Tag: عبدالعلیم خان

لاہور: تحریک انصاف کے رہنما عبدالعلیم خان نے کہا ہے کہ نادرا میں کرپٹ لوگ انتخابی دھاندلی میں ملوث ہیں۔ وزیر داخلہ نادرا میں موجود کرپٹ عناصر کا اعتراف کرکے ان کے موقف کی تائید کر رہے ہیں۔

ان خیالات کا اظہار انہوں نے لاہور میں واٹر فلٹر پلانٹ کی افتتاحی تقریب کے موقع پر میڈیا سے گفتگو کرتے ہوئے کیا۔عبدالعلیم خان کا کہنا تھا کہ ٹی او آرز میں سے وزیراعظم نواز شریف کا نام نہیں نکلے گا وہ سب سے پہلے جواب دہ ہیں۔

علیم خان نے کہا کہ حکومت احتساب سے فرار چاہتی ہے، ایک سوال کے جواب میں ان کا کہنا تھا کہ وزیر دفاع خواجہ آصف کے حلقے کا بھی وہی انجام ہوگا جو سردار ایاز صادق کے حلقے کا ہوا تھا۔

تحریک انصاف کے رہنما نے کہا کہ الیکشن کمیشن اور حکومت نے جعلی الیکشن ہی کرانے ہیں تو اس سے بہتر ہے کہ ملک میں آمریت کا نظام ہو، عوام ووٹ کسی کو ڈالتے ہیں اور جیت کسی اور کی ہوتی ہے۔

انہوں نے کہا کہ چودھری نثار کے نادرا کے بارے میں انکشافات تحریک انصاف کے ان الزامات کی تائید ہیں کہ نادرا میں کرپٹ لوگ انتخابی دھاندلی میں ملوث ہیں۔

انہوں نے مطالبہ کیا کہ وفاقی وزیر داخلہ چودھری نثار جرات کا مظاہرہ کرتے ہوئے نادرا کے کر پٹ عناصر کو کیفر کردارتک پہنچائیں۔

ایک سوال کے جواب میں علیم خان نے کہا کہ این اے 122 میں بائیس ہزار ووٹوں کا ہیر پھیر کیا گیا،چار ہزار ووٹ حلقے سے باہر غیرقانونی طور پر منتقل کیے گئے۔