Tag: عالمی ادب

ایک عظیم ادیب کے طور پر خراجِ تحسین پیش کرنے کے لائق، اپنی تخلیقات پر داد اور ستائش کے حق دار تصور کیے جانے والے اور نوبل انعام یافتہ جرمن ادیب گُنٹر گراس کو 2012 میں‌ اپنی ایک نظم کی وجہ سے تضحیک آمیز رویّے اور اپنی تخلیقات پر کڑی تنقید سہنا پڑی تھی۔ اس نظم کا عنوان تھا ’جو کہا جانا چاہیے۔‘

جرمنی کے اس عظیم ادیب اور نوبیل انعام یافتہ مصنف نے دراصل اپنی نظم میں‌ اسرائیل کو ہدفِ تنقید بنایا تھا اور جیسے ہی ان کی یہ تخلیق منظرِ عام پر آئی، گراس کی کردار کُشی کے ساتھ ان کی اس نظم کی ادبی ساخت پر بھی کڑی تنقید شروع ہو گئی۔ انھوں‌ نے سامی دشمنی اور تعصب کے پرچارک کا الزامات کا سامنا کیا، لیکن وہ اس سے قبل جرمنی میں‌ بھی اپنے ایک اعتراف کی وجہ سے جہاں مطعون کیے گئے، وہیں‌ ان کی اخلاقی دیانت کو سراہا بھی گیا اور انھیں‌ بہادر سمجھا گیا۔

یہ 2006 کی بات ہے جس اُن کی آپ بیتی سامنے آئی اور جرمنی میں ان سے متعلق ایک بحث چھڑ گئی۔

’پیلنگ دی اونین‘ نامی کتاب میں اس ادیب نے اعتراف کیا کہ وہ ہٹلر کے دور میں‌ ایک نازی یونٹ میں شامل رہے۔ اس پر ایک حلقے نے انھیں بد دیانت اور ناقابلِ بھروسا کہا۔ ناقدین نے انھیں منافق کہہ کر ان کی اخلاقی حالت اور کردار پر سوال اٹھائے، لیکن انہی میں‌ وہ آوازیں‌ بھی تھیں‌ جنھوں‌ نے اس ادیب کی اخلاقی جرات کو سلام پیش کیا۔

گنٹر گراس کی زندگی اور تخلیقی سفر پر ایک نظر ڈالیں تو کہا جاسکتا ہے کہ انھوں‌ نے بہت لکھا اور خوب لکھا۔ 1961 میں ’کیٹ اینڈ ماؤس‘ اور 1963 میں ’ڈاگز ایئرز‘ کے ساتھ انھوں نے ہٹلر کے زمانے کی وہ روداد تحریر کی جس سے جرمن قوم کا احساسِ جرم جھلکتا ہے۔ ان کی ادبی تخلیقات کو بہت پسند کیا گیا۔

ان کے نازی سپاہی رہنے اور اسرائیل پر ان کی نظم پر شور اور تنقید سے ہٹ کر انھیں آج بھی باکمال تخلیق کار مانا جاتا ہے۔ وہ ایک صرف ادیب ہی نہیں گیت نگار اور مجسمہ ساز بھی تھے۔ گراس وہ ادیب تھے جو اپنی کتب کے سرورق خود بناتے تھے۔

گراس کو ایک بھرپور اور توانا لکھاری کی حیثیت سے ہمیشہ یاد رکھا جائے گا۔

ایک دن ایک عورت بکریوں کی تلاش میں نکلی جو اپنے ریوڑ سے بچھڑ گئی تھیں۔ وہ ان کی کھوج میں کھیتوں میں اِدھر اُدھر پھرتی رہی، لیکن بے سود۔

آخر کار وہ سڑک کے قریب پہنچی۔ یہاں ایک بہرا آدمی اپنے لیے کافی بنارہا تھا۔ عورت کو معلوم نہیں تھا کہ وہ بہرا ہے۔ اس نے اس سے پوچھ لیا، ”تم نے ادھر میری بکریاں دیکھی ہیں؟“

بہرا آدمی سمجھا، وہ پانی کا پوچھ رہی ہے۔ اس نے دریا کی طرف اشارہ کردیا۔ عورت نے اس کا شکریہ ادا کیا اور دریا کی جانب چل پڑی۔

یہ محض اتفاق تھا کہ اسے وہاں بکریاں مل گئیں۔ بس ایک میمنا چٹان سے گر کر اپنی ٹانگیں تڑوا بیٹھا تھا۔ اس نے اسے اٹھا لیا۔ جب وہ بہرے آدمی کے قریب سے گزری تو اس کا شکریہ ادا کرنے کے لیے رک گئی اور اس کی مدد کے عوض اسے میمنا پیش کردیا۔

بہرا آدمی اس کی بات نہ سمجھ سکا۔ جب اس نے میمنا اس کی طرف کیا تو وہ سمجھا عورت اسے میمنے کی بدقسمتی کا ذمے دار قرار دے رہی ہے۔ وہ ناراض ہوگیا۔

”میں اس کا ذمے دار نہیں۔“ اس نے واویلا کیا۔

”لیکن آپ نے مجھے راستہ دکھایا تھا۔“عورت بولی۔

”بکریوں کے ساتھ ہمیشہ ایسا ہی ہوتا ہے۔“ آدمی بولا۔

”لیکن یہ مجھے ادھر ہی ملیں، جہاں آپ نے بتایا تھا۔“

آدمی غصے سے بولا ”چلی جاؤ اور مجھے اکیلا چھوڑ دو۔ یہ میمنا میں نے زندگی میں پہلے کبھی نہیں دیکھا۔“

لوگ اکھٹے ہوگئے اور ان کے دلائل سننے لگے۔ عورت نے انھیں بتایا، ”میں بکریوں کی تلاش میں تھی۔ اس نے مجھے بتایا کہ وہ دریا کے قریب ہیں۔ اب میں اسے یہ میمنا دینا چاہتی ہوں۔“

آدمی غصے سے چیخا۔ ”تم میری توہین نہ کرو۔ میں نے اس کی ٹانگ نہیں توڑی۔“ اور ساتھ عورت کو تھپڑ رسید کردیا۔

”آپ دیکھ رہے ہیں، اس نے مجھے مارا ہے۔ عورت مجمع سے مخاطب ہوئی۔ میں اسے منصف کے پاس لے کر جاؤں گی۔“

اس طرح اپنے بازوؤں میں میمنا اٹھائے عورت، بہرا آدمی اور تماش بین منصف کی طرف چل پڑے۔

منصف ان کی شکایت سننے گھر سے باہر آگیا۔ پہلے عورت نے اپنا مقدمہ پیش کیا۔ پھر آدمی نے اپنی داستان سنائی۔ آخر میں مجمع نے منصف کو صورت حال بتائی۔ منصف اپنا سَر ہلاتا رہا۔

بہرے آدمی کی طرح وہ بھی کچھ نہ سمجھ سکا۔ اس کی نظر بھی کم زور تھی۔ آخر اس نے اپنا ہاتھ کھڑا کیا۔ لوگ چپ ہوگئے۔

اس نے اپنا فیصلہ سنا دیا۔”اس طرح کے گھریلو جھگڑے بادشاہ اور کلیسا کے لیے بے عزتی کا باعث ہیں۔ پھر اس نے اپنا رخ آدمی کی طرف کیا، ”اپنی بیوی سے برا سلوک چھوڑ دو۔“

اب وہ عورت سے مخاطب ہوا۔ ”تم سست ہوگئی ہو۔ اپنے میاں کو وقت پر کھانا دیا کرو۔“

اس نے پیار سے میمنے کی طرف دیکھا۔”خدا اسے لمبی عمر دے اور یہ آپ دونوں کے لیے خوشی کا باعث ہو۔“

مجمع تربتر ہوگیا اور لوگ اپنے اپنے گھروں کو روانہ ہوگئے۔ وہ ایک دوسرے سے کہہ رہے تھے،

”واہ کیا فیصلہ کیا ہے اور یہ فیصلہ حاصل کرنے کے لیے ہمیں کتنا فاصلہ طے کرنا پڑا۔“

( اس کہانی کے مصنف کا نام حماتوما ہے اور اس کے مترجم حمید رازی ہیں)

وکٹر ہیوگو دنیائے ادب کے ان تخلیق کاروں میں سے ایک ہے جن کا نام اور کام صدی سے زائد عرصہ بیت جانے کے باوجود آج بھی زندہ ہے۔

وکٹر ہیوگو کا وطن فرانس ہے۔ اس لکھاری نے ناول نگاری، ڈراما نویسی اور شاعری بھی کی اور ہر صنفِ ادب میں اپنی انفرادیت برقرار رکھی۔

وہ زرخیز ذہن کا مالک تھا اور شاعر و ادیب ہی نہیں صحافی اور سیاست داں بھی تھا۔

اُنیسویں صدی کے اس نام ور لکھاری کی شہرت کا سفر بہ طور شاعر شروع ہوا تھا، اور بعد میں ناول نگار کے طور پر مقبولیت حاصل کی۔

اس فرانسیسی ادیب کا ایک ناول لیس مزرایبل عالمی ادب میں عظیم اور بڑا ناول شمار ہوتا ہے جس پر فلم بھی بنائی گئی۔ اس کے علاوہ دیگر ناولوں کی شہرت اور مقبولیت بھی آج تک برقرار ہے۔

وکٹر ہیوگو نے اس دور میں سماجی حقائق اور رویوں کے ساتھ اور معاشرے کے مخلتف روپ کو اپنی تخلیقات میں‌ پیش کیا اور لوگوں کی توجہ حاصل کی۔

وکٹر ہیوگو کے مشہورِ زمانہ ناول مزرابیل کا انگریزی کے علاوہ 22 مختلف زبانوں میں ترجمہ کیا گیا جس میں اردو بھی شامل ہے۔ اس ناول کے لیے وکٹر ہیوگو نے 1845 میں قلم تھاما تھا اور کہتے ہیں یہ 1861 میں مکمل ہوا۔

وکٹر ہیوگو کا سنِ پیدائش 1802 ہے اور اس کی زندگی کا یہ سفر 1885 تک جاری رہا۔

میں بندرگاہ کے کنارے کھڑا ان سمندری پرندوں کو دیکھ رہا تھا جو بار بار پانی میں غوطہ لگاتے اور بھیگتے ہوئے جسموں سے پانی جھاڑنے کے لیے اپنے پروں کو پھڑپھڑاتے تھے۔

ان کے پروں سے پانی پھولوں پر شبنم کی طرح ٹپک رہا تھا۔ میں محویت سے ان کا یہ کھیل دیکھ رہا تھا۔ سمندر کی سطح پر پھیلے ہوئے تیل نے سطح کو مزید چمک دار اور گہرا بنا دیا تھا۔ اردگرد کوئی جہاز نہیں تھا۔

بندرگاہ پر کھڑی زنگ آلود کرینیں خاموش دکھائی دیتی تھیں۔ ساحلی عمارتوں پر سنسان ہونے کا گمان ہوتا تھا۔ ویرانی کا یہ عالم کہ چوہے بھی اندر داخل ہوتے ہوئے گھبرائیں، لگتا تھا اس ساحل پر غیر ملکی جہازوں کی آمدورفت پر قد غن ہے۔

یکایک ایک پرندہ ڈبکی لگا کر پھڑ پھڑاتا ہوا اڑا اور فضا میں بلند ہوکر دوبارہ سمندر میں غوطہ زن ہوا۔ لمحہ بھر بعد اس نے پھر گردن تک غوطہ لگایا اور پَر پھڑپھڑا کر، اپنا بدن ہولے ہولے تولتے ہوئے پرواز کی تیاری کرنے لگا۔

میں نے محسوس کیا کہ اسے پانی سے چھیڑ چھاڑ میں مزہ آرہا ہے۔ اس وقت اسے خوراک کی طلب ہورہی تھی۔ جب تک سانس اس کا ساتھ دیتا، وہ پانی میں گردن ڈالے رکھتا لیکن اس کی چونچ شکار سے محروم رہتی۔ وہ ہمت نہ ہارتا۔

میں دل میں سوچنے لگا کہ کاش میرے پاس اس وقت ڈبل روٹی کا ٹکرا ہوتا تو میں اسے یوں تھکنے، بھٹکنے اور تڑپنے نہ دیتا لیکن میں بذات خود بھوک سے بے تاب اور اس پرندے کی طرح بے بس تھا۔

میں نے اپنے ہاتھ خالی جیبوں میں ڈال لیے اور اپنی خواہش دل میں دبا لی۔ دفعتاً کسی نے میرے کندھے پر زور سے اپنا ہاتھ رکھا۔ میں نے پلٹ کر دیکھا، وہ ایک پولیس والا تھا۔

مجھے اس کی یہ دخل اندازی بری لگی۔ جی چاہا اس کا ہاتھ جھٹک دوں اور دوبارہ معصوم پرندے کا نظارہ کرنے لگوں۔ اس وقت تک، جب تک اس پرندے کی چونچ میں خوراک کا کوئی ٹکڑا نہ آجائے لیکن اب تو میں خود اس سپاہی کے شکنجے میں شکار کی طرح پھنسا ہوا تھا۔

”کامریڈ“! اس نے میرے کندھے پر دباؤ ڈال کر کہا۔

”جی جناب!“ میں نے عاجزی سے جواب دیا۔

”جناب؟ جناب کوئی لفظ نہیں، یہاں سب لوگ کامریڈ ہیں۔“ اس کی آواز میں واضح طنز تھا۔

”آپ نے مجھے کیوں پکڑ رکھا ہے؟ کیا مجھ سے کوئی جرم سرزد ہوگیا ہے؟“

وہ مسکرایا۔”تم مغموم نظر آتے ہو۔“ اس کی بات سن کر میں کھلکھلا کر ہنسا۔

”اس میں ہنسنے کی کیا بات ہے؟“ اس کا چہرہ لال بھبھوکا ہوگیا۔

میں سوچ رہا تھا کہ شاید وہ اس وقت بیزاریت کا شکار ہے اس لیے غصہ دکھا رہا ہے۔ آج شاید ساحل پر اسے کوئی شکار نہیں ملا۔ نہ کوئی نشے میں دھت مئے نوش اور نہ کوئی جیب تراش۔ لیکن چند لمحوں میں مجھے اندازہ ہوا کہ وہ واقعی غصّے میں ہے۔

اب اس نے دوسرا ہاتھ بھی بڑھایا اور مجھے قابو کرلیا۔ اس وقت میری حالت اس پرندے جیسی تھی جو جال میں پھنس گیا ہو اور نکلنے کے لیے پھڑپھڑا رہا ہو۔ اس کی گرفت میں پھنسے ہوئے سمندر کو اپنی نظروں میں سمویا اور اپنے صیاد کے پہلو میں چلنے لگا۔

پولیس کی گرفت میں آنے کا مطلب یہی ہے کہ اب لمبے عرصے کے لیے تاریکی میں دھکیل دیا جائے۔ جیل کا خیال آتے ہی میں اپنے خیالات کی دنیا سے باہر آگیا اور ہکلاتے ہوئے کہا۔

”کامریڈ، میر اقصور تو بتائیے؟“

”قصور! اس ملک کا قانون یہ ہے کہ ہر شخص ہر وقت خوش نظر آئے۔“

”لیکن میں تو بے حد مسرور ہوں۔“ میں نے پورے جوش و جذبے سے جواب دیا۔
”بالکل غلط ۔“

”لیکن میں تو ملک میں رائج اس قانون سے ناواقف ہوں۔“

”کیوں؟ اس قانون کا اعلان چھتیس گھنٹے پہلے ہوا ہے۔ تم نے کیوں نہیں سنا؟ چوبیس گھنٹے گزر جانے کے بعد ہر اعلان قانون میں بدل جاتا ہے۔“

وہ اب بھی مجھے اپنے ساتھ گھسیٹے جارہا تھا۔ شدید سردی کے سبب میں بری طرح کانپ رہا تھا۔ بھوک نے الگ ستا رکھا تھا۔ میرا لباس جگہ جگہ سے پھٹا ہوا تھا، شیو بڑھی ہوئی تھی، جب کہ اعلان کے مطابق ہر آدمی پر لازم تھا کہ وہ ہشاش بشاش نظر آئے۔

تو یہ تھا میرا جرم……!

تھانے جاتے ہوئے میں نے محسوس کیا کہ ہر راہ گیر نے خوشی کا ماسک منہ پر چڑھا رکھا ہے۔ ہمیں دیکھ کر کئی راہ گیر رک جاتے۔ سپاہی ہررک جانے والے کے کان میں کچھ کہتا تو اس کا چہرہ مسرت سے چمکنے لگتا حالاں کہ مجھے لگ رہا تھا کہ ہر کوئی بولایا بولایا پھر رہا ہے۔

صاف لگ رہا تھا کہ ہر کوئی پولیس والے کی نظروں سے بچنے کی کوشش میں مصروف ہے۔

ایک چوراہے پر ہماری ایک بوڑھے سے مڈبھیڑ ہوگئی۔ وہ حلیے سے کوئی اسکول ماسٹر لگ رہا تھا، ہم اس کے اتنا قریب پہنچ چکے تھے کہ وہ بچ نکلنے سے قاصر تھا۔

قاعدے کے مطابق اس نے بڑے احترام سے سپاہی کو سلام کیا اور میرے منہ پر تین بار تھوک کر کہا۔

”غدار کہیں کا۔“ اس کی اس حرکت سے قانون کے تقاضے تو پورے ہو گئے، مگر مجھے صاف محسوس ہوا کہ اس فرض کی ادائیگی سے اس کا گلا خشک ہوگیا ہے۔

میں نے آستین سے تھوک صاف کرنے کی جسارت کی تو میری کمر پر زور دار مکّا پڑا۔ میں نے اپنی سزا کی طرف قدم بڑھا دیا۔

اسکول ماسٹر تیز قدموں سے چلتا ہوا کہیں غائب ہوگیا۔ آخر ہم تفتیش گاہ پہنچ گئے۔ یکایک بیل بجنے کی آواز آئی جس کا مفہوم یہ تھا کہ سب مزدور اپنے اپنے کام چھوڑ دیں اور نہا دھوکر، صاف لباس پہن کر خوش و خرم نظر آئیں۔

قانون کے مطابق فیکٹری سے باہر نکلنے والا ہر مزدور خوش نظر آرہا تھا لیکن اتنا بھی نہیں کہ اس خوشی سے یہ تاثر ملے کہ وہ کام سے چھٹکارا پاکر بغلیں بجارہا ہے۔

میری خوش بختی کہ بگل دس منٹ پہلے بجا دیا گیا۔ شکر ہے یہ دس منٹ مزدوروں نے ہاتھ منہ دھونے میں صرف کیے ورنہ قاعدے کے مطابق میں جس مزدور کے سامنے سے گزرتا، وہ تین مرتبہ میرے منہ پر تھوکتا۔

مجھے جس عمارت میں لے جایا گیا تھا وہ سرخ پتھروں کی بنی ہوئی تھی۔ دو سپاہی دروازے پر پہرہ دے رہے تھے۔ انہوں نے بھی میری پیٹھ پر اپنی بندوقوں کے بٹ رسید کیے۔

اندر ایک بڑی سی میز تھی جس کے پاس دو کرسیاں پڑی تھیں اور میز پر ٹیلی فون پڑا تھا، مجھے کمرے کے وسط میں کھڑا کردیا گیا۔

میز کے پاس ایک آدمی بیٹھا ہوا تھا اور ایک اور شخص خاموشی سے اندر آیا اور اس کے پہلو میں بیٹھ گیا۔ وہ سادہ لباس پہنے ہوئے تھا، جب کہ دوسرا فوجی وردی میں ملبوس تھا۔ اب مجھ سے تفتیش شروع ہوئی۔

”تم کیا کرتے ہو؟“

”ایک عام کامریڈ ہوں۔“

”تاریخِ پیدائش۔“

یکم جنوری، 1901ء“

”یہاں کیا کررہے ہو؟“

”جی، میں ایک جیل میں قید تھا۔“ میرا جواب سن کر دونوں ایک دوسرے کو گھورنے لگے۔

”کس جیل میں؟“

”جیل نمبر 12، کوٹھری نمبر 13۔ میں نے کل ہی رہائی پائی ہے۔“

”رہائی کا پروانہ کہاں ہے؟“ میں نے رہائی کے کاغذات نکال کر ان کے سامنے رکھ دیے۔

”تمہارا جرم کیا تھا؟“

”جی میں ان دنوں خوش خوش دکھائی دے رہا تھا۔“ وہ دونوں پھر ایک دوسرے کا منہ دیکھنے لگے۔

”کھل کر بات کرو۔“

”اس روز ایک بہت بڑا سرکاری افسر انتقال کر گیا تھا۔ حکومت کی جانب سے اعلان ہوا کہ سب لوگ سوگ میں شامل ہوں گے۔

مجھے اس افسر سے کوئی دل چسپی نہ تھی اس لیے الگ تھلگ رہا۔ ایک پولیس والے نے مجھے یہ کہہ کراندر کروا دیا کہ میں سوگ میں ڈوبے عوام سے الگ تھلگ خوشیاں منا رہا تھا۔“

”تمہیں کتنی سزا ہوئی؟“

”پانچ سال قید…“ جلد ہی میرا فیصلہ سنا دیا گیا۔

اس بار دس سال قید کی سزا ہوئی تھی۔

جی ہاں! خوشی سے کھلا ہوا چہرہ میرے لیے پانچ سال قید کا موجب بنا اور اب میرے مغموم چہرے نے مجھے دس سال کی سزا دلا ئی تھی۔

میں سوچنے لگا کہ جب مجھے رہائی نصیب ہوگی تو شاید میرا کوئی چہرہ ہی نہ ہو۔

نہ خوش و خرّم، نہ مغموم اور اداس چہرہ۔

(یہ کہانی جرمن ادیب ہینرخ بوئل کی تخلیق ہے، اس کا اصل عنوان ” خلافِ ضابطہ” ہے)

یہ ڈنمارک کے اُس لڑکے کی کہانی ہے جسے کم عمری ہی میں کتابوں سے عشق اور مطالعے کا شوق ہو گیا تھا۔

وہ ادیب بننا چاہتا تھا۔ گھر کے معاشی حالات نے اُسے مڈل کے بعد تعلیمی سلسلہ جاری رکھنے کی اجازت نہ دی، لیکن جب بھی کوئی اخبار یا کتاب اس کے ہاتھ لگتی، وہ بہت توجہ اور انہماک سے اسے پڑھتا اور اس سے کچھ سیکھنے اور سمجھنے کی کوشش کرتا۔

اس کے والد جوتیاں گانٹھ کر جو رقم حاصل کر پاتے، اس میں تو کنبے کا پیٹ بھرنا ہی مشکل تھا، دوسرے اخراجات کیسے پورے ہوتے۔ اسی غربت اور تنگ دستی کے دنوں میں ایک روز والد بھی دنیا سے چلے گئے۔ ان کے انتقال کے وقت وہ دس سال کا تھا اور اسے کسبِ معاش کے لیے گھر سے باہر نکلنا پڑا۔

اس یتیم بچے کی ماں چاہتی تھی کہ وہ لوگوں کے کپڑے سینے کا کام سیکھے تاکہ گزر بسر کی کوئی صورت بنے، لیکن ایسا نہ ہو سکا۔

لڑکے نے کوپن ہیگن جانے کا فیصلہ کر لیا تھا اور ایک روز اسی ارادے سے گھر سے نکلا۔ اس کی جیب میں سواری کا کرایا نہ تھا اور وہ سڑک پر پیدل آگے بڑھ رہا تھا۔ ذہن طرح طرح کے خیالات کی آماج گاہ بنا ہوا تھا۔ راستے میں ایک گھوڑا گاڑی والے نے اس پر ترس کھایا اور اپنے ساتھ بٹھا لیا۔ یوں وہ کوپن ہیگن پہنچنے میں کام یاب ہو گیا۔

اس لڑکے کا نام ہانز کرسچین اینڈرسن تھا۔ کوپن ہیگن پہنچ کر اُس نے کسی طرح اپنے دور کے ایک مشہور موسیقار سے ملاقات کا بندوبست کیا اور اس کے سامنے اپنے گھریلو حالات کے علاوہ اپنے ادیب بننے کی خواہش کا اظہار کردیا۔

ہانز کرسچین اینڈرسن نے موسیقار کو بتایا کہ وہ پڑھنے لکھنے کے ساتھ رقص اور موسیقی میں بھی دل چسپی رکھتا ہے اور اب اس سلسلے میں اسے راہ نمائی اور مشاورت چاہیے۔ موسیقار نے اس کی مدد کرنے کا وعدہ کرلیا اور کوپن ہیگن میں اس کا بہت خیال رکھا۔ مقامی شاہی تھیٹر کے ڈائریکٹر سے کہہ کر اس لڑکے کی رہائش کا بندوبست بھی کروایا اور ساتھ ہی کہانیاں لکھنے پر آمادہ کر لیا۔

ہانز کرسچین اینڈرسن نے اپنے محسن کے کہنے پر نہ صرف کہانیاں لکھنے لگا بلکہ جلد ہی ڈراما نویسی بھی شروع کردی اور کچھ ہی عرصے میں اپنے تخلیقی جوہر کو منوا لیا۔

ہانز کرسچین اینڈرسن 1805 میں پیدا ہوا اور ایک ادیب کی حیثیت سے دنیا بھر میں پہچانا جاتا ہے۔ بچوں اور بڑوں کے لیے اس کی تخلیقات کا کئی زبانوں میں ترجمہ کیا گیا۔ اس لکھاری کی مقبول ترین کہانیوں میں اسنوکوئن، اگلی ڈکلنگ، ماچس فروش اور لٹل مرمیڈ یعنی ننھی جل پری آج بھی پڑھی جاتی ہیں۔

1835 میں ہانز کرسچین اینڈرسن کا پہلا ناول شایع ہوا جسے بہت پسند کیا گیا۔ اس ناول کا جرمن زبان اور چند سال بعد انگریزی میں بھی ترجمہ شایع ہوا اور یوں اس کی شہرت دور دور تک پھیل گئی۔

اینڈرسن نے پہلا ڈراما لکھا جو شاہی تھیٹر میں پیش کیا گیا تھا اور یوں ہر طرف گویا اس کی دھوم مچ گئی۔ اسی ڈرامے کی وجہ سے اسے شاہِ ڈنمارک کی جانب سے سالانہ وظیفہ ملنے لگا تھا۔

اس نے بچوں کے لیے پریوں اور اس جیسے دوسرے دل چسپ کرداروں پر مبنی کہانیاں لکھنے کا سلسلہ جاری رکھا جو کتابی صورت میں شایع ہوئیں اور انھیں بے حد پسند کیا گیا۔ یہ کہانیاں اتنی مقبول ہوئیں کہ صرف تین سال کے دوران متعدد زبانوں میں ان کا ترجمہ ہوا۔ ڈنمارک کے نام ور ادیبوں نے ان کہانیوں کو شاہ کار قرار دیا۔

1875 میں اس عظیم لکھاری نے دنیا سے ہمیشہ کے لیے ناتا توڑ لیا۔ اوڈنسے میں اینڈرسن کی یاد میں ایک عجائب گھر بنایا گیا ہے جہاں اس کی تحریریں، اس کے زیرِ استعمال مختلف اشیا جیسے رائٹنگ ٹیبل اور کرسی وغیرہ بھی رکھی گئی ہے۔ اسی عجائب گھر کے باہر اینڈرسن کا ایک بڑا مجسمہ بھی نصب ہے۔

اس ادیب کی عظمت اور مقبولیت کا عالم یہ ہے کہ چین کے شہر شنگھائی میں صرف اینڈرسن کی زندگی اور تخلیقات کا احاطہ اور نمائش کے لیے ایک تھیم پارک بنایا گیا ہے۔ اینڈرسن کی مشہور کہانیوں پر متعدد فلمیں بن چکی ہیں۔