لاہور: پاکستان تحریکِ انصاف کے سینیٹر فیصل جاوید کا کہنا ہے کہ عمران خان کراچی سے عامر لیاقت کی جگہ کھمبا بھی کھڑا کرتے تو وہ جیت جاتا۔
تحریکِ انصاف کے رہنما فیصل جاوید اے آر وائی نیوز سے گفتگو کر رہے تھے، انھوں نے کہا ’کراچی جلسے میں عامر لیاقت نے کہا میری تقریر کرا دیں تاکہ جیت جاؤں۔‘
فیصل جاوید کا کہنا تھا کہ کراچی کے عوام نے عامر لیاقت کو نہیں بلکہ عمران خان کو ووٹ دیے ہیں، عامر لیاقت اپنی ذات کے لیے سیاست کر رہے ہیں یا پاکستان کے لیے۔
پی ٹی آئی رہنما نے کہ میں عمران خان کے ساتھ 22 سال سے ہوں لیکن کبھی وزارت نہیں مانگی، تمام چیزوں سے بالاتر ہو کر پاکستان کے لیے سوچیں۔
سینیٹر فیصل جاوید نے کہا ’عامر لیاقت کو ہم جلدی منالیں گے، وہ جذباتی آدمی ہیں لیکن دل کے اچھے ہیں، انٹرٹینمنٹ سے ان کا تعلق ہے اس لیے وہ ایسا کرتے رہتے ہیں۔‘
اسے بھی پڑھیں:عامر لیاقت کا شکوہ، گورنر سندھ کے عشائیے میں عدم شرکت
ان کا کہنا تھا کہ وزیرِ اعظم عمران خان نے کراچی سے صدر اور گورنر بنایا، کراچی کے عوام نے 2013 میں بھی ووٹ دیا اور 2018 میں بھی، تحریکِ انصاف میں کوئی فارورڈ بلاک نہیں بلکہ پروگیسو بلاک ہے۔
خیال رہے کہ عامر لیاقت اپنے ٹویٹر اکاؤنٹ سے تحریکِ انصاف پر مسلسل تنقیدی ٹویٹ کر رہے ہیں، کہا جا رہا ہے کہ وہ وزارت نہ ملنے پر ناراض ہیں اور انھیں نظر انداز کیا جا رہا ہے۔
