیا تھا، نوٹس میں کہا گیا تھا کہ رانا ثنااللہ نے 6 اگست کو میڈیا پر بیان دیا، جس میں انہوں نے عائشہ احد لیے نازیبا الفاظ استعمال کیے‘ جو کسی بھی عورت کی تذلیل ہے جسے کسی صورت نظر انداز نہیں کیا جا سکتا۔
خیال رہے کہ حمزہ شہباز کی اہلیہ ہونے کی دعوے دار عائشہ احد نے پی ٹی آئی کی رہنماء یاسمین راشد اور فردوس عاشق اعوان کے ہمراہ نیوز کانفرنس کی تھی، جس میں انہوں نے کہا تھا کہ 2010 میں حمزہ شہباز نے مجھ سے شادی کی تھی اور جھوٹ بولا تھا کہ پہلی بیوی کو طلاق دے چکا ہوں لیکن بعد ازاں وہ مجھ سے شادی کرنے ہی سے مُکر گئے۔ اس سے پہلے بھی وہ کئی بار اپنے لیے انصاف کی اپیل کرچکی ہیں۔
