ممبئی: بالی ووڈ کے اداکار عامر خان پاکستانی ہیرو فواد خان کی نئی آنے والی فلم کپور اینڈ سنزدیکھ کر جذبات پر قابو نہ رکھ سکے اور آبدیدہ ہوگئے۔
بھارتی میڈیا کے مطابق کپور اینڈ سنز پاکستانی ڈراموں سے شہرت حاصل کرنے والے فواد خان کی بالی ووڈ میں دوسری فلم ہے جسے 18 مارچ کو سینما گھروں میں نمائش کے لیے پیش کیا جائے گا، فلم میں فواد خان کے ساتھ لیجنڈری اداکار رشی کپور، سدھارتھ ملہوترا اور عالیہ بھٹ نے مرکزی کردار ادا کیا ہے۔
فلم کے ڈائریکٹر شکون بترا نے فلم کی خصوصی سکریننگ رکھی جس میں عامر خان سمیت دیگر بڑے نامور اداکاروں نے شرکت کی، سکریننگ کے دوران عامر خان فلم کے جذباتی مناظر پر اپنے جذبات قابو میں نہ رکھ سکے اور آبدیدہ ہوگئے، اس سے قبل مسٹر پرفیکٹ بالی ووڈ کی فلم مسان کی سکریننگ کے موقع پر بھی آبدیدہ ہوگئے تھے۔
اس موقع پر میڈیا سے گفتگو کرتے ہوئے عامر خان کا کہنا تھا کہ کپور اینڈ سنز بہت ہی اچھی فلم ہے جس میں تمام اداکاروں نے اپنے کرداروں میں ڈھل کر اداکاری کی ہے جو قابل تعریف ہے، فلم میں جذباتی مناظر کو نہایت عمدگی سے فلمایا گیا ہے ہے جنہیں دیکھتے ہوئے میں اپنے جذبات پر قابو نہ رکھ سکا اور روتا رہا۔
