کراچی : صدر پاکستان عارف علوی نے کہا ہے کہ کثیرالملکی میری ٹائم مشق”امن 2019“تمام میری ٹائم شراکت داروں کی مشترکہ کاوشوں سے خطے کو مزید پُرامن اور محفوظ بنائے گی“۔
یہ بات انہوں نے میری ٹائم مشق امن کے فلیٹ ریویو کے دوران بحیثیت مہمان خصوصی اظہارِ خیال کرتے ہوئے کہی۔ تفصیلات کے مطابق پاک بحریہ کے زیراہتمام منعقد ہونے والی کثیرالملکی میری ٹائم مشق امن شمالی بحیرہ عرب میں بحری حربی تدبیروں اور انٹرنیشنل فلیٹ ریویو کے ساتھ اختتام پذیر ہو گئی۔
مشق میں46ممالک نے”امن کے لیے متحد“کے عزم کے تحت حصہ لیا۔شمالی بحیرہ عرب میں مشق کے اختتامی سمندری فیز کے دوران منعقدہ انٹرنیشنل فلیٹ ریویو کے مہمانِ خصوصی صدرِ پاکستان ڈاکٹر عارف علوی تھے۔46ممالک کے بحری اثاثوں بشمول جنگی بحری جہازوں، ہیلی کاپٹرز، اسپیشل آپریشنز فورسز اور مندوبین نے مشق میں حصہ لیا۔
پاک بحریہ کے جہاز پی این ایس معاون آمد پر پاک بحریہ کے سربراہ ایڈمرل ظفر محمود عباسی اور پاک بحریہ کے سینئر افسران نے صدر مملکت کا استقبال کیا۔
اس موقع پر وزیر دفاع، وزیر برائے دفاعی پیداوار، وزیراعلیٰ سندھ، چیئرمین جوائنٹ چیفس آف اسٹاف کمیٹی، چیف آف آرمی اور چیف آف ایئر اسٹاف بھی موجود تھے۔
اس کے علاوہ سفیروں، اعلیٰ عسکری حکام، مختلف ممالک کے دفاعی و نیول اتاشیوں اور اعلیٰ حکام بھی انٹرنیشنل فلیٹ ریویو کے موقع پر موجود تھے۔
مہمانِ خصوصی نے مختلف آپریشنل سرگرمیوں کا جائزہ لیا جن میں سطح سمندر سے مقررہ اہداف کو نشانہ بنانے کی فائرنگ اور سمندر میں ایک جہاز سے دوسرے جہاز کو تیل کی فراہمی اورمختلف بحری جنگی تدابیر کا مظاہرہ شامل تھا۔
فلیٹ ریویو کے دوران مشق میں شریک ممالک کے ایئر کرافٹ اور ہیلی کاپٹرز کی جانب سے شاندار فلائی پاسٹ کا مظاہرہ کیا گیا۔
بعدازاں مشق میں حصہ لینے والے جہازوں نے میری ٹائم خطے میں اتحاد اور ہم آہنگی کے اظہار کے لیے روایتی ”امن فارمیشن“ بنائی۔
صدر پاکستان نے اس بڑی مشق کے کامیاب انعقاد پر پاک بحریہ کو مبارک باد پیش کی اور خطے میں قیام امن و استحکام کے ضمن میں پاکستان کے عزم کو سراہا۔
ڈاکٹر عارف علوی نے مشق میں کثیر تعداد میں ہم خیال ممالک کی شرکت کو سراہتے ہوئے کہا کہ یہ مشق میری ٹائم شراکت داروں کی مشترکہ کاوشوں سے خطے کو مزید پُرامن اور محفوظ بنائے گی۔
انہوں نے مختلف النوع میری ٹائم خطرات سے نبرد آزما ہونے اور خطے میں امن و عامہ کو یقینی بنانے کے لیے عسکری تعاون پر زور دیا۔ تقریب میں آرمی چیف جنرل قمر باجوہ سے سری لنکن، زمبابوے بحریہ کےحکام نے خصوصی ملاقاتیں کیں۔
دو مراحل میں منعقد ہونے والی مشق امن کا ہاربر فیز کے دوران عالمی میری ٹائم کانفرنس، سیمینارز، مباحثوں، جہازوں کے باہمی دوروں، ملاقاتوں، انٹرنیشنل بینڈ ڈسپلے، انسدادِ بحری دہشت گردی کی مشقوں، ثقافتی میلے اور فوڈ گالا کا انعقاد کیا گیا۔
سمندری فیز میں ہاربر فیزکے دوران حتمی شکل پانے والی آپریشنل سرگرمیوں اور منصوبوں کو عملی جامہ پہنایا گیا جبکہ انٹرنیشنل فلیٹ ریویوسمندری فیز کا حصہ تھا۔
