پشاور: ملک میں ایک روز میں پولیو کے تین نئے کیس سامنے آ گئے، تینوں پولیو کیسز کا تعلق خیبر ایجنسی کی تحصیل باڑہ سے ہے،رواں سال کے پولیو کیسز کی تعداد اکیانوے ہو گئی۔
حکومت کی جانب سے پولیو کو ختم کرنے کی تمام تر کوششوں کے باوجود پولیو کیسز میں اضافہ ہوتا جا رہا ہے۔ آج ایک روز میں پولیو کے تین نئے کیسز سامنے آگئے، تینوں کیسز کا تعلق خیبرایجنسی کی تحصیل باڑہ سے ہے، باڑہ کے گاؤں اکا خیل کی پانچ سالہ سنبل میں پولیو کا وائرس پایا گیا، پولیو کا شکار ایک سالہ ثمرن کا تعلق باڑہ کے گاؤں شاہ ڈالے سے ہے، کنڈے میران خیل کا ڈیڑھ سالہ ابراہیم پولیو وائرس کا شکارہوگیا، دو ہزار تیرہ میں پولیو کے ترانوے کیس رپورٹ ہوئے تھے جبکہ رواں سال کے سات ماہ میں اکیانوے کیس سامنے آچکے ہیں، رواں سال فاٹا سے پولیو کے انہتر کیسز سامنے آئے ہیں جن میں سے آٹھ کیسز کا تعلق خیبر ایجنسی سے ہے۔
