کراچی: شہر قائد میں شدید گرمی کے باعث عاشورہ جلوس کے متعدد شرکا کی حالت غیر ہو گئی۔
تفصیلات کے مطابق کراچی شہر میں شدید گرمی اور حبس کی شدت برقرار ہے، ایسے میں عاشورہ جلوس کے متعدد شرکا کی حالت غیر ہو گئی، نمائش پر قائم جناح اسپتال کیمپ میں 200 کیسز رپورٹ ہوئے۔
ایگزیکٹو ڈائریکٹر جناح اسپتال ڈاکٹر شاہد رسول کے مطابق دوپہر 1 بجے تک کیمپ میں دو سو کیسز رپورٹ ہوئے، متاثرہ تمام افراد کو ابتدائی طبی امداد فراہم کر دی گئی۔
واضح رہے کہ چیف میٹرولوجسٹ سردار سرفراز کے مطابق کراچی میں درجہ حرارت آج 40 ڈگری تک پہنچا، اور گرمی کی شدت 52 ڈگری محسوس کی گئی، شہر میں ہوا میں نمی کا تناسب 53 فی صد رہا۔
محکمہ موسمیات کے مطابق شہر قائد میں سمندری ہوائیں معطل ہیں، مرطوب موسم کے باعث گرمی کی شدت زیادہ محسوس کی جا رہی ہے، اور شدید گرم اور مرطوب موسم کے باعث ہیٹ ویو جیسی صورت حال ہے۔ محکمہ موسمیات نے امکان ظاہر کیا ہے کہ آج شام یا رات شہر کے مختلف علاقوں میں بوندا باندی ہو سکتی ہے۔
