Tag: عبوری ضمانت

لاہور: انسداد دہشت گردی عدالت نے نیب آفس میں مریم نواز کی پیشی کے موقع پر ہنگامہ آرائی کیس میں کیپٹن صفدر اور رانا ثناء اللہ سمیت دیگر لیگی رہنماؤں کی عبوری ضمانت میں 15 اکتوبر تک توسیع کر دی۔

تفصیلات کے مطابق انسداد دہشت گردی عدالت کے جج ارشد حسین بھٹہ نے نیب آفس میں مریم نواز کی پیشی کے موقع پر ہنگامہ آرائی کیس کیپٹن صفدر اور رانا ثناء اللہ سمیت دیگر لیگی رہنماؤں کی درخواست ضمانت پر سماعت کی۔

رانا ثناءاللہ عدالت میں حاضری کے لیے پیش ہوئے جبکہ کیپٹن صفدر کی جانب سے حاضری معافی کی درخواست منظور کر لی گئی، عدالت کو بتایا گیا کہ کیپٹن صفدر پشاور میں ہیں لہذا حاضری معافی کی درخواست منظور کی جائے۔

تفتیشی افسر کی جانب سے عدالت میں رپورٹ پیش کی گئی، جس میں کہا گیا کہ کیپٹن صفدر اور رانا ثنااللہ سمیت دیگر رہنماؤں نے کارکنوں کو حملے اور تشدد پر اکسایا ۔

رانا ثنااللہ کے وکیل کا کہنا تھا کہ دہشت گردی کا مقدمہ بے بنیاد اور ہنگامہ آراٸی اور تشدد کا الزام جھوٹ ہے، لہذا عدالت عبوری ضمانت منظورکرے ، جس پر عدالت نے ن لیگی رہنماؤں کی 15 اکتوبر تک عبوری ضمانت میں توسیع کردی ۔

یاد رہے مریم نواز کی نیب میں پیشی کے موقع پر صورتحال کشیدہ ہوگئی تھی، نیب دفتر کے باہر لیگی کارکنان کی جانب سے پولیس پر پتھراؤ کیا گیا جبکہ لیگی کارکنوں نے نیب دفتر کے باہر رکاوٹیں ہٹادیں تھیں۔

پولیس کی جانب سے لیگی کارکنوں کومنتشر کرنے کیلئے نیب آفس کے باہر واٹر کینن بھی طلب کی تھی، لیگی کارکنان گاڑی ایل ای 3378میں پتھر سےبھرے شاپرلیکرآئے تھے ، لیگی کارکنوں نے گاڑی کےاندر سے پتھر نکال کر پولیس پر برسائے تھے۔

لیگی کارکنوں کے پتھراؤ کے باعث نیب دفتر پرکھڑیوں کے شیشےٹوٹ گئے جبکہ لیگی کارکنان نے نیب دفتر کے باہر بیریئر بھی توڑنےکی کوشش کی تھی

لاہور: لاہور ہائی کورٹ نے مسلم لیگ ن کے صدر اور اپوزیشن لیڈر شہباز شریف کی ضمانت میں پیر تک توسیع کر دی۔

تفصیلات کے مطابق لاہور ہائی کورٹ میں میاں شہباز شریف کی منی لانڈرنگ کیس میں عبوری ضمانت کی درخواست پر سماعت ہوئی۔ جسٹس سردار احمد نعیم کی سربراہی میں دو رکنی بینچ نے درخواست ضمانت پر سماعت کی۔شہباز شریف عدالت میں پیش ہوئے۔

اپوزیشن لیڈر کے وکیل نے سماعت کے دوران دلائل دیتے ہوئے کہا کہ حکومت کے مشیر اعلان کر رہے ہیں کہ ہم شہباز شریف کو جیل میں ڈال کر نشان عبرت بنائیں گے۔ یہ طے کر کے بیٹھے ہیں کہ شہباز شریف جیل جانے کے لیے اپنے کپڑے ساتھ لائیں۔

امجد پرویز نے کہا کہ نیب پہلے دن سے شہباز شریف کو گرفتار کرنے کا دماغ بنا چکا ہے، جب ریفرنس فائل ہو چکا ہے تو پھر گرفتاری کی کیا ضرورت ہے؟

قائد حزب اختلاف کے وکیل نے کہا کہ شہباز شریف قومی اسمبلی میں اپوزیشن لیڈر ہیں، ان کی آئینی ذمہ داریاں ہیں، شہباز شریف کا نام ای سی ایل میں ڈالا گیا جسے عدالت نے کالعدم قرار دیا۔

شہباز شریف نے عدالت میں بیان دیا کہ جس دن سنا تھا کہ کورونا کی وجہ سے فلائٹس بند ہو رہی ہیں،آخری فلاٸٹ تھی جس کے ذریعے ملک واپس آیا اور نیب کی کارروائی کا سامنا کیا۔

بعدازاں لاہور ہائی کورٹ نے منی لانڈرنگ اور آمدن سے زائد اثاثہ جات کیس میں شہباز شریف کی عبوری ضمانت میں 28 ستمبر تک توسیع کر دی۔