Tag: عاقب جاوید

سلیکشن کمیٹی کے موجودہ سربراہ اور سابق کرکٹر عاقب جاوید نے قومی کرکٹ ٹیم کے وائٹ بال کوچ بننےکی پیشکش قبول کرلی ہے۔

اے آر وائی نیوز کے مطابق ذرائع نے اس حوالے سے تفصیلات بتاتے ہوئے کہا گیری کرسٹن کے منظرنامے سے ہٹنے کے بعد عاقب جاوید اپنی سوجھ بوجھ کی وجہ سے وائٹ بال ہیڈ کوچ کے لیے مضبوط ترین امیدوار تھے، عاقب دورہ زمبابوے میں ذمہ داریاں سنبھالیں گے۔

ذرائع نے مزید بتایا کہ پی سی بی قومی ٹیم کے ہیڈ کوچ کا اعلان جلد کرے گا، پاکستان اور زمبابوے کے درمیان سیریز 24 نومبر سےشروع ہوگی۔

اس سے قبل خبریں زیر گردش تھیں کہ پاکستان کرکٹ بورڈ سابق فاسٹ بولر عاقب جاوید کو نئی ذمے داریاں دینے جا رہا ہے اور انھیں وائٹ بال ٹیم کا ہیڈ کوچ بنایا جائے گا۔

ذرائع کا کہنا تھا کہ گیری کرسٹن کے دورہ آسٹریلیا سے قبل اچانک ہیڈ کوچ کے عہدے سے مستعفی ہونے کے بعد پی سی بی اب ملکی کوچ پر انحصار کرنا چاہتا ہے اور اسی لیے قرعہ فال عاقب جاوید کے نام نکلا ہے۔

عاقب جاوید جو سینئر اور جونیئر سطح پر کوچنگ سمیت پی سی ایل میں بھی کوچنگ کا وسیع تجربہ رکھتے ہیں، انھیں پی سی بی نے گزشتہ ماہ انگلینڈ سے پہلے ٹیسٹ میچ میں شرمناک اننگز کی شکست کے بعد سلیکشن کمیٹی میں شامل کیا تھا۔

عاقب جاوید کی نگرانی میں سلیکشن کمیٹی نے آتے ہی بولڈ فیصلے کرتے ہوئے بابر اعظم، شاہین شاہ آفریدی، نسیم شاہ کو آرام دیا اور نئے کھلاڑیوں کو آزمایا جس کا نتیجہ شکستوں کے بھنور میں پھنسی پاکستانی ٹیم کے سیریز جیتنے کی صورت میں نکلا تھا۔

پاکستان اور زمبابوے کے درمیان تین ون ڈے میچز اور اتنے ہی ٹی ٹوئنٹی انٹرنیشنل میچز پر مشتمل سیریز 24 نومبر سے شروع ہو گی۔

پاکستان کے سابق ٹیسٹ کرکٹر عاقب جاوید کا کہنا ہے کہ قومی فاسٹ بولر حارث رؤف کو ٹیسٹ میچ کے بجائے ٹی ٹوئنٹی کے لیے گروم کیا جائے۔

نجی چینل پر اپنے خیالات کا اظہار کرتے ہوئے عاقب نے بتایا کہ حارث رؤف کو ایک ٹیسٹ میچ میں کھلایا گیا تھا جس کے بعد ڈیڑھ دن میں وہ ان فٹ ہو گئے۔ انھوں نے سلیکشن کمیٹی کو تجویز دی کہ حارث کو ٹیسٹ میچ کے بجائے آئندہ ویسٹ انڈیز اور امریکا میں ہونے والے ٹی 20 ورلڈکپ کے لیے تیار کیا جائے۔

سابق رکن پاکستان تیم نے کہا کہ حارث کو نیشنل ٹی ٹوئنٹی کپ کھلایا جائے اور نیوزی لینڈ کے خلاف 5 ٹی ٹوئنٹی میچوں کی سیریز میں موقع دیا جائے، پھر دیکھیں کہ انھیں کیسے ٹی ٹوئنٹی ورلڈکپ میں استعمال کیا جا سکتا ہے۔

عاقب جاوید کا کہنا تھا کہ ٹیسٹ کرکٹر بننا آسان نہیں، سالوں کی پریکٹس درکار ہوتی ہے، آپ کو کبھی ایک دن میں چار اسپیل کرنے پڑ جاتے ہیں۔

انھوں نے کہا کہ جس طرح حارث رؤف کو پیش کیا جا رہا ہے وہ فاسٹ بولر کے ساتھ ناانصافی ہے، اگر حارث آسٹریلیا جاتا اور کھیلتا تو شاید وہ ان فٹ ہو جاتا۔

سابق ٹیسٹ کرکٹر کا کہنا تھا کہ حارث رؤف نے ایک سال سے ٹیسٹ میچ نہیں کھیلا اس پر پریشر ڈالنا مناسب نہیں، قومی پیسر کو خود کو ٹیسٹ کے لیے کلیئر کر دینا چاہیے۔

واضح رہے کہ آئی سی سی ورلڈکپ میں حارث ٹورنامنٹ کے سب سے مہنگے بولر ثابت ہوئے، انھوں نے 9 میچز میں 6.89 کی اوسط سے 527 رنز دیے تھے۔

سابق کرکٹر عاقب جاوید نے کہا ہے کہ انضمام الحق نے استعفیٰ دیا اور فخر کو کھلا لیا گیا، کپتان سے پوچھا جائے کہ فخر کو کیوں ناکالا۔

انھوں نے نجی چینل کے پرگرام میں انکشاف کرتے ہوئے کہا کہ فخر زمان سے اس بات پر لوگ ناراض ہیں کہ تم نے کیوں کہا کہ میں تو ان فٹ نہیں تھا، ایک ہی جگہ سوئی پھنسی ہوئی ہے کہ انضمام استعفیٰ دیتا ہے اور اگلا میچ فخر کھیلتا ہے، کپتان نے فخر کو کھلانا تھا نہ اس نے کیوں نہیں کھلایا؟

سابق ٹیسٹ کرکٹر نے کہا کہ اگر کپتان کو بھی اعتماد نہیں ہے تو وہ باہر بیٹھ جائے۔ آپ نے دیکھنا یہ ہوتا ہے کہ آپ کا جو مقصد تھا سیمی فائنل میں پہنچنے کا پورا ہوگیا ہے، نیوزی لینڈ والے سیدھے جارہے تھے بیچ میں وہ نیچے گرے، انھوں نے بڑی مشکل سے کوالیفائی کیا، آپ کی فیصلہ سازی صحیح ہونی چاہیے۔

انھوں نے کہا کہ آپ نے دیکھنا یہ ہے کہ آپ کے میچ ونر کون سے ہیں آپ نے انھیں سپورٹ کرنا ہے۔ یہ ایک حکمت عملی ہوتی ہے۔ یہ کوچز اور کپتان کا مائینڈ سیٹ ہے کہ اگر آپ کسی پلیئر کو انڈر پریشر رکھیں گے تو وہ زیادہ پرفام کرے گا مگر وہ کبھی نہیں کرے گا۔

عاقب جاوید نے کہا کہ یہ گیم ہے جس مائنڈ سے آسٹریلین کھیل رہے ہیں، جس مائنڈ سے اب بھارتی ٹیم کھیلنا شروع ہوگئی ہے۔ آپ دیکھیں وہ کبھی کوہلی پر پریشر نہیں ڈالیں گیں۔ کبھی روہت شرما کے بارے میں شبہ نہیں ڈالیں گے۔

فخر زمان جیسا پلیئر ہے ہمیں بہت سالوں بعد ایسا جارحانہ پلیئر ملا ہم نے اسے شبہ میں ڈال ڈال کر اس کی یہ حالت کردی ہے کہ اب اس کی جگہ ایسے پلیئر اوپن کررہے ہیں جو دائرے سے بال باہر نہیں نکال سکتے۔

انھوں کا کہ مینجمنٹ کے لیے اپنی سوچ میں واضح ہونا بہت ضروری ہے۔ اگر آپ کو یہ پتا ہے کہ میچ ونرز کون سے ہیں اور ہم نے انھیں بیک کرنا ہے تو کوئی کچھ نہیں بگاڑ سکتا۔

سابق کرکٹر عاقب جاوید ورلڈکپ میں پاکستان کی پرفارمنس سے بالکل بھی خوش نظر نہیں آتے، انھوں نے جنوبی افریقہ کے میچ کے حوالے سے سعود شکیل پر طنز کیا تھا۔

عاقب کی جانب سے لیفٹ آرم مڈل آرڈر بیٹر سعود شکیل پر کیا گیا طنز ان کے گلے پڑ گیا۔ شائقین انھیں تنقید کا نشانہ بنا رہے ہیں۔ کچھ روز پہلے عاقب جاوید نے سعود کے حوالے سے کہا تھا کہ جنوبی افریقہ کے پاور ہٹرز کے سامنے ہم یہ پاور ہٹر لائے ہیں۔

جنوبی افریقہ کے خلاف عمدہ بیٹنگ کرتے ہوئے سعود شکیل نے نصف سنچری اسکور کی تھی۔ وہ بابر کے علاوہ واضح بیٹر تھے جنھوں نے ففٹی بنائی تھی۔

نجی ٹی وی کے اسپورٹس پروگرام میں عاقب جاوید کا طنز سعود کی پرفارمنس کے بعد شائقین کو یاد آگیا اور وہ سابق کرکٹر کے تبصرے پر ناراض نظر آئے۔

شائقین کرکٹ کی جانب سے عاقب جاوید کے بیان پر انھیں سخت تنقید کا نشانہ بنایا جا رہا ہے، لوگوں کا کہنا ہے کہ عاقب جیسے پلیئر کو اپنے جونیئر پر ایسی تنقید نہیں کرنی چاہیے تھی۔