ARYNews.tv | Urdu – Har Lamha Bakhabar

Tag: عالمی ریکارڈ

  • پاکستانی اسکواش پلیئر نے 2 ورلڈ ریکارڈ قائم کردیئے

    پاکستانی اسکواش پلیئر نے 2 ورلڈ ریکارڈ قائم کردیئے

    پاکستانی اسکواش پلیئر زاہب کمال خان نے 6 فٹ 3 انچ لمبے بال عطیہ کرکے عالمی ریکارڈ قائم کردیا۔

    تفصیلات کے مطابق اسکواش کے مقابلوں میں پاکستان کا نام روشن کرنے والی خاتون کھلاڑی زاہب کمال خان نے دو ورلڈ ریکارڈ قائم کرلیے۔

    زاہب کمال خان نے پہلا ریکارڈ اپنے بالوں میں 1100 کلپ لگاکر عالمی ریکارڈ اپنے نام کیا اور ریکارڈ اپنے 6 فٹ 3 انچ لمبے بال عطیہ کرنے کا ریکارڈ قائم کیا۔

    رپورٹ کے مطابق ان دنوں امریکا میں مقیم پاکستانی اسکواش پلیئر کے بالوں میں زیادہ کلپ لگانے والے ریکارڈ کو گنیز بک آف ورلڈ ریکارڈ نے فوری تسلیم کرلیا۔

    واضح رہے کہ 30 سالہ اسکواش پلیئر زاہب کمال خان نے عالمی ریکارڈ قائم کرنے کی غرض سے 13 برس کی عمر سے اپنے بال نہیں کٹوائے تھے، اب انہوں نے 17 سال بعد پہلی مرتبہ اپنے بال کٹوائے ہیں تاکہ بال عطیہ کرسکیں۔

    زاہب کمال کو انفرادی اعتبار سے سب سے زیادہ بال عطیہ کرنے کا اعزاز بھی حاصل ہوگیا ہے۔

    میڈیا رپورٹس کے مطابق ان کے بال بالوں سے محروم بچوں کی وگ بنانے کےلیے استعمال کیے جائیں گے۔

    اس موقع پر انہوں نے کہا تھا کہ ’میں تھوڑی گھبرا رہی ہوں لیکن اپنے چھوٹے بالوں کو دیکھنے کےلیے پُرجوش بھی ہوں‘۔

  • 17 سالہ لڑکا دو دن تک جھولا جھولتا رہا

    17 سالہ لڑکا دو دن تک جھولا جھولتا رہا

    نیوزی لینڈ میں ایک 17 سالہ نوجوان نے مسلسل 36 گھنٹے تک جھولا جھولنے کا نیا ریکارڈ قائم کردیا۔

    17 سالہ پیٹرک کوپر نے، جو نیوزی لینڈ کا رہائشی ہے ہفتے کی صبح 10 بج کر 23 منٹ پر جھولا جھولنا شروع کیا اور اتوار کی رات 10 بج کر 23 منٹ پر اس کا اختتام کیا۔

    نوجوان کا کہنا ہے کہ وہ صبح 9 بجے اس کا آغاز کرنا چاہتا تھا لیکن وہ وقت پر نہیں اٹھ سکا۔

    اس نے اپنی ویڈیو گنیز بک آف ورلڈ ریکارڈز کی انتظامیہ کو جمع کروا دی ہے اور وہ جلد ہی اس کا نام بک میں درج کیے جانے سے متعلق اسے آگاہ کریں گے۔

    فی الحال یہ ریکارڈ نیوزی لینڈ کے ہی ایک شہری کے پاس ہے جس نے 32 گھنٹوں تک جھولا جھول کر گنیز بک آف ورلڈ ریکارڈ میں اپنا نام درج کروایا۔

    پیٹرک نے اس کام کے ذریعے 16 سو ڈالرز بھی جمع کرلیے ہیں جو وہ ایک اسپتال کو عطیہ کرے گا۔

  • دنیا کا سب سے بڑا مارکر پین کس طرح تیار کیا گیا! ویڈیو دیکھیں

    دنیا کا سب سے بڑا مارکر پین کس طرح تیار کیا گیا! ویڈیو دیکھیں

    کیرلہ: بھارتی مسلمان نے دنیا کا سب سے بڑا مارکر پین بنا کر عالمی ریکارڈ قائم کر لیا۔

    تفصیلات کے مطابق گنیز ورلڈ ریکارڈز کے آفیشل فیس بک پیج پر ایک ایسے بھارتی مسلمان کے کارنامے کی ویڈیو پیش کی گئی ہے، جسے دیکھ کر لوگ حیران رہ گئے۔

    بھارتی ریاست کیرلہ سے تعلق رکھنے والے مسلمان شہری محمد دلیف نے دنیا کا سب سے بڑا مارکر قلم تیار کر کے گنیز بک آف ورلڈ ریکارڈ میں جگہ بنا لی، اس قلم کی لمبائی 2 میٹر سے زیادہ ہے۔

    گنیز آفیشل پیج پر قلم کی تیاری کی ویڈیو بھی شیئر کی گئی ہے، تین منٹ طویل اس ویڈیو میں مارکر کی تیاری کے تمام مراحل دکھائے گئے ہیں، جو بے حد دل چسپ ہیں۔

    ویڈیو کے آخر میں محمد دلیف کئی دیگر افراد کی مدد سے یہ مارکر اٹھاتے ہیں اور ایک وائٹ بورڈ پر اس سے لکھنے کا مظاہرہ بھی کرتے ہیں۔

    مارکر پین کی پیمائش 2.745m x 0.315 میٹر ہے، محمد دلیف نے یہ عالمی ریکارڈ ستمبر میں قائم کیا تھا، تاہم گنیز آفیشلز نے ابھی اس کی ویڈیو سوشل میڈیا پر شیئر کی ہے۔

    واضح رہے کہ عالمی ریکارڈ بنانے یا پہلے سے موجود ریکارڈ کو توڑنے کے لیے غیر معمولی کارکردگی دکھانی پڑتی ہے، جسے دیکھ کر لوگ حیران رہ جائیں، یہی وجہ ہے کہ اب لوگ بھارتی مسلمان کے اس ریکارڈ کی طرف بھی دیکھنا شروع کریں گے۔

  • لمبے بالوں والی لڑکی نے اپنا ہی عالمی ریکارڈ توڑ دیا

    لمبے بالوں والی لڑکی نے اپنا ہی عالمی ریکارڈ توڑ دیا

    موداسہ: دنیا کی سب سے لمبے بالوں والی لڑکی نیلانشی پٹیل نے اپنا ہی عالمی ریکارڈ توڑ دیا۔

    تفصیلات کے مطابق بھارتی ریاست گجرات کے علاقے موداسہ سے تعلق رکھنے والی نیلانشی نامی لڑکی نے اس سے قبل 2018 میں گینزبک آف ورلڈ ریکارڈ میں اپنا نام درج کرایا تھا اور آج ایک بار پھر نیا ریکارڈ قائم کرکے اپنا ہی چیلنج پورا کرلیا۔

    غیرملکی خبررساں ادارے کے مطابق 17 سالہ لڑکی نے 6 فٹ 2 انچ لمبے بال کرکے گینزبک آف ورلڈ ریکارڈ میں اپنا نام درج کرایا، اس سے قبل دسمبر 2018 میں نیلانشی پٹیل کا اپنا ریکارڈ 5 فٹ 6 انچ کا تھا۔

    اپنا ہی ورلڈ ریکارڈ توڑنے والی لڑکی کا کہنا ہے کہ انہیں ان کے دوست بالوں کی ملکہ کے نام سے پکارتے ہیں، گزشتہ 11 سالوں کے دوران وہ کبھی ہیئرسلون نہیں گئیں نہ ہی بالوں پر کسی قسم کی کوئی ٹریٹمنٹ کرائی۔

    انہوں نے کہا کہ لمبے ہونے کی وجہ سے میرے بال زمین کو چھوتے ہیں جس کے باعث انہیں اونچی ہیل پہننا پڑتی ہے۔ عالمی ریکارڈ قائم کرنے اور پھر اپنا ریکارڈ توڑنے میں میرے گھر والوں نے بھی مدد کی۔ خصوصاً ماں نے بہت ساتھ دیا۔

    نیلانشی کا کہنا ہے کہ جب بھی بال بنانے یا سنوارنے ہوں میری والدہ مدد کرتی ہیں۔ ہفتے میں ایک بار بالوں کو دھونا اور ایک سے دو بار تیل لگانا معمول ہے۔ بالوں کو سکھانے کے لیے سورج کی روشنی بہت مفید ہوتی ہے۔

  • ترک خاتون غوطہ خور نے عالمی ریکارڈ بنا کر سب کو حیران کر دیا

    ترک خاتون غوطہ خور نے عالمی ریکارڈ بنا کر سب کو حیران کر دیا

    انقرہ: ترکی کی 34 سالہ قومی ایتھلیٹ ساہیکا ارکیومین نے زیرآب غار میں ایک سانس میں 100 میٹر کا فاصلہ طے کرکے عالمی ریکارڈ اپنے نام کرلیا۔

    تفصیلات کے مطابق نہ آکسیجن سلینڈر نہ پیروں میں تیراکی کے مخصوص جوتے، ترکی کی خاتون غوطہ خور ساہیکا ارکیومن نے زیر آب غار میں ایک ہی سانس میں سو میٹر کا فاصلہ طے کر کے نیا عالمی ریکارڈ بنا لیا۔

    ترکی کی 34 سالہ قومی ایتھلیٹ ساہیکا ارکیومین نے زیر آب غار میں جہاں پانی کا درجہ حرارت 1 ڈگری سینٹی گریڈ تھا اپنی سانس روک کر 1 منٹ میں 100 میٹر تیر کر سب کو حیران کردیا۔

    خیال رہے کہ یہ غار 1999 میں ایک چرواہے نے دریافت کی تھی اور یہ برفانی دور کی ہے۔

    عالمی ریکارڈ بنانے کے بعد ساہیکا ارکیومین کا کہنا تھا کہ زیر آب غار میں تیرنے سے پہلے وہ بہت پرجوش تھیں اور ان کا دل تیزی سے دھڑک رہا تھا کیونکہ وہ ایک خاص مقصد کے لیے تیر رہی تھیں اور اس میں انہیں کامیابی ملی۔

    فری اسٹائل غوطہ خور ساہیکا ارکیومین اس سے قبل بھی کئی ریکارڈ اپنے نام کرچکی ہیں۔

  • چھ سالہ چیچن بچے نے دو عالمی ریکارڈ بنا لیے

    چھ سالہ چیچن بچے نے دو عالمی ریکارڈ بنا لیے

    گروزنی: چھ سالہ چیچن بچے نے ایک ہی وقت میں دو عالمی ریکارڈز قایم کر کے لوگوں کو حیران کر دیا۔

    تفصیلات کے مطابق چھ سال کے چیچن بچےنے مسلسل 4,618 پریس اپس لگا کر دو عالمی ریکارڈ بنا لیے، رحیم کورائیف نے ریاستی ٹی وی پر دو عالمی ریکارڈز توڑنے کا مظاہرہ کر کے لوگوں کو حیران کیا۔

    رحیم کورائیف نے پہلا ریکارڈ اس وقت توڑا جب اس نے دو گھنٹے میں 4,183 پریس اپس کیے، یہ کسی بھی چھ سالہ بچے کی طرف سے سب سے زیادہ پریس اپس تھے۔

    چھ سالہ ایتھلیٹ نے دوسرا ریکارڈ اس وقت توڑا جب اس نے 4,618 پریس اپس لگا کر مسلسل زیادہ سے زیادہ پریس اپس لگانے کا کارنامہ انجام دیا۔

    خیال رہے کہ رحیم کورائیف نے گزشتہ سال نومبر میں مسلسل 105 4 پریس اپس لگا کر ریکارڈ قایم کیا تھا جس پر چیچن رہنما نے اسے مرسیڈیز کار تحفے میں دی تھی۔

    شایقین نے چھ سالہ رحیم کورائیف کو ’چیچن شوارزینگر‘ قرار دے دیا، جب اس نے دو گھنٹے مسلسل پریس اپس لگا کر ایک عالمی ریکارڈ توڑا تو لوگ سانسیں روک کر اسے دیکھ رہے تھے، لیکن وہ رکا نہیں اور جلد ہی دوسرا ریکارڈ بھی قایم کر لیا۔

    رحیم کورائیف کو رشین بک آف ریکارڈز کی جانب سے ٹرافی اور سرٹیفکیٹس دیے گئے، چیچن رہنما اور ولادی میر پیوٹن کے قریبی دوست رمضان قادیروف بھی اس کی بہت تعریف کر چکے ہیں۔

  • اطالوی شہری نے مختلف ممالک کے 1444 اخبارات جمع کرکے عالمی ریکارڈ بنالیا

    اطالوی شہری نے مختلف ممالک کے 1444 اخبارات جمع کرکے عالمی ریکارڈ بنالیا

    روم : اطالوی شہری نے مختلف ممالک کے اخبارات جمع کرنے کےاپنے انوکھے شوق کے باعث عالمی ریکارڈ قائم کرکے گنزبُک آف ورلڈ ریکارڈ میں اپنا نام درج کرالیا۔

    تفصیلات کے مطابق دنیا بہت سے اسے افراد موجود ہیں جنہیں مختلف و انوکھے کام انجام دینے کا جنون کی حد تک شوق ہوتا ہے، ایسا ہی ایک اٹلی سے تعلق رکھتا ہے جسے بچپن سے ہی مختلف موضوعات پر مختلف ممالک کے اخبارات اکھٹا کرنے کا شوق ہے اور اسی شوق کے باعث سیرگیوبوڈینی نامی شخص کو عالمی ریکارڈ قائم کرلیا۔

    اطالوی شہری کا کہنا تھا کہ اس وقت اس کے پاس سینکڑوں ممالک کےاخبارات کے 1444 ایڈیشنز موجود ہیں۔

    خبر رساں ادارے سے گفتگو کرتے ہوئے سیرگیو کا کہنا تھا کہ انہیں سنہ 1980  میں دس برس کی عمر سے اخبارات جمع کرنے کا شوق پیدا ہوا تھا جو بڑھتے بڑھتے جنون کی شکل اختیار کرگیا۔

    سیرگیو نے بتایا کہ انہیں اسکول کے زمانے میں ایسے پراجیکٹس ملتے تھے جس کےلیے اخبارات جمع کرنے پڑتے تھے جو شوق میں تبدیل ہوگئے اور مجھے بھی بچپن میں صحافی بننے کا شوق تھا جو نہ بن سکا اور کیمیا دان بن گیا۔

    انہوں نے بتایا کہ میرے اس شوق کی تکمیل میں میرےدوستوں اور اہل خانہ کا بہت بڑا ہاتھ ہے کیونکہ جب بھی عزیز و اقارب میں سے کوئی باہر جاتا تو میرے لیے وہاں کا اخبار لےآتا تھا۔

    اطالوی شہری نے بتایا کہ اخبارات جمع کرنے کا شوق بہت ہی دلچسپ ہے جس کی وجہ سے آپ کو پرانے زمانے کی خبریں پڑھتے ہیں، جو ہمیں اسی دور میں لے جاتا ہےاور ان کے مسائل اور نظریات سے متعلق آگاہ کرتا ہے۔

    عالمی ریکارڈ یافتہ سیرگیو بوڈینی کا کہنا تھا کہ میری خواہش ہے کہ میرے پاس دنیا کے ہر ایک ملک کا اخبار موجود ہو مگر یہ مشکل ہے۔

  • پاکستانی فٹبالر ہاجرہ خان نے گنیز ورلڈ ریکارڈ اپنے نام کرلیا

    پاکستانی فٹبالر ہاجرہ خان نے گنیز ورلڈ ریکارڈ اپنے نام کرلیا

    پاکستان ویمن فٹبال ٹیم کی کپتان ہاجرہ خان نے گنیز ورلڈ ریکارڈ اپنے نام کرلیا، وہ اس سے قبل بھی گنیز ورلڈ ریکارڈ بنا چکی ہیں۔

    ہاجرہ نے دنیا کے طویل ترین فٹبال میچ میں حصہ لیا جو 69 گھنٹوں تک جاری رہا، ہاجرہ نے اس میچ میں پاکستان کی نمائندگی کی۔ یہ میچ فرانس میں ایکول پلیئنگ فیلڈ کی جانب سے کھیلا گیا جس میں 51 ممالک کی 807 خواتین کھلاڑیوں نے شرکت کی۔

    اس پروگرام کا مقصد صنفی مساوات کے ذریعے خواتین کے خلاف تشدد کی روک تھام اور مختلف کھیلوں کے ذریعے دنیا بھر سے خواتین کو مواقع فراہم کرنا ہے۔

    پانچ روزہ فٹبال فیسٹیول میں ہاجرہ کے ہمراہ دیگر 3 پاکستانی خاتون فٹبالرز ابیہا حیدر، خدیجہ کاظمی اور صبا داؤد لاکھو نے بھی حصہ لیا۔ یہ میچ فیفا ویمن ورلڈ کپ 2019 کے دوران منعقد کیا گیا۔

    ہاجرہ خان نے اس میچ میں مسلسل ساڑھے 3 گھنٹوں تک کھیل کر 4 گولز اسکور کیے اور وہ یہ اسکور کرنے والی واحد پاکستانی فٹبالر بنیں۔

    ہاجرہ اس سے قبل اسی تنظیم کے تحت اردن کے بحر مردار کے ساحل پر سطح سمندر سے 420 میٹر نیچے کھیل کر، دنیا کی سب سے کم اونچائی والا فٹ بال میچ کھیلنے کا عالمی ریکارڈ بھی قائم کر چکی ہیں۔

  • دنیا کا طویل ترین افطار دستر خوان کا عالمی ریکارڈ مصر کے نام

    دنیا کا طویل ترین افطار دستر خوان کا عالمی ریکارڈ مصر کے نام

    قاہرہ : مصرنے دنیا کی سب سے طویل ترین افطار دستر خوان کا عالمی ریکارڈ اپنے نام کر لیا، سات ہزارلوگوں کیلئے افطاری کا انتظام کیا گیا ، اوت انواع و اقسام کے لذیذ کھانے رکھے گئے تھے۔

    تفصیلات کے مطابق مصر میں روزے داروں کے لیے دنیا کا طویل ترین افطاری دستر خوان لگایا گیا، جس پرسات ہزار روزہ داروں نے افطار ی کی، تین ہزارمیٹر طویل اس افطار ٹیبل پر انواع و اقسام کے لذیذ کھانے رکھے گئے تھے۔

    پانچ سو سے زائد رضاکاروں نے افطاری میں شرکت کرنے والے مہمانوں کی تواضع میں کوئی کسر نہ چھوڑی۔

    رمضان کے مقدس مہینے کے دوران  یہ دستر خوان مسلم ممالک میں ایک قدیم روایت ہے،  جہاں شہر کے غریب  افراد  کو افطاری پر مدعو کیا جاتا ہے۔

    گذشتہ سال متحدہ عرب امارات کے عالمی سیاحتی مرکز دبئی میں پدنیا کا طویل ترین افطار دستر خوان قائم کرکے ایک نیا ریکارڈ قائم کیا تھا ۔

    افطار عام زاید‘ کے عنوان سے دبئی صنعتی زون میں جبل علی کے مقام پر 6 کلو میٹر طویل افطار دستر خوان لگایا گیا تھا اور افطاری کے لیے 12 ہزار 830 ملازمین کی خدمات حاصل کی گئیں۔

  • نیپالی شہری نے 23 مرتبہ ماؤنٹ ایورسٹ سر کرکے کا عالمی ریکارڈ بنادیا

    نیپالی شہری نے 23 مرتبہ ماؤنٹ ایورسٹ سر کرکے کا عالمی ریکارڈ بنادیا

    کھٹمنڈو : نیپالی شہری نے 23 ویں بار دنیا کی بلند ترین چوٹی سرکے ورلڈ ریکارڈ قائم کردیا، نیپالی حکام کا کہنا ہے کہ حالیہ سمٹ میں 30 مزید کوہ پیما حصہ لے رہے ہیں جو (آج) چوٹی سر کر لیں گے۔

    تفصیلات کے مطابق نیپال کے ہائیکنگ حکام نے بتایا ہے کہ کامی ریٹا شرپا نامی 49 سالہ نیپالی شہری نے تیس ویں بار دنیا کی بلند ترین چوٹی ماؤنٹ ایورسٹ سر کر کے نیا عالمی ریکارڈ قائم کر دیا ہے۔

    میڈیا رپورٹس کے مطابق نیپال کے محکمہ سیاحت کی اہلکار میرا اچاریا نے بتایا کہ آٹھ ہزار 850 میٹر بلند پہاڑی ماؤنٹ ایورسٹ کی پرچھاؤں میں آباد تھیم نامی نیپالی گاؤں کے رہائشی شرپا نے جنوبی مشرقی رستہ استعمال کرتے ہوئے چوٹی کو سر کیا۔

    میرا نے بتایا کہ شرپا نے بدھ کی صبح مقامی وقت کے مطابق سات بج کر 50 منٹ پر چوٹی سر کی اور اب وہ نچلے کیمپوں کی طرف روانہ ہیں۔

    میرا کے مطابق حالیہ سمٹ میں 30 مزید کوہ پیما حصہ لے رہے ہیں جو (آج) جمعرات کو چوٹی سر کر لیں گے۔

    غیر ملکی خبر رساں ادارے کا کہنا تھا کہ ریٹا نے پہلی مرتبہ 1994 میں ماؤنٹ ایورسٹ سر کیا تھا جس کے بعد وہ ہر سال دنیا کی بلند ترین چوتی سرنے لگے۔

    غیر ملکی خبر رساں ادارے کا کہنا تھا کہ ریٹا ماؤنٹ ایورسٹ کے علاوہ دنیا کی دوسری بلند ترین چوٹی کے ٹو، چواو، ماناسلو، لوٹشے بھی سر کرچکے ہیں۔

    ریٹا کا کہنا تھا کہ ’میں ایک سپاہی کی طرح ہوں جو اپنے ملک کی بقاء کی جنگ میں پیچھے مڑ کر اپنے بیوی بچوں اور اہل خانہ کی فکر نہیں کرتا‘۔