کراچی : قومی اسمبلی کے حلقہ این اے 258 میں جاری ضمنی الیکشن میں پیپلزپارٹی کے امیداوارعبدالحکیم بلوچ نے 80 ہزار سے زائد ووٹ حاصل کرکے کامیابی حاصل کرلی۔
غیرسرکاری اور غیر حتمی نتائج کے مطابق پیپلز پارٹی کے عبدالحکیم بلوچ نے 80 ہزار سے زائد ووٹ حاصل کرکے یہ معرکہ جیت لیا ہے۔
اب تک ملنے والے غیر سرکاری نتائج کے مطابق عبد الحکیم بلوچ نے 80 ہزار 272 ووٹ حاصل کیے، 2013ء کے انتخابات میں بھی وہ یہیں سے منتخب ہوئے تھے اور انہوں نے 57ہزار ووٹ حاصل کیے تھے۔
عبد الحکیم بلوچ پہلے ن لیگ میں شامل ہوگئے تھے لیکن اس بار وہ پیپلز پارٹی کے پلیٹ فارم سے الیکشن لڑرہے ہیں اور انہیں اس بار 30 ہزار سے زائد ووٹ ملے ہیں۔
عبدالحکیم بلوچ کا اے آر وائی نیوز سے بات چیت کرتے ہوئے کہنا تھا کہ شیر کو یہاں سے ہی نہیں پورے سندھ سے بھگائیں گے۔ انہوں نے کہا کہ الیکشن کی تاریخ تبدیل ہونے پر خود بھی حیران ہوں۔
یاد رہے کہ قومی اسمبلی کے حلقہ 258 کی یہ نشست مسلم ن لیگ کے رکن قومی اسمبلی عبدالحکیم بلوچ کے استعفیٰ دینے کے بعد خالی ہوئی تھی۔ ایم کیوایم پاکستان نے قومی اسمبلی کی نشست این اے 258 میں ضمنی انتخاب کے بائیکاٹ کا اعلان کیا تھا۔
این اے 258 میں ووٹرز کی تعداد 4 لاکھ 8ہزار 613 ہے جبکہ حلقے میں 287 پولنگ اسٹیشنز قائم کیے گئے تھے۔ حلقے میں تمام پولنگ اسٹیشنز کو حساس قرار دیا گیا تھا اور ہرپولنگ اسٹیشن کے اندر اور باہر رینجرز کے اہلکار تعینات کیے گئے تھے۔
قومی اسمبلی کی نشست این اے 258 پر پیپلزپارٹی کے امیدوار عبدالحکیم بلوچ سمیت 14امیدوار مد مقابل تھے۔انتخابی عمل پرسکون طریقے سے مکمل ہوا۔
