ARYNews.tv | Urdu – Har Lamha Bakhabar

Tag: عبد الرزاق داؤد

  • پاکستانی ایکسپورٹرز کے لیے خوشخبری

    پاکستانی ایکسپورٹرز کے لیے خوشخبری

    اسلام آباد: مشیر تجارت عبد الرزاق داؤد کا کہنا ہے کہ چین یکم اپریل 2022 سے خنجراب بارڈر کھول رہا ہے، برآمد کنندگان فائدہ اٹھائیں اور چین کو اپنی برآمدات میں اضافہ کریں۔

    تفصیلات کے مطابق مشیر تجارت عبدالرزاق داؤد نے سماجی رابطے کی ویب سائٹ ٹویٹر پر اپنے ٹویٹ میں کہا کہ چین یکم اپریل 2022 سے خنجراب بارڈر کھول رہا ہے، سرحد کھلنے سے پاک چین ایف ٹی اے کے دوسرے مرحلے کے استعمال میں مدد ملے گی۔

    رزاق داؤد کا کہنا تھا کہ سرحد کے دونوں طرف تجارت خصوصاً پھلوں کی تجارت میں مدد ملے گی، پاکستان کے شمال کی جانب سے سبزی برآمد کرنے والے اس سے فائدہ اٹھا سکتے ہیں۔

    انہوں نے مزید کہا کہ برآمد کنندگان فائدہ اٹھائیں اور چین کو اپنی برآمدات میں اضافہ کریں۔

  • فروری 2022 میں برآمدات میں 36 فیصد اضافہ

    فروری 2022 میں برآمدات میں 36 فیصد اضافہ

    اسلام آباد: مشیر تجارت عبد الرزاق داؤد کا کہنا تھا کہ فروری 2022 میں برآمدات میں 36 فیصد اضافہ ہوا ہے، یومیہ 100 ملین کے حساب سے اضافہ ہوا۔

    تفصیلات کے مطابق مشیر تجارت عبد الرزاق داؤد کا کہنا تھا کہ فروری 2022 میں برآمدات بڑھ کر 2.808 ارب ڈالرز ہوگئیں، گزشتہ سال فروری کے مہینے میں برآمدات 2.068 ارب ڈالرز تھیں۔

    مشیر تجارت کا کہنا تھا کہ برآمدات میں یومیہ 100 ملین کے حساب سے اضافہ ہوا جو کسی بھی مہینے کے مقابلے میں تیز ترین اضافہ ہے، مجموعی طور پر 36 فیصد اضافہ ہوا۔

    انہوں نے کہا کہ جولائی 2021 تا فروری 2022 برآمدات 26 فیصد اضافے سے 20.552 ارب ڈالرز ہوگئیں، جولائی 2020 تا فروری 2021 برآمدات 16.324 ارب ڈالرز تھیں۔

    مشیر تجارت کا مزید کہنا تھا کہ درآمدات سے متعلق ڈیٹا پاکستان ادارہ شماریات سے تصدیق کے بعد جاری ہوگا۔

  • 200 ڈالر سے کم قیمت موبائل فون کی اسمبلنگ پاکستان میں ہو رہی ہے: میک ان پالیسی پر اجلاس

    200 ڈالر سے کم قیمت موبائل فون کی اسمبلنگ پاکستان میں ہو رہی ہے: میک ان پالیسی پر اجلاس

    اسلام آباد: وزیر اعظم عمران خان کے مشیر تجارت عبد الرزاق داؤد کی زیر صدارت میک ان پالیسی پر اجلاس میں بتایا گیا کہ 200 ڈالر سے کم قیمت موبائل فون کی اسمبلنگ اب پاکستان میں ہو رہی ہے۔

    تفصیلات کے مطابق وزیر اعظم عمران خان کے مشیر تجارت عبد الرزاق داؤد کی زیر صدارت میک ان پالیسی پر اجلاس ہوا، اجلاس میں مقامی طور پر تیار موبائل فونز کی برآمد میں پیشرفت کا جائزہ لیا گیا۔

    اجلاس کے دوران بریفنگ میں بتایا گیا کہ پاکستان میں 80 سے 85 فیصد موبائل 200 ڈالر یا اس کم کے ہیں، موبائل مینو فیکچرنگ پالیسی کے تحت پیداوار بڑھانے کے لیے مراعات دی گئیں۔ 200 ڈالر سے کم قیمت موبائل فون کی اسمبلنگ اب پاکستان میں ہو رہی ہے۔

    بریفنگ میں کہا گیا کہ پی ٹی اے نے ڈی آئی آر بی ایس کے تحت موبائل فون کی اسمگلنگ کو روکا، مینو فیکچرنگ پالیسی کے تحت تیار سی بی یوز کی درآمد میں کمی آرہی ہے۔ موبائل فون کے پارٹس کی درآمد میں اضافہ ہو رہا ہے۔

    اجلاس کو بتایا گیا کہ جولائی تا نومبر سی بی یوز کی درآمد 73 فیصد کم ہو کر 179 ملین امریکی ڈالر ہوگئی۔ موبائل مینو فیکچرنگ پالیسی سے غیر ملکی زرمبادلہ میں 410 ملین ڈالر کی بچت ہوئی۔

    بریفنگ کے مطابق مقامی اسمبلنگ کے لیے موبائل پارٹس کی درآمد گزشتہ سال 133 ملین ڈالر کی تھی، رواں مالی سال موبائل فون پارٹس کی درآمد 674 ملین امریکی ڈالر ہوگئیں۔

    مشیر تجارت عبدالرزاق داؤد نے کہا کہ اسمارٹ فون ضرورت بن چکے اب ایس ایم ایز موبائل پر کاروبارچلاتے ہیں، جب ہماری حکومت آئی تو پاکستان موبائل فون کا درآمد کنندہ تھا۔ اب صورتحال مختلف ہے شعبے میں روزگار کے مواقع پیدا ہو رہے ہیں۔

    انہوں نے کہا کہ پاکستان کو موبائل فون مینو فیکچرنگ اور ایکسپورٹ کا مرکز بنانا ہے، موبائل فونز کی برآمد جلد شروع ہوگی جس سے زرمبادلہ حاصل ہوگا۔

  • نائیجیریا میں دوسری پاک افریقہ کانفرنس اور سنگل کنٹری نمائش

    نائیجیریا میں دوسری پاک افریقہ کانفرنس اور سنگل کنٹری نمائش

    اسلام آباد: مشیر تجارت عبد الرزاق داؤد نائیجیریا کے دورے پر روانہ ہوگئے جہاں وہ دوسری پاک افریقہ کانفرنس اور سنگل کنٹری نمائش میں شریک ہوں گے۔

    تفصیلات کے مطابق وزارت تجارت کی جانب سے جاری کردہ اعلامیے میں کہا گیا ہے کہ مشیر تجارت عبد الرزاق داؤد نائیجیریا کے دورے پر روانہ ہوگئے ہیں۔

    دورے کے دوران مشیر تجارت نائیجیریا میں دوسری پاک افریقہ کانفرنس اور سنگل کنٹری نمائش میں شریک ہوں گے۔ کانفرنس اور نمائش میں پاکستان سے 115 کاروباری وفود شرکت کریں گے۔

    وزارت تجارت کے مطابق کانفرنس اور نمائش میں ٹیکسٹائل، فارما سیوٹیکل، انجینیئرنگ، خوراک اور سبزیوں کی کمپنیاں شریک ہوں گی۔

    علاوہ ازیں آئی ٹی سے تعلق رکھنے والی پاکستانی کمپنیاں بھی اپنی مصنوعات نمائش میں پیش کریں گی۔ کانفرنس اور نمائش کا اہتمام وزارت تجارت کی طرف سے لک افریقہ پالیسی کے تحت کیا جاتا ہے۔

  • پاکستان ورلڈ ٹریڈ آرگنائزیشن کمیٹی برائے تجارت و ترقی کی سربراہی کے لیے منتخب

    پاکستان ورلڈ ٹریڈ آرگنائزیشن کمیٹی برائے تجارت و ترقی کی سربراہی کے لیے منتخب

    اسلام آباد: مشیر تجارت عبد الرزاق داؤد کا کہنا ہے کہ پاکستان کو ورلڈ ٹریڈ آرگنائزیشن کمیٹی برائے تجارت و ترقی کی سربراہی کے لیے منتخب کرلیا گیا ہے۔

    تفصیلات کے مطابق وزیر اعظم کے مشیر تجارت عبد الرزاق داؤد نے سماجی رابطے کی ویب سائٹ ٹویٹر پر ٹویٹ کرتے ہوئے بتایا کہ پاکستان ورلڈ ٹریڈ آرگنائزیشن کمیٹی برائے تجارت و ترقی کی سربراہی کے لیے منتخب کیا گیا۔

    اپنے ٹویٹ میں انہوں نے کہا کہ یہ انتخاب سال 2021 کے لیے ہے، یہ کمیٹی 1965 میں ترقی پذیر ممالک کی معاشی ترقی کے لیے بنائی گئی تھی۔

    انہوں نے بتایا کہ پاکستان کی قیادت میں سی ٹی ڈی تجارت اور سرمایہ کاری کے لیے کام کرے گا۔

    یاد رہے کہ پاکستان تحریک انصاف کی حکومت میں ملک میں تجارت و ترقی کے شعبے میں اضافہ دیکھا جارہا ہے۔

    اس سے قبل ایک موقع پر عبد الرزاق داؤد کا کہنا تھا کہ بیرون ملک سرمایہ کاروں کو راغب کرنے کے لیے مراعات دے رہے ہیں۔

    انہوں نے کہا تھا کہ بیرونی ملک سرمایہ کاروں کو مراعات دینے سے کاروبار میں اضافہ ہوگا، معیشت سے متعلق موجودہ حکومت مختلف اقدامات کررہی ہے۔

    مشیر تجارت کا کہنا تھا کہ کاروبار میں حائل غیر ضروری رکاوٹیں ختم کر رہے ہیں، بلوچستان اور خیبر پختونخواہ میں بھی سرمایہ کاری بڑھانے کے لیے مراعات دے رہے ہیں۔

  • افغان صدر سے ملاقات میں تجارت و مواصلات پر تبادلہ خیال ہوا: مشیر تجارت

    افغان صدر سے ملاقات میں تجارت و مواصلات پر تبادلہ خیال ہوا: مشیر تجارت

    اسلام آباد: وزیر اعظم کے مشیر برائے تجارت عبد الرزاق داؤد کا کہنا ہے کہ افغان صدر سے ملاقات میں تجارت و مواصلات پر تبادلہ خیال ہوا، امید ہے راہداری اور ترجیحی تجارتی معاہدے جنوری تک طے پا جائیں گے۔

    تفصیلات کے مطابق وزیر اعظم کے مشیر برائے تجارت عبد الرزاق داؤد نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ افغان صدر سے ملاقات میں تجارت و مواصلات پر تبادلہ خیال ہوا۔

    مشیر تجارت کا کہنا تھا کہ دیگر اعلیٰ حکام سے بھی تجارت کے امور پر ملاقاتیں ہوئیں، امید ہے راہداری اور ترجیحی تجارتی معاہدے جنوری تک طے پا جائیں گے۔

    انہوں نے کہا کہ آنے والے دنوں میں شراکت داروں سے تفصیلی ملاقاتیں کروں گا، دونوں ملکوں میں تجارت اور سرمایہ کاری میں خاطر خواہ مواقع ہیں۔ ملکی کاروباری برادری کو ان مواقع سے فائدہ اٹھانا چاہیئے۔

    خیال رہے کہ چند روز قبل مشیر تجارت کی سربراہی میں تجارتی وفد نے افغانستان کا دورہ کیا تھا، وفد میں سیکریٹری تجارت، کسٹمز کے ارکان اور وزارت تجارت کے اعلیٰ حکام شامل تھے۔

    دورے کے دوران دو طرفہ تجارت، راہداری تجارت اور دو طرفہ ترجیحی تجارتی معاہدے پر مذاکرات ہوئے جبکہ غیر رسمی تجارت کو رسمی بنانے کے سلسلے میں بھی بات چیت ہوئی۔

    مشیر تجارت عبد الرزاق داؤد نے افغان صدر اشرف غنی سے بھی ملاقات کی تھی۔

  • وزیراعظم کے مشیر تجارت شوگر انکوائری کمیشن میں پیش، ڈیڑھ گھنٹے تک سوالات

    وزیراعظم کے مشیر تجارت شوگر انکوائری کمیشن میں پیش، ڈیڑھ گھنٹے تک سوالات

    اسلام آباد : وزیراعظم کے مشیرتجارت عبد الرزاق داؤد نے شوگرانکوائری کمیشن کے سامنے پیش ہوکر سوالات کے جواب دے دیئے، حکام کا کہنا ہے شوگر ایڈوائزری بورڈ نے مشیر تجارت کی سربراہی میں چینی برآمد کرنے کی سفارش کی تھی۔

    تفصیلات کے مطابق وزیراعظم کے مشیرتجارت عبد الرزاق داؤد شوگرانکوائری کمیشن میں پیش ہوئے اور ڈیڑھ گھنٹے تک سوالات کے جواب دیئے، ذرائع کا کہنا ہے کہ مشیرتجارت سے کمیشن ممبران نے سخت سوالات کئے۔

    حکام کا کہنا ہے شوگر ایڈوائزری بورڈ نے مشیر تجارت کی سربراہی میں چینی برآمد کرنے کی سفارش کی تھی، اقتصادی رابطہ کمیٹی نے اکتوبر اور دسمبر 2018 میں چینی برآمدکرنےکی اجازت دی تھی۔ جبکہ ای سی سی نے اسی عرصے میں گیارہ لاکھ ٹن چینی برآمد کرنے کی اجازت دی تھی۔

    گزشتہ روز وزیراعلی پنجاب عثمان بزدار نے کمیشن کے سامنے پیش ہوکر بیان ریکارڈ کرایا تھا جبکہ وزیراعلی سندھ مراد علی شاہ کو بھی کمیشن میں طلب کیا گیا تھا تاہم انہوں نے انکار کر دیا تھا۔

    اس سے قبل اسد عمر نے ایف آئی اے ہیڈکوارٹر پہنچ کر چینی سبسڈی کے معاملے پر شوگر انکوائری کمیشن کے سامنے بیان ریکارڈ کروایا تھا۔

    وزیراعلیٰ پنجاب عثمان بزدار اور وفاقی وزیر اسد عمر کے شوگر انکوائری کمیشن کے سامنے بیان ریکارڈ کروانے پر ردعمل دیتے ہوئے وفاقی وزیر اطلاعات شبلی فراز نے کہا کہ نئےپاکستان میں افرادقانون کےتابع ہیں۔

  • ٹیکسٹائل کی صنعت کے لیے اچھی خبر

    ٹیکسٹائل کی صنعت کے لیے اچھی خبر

    اسلام آباد: مشیر تجارت عبد الرزاق داؤد کا کہنا ہے کہ مغربی ممالک رفتہ رفتہ نئے تجارتی آرڈرز دے رہے ہیں، ٹیکسٹائل انڈسٹری ان مواقع سے بھرپور فائدہ اٹھائے۔

    تفصیلات کے مطابق مشیر تجارت عبد الرزاق داؤد نے سماجی رابطے کی ویب سائٹ ٹویٹر پر اپنے ٹویٹ میں کہا کہ مغربی ممالک رفتہ رفتہ کھل رہے ہیں، مغربی ممالک نئے تجارتی آرڈرز دے رہے ہیں۔

    مشیر تجارت کا کہنا تھا کہ اکثریتی آرڈرز کرونا وائرس سے پھیلاؤ کے پہلے کے ہیں، ٹیکسٹائل انڈسٹری ان مواقع سے بھرپور فائدہ اٹھائے۔

    انہوں نے کہا کہ ٹیکسٹائل شعبہ منڈیوں تک رسائی حاصل کر سکتا ہے، حکومت اس سلسلے میں بھرپور تعاون کرے گی۔

    اس سے قبل ایک موقع پر مشیر تجارت نے کہا تھا کہ کرونا کی وجہ سے ملک کے معاشی حالات کافی نازک ہیں، عالمی بینک اور آئی ایم ایف نے بھی پاکستان کے حوالے سے پیشگوئی کردی ہے۔

    انہوں نے کہا تھا کہ کرونا کی وجہ سے پاکستان کی برآمدات میں 3 ارب ڈالر تک کمی کا امکان ہے، گزشتہ سال کے مقابلے میں رواں ماہ برآمدات 70 فیصد کم ریکارڈ کی گئیں۔

    انہوں نے کہ تھا کہ کاروباری طبقے کو قرضوں کی ادائیگی مؤخر کرنے کے معاملے پر اسٹیٹ بینک آف پاکستان سے رابطے میں ہیں اور جلد ہی اس مسئلے کو حل کریں گے۔

  • کاروبار میں آسانیاں پیدا کرنے سے سرمایہ کاری میں اضافہ ہوگا، مشیر تجارت

    کاروبار میں آسانیاں پیدا کرنے سے سرمایہ کاری میں اضافہ ہوگا، مشیر تجارت

    اسلام آباد: مشیر تجارت عبد الرزاق داؤد کا کہنا ہے کہ کاروبارمیں آسانیاں پیدا کرنے سے سرمایہ کاری میں اضافہ ہوگا، چھوٹے اور درمیانے درجے کی صنعتوں کو مضبوط کیا جائے گا۔

    تفصیلات کے مطابق مشیر تجارت عبد الرزاق داؤد کی زیرصدارت سرمایہ کاری سے متعلق اجلاس ہوا جس میں چیئرمین سرمایہ کاری بورڈ، سیکرٹری تجارت ودیگر اعلیٰ حکام نے شرکت کی۔ اجلاس میں کاروباری سرگرمیوں کے فروغ کے لیے مزید آسانیاں پیدا کرنے پرغور کیا گیا۔

    مشیر تجارت نے کہا کہ کاروبارمیں آسانیاں پیدا کرنے سے سرمایہ کاری میں اضافہ ہوگا، چھوٹے اور درمیانے درجے کی صنعتوں کو مضبوط کیا جائے گا۔

    عبد الرزاق داؤد نے کہا کہ ایس ایم ایز کی ترقی معیشت مستحکم کرنے میں اہم کردار ادا کرتی ہے، ایز آف ڈوئنگ بزنس رپورٹ میں پاکستان نے 28 درجے ترقی کی، مزید آسانیاں پیدا کرکے سرمایہ کاری کو فروغ دیا جائے گا۔

    مشیر تجارت عبدالرزاق داﺅد نے گزشتہ ہفتے اکتوبر2019 کے تجارتی اعدادوشمار جاری کیے تھے، اکتوبر کے دوران برآمدات 2 ارب 80 کروڑ ڈالر رہیں۔

    پاکستان نے ایز آف ڈوئنگ انڈیکس میں 28 درجے بہتری دکھائی، فچ ریٹنگز

    یاد رہے کہ گزشتہ ہفتے عالمی معاشی ریٹنگ کے ادارے فچ ریٹنگز کا کہنا تھا کہ پاکستان نے ایز آف ڈوئنگ انڈیکس میں 28 درجے بہتری دکھائی، پاکستان کا شمار سب سے زیادہ بہتری دکھانے والے 10 ممالک میں ہوا۔

  • برآمدات سے قبل اضافی چینی کی موجودگی یقینی بنائی جائے گی: مشیر تجارت

    برآمدات سے قبل اضافی چینی کی موجودگی یقینی بنائی جائے گی: مشیر تجارت

    اسلام آباد: مشیر تجارت عبد الرزاق داؤد کا کہنا ہے کہ برآمدات سے قبل اضافی چینی کو یقینی بنایا جائے گا، چین کی 1 ارب ڈالر مارکیٹ رسائی میں چینی نے 3 لاکھ ٹن کا کوٹا پورا کیا۔

    تفصیلات کے مطابق مشیر تجارت عبد الرزاق داؤد کی زیر صدارت شوگر ایڈوائزری بورڈ کا اجلاس ہوا۔ اجلاس میں پاکستان شوگر ملز ایسوسی ایشن اور کسان بورڈ کے نمائندوں نے شرکت کی۔

    اجلاس میں سیکریٹری تجارت سردار احمد اور سیکریٹری صنعت و پیداوار بھی شریک ہوئے۔

    اجلاس میں گنے اور چینی کی موجودہ صورتحال اور چین و افغانستان برآمد کی گئی چینی کی مقدار کا جائزہ لیا گیا۔

    عبد الرزاق داؤد کا کہنا تھا کہ برآمدات سے قبل اضافی چینی کو یقینی بنایا جائے گا، چین کی 1 ارب ڈالر مارکیٹ رسائی میں چینی نے 3 لاکھ ٹن کا کوٹا پورا کیا۔

    انہوں نے کہا کہ اکتوبر کے پہلے ہفتے میں شوگر ایڈوائزری بورڈ کا اجلاس طلب کریں گے۔ آئندہ اجلاس میں گنے اور چینی کی پیداواری لاگت کا جائزہ لیں گے۔ تمام نمائندے پیداواری لاگت کا تخمینہ لگائیں گے۔