ARYNews.tv | Urdu – Har Lamha Bakhabar

Tag: عثمان بزدار

  • آٹے کی قیمتوں میں خود ساختہ اضافہ برداشت نہیں کیا جائے گا: وزیر اعلیٰ پنجاب

    آٹے کی قیمتوں میں خود ساختہ اضافہ برداشت نہیں کیا جائے گا: وزیر اعلیٰ پنجاب

    لاہور: وزیر اعلیٰ پنجاب عثمان بزدار کا کہنا ہے کہ گندم اور آٹے کی قیمتوں میں خود ساختہ اضافہ برداشت نہیں کیا جائے گا، حکام اور انتظامی افسران قیمتوں کی تسلسل کے ساتھ مانیٹرنگ جاری رکھیں گے۔

    تفصیلات کے مطابق وزیر اعلیٰ پنجاب عثمان بزدار کا کہنا ہے کہ بر وقت اور مؤثر اقدامات سے گندم اور آٹے کی قیمتوں میں استحکام آیا، پنجاب واحد صوبہ ہے جہاں 20 کلو آٹے کا تھیلا مقرر ہ نرخوں پر دستیاب ہے۔

    عثمان بزدار کا کہنا تھا کہ قیمتوں میں استحکام کے لیے آئندہ بھی ہر انتظامی قدم اٹھایا جائے گا۔

    انہوں نے کہا کہ صوبے کے عوام کے حقوق کا تحفظ کرنا میری ذمہ داری ہے، کسی کو عوام کا استحصال کرنے کی اجازت نہیں دیں گے۔

    عثمان بزدار کا مزید کہنا تھا کہ حکام اور انتظامی افسران قیمتوں کی تسلسل کے ساتھ مانیٹرنگ جاری رکھیں گے، عوام کو ہر ممکن ریلیف دینے کے لیے متعلقہ ادارے متحرک رہیں، گندم اور آٹے کی قیمتوں میں خود ساختہ اضافہ برداشت نہیں کیا جائے گا۔

  • شراب لائسنس کیس، وزیر اعلیٰ پنجاب سے نیب سوالات منظر عام پر

    شراب لائسنس کیس، وزیر اعلیٰ پنجاب سے نیب سوالات منظر عام پر

    لاہور: نجی ہوٹل کو شراب لائسنس کیس کے سلسلے میں وزیر اعلیٰ پنجاب عثمان بزدار سے نیب کے سوالات کی تفصیلات منظر عام پر آ گئیں۔

    اے آر وائی نیوز کے مطابق وزیر اعلیٰ پنجاب عثمان بزدار 12 اگست کو نیب میں پیش ہوئے تھے تاہم وہ نیب کے سوالات کے جواب نہ دے سکے تھے، جس پر انھیں 12 صفحات پر مشتمل سوال نامہ دیا گیا۔

    ذرایع کا کہنا ہے کہ عثمان بزدار سے ان کی تنخواہ اور ذرایع آمدن کے بارے میں تفصیل پوچھی گئی ہے، اگر کوئی کاروبار ہے تو اس کی تفصیل مانگی گئی ہے، نیب نے گیس، بجلی، فونز بلوں سمیت ملازمین کی تعداد سے متعلق بھی تفصیل طلب کی ہے۔

    ذرایع کے مطابق نیب نے عثمان بزدار سے وراثت میں حاصل جائیداد سمیت منقولہ و غیر منقولہ جائیدادوں کی تفصیل طلب کی ہے، اور کہا ہے کہ لیز پر یا بذریعہ نیلامی اور تحفوں کی صورت میں اگر کوئی اثاثے ہیں تو ان کی تفصیل بھی دی جائے۔

    ان اثاثوں کی تفصیل بھی طلب کی گئی ہے جو اب ان کی ملکیت نہیں رہے، ایسے اثاثوں کے بارے میں پوچھا گیا ہے کہ انھیں کب اور کسے فروخت کیا گیا، عثمان بزدار سے بیرون ملک دوروں سے متعلق بھی تفصیلات طلب کی گئی ہیں، نیب نے کہا ہے کہ بینک اکاؤنٹ سمیت اہل خانہ یا ان کے نام کریڈٹ کارڈز، قرض اور دیگر تفصیلات ہوں تو فراہم کی جائیں۔

    وزیراعلیٰ پنجاب عثمان بزدار سے نیب دفتر میں تحقیقات کی اندرونی کہانی سامنے آگئی

    عثمان بزدار سے بچوں کے تعلیمی اخراجات اور دیگر تفصیلات فراہم کرنے کا بھی کہا گیا ہے، سیاست میں کب داخل ہوئے کون کون سے الیکشن میں حصہ لیا، نیب نے اس کی تفصیل بھی طلب کی ہے، عثمان بزدار سے الیکشن اخراجات کی تفصیلات بھی طلب کی گئی ہیں۔

    ذرایع کا کہنا ہے کہ نیب نے عثمان بزدار سے فیملی ممبرز کے نام جائیدادوں کی تفصیلات بھی طلب کی گئی ہیں۔

    یہ تفصیلات نیب آرڈیننس کے سیکشن 19 اور 27 کے تحت طلب کی گئی ہیں، واضح رہے کہ غلط معلومات فراہم کرنے کی صورت میں شیڈول 4 کے تحت 5 برس سزا ہو سکتی ہے۔

  • سعودی عرب کے سرمایہ کاروں کو ون ونڈو آپریشن کے تحت سہولتیں دیں گے: عثمان بزدار

    سعودی عرب کے سرمایہ کاروں کو ون ونڈو آپریشن کے تحت سہولتیں دیں گے: عثمان بزدار

    لاہور: وزیر اعلیٰ پنجاب عثمان بزدار نے کہا ہے کہ سعودی عرب کے سرمایہ کاروں کو ون ونڈو آپریشن کے تحت سہولتیں دیں گے، پنجاب میں اسپیشل اکنامک زونز کا قیام عمل میں لایا جا رہا ہے۔

    تفصیلات کے مطابق آج وزیر اعلیٰ پنجاب عثمان بزدار سے سعودی عرب کے سفیر نواف بن سعید احمد المالکی نے ملاقات کی، سعودی سفیر نے وزیر اعلیٰ کو یوم آزادی کی مبارک باد دی، اور پاکستانی قوم کے لیے نیک خواہشات کا اظہار کیا، جب کہ عثمان بزدار نے سعودی فرماں روا شاہ سلمان کی صحت سے متعلق نیک تمناؤں کا اظہار کیا۔

    ملاقات میں باہمی دل چسپی کے امور اور دو طرفہ تعلقات کے فروغ اور تعاون پر تبادلہ خیال کیا گیا، عثمان بزدار نے کہا کہ پاکستان کے عوام سعودی عرب کے ساتھ دلی اور روحانی وابستگی رکھتے ہیں، دونوں ممالک کے عوام میں اخوت اور بھائی چارے کا مضبوط رشتہ ہے، پاکستان کی تعمیر و ترقی میں سعودی حکومت کا تعاون لائق تحسین ہے۔

    وزیر اعلیٰ پنجاب نے کہا کہ حکومت سعودی سرمایہ کاروں کو ہر ممکن سہولتیں دے گی، پنجاب میں اسپیشل اکنامک زونز کا قیام عمل میں لایا جا رہا ہے، بہت جلد بہاولپور میں اسپیشل اکنامک زون پر کام شروع کیا جائے گا، جہاں سرمایہ کاروں کو مراعات دی جائیں گی۔

    انھوں نے کہا سعودی عرب کے سرمایہ کاروں کو ون ونڈو آپریشن کے تحت سہولتیں دی جائیں گی، سرمایہ کاروں کو اربوں کی محفوظ سرمایہ کاری کے مواقع میسر ہوں گے، سعودی عرب ہمیشہ پاکستان کے ساتھ کھڑا رہا ہے، اور مشکل کی ہر گھڑ ی میں پاکستان کا بھرپور ساتھ دیا۔

    سعودی سفیر نواف بن سعید احمد المالکی نے پنجاب میں سماجی شعبوں کی بہتری اور عوامی ترقی کے اقدامات کو سراہا، انھوں نے راوی ریور فرنٹ اربن ڈویلپمنٹ پراجیکٹ میں دل چسپی کا اظہار کیا اور کہا سعودی عرب اور پاکستان کے عوام مضبوط رشتوں میں بندھے ہیں، دونوں ممالک نے بھائیوں کی طرح ایک دوسرے کا ساتھ نبھایا، پاکستان کے عوام کو یوم آزادی پر مبارک باد پیش کرتا ہوں۔

  • حکومت نے جنوبی پنجاب کے عوام سے کیا وعدہ پورا کر دیا،عثمان بزدار

    حکومت نے جنوبی پنجاب کے عوام سے کیا وعدہ پورا کر دیا،عثمان بزدار

    لاہور:وزیراعلیٰ پنجاب سردار عثمان بزدار کا کہنا ہے کہ تحریک انصاف حکومت نے جنوبی پنجاب کے عوام سے کیا وعدہ پورا کر دیا۔

    تفصیلات کے مطابق سماجی رابطے کی ویب سائٹ ٹویٹر پر وزیراعلیٰ پنجاب سردار عثمان بزدار نے اپنے پیغام میں کہا کہ 16محکموں کے سیکریٹریز،افسران اختیارات کے ساتھ ساؤتھ پنجاب سیکرٹریٹ میں بیٹھیں گے۔

    عثمان بزدار کا کہنا تھا کہ حکومت نے جنوبی پنجاب کے عوام سے کیا وعدہ پورا کر دیا۔انہوں نے اپنے پیغام میں بتایا کہ ایڈیشنل چیف سیکرٹری کے پاس بھی چیف سیکرٹری کے تمام اختیارات ہوں گے۔

    یاد رہے کہ گزشتہ ہفتے وزیراعلیٰ پنجاب سردار عثمان بزدار سے وزیر خارجہ شاہ محمود قریشی نے ملاقات کی تھی جس میں باہمی دلچسپی کے امور، سیاسی صورت حال اور جنوبی پنجاب سیکرٹریٹ کے امور پر تبادلہ خیال کیا گیا تھا۔

    وزیراعلیٰ پنجاب کا کہنا تھا کہ سابق حکمرانوں نے جنوبی پنجاب کی ترقی کے نام پر لیے گئے فنڈ اپنے حلقوں پر لگائے، جنوبی پنجاب کے عوام نے ترقی کے نام پر دھوکہ دینے والوں کو عام انتخابات میں بری طرح مسترد کیا۔

  • ‘عثمان بزدار کہیں نہیں جا رہے، اپنے عہدے پر رہیں گے’

    ‘عثمان بزدار کہیں نہیں جا رہے، اپنے عہدے پر رہیں گے’

    لاہور : گورنر پنجاب  چوہدری سرور کا کہنا ہے کہ عثمان بزدار کہیں نہیں جا رہے، اپنے عہدے پر رہیں گے، عثمان بزدارکی نیب میں پیشی کوانہیں ہٹانے کا جواز قرار دینا درست نہیں۔

    تفصیلا ت کے مطابق گورنر پنجاب  چوہدری سرور نے اپنے بیان میں کہا ہے کہ عثمان بزدار کہیں نہیں جا رہے، اپنے عہدے پر رہیں گے، آب پاک اتھارٹی ایک ادارہ ہے اور ادارے کام کرتے رہیں گے۔

    گورنرپنجاب کا کہنا تھا کہ بھرتیاں شروع ہی نہیں ہوئیں میرٹ پر عمل نہ ہونے کا الزام افسوسناک ہے، نیب میں سابق حکومتوں کے وزیر اور وزرااعلی پیش ہوتے رہے ہیں۔

    چوہدری سرور نے کہا کہ  کرپشن الزامات پرنیب حکومت اوراپوزیشن دونوں کےلوگوں کو بلاتا ہے، عثمان بزدارکی نیب میں پیشی کوانہیں ہٹانے کاجوازقرار دینا درست نہیں۔

    ان کا کہنا تھا کہ وزیراعلیٰ پنجاب کووزیراعظم ،پارٹی اوراراکین پار لیمنٹ کااعتمادحاصل ہے، نیب کس کو بلاتاہے یہ نیب کا اختیار ہےحکومت کاکوئی لینا دینا نہیں ۔

    گورنرپنجاب نے کہا کہ نیب دفترکےباہرپیش آئےواقعے کی شفاف تحقیقات ہوں گی، حتمی انکوائری کے بعد ذمےداروں کےخلاف حکومت ایکشن لے گی  ، نیب صرف اپوزیشن نہیں ہمارے لوگوں کوبھی بلا رہی ہے ۔

    چوہدری محمدسرور  کا مزید کہنا تھا کہ اپوزیشن کے خلاف ایک مقدمہ بھی پی ٹی آئی حکومت نےنہیں بنایا ،آب پاک اتھارٹی میں ایک بھر تی نہیں ہوئی 300کہاں سے ہو گئیں؟

  • عثمان بزدار کے خلاف 2 وعدہ معاف گواہ سامنے آ گئے

    عثمان بزدار کے خلاف 2 وعدہ معاف گواہ سامنے آ گئے

    لاہور: نجی ہوٹل کو غیر قانونی شراب لائسنس اجرا کیس میں وزیر اعلیٰ عثمان بزدار کے خلاف 2 وعدہ معاف گواہ سامنے آ گئے۔

    ذرایع کے مطابق وزیر اعلیٰ پنجاب عثمان بزدار کے خلاف 2 افراد وعدہ معاف گواہ بننے کو تیار ہو گئے ہیں، سابق ڈی جی ایکسائز سمیت دو افراد نے وعدہ معاف گواہ بننے کی درخواست دے دی۔

    ذرایع کا کہنا ہے کہ وعدہ معاف گواہ بننے والے دوسرے شخص کا نام راز میں رکھا جا رہا ہے، دونوں وعدہ معاف گواہان نے بیان دیا ہے کہ وزیر اعلیٰ آفس سے لائسنس جاری کرنے کے لیے ان پر دباؤ ڈالا گیا تھا۔


    یاد رہے کہ آج قومی احتساب بیورو ( نیب) نے شراب کےغیر قانونی لائسنس کیس میں وزیر اعلیٰ پنجاب عثمان بزدار کو طلب کیا تھا، جہاں انھیں ایک سوال نامہ دے دیا گیا ہے، اور اثاثوں کی تفصیلات طلب کرتے ہوئے تمام مطلوبہ دستاویزات 18 اگست تک فراہم کرنے کی ہدایت کی گئی۔

    نجی ہوٹل کو شراب کا لائسنس عثمان بزدار نے جاری کیا یا کسی اور نے؟ حقیقت سامنے آ گئی

    نیب کی مشترکہ ٹیم نے عثمان بزدار سے ایک گھنٹہ 40 منٹ پوچھ گچھ کی، ذرایع کا کہنا ہے کہ عثمان بزدار کو جاری کردہ سوالات 12 صفحات پر مشتمل ہیں، بعض سوالوں کے بارے میں وزیر اعلیٰ نے لاعلمی کا اظہار کیا۔

    پیشی کے بعد عثمان بزدار نے ایک ٹویٹ میں کہا کہ میں قانونی تقاضے پورے کرتے ہوئے ذاتی حیثیت میں نیب میں پیش ہوا اور اپنا مؤقف پیش کیا، میں نے انکوائری کے معاملے پر نیب کو حقائق سے آگاہ کیا، نئے پاکستان میں کوئی قانون سے بالاتر نہیں، قوم نے کل قانون شکنی اور آج قانون پسندی کا مظاہرہ دیکھا، ہم پنجاب میں قواعد و ضوابط کے مطابق امور حکومت چلا رہے ہیں۔

  • نوجوانوں کو با اختیار بنا کر نئے پاکستان کے مقاصد حاصل کریں گے: عثمان بزدار

    نوجوانوں کو با اختیار بنا کر نئے پاکستان کے مقاصد حاصل کریں گے: عثمان بزدار

    لاہور: وزیر اعلیٰ پنجاب عثمان بزدار کا کہنا ہے کہ نئے پاکستان کی تعمیر میں نوجوانوں کا کردار بہت اہمیت رکھتا ہے، نوجوانوں کو با اختیار بنا کر نئے پاکستان کے مقاصد حاصل کریں گے۔

    تفصیلات کے مطابق وزیر اعلیٰ پنجاب سردار عثمان بزدار نے نوجوانوں کے عالمی دن پر اپنے پیغام میں کہا کہ نئے پاکستان کی تعمیر میں نوجوانوں کا کردار بہت اہمیت رکھتا ہے، کسی بھی ملک کی ترقی میں نوجوان کلیدی کردار ادا کرتے ہیں۔

    عثمان بزدار کا کہنا تھا کہ پاکستان کی آبادی کا بڑا حصہ نوجوانوں پر مشتمل ہے، آبادی کے اس بڑے حصے کو حقیقی معنوں میں با اختیار بنا رہے ہیں۔

    انہوں نے کہا کہ نوجوانوں پر سرمایہ کاری حکومت کی ترجیحات میں ہے، پاکستانی نوجوان بے پناہ صلاحیتوں اور ذہانت سے مالا مال ہیں، نوجوانوں کو با اختیار بنا کر نئے پاکستان کے مقاصد حاصل کریں گے۔

    خیال رہے کہ موجودہ صوبائی و وفاقی حکومت کی جانب سے نوجوانوں کے لیے کئی اقدامات کیے جارہے ہیِں۔ وفاقی حکومت کی انہی کوششوں کی وجہ سے پاکستان شنگھائی تعاون تنظیم کی یوتھ کونسل کا مستقل رکن بن چکا ہے۔

    وزیر اعظم عمران خان کے معاون خصوصی برائے امور نوجوانان عثمان ڈار کا کہنا تھا کہ وزیر اعظم کا کامیاب جوان پروگرام اور یوتھ کونسل کا قیام درست فیصلہ تھا۔ نوجوان اب ایس سی او کی یوتھ کونسل اجلاس میں شریک ہو سکیں گے اور اسکل ڈویلپمنٹ کے پروگرامز میں نوجوانوں کی شرکت ممکن ہوسکے گی۔

  • نجی ہوٹل کو شراب کا لائسنس عثمان بزدار نے جاری کیا یا کسی اور نے؟ حقیقت سامنے آ گئی

    نجی ہوٹل کو شراب کا لائسنس عثمان بزدار نے جاری کیا یا کسی اور نے؟ حقیقت سامنے آ گئی

    لاہور: نجی ہوٹل کو شراب کا لائسنس کس نے جاری کیا، وزیر اعلیٰ پنجاب عثمان بزدار نے یا کسی اور نے، اس سلسلے میں اے آر وائی نیوز نے اہم سرکاری خطوط کا ریکارڈ حاصل کر لیا ہے۔

    تفصیلات کے مطابق وزیر اعلیٰ پنجاب عثمان بزدار پر نجی ہوٹل کو شراب کا غیر قانونی لائسنس جاری کرنے کا الزام ہے، نیب نے انھیں 12 اگست کو طلب کیا ہے، نیب کا کہنا ہے کہ شراب کا پرمٹ جاری کرتے ہوئے پالیسی اور قانون نظر انداز کیے گئے، ڈی جی ایکسائز کے اختیارات کا غیر قانونی طور پر استعمال کیا گیا۔

    اے آر وائی نیوز نے لائسنس کے اجرا سے متعلق سرکاری خطوط کا ریکارڈ حاصل کر لیا ہے، جس سے معلوم ہوتا ہے کہ نجی ہوٹل کو شراب کا لائسنس ڈی جی ایکسائز پنجاب نے جاری کیا، عثمان بزدار نے شراب کا لائسنس دیے جانے کی کوئی سمری منظور نہیں کی۔

    ذرایع کا کہنا ہے کہ وزیر اعلیٰ کے پرنسپل سیکریٹری نے سمری وزیر اعلیٰ تک پہنچنے سے پہلے ہی روک لی تھی، لائسنس کی درخواست پر مبنی سمری 2 مرتبہ وزیر اعلیٰ کو بھیجنے کی کوشش کی گئی تھی، سمری براہ راست وزیر اعلیٰ کو بھیجنے کی کوشش پر متعلقہ ادارے کے افسران کی سرزنش بھی ہوئی تھی۔

    ذرایع نے بتایا کہ پرنسپل سیکریٹری نے سمری براہ راست وزیر اعلیٰ کو بھجوانے پر اظہار ناراضگی کیا، خط میں متعلقہ ادارے سے کہا گیا کہ غیر ضروری طور پر کیسز وزیر اعلیٰ کو نہ بھجوائے جائیں، پرنسپل سیکریٹری نے چیف سیکریٹری کی ہدایات کو بھی خط کا حصہ بنایا۔

    وزیر اعلیٰ سے منظوری نہ ملنے پر ڈی جی ایکسائز نے سمری کی منظوری دے دی تھی، بعد میں تعینات ہونے والے دوسرے ڈی جی نے شراب کا لائسنس منسوخ کر دیا، نجی ہوٹل نے لائسنس منسوخ ہونے پر لاہور ہائی کورٹ سے رجوع کر لیا تھا، لاہور ہائی کورٹ کی جانب سے لائسنس بحال کرنے کی استدعا منظور کی گئی۔

    معلوم ہوا ہے کہ وزیر اعلیٰ پنجاب عثمان بزدار کا لائسنس کی منظوری یا منسوخی سے براہ راست کوئی تعلق نہیں تھا۔

  • 2023 تک 10 ارب پودے لگانے کا ہدف پورا کرنے کے لیے پرعزم ہیں، عثمان بزدار

    2023 تک 10 ارب پودے لگانے کا ہدف پورا کرنے کے لیے پرعزم ہیں، عثمان بزدار

    لاہور: وزیراعلیٰ پنجاب سردار عثمان بزدار کا کہنا ہے کہ 2023 تک 10 ارب پودے لگانے کا ہدف پورا کرنے کے لیے پرعزم ہیں۔

    تفصیلات کے مطابق وزیراعلیٰ پنجاب سے معاون خصوصی عثمان ڈار اور صوبائی وزیر محمد اخلاق نے ملاقات کی جس میں ٹائیگرز فورس ڈے کے انعقاد اور باہمی دلچسپی کے امور پر تبادلہ خیال کیا گیا۔

    اس موقع پر عثمان بزدار کا کہنا تھا کہ 9 اگست کو صوبے بھر میں ٹائیگرز فورس ڈے بھرپور طریقے سے منایا جائے گا،ٹائیگرز فورس ڈے پر پنجاب میں شجر کاری مہم کی520 تقریبات ہوں گی،صوبے بھر میں 12 لاکھ سے زائد پودے لگائے جائیں گے۔

    وزیراعلیٰ پنجاب کا کہنا تھا کہ پودے لگانا صدقہ جاریہ ہے،نسلوں کو صاف ماحول دیں گے،2023تک 10 ارب پودےلگانےکا ہدف پورا کرنے کے لیے پرعزم ہیں۔

    انہوں نے کہا کہ پاکستان نے سفارتی اور سیاسی محاذ پر تنازع کشمیر کو اجاگر کیا ہے،بھارت کو پیغام دیا پاکستانی قوم کشمیریوں کے ساتھ کھڑی ہے۔

    سردار عثمان بزدار کا کہنا تھا کہ نام نہاد سیکولربھارت نے مقبوضہ کشمیر میں جمہوری اقدار کا خون کیا،کشمیری عوام کے ساتھ کھڑے تھے، ہیں اور کھڑے رہیں گے۔

  • صفائی نہ ہونے کی شکایت پر عملے کے خلاف تادیبی کارروائی ہوگی: عثمان بزدار

    صفائی نہ ہونے کی شکایت پر عملے کے خلاف تادیبی کارروائی ہوگی: عثمان بزدار

    لاہور: وزیر اعلیٰ پنجاب عثمان بزدار نے عید الاضحیٰ کے بعد صفائی آپریشن جلد نمٹانے کی ہدایت کرتے ہوئے کہا کہ صفائی پر کوئی سمجھوتہ نہیں کیا جائے گا، شکایت آنے پر عملے کے خلاف تادیبی کارروائی ہوگی۔

    تفصیلات کے مطابق وزیر اعلیٰ پنجاب عثمان بزدار نے صفائی آپریشن مؤثر انداز سے جاری رکھنے کی ہدایت کی ہے، عثمان بزدار کا کہنا ہے کہ صفائی آپریشن پر مامور گاڑیاں گلیوں، سڑکوں اور محلوں کا گشت کریں۔

    وزیر اعلیٰ کا کہنا تھا کہ بر وقت آلائشیں اٹھا کر مناسب طریقے سے ٹھکانے لگائی جائیں، شہروں کی صفائی کے لیے تمام ممکنہ وسائل فراہم کیے گئے ہیں۔ صفائی پر کوئی سمجھوتہ نہیں کیا جائے گا۔

    انہوں نے کہا کہ شکایت آنے پر عملے کے خلاف تادیبی کارروائی ہوگی، شہری صفائی کے لیے قائم سیل پر رابطہ کر کے آلائشیں اٹھوائیں۔

    دوسری جانب لاہور ویسٹ مینجمنٹ کمپنی کا دوسرے روز بھی صفائی آپریشن جاری ہے، لاہور میں شدید بارش کے باوجود صفائی آپریشن بلا تعطل جاری رہا۔

    ترجمان مینجمنٹ کمپنی کے مطابق گزشتہ روز 16 ہزار 500 ٹن آلائشوں کو اکٹھا کیا گیا تھا، عید کے دوسرے روز 3 ہزار ٹن آلائشیں اکٹھی کی گئیں، کل سے اب تک مجموعی طور پر 19 ہزار 500 ٹن آلائشیں اکٹھی کی جا چکی ہیں۔

    ترجمان ویسٹ مینجمنٹ کمپنی کا کہنا ہے کہ آخری آلائش تک صفائی آپریشن جاری رہے گا۔