اسلام آباد: وزیرخارجہ شاہ محمود قریشی کا کہنا ہے کہ مقبوضہ کشمیرمیں دنیا کو اپنی خاموشی توڑنی ہوگی، مقبوضہ کشمیرمیں بات اب مشاہدے سے آگے جا چکی ہے۔
تفصیلات کے مطابق وزیرخارجہ شاہ محمود قریشی نے کہا کہ کشمیرمیں مسئلہ زندگیوں اورانسانی حقوق کی خلاف ورزی کا ہے، خواتین کواغوا کر کےعصمت دری کی جا رہی ہے۔
انہوں نے کہا کہ بچوں کوزبردستی اسکول بھیجنے پرمجبورکیا جا رہا ہے، والدین خوف کا شکارہیں ،انہیں نہیں معلوم بچے واپس لوٹیں گے یا نہیں۔
شاہ محمود قریشی نے کہا کہ مقبوضہ کشمیرمیں نسل کشی شرو ع کی جا رہی ہے، دنیا تسلیم کر رہی ہے، مقبوضہ کشمیرمیں دنیا کو اپنی خاموشی توڑنی ہوگی، مقبوضہ کشمیرمیں بات اب مشاہدے سے آگے جا چکی ہے۔
وزیرخارجہ نے کہا کہ کل بھی اقوام متحدہ سے خط میں انکوائری کا مطالبہ کیا ہے، مقبوضہ کشمیرمیں کرفیو ہٹے گی تو اصل صورت حال سامنے آئے گی۔
انہوں نے کہا کہ ہمارے پاس جو ممکنہ راستے ہیں وہ اختیارکر رہے ہیں، اقوام متحدہ میں مستقل مندوب کو رابطوں کی ہدایت کر رکھی ہے، ہم خدشے سے دنیا کوآگاہ کر رہے ہیں، بیانات نہیں کردار ادا کریں۔
مقبوضہ کشمیر میں کرفیو کا مسلسل 18واں روز
واضح رہے کہ مقبوضہ کشمیر میں آج مسلسل 18ویں روز بھی کرفیو برقرار ہے اور مواصلات کا نظام مکمل پر معطل ہے، قابض انتظامیہ نے ٹیلی فون سروس بند کررکھی ہے جبکہ ذرائع ابلاغ پرسخت پابندیاں عائد ہیں۔
