کوئٹہ گلیڈی ایٹرز کے اسپنر عثمان طارق کا بولنگ ایکشن رپورٹ ہوگیا، اسپنر کابولنگ ایکشن لاہور قلندرز کیخلاف میچ میں رپورٹ ہوا۔
تفصیلات کے مطابق فیلڈ امپائر احسن رضا اور کرس براؤن نے عثمان طارق کا ایکشن رپورٹ کیا، رولز کے تحت عثمان طارق پی ایس ایل میں بولنگ کر سکتے ہیں جبکہ اسپنر کا ایکشن دوبارہ رپورٹ ہونے پر پابندی عائدہو سکتی ہے۔
واضح رہے کہ گزشتہ روز پاکستان سپر لیگ کے اپنے دوسرے میچ میں کوئٹہ گلیڈی ایٹرز کو 79 رنز سے شکست کا سامنا کرنا پڑا تھا۔
لاہور قلندرز کی طرف سے دیے گئے 220 رنز کے ہدف کے تعاقب میں کوئٹہ گلیڈی ایٹرز 140 رنز پر ڈھیر ہوگئی، رائلی روسو 44 اور کوشال مینڈس 28 رنز بناکر کچھ مزاحمت کرپائے، کوئٹہ کے 6 کھلاڑی ڈبل فیگرز میں بھی داخل نہ ہوسکے۔
آل راؤنڈر فہیم اشرف نے آخر میں آؤٹ ہوئے انھوں نے 22 رنز کی اننگز کھیلی، شعیب ملک 14 رنز بنا پائے، عقیل حسین 13 رنز بنا کر آؤٹ ہوئے۔
لاہور کی طرف سے عمدہ بولنگ کرتے ہوئے رشاد حسین نے 31 رنز دیکر کوئٹہ کے 3 بیٹرز کو پویلین کی راہ دکھائی، شاہین آفریدی، سکندر رضا اور آصف آفریدی نے 2،2 وکٹیں حاصل کیں۔
اس سے قبل لاہورقلندرز نے پہلے کھیل کر 6 وکٹوں کے نقصان پر219 رنز بنائے، جارح مزاج بلے باز فخر زمان نے 39 گیندوں پر67 رنز عمدہ اننگز کھیلی، سیم بلنگز نے 19 گیندوں پر 50 رنز کی جارحانہ اننگز سے لاہور کو بڑے ٹوٹل کا موقع فراہم کیا۔
لاہور کی جانب سے اوپنر عبداللہ شفیق اور ڈیرل مچل نے 37،37 رنز کی اننگزکھیلی، سکندر رضا صرف 6 رنز بنا کر چلتے بنے۔
کوئٹہ گلیڈی ایٹر کی جانب سے ابرار احمد اور عقیل حسین نے 2،2 کھلاڑیوں کو آؤٹ کیا، عثمان طارق اور فہیم اشرف نے ایک ایک وکٹ حاصل کی۔
