کراچی: نگراں وزیر اعلیٰ سندھ جسٹس (ر) مقبول باقر نے کہا ہے کہ درآمدی کاغذ پر ڈیوٹی کا اختیار وفاقی حکومت کا ہے، تاہم سندھ حکومت درآمدی کاغذ کی قیمتوں میں کمی کے لیے وفاقی حکومت سے رابطہ کرے گی۔
تفصیلات کے مطابق کراچی میں اٹھارواں انٹرنیشنل بک فیئر شروع ہو چکا ہے، جمعرات 14 دسمبر کو نگراں وزیر اعلیٰ سندھ نے عالمی کتب میلے کا افتتاح کیا، تقریب میں اہم شخصیات نے شرکت کی تھی۔
کراچی ایکسپو سینٹر میں جاری اٹھارویں کراچی بین الاقوامی کتب میلے کے پہلے دن صبح ہی سے طلبہ و طالبات اور شہری بڑی تعداد میں پہنچ گئے تھے، طلبہ و طالبات نے نصابی اور درسی کتب کے علاوہ تاریخی اور کہانیوں کی کتب میں دل چسپی ظاہر کی، اسکول و مدرسہ کے ہزاروں طلبہ بسوں اور وینوں کے ذریعہ کتب میلے میں شریک ہوئے۔ شام سے قبل ہی پارکنگ کی جگہ تقریبا بھر چکی تھی، پبلشرز کی جانب سے کتب پر 30 فی صد سے 70 فی صد تک رعایت دی جا رہی ہے۔
مقبول باقر نے اس موقع پر کہا کتاب لوگوں میں شعور پیدا کرتی ہے اور ذہنی تقویت کا باعث بنتی ہے، کتاب معاشرہ کی تشکیل میں اہم کردار ادا کرتی ہے، اس لیے اس کی اہمیت کو نظر انداز نہیں کیا جا سکتا۔
پاکستان پبلشرز ایند بک سیلرز ایسوسی ایشن کے چیئرمین عزیز خالد نے کہا 2005 سے 2023 تک مسلسل کتب میلے کا انعقاد کامیابی سے جاری ہے، کتب میلے کے ذریعے کتب بینی کا کلچر دوبارہ آ رہا ہے، بڑے شہروں کے علاوہ چھوٹے گاﺅں دیہات میں اب بھی علم کا ذریعہ کتابیں ہیں۔ ان کا کہنا تھا کہ درآمدی کاغذ پر ڈیوٹی کی شرح میں اضافے سے پاکستان میں کاغذ انتہائی مہنگا ہو گیا ہے، جس کی وجہ سے کتابوں کی قیمتوں میں اضافہ ہوا، لوکل فیکٹریاں جو کاغذ بناتی ہیں وہ بھی ضروریات کو پورا نہیں کر پا رہی۔ انھوں نے وزیر اعلیٰ سندھ سے درخواست کی کہ کاغذ پر ڈیوٹی کی کمی کے حوالے سے وفاق سے بات کی جائے۔
درآمدی کا غذ کی ڈیوٹی میں اضافے کے باعث کتب مہنگی ہونے کے حوالے سے نگراں وزیر اعلیٰ سندھ نے کہا مجھے پبلشرز کی مشکلات کا اندازہ ہے تاہم درآمدی کاغذ پر ڈیوٹی وفاق کا معاملہ ہے اس لیے اس پر وفاق سے بات کی جائے گی کہ ڈیوٹی کم کی جائے، اس حوالے سے میں اپنی ہر ممکن کوشش کروں گا۔
ایم کیو ایم کے رہنما اور سینیٹر فیصل سبزواری نے کہا درآمدی کاغذ پر انحصار کرنے کی بجائے کاغذ کی مقامی انڈسٹریز کو فروغ دیا جانا چاہیے، ہمارے ملک میں 95 فی صد لوگ ایسے ہیں جنھوں نے اپنے نصاب کے علاوہ کوئی کتاب نہیں پڑھی، کتابوں سے قربت انتہائی ضروری ہے۔
