Tag: عالمی بینک

اسلام آباد: عالمی بینک کی جانب سے پاکستان کو 4 کروڑ 79 لاکھ ڈالر کی گرانٹ دینے کا اعلان کردیا، یہ گرانٹ پاکستان میں تعلیمی شعبے کیلئےاستعمال ہوگی۔

تفصیلات کے مطابق عالمی بینک نے پاکستان کے تعلیمی شعبے کے لیے 4 کروڑ 79 لاکھ ڈالر کی گرانٹ فراہم کرنے کا اعلان کیا ہے۔

وزارت تعلیم کی جانب سے کہا گیا کہ یہ گرانٹ خصوصی طور پر پنجاب میں تعلیمی منصوبوں پر خرچ کی جائے گی تاکہ اسکولوں سے باہر بچوں کو تعلیم کی طرف راغب کیا جا سکے۔

اعلامیہ میں کہا گیا ہے کہ اس گرانٹ کے ذریعے 40 لاکھ بچوں کو براہ راست فائدہ پہنچے گا جبکہ 80 ہزار بچوں کو اسکولوں میں داخلے میں مدد ملے گی۔ مزید برآں 30 لاکھ بچوں کو معیاری تعلیمی سہولتوں تک رسائی حاصل ہو سکے گی۔

منصوبے کے تحت ایک لاکھ اساتذہ اور والدین پر مبنی کمیونٹی لیڈرز تیار کیے جائیں گے جو تعلیمی عمل میں رہنمائی فراہم کریں گے۔

اس کے علاوہ گرانٹ سے اسکولوں میں موسمیاتی تبدیلیوں سے متعلق آگاہی پیدا کرنے کے اقدامات بھی کیے جائیں گے۔

اعلامیہ کے مطابق یہ اقدام پاکستان میں بچوں کے تعلیمی مواقع بڑھانے اور تعلیم کے فروغ کے لیے ایک اہم سنگ میل ثابت ہوگا۔

سینیٹ کی قائمہ کمیٹی برائے اقتصادی امور کے چیئرمین سیف اللہ ابڑو نے عالمی بینک اور اے ڈی بی کے بڑے منصوبوں کو کرپشن کی جڑ قرار دیا ہے۔

اے آر وائی نیوز کےمطابق سینیٹ کی قائمہ کمیٹی برائے اقتصادی امور کا اجلاس ہوا جس میں چیئرمین کمیٹی سینیٹر سیف اللہ ابڑو نے خیبر پاس اکنامک کوریڈور تعمیر منصوبے میں تاخیر پر برہمی کا اظہار کرتے ہوئے عالمی بینک اور اے ڈی بی کے بڑے منصوبوں کو کرپشن کی جڑ قرار دے دیا۔

چیئرمین سیف اللہ ابڑو کی زیر صدارت سینیٹ کی قائمہ کمیٹی برائے اقتصادی امور کے اجلاس میں این ایچ اے حکام اور کمیٹی ارکان نے شرکت کی۔

اجلاس میں این ایچ اے حکام نے بتایا کہ عالمی بینک کی امداد سے خیبر پاس اکنامک کوریڈور تعمیر کیا جائیگا۔ منصوبے کیلیے قرض معاہدے پر دسمبر 2019 میں دستخط کیے گئے تھے۔ اس منصوبے کے لیے عالمی بینک 46 کروڑ ڈالر فراہم کرے گا۔

چیئرمین کمیٹی نے استفسار کیا کہ منصوبے میں اتنی تاخیر کی کیا وجوہات ہیں۔ جس پر این ایچ اے حکام کا کہنا تھا کہ منصوبے کی ضروریات پوری کرنے میں تاخیر ہو جاتی ہے۔ حکام اقتصادی امور ڈویژن نے کہا کہ عالمی بینک خود سے شرائط عائد نہیں کر سکتا۔

این ایچ اے حکام نے بتایا کہ اس منصوبے کی بولی کھولنے میں 4 سال لگ گئے۔ بولی کی رقم قرض سے دگنی ہے۔ پاکستان نے عالمی بینک سے نیا معاہدہ کیا ہے۔ اس نئے 10 سالہ پروگرام کے تحت سماجی شعبے کیلیے امداد ملے گی۔

اس موقع پر اقتصادی امور ڈویژن نے خدشہ ظاہر کیا کہ این ایچ اے نے مسئلے کا فوری حل نہ نکالا تو نرم شرائط والے قرض منسوخ ہو سکتے ہیں۔ اب یہ عالمی بینک کی ترجیحات میں نہیں، اس لیے قرض نہیں بڑھایا جائے گا۔

سینیٹر کامران مرتضیٰ نے کہا کہ اتنے سستے قرض کو بھی کس طرح ضائع کیا گیا۔
چیئرمین کمیٹی سینیٹر سیف اللہ ابڑو نے کہا کہ اگر چیک اینڈ بیلنس نہیں ہوگا تو اسی طرح ہوگا۔ عالمی بینک اور اے ڈی بی کے بڑے منصوبے اصل میں کرپشن کی جڑ ہیں۔ ایسے شاہانہ اقدامات کا تدارک کیا جانا ضروری ہے۔

سینیٹر کامل علی آغا نے کہا کہ یہ وجہ ہے کہ ہمارے قرض بڑھتے رہتے ہیں۔ جب پاکستان نرم شرائط والے قرض استعمال ہی نہیں کر سکتا، تو مزید قرض کیوں ملےگا۔ حکومت کو سفارش کریں کہ معاملے کی انکوائری اور ذمہ داروں کاتعین کیا جائے۔

اسلام آباد : عالمی بینک کے ایگزیکٹو ڈائریکٹرز کا ایک اعلی سطح کا وفد پاکستان پہنچ گیا، دورے کا مقصد پاکستان میں اقتصادی ترقی کے منصوبوں اور سرمایہ کاری کے مواقع پر بات چیت کرنا ہے۔

تفصیلات کے مطابق عالمی بینک کا ایک اعلی سطح کا وفد پاکستان پہنچ گیا، عالمی بینک گروپ کا وفد ایگزیکٹو ڈائریکٹرز پر مشتمل ہے۔

ذرائع نے بتایا کہ دورے کا مقصد پاکستان میں اقتصادی ترقی کے منصوبوں، سرمایہ کاری کے مواقع پر بات چیت کرنا ہے۔

حال ہی میں منظور کردہ کنٹری پارٹنرشپ فریم ورک پر عمل درآمد کیلئے حکمت عملی پر بات چیت ہوگی۔

پاکستان اور ورلڈ بینک نے اگلے دس سال کیلئے 20 ارب ڈالر کے کنٹری پارٹنر فریم ورک معاہدے پر دستخط کیئے تھے اور مستقبل میں یہ فنڈز بڑھ کر 40 ارب ڈالر تک پہنچ جائیں گے۔

ورلڈ بینک کے ایگزیکٹو ڈائریکٹرز کا 20سال بعد پہلا دورہ پاکستان ہے ، ایگزیکٹو ڈائریکٹرز کا وفد وزیر اعظم وزیر خزانہ، وزیر اقتصادی امور سے ملاقات کرے گا جبکہ وفاقی وزیر منصوبہ بندی اور وزیر توانائی سے بھی ملاقات شیڈول ہیں۔

حکام نے بتایا ہے کہ ورلڈ بینک کا اعلیٰ سطح وفد خیبرپختونخوا، سندھ، پنجاب اور بلوچستان کا دورہ بھی کرے گا۔

عالمی بینک نے رواں عالمی اقتصادی امکانات رپورٹ 2025 جاری کر دی ہے جس میں پاکستان سمیت دیگر ممالک کی اقتصادی اور معاشی حالات سے متعلق پیشگوئی کی گئی ہے۔

عالمی بینک کا اپنی رپورٹ میں کہنا ہے کہ پاکستان میں عام انتخابات کے بعد سیاسی عدم استحکام میں کمی ہوئی ہے۔ زرعی اور صنعتی شعبہ کی کارکردگی میں بہتری آ رہی ہے جب کہ مستحکم کرنسی اور مہنگائی کنٹرول کرنے سے میکرو اکنامک استحکام نظر آیا ہے۔ تین سال بعد مہنگائی سنگل ڈیجیٹ میں آئی ہے اور مہنگائی میں کمی کے بعد مرکزی بینک نے بھی پالیسی ریٹ میں کمی کی ہے۔

رپورٹ میں بتایا گیا ہے کہ عدم استحکام کی فضا میں کمی سے کاروبار اور سرمایہ میں اضافے کی توقع ہے۔ تاہم پاکستان میں تاحال سخت مالی نظم و نسق کی پالیسی اختیار کی جا سکتی ہے۔

رپورٹ میں اس جانب بھی اشارہ کیا گیا ہے کہ بے روزگاری کے باعث نوجوانوں کی بڑی تعداد روزگار کیلیے بیرون ملک کا رخ کر رہی ہے۔

عالمی بینک نے اپنی رپورٹ میں کہا ہے کہ پاکستان کو آئی ایم ایف قرض پروگرام پر مکمل کاربند رہنا ہو گا کیونکہ پروگرام پر سختی سے عملدرآمد نہ ہونے کی صورت میں معاشی سرگرمیوں پر اثر پڑے گا۔

ورلڈ بینک نے رواں مالی سال کے دوران پاکستان کی جی ڈی پی گروتھ 2.8 فیصد رہنے کی پیشگوئی کی ہے جب کہ اس سے قبل آئی ایم ایف پاکستان کی جی ڈی پی کی شرح تین فیصد رہنے کی پیشگوئی کر چکا ہے۔

عالمی بینک کی رپورٹ کے مطابق اگلے مالی سال پاکستان 3.2 فیصد کی شرح سے ترقی کرے گا اور پاکستان میں خطے کے مقابلے میں سب سے کم شرح نمو رہنے کی پیش گوئی ہے۔ بھارت میں 6.7 فیصد ، بھوٹان7.2 فیصد ، مالدیپ میں 4.7 فیصد ، نیپال 5.1 فیصد ، بنگلہ دیش 4.1 فیصد ، سری لنکا میں 3.5 فیصد گروتھ متوقع ہے۔

رپورٹ میں یہ بھی کہا گیا ہے کہ پاکستان میں سال 2026 تک فی کس آمدن کمزور رہنے کا خدشہ ہے۔

اسلام آباد : وزیراعظم شہباز شریف نے عالمی بینک کی طرف سے 20 ارب ڈالر دینے کے وعدے کا خیرمقدم کرتے ہوئے معاشی بنیادیں مضبوط کرنے کیلئے آرمی چیف اور رفقا کی کاوشوں کی تعریف کی۔

تفصیلات کے مطابق وزیراعظم شہباز شریف نے عالمی بینک کی طرف سے 20 ارب ڈالر کی یقین دہانی کا خیرمقدم کرتے ہوئے کہا کہ عالمی بینک اور پاکستان کا 10سالہ شراکت داری فریم ورک اہمیت کاحامل ہے۔

وزیراعظم نے بتایا کہ شراکت داری فریم ورک کے تحت 6شعبوں پرتوجہ مرکوز ہے، ان شعبوں میں معیاری تعلیم،بچوں کی غذائیت اور موسمیاتی تبدیلی شامل ہیں تاہم کلین انرجی،جامع ترقی اور نجی سرمایہ کاری کے فروغ پر بھی توجہ مرکوز کی جائے گی۔

ان کا کہنا تھا کہ ہم نے ہوم گراؤن ٹرانسمیشن پلان انہی ترجیحات کی بنیاد پر تشکیل دیا ہے، معیشت کی بنیادیں مضبوط کرنے کیلئے آرمی چیف اور رفقا کی کاوشیں قابل ستائش ہیں۔

مزید پڑھیں : عالمی بینک کا پاکستان کو 20 ارب ڈالرز دینے کا وعدہ

وزیراعظم نے مزید کہا کہ شراکت داری فریم ورک پاکستان کی اقتصادی کاوشوں پرعالمی بینک کے اعتماد کامظہرہے، عوام کیلئے پائیدار مواقع پیدا کرنے کی کوششوں ہو ہم آہنگ کرتے ہوئے شراکت داری کو مضبوط بنانے کے خواہاں ہیں۔

یاد رہے گذشتہ روز عالمی بینک نے پاکستان کیلئے 20 ارب ڈالرز دینے کا وعدہ کیا تھا، ذرائع نے انکشاف کیا تھا کہ 10 سالہ کنٹری پارٹنر شپ فریم ورک کے تحت ورلڈ بینک کی جانب سے 20 ارب ڈالرز دینے کا وعدہ کیا گیا ہے، فریم ورک کی منظوری کیلئے 24 میں سے 19 ڈائریکٹرز نے پاکستان کے حق میں ووٹ دیا۔

ذرائع نے بتایا تھا کہ عالمی بینک 20 ارب ڈالرز کا تقریباً 3 چوتھائی حصہ آئی ڈی اے کے ذریعے فراہم کرے گا، بقیہ رقم انٹرنیشنل بینک فار ری کنسٹرکشن اینڈ ڈویلپمنٹ کے تحت فراہم کی جائے گی۔

توسیعی فریم ورک 6 کلیدی ترقیاتی شعبوں پر توجہ مرکوز کرےگا، انٹرنیشنل فنانس کارپوریشن کی طرف سے اضافی فنڈنگ سے سی پی ایف کی تکمیل ہوگی۔