بنوں : حکومت نے آپریشن ضربِ عضب میں تباہ ہونے والے ہر گھر کے بدلےچار لاکھ روپے دینے کا فیصلہ کیا ہے۔
بنوں میں آئی ڈی پیز سے خطاب کرتے ہوئے عبدالقادربلوچ کا کہنا تھا حکومت متاثرین شمالی وزیرستان کی بہتری کے لیے ہر مممکنہ اقدام کر رہی ہے،ان کا کہنا تھا چار لاکھ کےعلاوہ متاثرین کو واپسی اور راشن کیلیے مزید 50 ہزار روپے بھی دیے جائیں گے۔
دوسری جانب شمالی وزیرستان میں دہشت گردوں کے خلاف پاک فوج کا آپریشن ضرب عضب کامیابی سے جاری ہے، اب تک ساڑھے سات سو سے زیادہ دہشت گردوں کو ہلاک اور ان کے سو سے زیادہ ٹھکانے تباہ کردیے گئے ہیں،میران شاہ کے بعد پاک فوج نے میر علی کا ستر فیصد کلیئر کرالیا ہے،میر علی میں دو اسلحہ ساز فیکٹریاں تباہ اور گھر تلاشی کے دوران زیرزمین چھپائے گئے بارود سے بھرے تیس ڈرم بھی برآمد کیے گئے ہیں ۔بویا کے علاقے سے بھی پانچ ہزارکلو بارود برآمد کرکے ناکارہ بنادیا گیا ہے ۔
