اسلام آباد : تحریک انصاف کی باغی رہنما عائشہ گلالئی کو نا الی کیس میں قومی اسمبلی سیکرٹریٹ کاقانونی امداداوررہنمائی فراہم کرنے کا انکشاف ہوا ہے۔
تفصیلات کے مطابق قومی اسمبلی سیکرٹریٹ کے عائشہ گلالئی کو قانونی امداد اور رہنمائی فراہم کرنے کا انکشاف سامنے آیا، جس مین کہا گیا کہ ایاز صادق کے سیکریٹری نے اسمبلی سیکرٹریٹ کے شعبہ قانون سازی کو ہدایات دیں اور عائشہ گلا لئی کو قانونی معاونت فراہم کرنےکے لیےجوائنٹ سیکریٹری کی ذمے داری لگائی گئی۔
ذرائع کا کہنا ہے کہ نا اہلی کیس کی سماعت پر عائشہ گلالئی کو معاونت اور قانونی امداد فراہم کی گئی جبکہ الیکشن کمیشن میں عائشہ گلالئی کے جمع کرائے گئے جواب کے لیے بھی رہنمائی اسمبلی سیکرٹریٹ نے کی۔
ذرائع کے مطابق تحریک انصاف کی جانب سے جمع کرایا گیا نا اہلی کاریفرنس بھی نظر اندازکیا گیا جبکہ پی ٹی آئی کےپانچ منحرف اراکین قومی اسمبلی سے بھی ا سپیکر آفس نے رعایت کی۔
خیال رہے کہ رواں برس یکم اگست کو عائشہ گلالئی نے پریس کانفرنس کے دوران پاکستان تحریک انصاف چھوڑنے کا اعلان کرتے ہوئے عمران خان پرسنگین الزمات عائد کیے تھے۔
یاد رہے کہ رواں سال 28 اگست کو پاکستان تحریک انصاف نے عائشہ گلالئی کی پارٹی رکنیت منسوخ کردی تھی جبکہ انہیں ڈی سیٹ کرانے کے لیے الیکشن کمیشن سے رجوع کیا تھا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
اسلام آباد : عائشہ گلالئی کو نا اہل کرنے سے متعلق چیئرمین پاکستان تحریک انصاف عمران خان کی درخواست الیکشن کمیشن آف پاکستان نے مسترد کردی۔
تفصیلات کےمطابق الیکشن کمیشن آف پاکستان میں چیف الیکشن کمشنر جسٹس ریٹائرڈ سردار محمد رضا کی سربراہی میں 5 رکنی کمیشن نے عائشہ گلالئی کی نا اہلی کے لیے دائر عمران خان کی درخواست کی سماعت کی۔
الیکشن کمیشن نے پاکستان تحریک انصاف اور عائشہ گلالئی کے وکلا کے دلائل سننے کے بعد رواں ماہ 17 اکتوبر کو فیصلہ محفوظ کیا تھا جو آج سنایا گیا۔
الیکشن کمیشن کے 5 میں سے3 ممبران نے درخواست خارج کرنے کے حق میں فیصلہ سناتے ہوئے رکن قومی اسمبلی عائشہ گلالئی کے خلاف پاکستان تحریک انصاف کے ریفرنس کو مسترد کردیا۔
قبل ازیں الیکشن کمیشن آف پاکستان میں عائشہ گلالئی کے نا اہلی کے لیے دائر درخواست کی سماعت ہوئی اور عمران خان کے وکیل کی جانب سے دلائل دیے گئے تھے۔
خیال رہے کہ رواں برس یکم اگست کو عائشہ گلالئی نے پریس کانفرنس کے دوران پاکستان تحریک انصاف چھوڑنے کا اعلان کرتے ہوئے عمران خان پرسنگین الزمات عائد کیے تھے۔
یاد رہے کہ رواں سال 28 اگست کو پاکستان تحریک انصاف نے عائشہ گلالئی کی پارٹی رکنیت منسوخ کردی تھی جبکہ انہیں ڈی سیٹ کرانے کے لیے الیکشن کمیشن سے رجوع کیا تھا۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
اسلام آباد : تحریک انصاف سے منحرف ہونے والی خاتون رکن قومی اسمبلی عائشہ گلالئی نے کہا ہے کہ میں ایوان میں میرٹ پر ہوں، اپنی نشست سے استعفیٰ نہیں دوں گی، میرےخلاف بات کرنے پر تحریک استحقاق پیش کروں گی۔
ان خیالات کا اظہار انہوں نے قومی اسمبلی میں خطاب کرتے ہوئے کیا، عائشہ گلالئی کا کہنا تھا کہ میری پریس کانفرنس کو غلط سیاسی رنگ دیا گیا، حق کی بات کرتی رہوں گی، ایم این اے ہونے پر فخر ہے۔
ان کا کہنا تھا کہ پی ٹی آئی میں رشتے داری کی بنیاد پرسیٹیں دی گئیں میں میرٹ پر ہوں، جس قوم کیلئے بہنوں کی عزت کی اہمیت نہ ہو اس کو زوال سے نہیں بچایا جاسکتا۔
عائشہ گلالئی کے خطاب کے دوران ایوان مچھلی بازارکا منظر پیش کرنے لگا، پی ٹی آئی رہنما کھڑے ہوگئے، خواتین ارکان ڈیسکیں بجاتی رہیں، اس موقع پر ڈپٹی اسپیکر کی جانب سے بارباراحتجاج کرنے والوں کوخاموش رہنے کی ہدایت کی جاتی رہی لیکن شور شرابا جاری رہا۔
شور شرابے کے باوجود عائشہ گلالئی نے اپنا خطاب جاری رکھا، انہوں نے مزید کہا کہ میرے خلاف بات کرنے پر تحریک استحقاق پیش کروں گی، مجھے اس ایوان میں اجنبی کیوں کہا گیا؟
نوجوانوں کو دنیا کی کسی کتاب میں گالی گلوچ کی تربیت نہیں دی جاتی، پی ٹی آئی میں ہیں تو اچھے ہیں پارٹی چھوڑ دیں تو سوشل میڈیا بریگیڈ حملہ کردیتی ہے، میری بہن پر تنقید کی گئی جس کا سیاست سے کوئی تعلق نہیں ہے۔
ان کا کہنا تھا کہ پاکستان تحریک انصاف سے نکلتے ہی مجھے قتل اور تیزاب پھینکنے کی دھمکیاں دی گئیں، میرے گھر والوں کو انتقامی کارروائیوں کا نشانہ بنایا جارہا ہے لیکن میں کسی دھمکی سے ڈرنے والی نہیں نہ میرا خاندان ڈرتا ہے۔
ان کا کہنا تھا کہ کے پی کے میں گزشتہ چار سال سے احتساب کمیشن کسی سے ایک روپیہ بھی وصول نہیں کرسکا، دوسروں پر تنقید کرنے والے عمران خان خیبرپختونخوا میں بڑی مچھلیوں سے کیوں احتساب شروع نہیں کرتے؟
انہوں نے کہا کہ کوئی مفاد نہ دیکھیں، کردار پرکوئی سمجھوتہ نہیں کیا جاتا، تعلیم یافتہ، مہذب پاکستان چاہتی ہوں، میں وزیراعظم شاہد خاقان عباسی کو مبارکباد نہیں دے سکی، اظہار یکجہتی کرنے والی سیاسی جماعتوں کا شکریہ ادا کرتی ہوں۔
پشاور: پاکستان تحریک انصاف کی سابق رکن عائشہ گلالئی پر کرپشن کے الزامات سامنے آنے کے بعد خیبر پختونخواہ احتساب کمیشن نے نوٹس لیتے ہوئے ان کے خلاف تحقیقات کرنے کا فیصلہ کیا ہے۔
تفصیلات کے مطابق چند روز قبل عائشہ گلالئی نے پاکستان تحریک انصاف چھوڑنے کا اعلان کرتے ہوئےچیئرمین عمران خان پر سنگین الزامات عائد کیے تھے۔
تاہم ذرائع کا کہنا ہے کہ عائشہ گلالئی سے پارٹی کے لیے کی جانے والی فنڈنگ کا حساب مانگا گیا جس پر وہ خفا ہوگئیں اور پارٹی چھوڑنے کا اعلان کردیا۔
ایک روز بعد ہی عائشہ گلالئی کے ذاتی معاون نور زمان نے تہلکہ خیز انکشافات کرتے ہوئے بتایا تھا کہ عائشہ گلالئی نے مختلف ترقیاتی منصوبوں سے تقریباً ایک کروڑ روپے کمیشن لیا جس کے ثبوت موجود ہیں۔
نور زمان نے میڈیا کو ثبوت دکھاتے ہوئے بتایا تھا کہ عائشہ گلالئی نے بنوں لنک روڈ کی تعمیر میں72 لاکھ روپے کمیشن لیا تھا۔
ان کے مطابق گلالئی نے لکی مروت ترقیاتی منصوبے کی رقم سے 12 لاکھ اور کرک سولر ٹیوب ویل کی تنصیب کے پیسوں سے بھی 6 لاکھ لیے تھے۔
نور زمان کا کہنا تھا کہ گلالئی نے یہ تمام رقم بنوں میں اپنے ساڑھے 4 کنال کے گھر کی تعمیر پر لگائے جبکہ کونسلر کو ٹکٹ دلوانے کے لیے بھی انہوں نے 10 لاکھ روپے میں ڈیل کی۔
نور زمان کے ان الزامات کے بعد خیبر پختونخواہ کے احتساب کمیشن نے الزامات کی تحقیقات کا فیصلہ کیا ہے۔
خیبر پختونخواہ کے وزیر اطلاعات شوکت یوسفزئی نے اے آر وائی نیوز سے گفتگو کرتے ہوئے بتایا کہ عائشہ گلالئی کے خلاف باقاعدہ ثبوت اور گواہ موجود ہیں۔ گلالئی کو اپنے اوپر لگائے گئے الزامات کا جواب دینا ہوگا۔
انہوں نے کہا کہ گلالئی نے جو الزمات عمران خان پر لگائے ان کا کوئی ثبوت نہیں۔
شوکت یوسف زئی کا کہنا تھا کہ گلالئی نے شہرت حاصل کرنے کے لیے پارٹی کو بدنام کیا اور جھوٹ بولا۔ انہوں نے الزامات لگانے کی بھاری قیمت وصول کی۔
ان کا کہنا تھا کہ عائشہ گلالئی پیسے لے کر تبادلے کرواتی رہتی تھیں۔ الیکشن میں ٹکٹ ملنے سے انکار پر عائشہ گلالئی نے یہ قدم اٹھایا۔
انہوں نے مطالبہ کیا کہ نیب عائشہ گلالئی کے خلاف الزامات کا نوٹس لیتے ہوئے ان پر کارروائی کرے۔
لاہور: تحریک انصاف کے ترجمان فواد چوہدری نے الزام عائد کیا ہے کہ عائشہ گلالئی نے 5 کروڑ روپے لے کر عمران خان کی کردار کشی کی جس پر انہیں نوٹس جاری کرتے ہوئے معافی کا مطالبہ کیا گیا ہے، انہوں اپنی دھواں دار پریس کانفرنس میں حدیبیہ پیپرز مل کیس کھولنے کا مطالبہ اور وزیراعظم خاقان عباسی پر تنقید کرتے ہوئے انہیں ریلو کٹا قراردے دیا۔
تفصیلات کے مطابق لاہورمیں چیئرمین سیکریٹریٹ میں پی ٹی آئی رہنماؤں نے پریس کانفرنس کی، اس موقع پر فواد چوہدری کے ہمراہ خواتین رہنما زرین ضیا، عالیہ حمزہ، یاسمین راشد بھی موجود تھیں۔
پریس کانفرنس سے خطاب کرتے ہوئے فواد چوہدری کا کہنا تھا کہ عمران خان کیخلاف سو فیصد سازش ہورہی ہے، اس قسم کے مزید کردار بھی سامنےآئیں گے، جس کیلئے پورا اسکرپٹ لکھا گیاہے جس میں نواز لیگ، میرشکیل الرحمان سمیت5لوگ ہیں، جن کیلئے پیسوں کی بوریوں کے منہ کھول دیئےگئے ہیں۔
انہوں نے کہا کہ اگر لیڈر اتنا برا تھا تو عائشہ گلالئی کو اس کی دی گئی نشست سے بھی استعفیٰ دے دینا چاہئیے، انہوں نے الزام عائد کیا کہ عائشہ گلالئی نے عمران خان کی کردار کشی کے لئے 5 کروڑ روپے وصول کئے ہیں۔
فواد چوہدری نے کہا کہ اس سے قبل پارٹی کو خیر باد کہنے والی خواتین رہنماؤں ملائکہ اور نازبلوچ نے واضح طور پر کہا ہے کہ ہمارے اختلافات تنظیمی تھے، ملائکہ اور نازبلوچ نے کہا ہے کہ عمران خان نے ہمیشہ ہماری عزت کی ہے۔ فواد چوہدری کا مزید کہنا تھا کہ جےآئی ٹی تفتیش کی ریکارڈنگ اور والیوم ٹین منظر عام پر لایا جائے۔
لقموں سے اندازہ ہوتا ہے کہ معاملہ کچھ اور ہے، زرین ضیا
دریں اثناء پی ٹی آئی رہنما زرین ضیا نے کہا کہ عائشہ گلالئی کے الزامات کی تردید اور شدید مذمت کرتے ہیں، ان کےالزامات سے ہماری دل آزاری ہوئی ہے، ان کو کہنا چاہتے ہیں کسی اورپارٹی میں جاکر الزامات نہ لگائیں۔
پی ٹی آئی کے تمام ممبرز فیملی کی طرح کام کرتےہیں، عائشہ گلالئی پشاور این اے ون کا ٹکٹ مانگ رہی تھیں، جس پر عمران خان نے ان کو کہا کہ آپ درست کام نہیں کر رہیں۔
انہوں نے کہا کہ عائشہ گلالئی کی پریس کانفرنس میں ان کے والد لقمے دے رہے تھے، ان کو والد کے لقموں کی ضرورت کیوں پڑرہی تھی؟ پریس کانفرنس سے اندازہ لگایا جاسکتا ہے کہ معاملہ ہی کچھ اور ہے۔
انہوں نے وزیر اعلیٰ خیبرپختونخوا پر بھی الزامات لگائے ہیں، پرویزخٹک ہمارے وزیراعلیٰ ہیں ہمیں معلوم ہے کہ وہ کیسےکام کر رہے ہیں۔
عائشہ گلالئی نے پارٹی کی تمام خواتین کی توہین کی، عالیہ حمزہ
پریس کانفرنس سے خطاب کرتے ہوئے پی ٹی آئی کی ممبرکور کمیٹی عالیہ حمزہ نے کہا کہ عمران خان کی گواہی پی ٹی آئی کے علاوہ اور بھی لوگ دے رہے ہیں، چیئرمین میرٹ پرکسی قسم کا سمجھوتہ نہیں کرتے۔
انجینئر اور کور کمیٹی کا حصہ ہوں ہمیں پارٹی میں عزت دی جاتی ہے، عائشہ گلالئی نے پارٹی کی تمام خواتین کی توہین کی ہے۔
عالیہ حمزہ نے کہا کہ گلالئی کہتی ہیں کہ خان صاحب مغربی اقدار لانا چاہتے ہیں، لیکن ہم ان سے پوچھنا چاہتے ہیں کہ عائشہ گلالئی صاحبہ آپ کی اپنی بہن بیرون ملک کیسے کپڑے پہنتی ہے؟
گلالئی کو میسج2013میں ملا تو اس وقت پریس کانفرنس کیوں نہ کی، عائشہ گلالئی نے پارٹی چھوڑنے سے پہلے عمران خان سے ملاقات کی اس ملاقات کی تصاویر منظرعام پر آچکی ہیں، ان تصاویر میں عمران خان کی نظریں دیکھی جاسکتی ہیں، جس میں عمران خان نے ایک مرتبہ بھی ان کو نظر تک اٹھا کرنہیں دیکھا۔
عائشہ گلالئی آپ اس کو دھمکی سمجھتی ہیں تو سمجھیں لیکن آئندہ عمران خان کیخلاف ایسی غلیظ باتیں نہ کرنا،عائشہ گلالئی کو صرف عمران خان کی کردارکشی کے پیسے ملے ہیں، اگر ان کو جہانگیر ترین کےخلاف پیسے ملے تو وہ ان پر بھی الزامات لگادیں گی، ہم خوش نصیب ہیں جوہمیں عمران خان صاحب جیسےلیڈرملےہیں۔
عائشہ گلالئی کےالزامات سے بہت دکھ ہوا ہے، یاسمین راشد
اس موقع پر خطاب کرتے ہوئے پی ٹی آئی رہنما یاسمین راشد کا کہنا تھا کہ میں پی ٹی آئی پنجاب میں پہلی خاتون جنرل سیکریٹری تھی، عائشہ گلالئی کےالزامات سے بہت دکھ اور تکلیف ہوئی ہے۔
ان کو کسی بھی شخص کی کردارکشی نہیں کرنی چاہئیےتھی، عمران خان صاحب جیسا دوسرا لیڈراس وقت پاکستان میں کوئی نہیں، یاسمین راشد نے کہا کہ عائشہ گلالئی کے پاس میسج آیاتھا تو اپنا بلیک بیری پہلے دے دیں۔
لاہور : عمران خان پر لگائے جانے والے سنگین الزامات پرتحریک انصاف نے عائشہ گلالئی کو لیگل نوٹس بھجوادیا، دس دن میں الزامات کے ثبوت فراہم نہ کرنے پر معافی نہ مانگی تو تین کروڑ روپے ہرجانہ ادا کرنا پڑے گا۔
تفصیلات کے مطابق پاکستان تحریک انصاف نے پارٹی سے منحرف ہونے والی عائشہ گلالئی کی جانب سے چیئرمین پی ٹی آئی عمران خان پر لگائے جانے والے سنگین الزامات پر اہم قدم اٹھا لیا ہے۔
اس حوالے سے پی ٹی آئی نے عائشہ گلالئی کو لیگل نوٹس بھجوادیا ہے، مذکورہ لیگل نوٹس ان کے مستقل پتہ اور پارلیمنٹ لاجز پر بھجوایا گیا ہے۔
نوڑس میں کہا گیا ہے کہ عائشہ گلالئی دس دن کے اندر اندر لگائے گئے الزامات کے ثبوت فراہم کریں، ثبوت فراہم نہ کیے گئے تو جھوٹے الزام لگانے پرمعافی مانگیں۔
اسلام آباد : تحریک انصاف سے منحرف ہونے والی خاتون رہنما عائشہ گلالئی نے اپنی نیوز کانفرنس میں عمران خان پر الزامات کی بوچھاڑ تو کی لیکن وہ اس حوالے سے صحافیوں کو کسی قسم کا کوئی ثبوت پیش نہیں کر سکیں۔
دوران خطاب ایک صحافی نے سوال کیا کہ آپ نے ایک چینل سے گفتگو میں کہا تھا کہ آپ پریس کانفرنس میں موبائل میسجز کے ثبوت دیں گی جو آپ نے نہیں دیئے، جس عائشہ گلالئی کا کہنا تھا کہ اگر کسی فورم پر بلایا گیا تو ضرور دکھاؤں گی اگر کسی کو وہ میسجز دیکھنے ہیں تو پی ٹی اے سے رابطہ کر لے۔
صحافی کے اس سوال پر کہ کیا آپ نے ان ٹیکسٹ میسجز کا ذکر دیگر مرد پٹھان رہنماؤں سے کیا یا جن خواتین رہنماؤں کو میسیجز کئے گئے وہ آپ کے ساتھ کیوں نہیں ہیں؟ عائشہ گلالئی نے اس سوال کا جواب گول کردیا اور پریس کانفرنس سے اٹھ کر چلی گئیں۔
چیئرمین پی ٹی آئی عمران خان پر عائشہ گلالئی کے سنگین الزامات پر پی ٹی آئی چھوڑ کر پیپلز پارٹی میں شامل ہونے والی رہنما ناز بلوچ نے اے آر وائی نیوز سے گفتگو کرتے ہوئے کہا کہ میں نے عمران خان کو ہمیشہ خواتین کی عزت کرتے دیکھا ہے۔
اس حوالے سے پی پی رہنما قمر زمان کائرہ نے کہا کہ عائشہ گلالئی کےالزام کی بھرپور مذمت کی جانی چاہئیے۔
اے آر وائی نیوز سے گفتگو کرتے ہوئے فواد چوہدری نے کہا کہ اگر پی ٹی آئی اتنی ہی بری جماعت ہے تو عائشہ گلالئی پہلے قومی اسمبلی کی رکنیت سے استعفیٰ دیں، عائشہ گلالئی نے قطری خط والا کام کیا ہے، ان کو استعمال کیا گیا ہے اور یہ سب ایک بنے بنائے منصوبے کےتحت ہورہا ہے۔
فواد چوہدری کا کہنا تھا کہ عائشہ کے والد نے مین ڈیل کی ہوگی، اسی لئے لقمےدے رہے تھے، مسئلہ تقریرکا نہیں پیسوں کا ہے، عائشہ گلالئی کوقیمت اچھی ملی اس لئےالگ ہوگئیں۔
پی ٹی آئی کی رہنما نادیہ شیرخان نے کہا کہ عائشہ گلالئی کی اس گفتگو پربہت حیران ہوں، اگراعتراضات تھے تو پہلےپارٹی چھوڑتیں، ایک دم کیسےخیال آگیا، عائشہ گلالئی کے پاس کوئی ثبوت ہے توپیش کریں۔
انہوں نے پریس کانفرنس میں فضول باتیں کی ہیں، نادیہ شیرخان نے دعویٰ کیا کہ عائشہ گلالئی کے ن لیگ سے رابطے ہوئے ہیں۔
پشاور: بجلی کی لوڈ شیڈنگ پر پی ٹی آئی کی رکن قومی اسمبلی عائشہ گلالئی نے وفاقی حکومت کے خلاف گدھا گاڑی پر ریلی نکالی۔
اے آر وائی نیوز کے نمائندہ عدنان طارق کے مطابق رکن قومی اسمبلی اور پاکستان تحریک انصاف کی رہنما عائشہ گلالئی نے بجلی کی لوڈ شیڈنگ پر وفاقی حکومت کے خلاف گدھا گاڑی پر احتجاج کیا۔
نکالی گئی احتجاجی ریلی میں وہ گدھا گاڑی پر سوار ہوئیں اور یہ ریلی ڈسکوری چوک سے شروع ہو کر شہر کی مختلف شاہراہوں سے گزرتا ہوا پشاور پریس کلب پر ختم ہوا۔
عائشہ گلالئی کا کہنا تھا کہ وہ کل صبح نو بجے پاکستان تحریک انصاف کی قیادت کے ساتھ بڑا احتجاج کریں گی اور واپڈا ہاؤس کا گھیراؤ کریں گی۔
