ARYNews.tv | Urdu – Har Lamha Bakhabar

Tag: عثمان ڈار

  • این اے 73 ، تحریک انصاف نے خواجہ محمد آصف کی کامیابی چیلنج کر دی

    این اے 73 ، تحریک انصاف نے خواجہ محمد آصف کی کامیابی چیلنج کر دی

    لاہور : این اے 73 سیالکوٹ سے تحریک انصاف کے امیدوار عثمان ڈار نے مسلم لیگ نون کے خواجہ محمد آصف کی کامیابی چیلنج کر دی اور کہا خواجہ آصف نے اپنے کاغذات نامزدگی میں اثاثے چھپائے۔

    تفصیلات کے مطابق تحریک انصاف کے امیدوار عثمان ڈار نے الیکشن ٹربیونل میں این اے 73 سے مسلم لیگ نون کے خواجہ محمد آصف کی کامیابی کے خلاف درخواست دائر کردی۔

    دائر درخواست میں مؤقف اختیار کیا ہے کہ خواجہ آصف نے کاغذات نامزدگی کے ساتھ غیر تصدیق شدہ بیان حلفی جمع کروایا، خواجہ آصف نے اپنے کاغذات نامزدگی میں اثاثے چھپائے۔

    درخواست میں کہا گیا ہے کہ الیکشن کمیشن کا عملہ الیکشن ایکٹ پر عملدرآمد میں ناکام رہا، 53 پولنگ اسٹیشنز کے پولنگ بیگز الیکشن کے اگلے روز جمع کروائے گئے۔

    دائر درخواست میں استدعا کی 1406 ووٹوں کے فرق کی وجہ سے دوبارہ کا حکم دیا جائے اور این اے 73 سے خواجہ آصف کی کامیابی کا نوٹیفیکیشن کالعدم قرار دیا جائے۔

    عثمان ڈار نے الیکشن ٹریبونل سے حلقہ میں دوبارہ الیکشن کرانے کا حکم دینے کی استدعا بھی کی ہے۔

    خیال رہے 25 جولائی کو ہونے والے عام انتخابات میں  این اے 73 سے ن لیگ کے خواجہ آصف 116975 ووٹ لے کر کامیاب ہوئے تھے جبکہ تحریک انصاف کے امیدوار عثمان ڈار دوسرے نمبر پر تھے۔

    مزید پڑھیں :  این اے 73 میں ووٹوں کی دوبارہ گنتی‘ خواجہ آصف کی جیت برقرار

    جس کے بعد تحریک انصاف کےامیدوارعثمان ڈار نے حلقے میں ووٹوں کی دوبارہ گنتی کی درخواست دی تھی ، تاہم ووٹوں کی دوبارہ گنتی کے بعد مسلم لیگ ن کے رہنما خواجہ آصف اپنی جیت برقرار رکھنے میں کامیاب رہے تھے۔

    بعد ازاں 8 اگست کو لاہورہائی کورٹ نے بھی پاکستان تحریک انصاف کے امیدوار عثمان ڈار کی این اے 73 سیالکوٹ میں دوبارہ گنتی اور خواجہ آصف کی کامیابی کا نوٹیفکیشن روکنے کی درخواست مسترد کردی تھی ۔

    واضح رہے کہ 2013 کے الیکشن میں بھی خواجہ آصف نے عثمان ڈار کو شکست دی تھی۔

  • ہمیشہ کرپشن کے ریکارڈ کو ہی کیوں آگ لگتی ہے؟ واقعے کی حقیقت جلد سامنے ہوگی، عثمان ڈار

    ہمیشہ کرپشن کے ریکارڈ کو ہی کیوں آگ لگتی ہے؟ واقعے کی حقیقت جلد سامنے ہوگی، عثمان ڈار

    اسلام آباد : تحریک انصاف کے رہنما عثمان ڈار نے کہا ہے کہ کرپشن کا کوئی کیس منطقی انجام کو پہنچتا ہے تو ریکارڈ کو آگ لگ جاتی ہے، ہمیشہ کرپشن کے ریکارڈ کو ہی کیوں آگ لگتی ہے؟ ہماری کوشش ہوگی کہ آگ کی تحقیقات جلد سامنے آجائے۔

    ان خیالات کا اظہار انہوں نے اے آر وائی کے پروگرام سوال یہ ہے میں گفتگو کرتے ہوئے کیا، اس موقع پر وزیراطلاعات پنجاب فیاض الحسن چوہان بھی موجود تھے۔

    عثمان ڈار نے کہا کہ نندی پور منصوبے میں اربوں روپے کی تاریخ ساز کرپشن کی گئی اس کا ریکارڈ بھی جل گیا۔ ایم ایم عالم روڈ پر پلازہ میں آتشزدگی پنجاب حکومت کیلئے ٹیسٹ کیس اور لمحہ فکریہ ہے، حکومت کی پوری کوشش ہوگی آگ لگنے کی تحقیقات جلد سامنے آجائے۔

    ایک سوال کے جواب میں ان کا کہنا تھا کہ اپوزیشن دھاندلی دھاندلی کا شور کررہی ہے اب تک کوئی حلقہ نہیں بتایا، دھاندلی پر پارلیمانی کمیشن نہ بننے کی ذمہ دارخود اپوزیشن ہے، اپوزیشن یہ تو بتائے کہ کس حلقے سے تحقیقات شروع کرنی ہیں۔

    عثمان ڈار نے کہا کہ انتخابات میں مبینہ دھاندلی پرکمیشن بنایا جائے گا، پی ٹی آئی حکومت ہی الیکشن کمیشن کو بھی ٹھیک کرے گی، کوشش ہوگی کہ آئندہ عام انتخابات بائیو میٹرک سسٹم کے تحت ہوں۔

    اس موقع پر فیاض الحسن چوہان نے کہا کہ پلازہ کی چھٹی منزل پر صاف پانی کمپنی کا دفتر تھا، شہبازشریف کے داماد علی عمران سے یہ دفتر30لاکھ روپے ماہانہ پرلیا، شاپنگ پلازہ میں دفاتر بنانا غیرقانونی ہے، ریکارڈ جلانے کی پرانی روایات کے تحت کچھ گڑبڑ لگ رہی ہے۔

  • پی ٹی آئی کےعثمان ڈار کی این اے73 میں دوبارہ گنتی کی درخواست مسترد

    پی ٹی آئی کےعثمان ڈار کی این اے73 میں دوبارہ گنتی کی درخواست مسترد

    لاہور : لاہورہائی کورٹ نے پاکستان تحریک انصاف کے امیدوار عثمان ڈار کی این اے 73 سیالکوٹ میں دوبارہ گنتی اور خواجہ آصف کی کامیابی کا نوٹیفکیشن روکنے کی درخواست مسترد کردی ۔

    تفصیلات کے مطابق لاہور ہائی کورٹ میں جسٹس مامون الرشید شیخ نے این اے 73 سیالکوٹ سے پی ٹی آئی کے ناکام امیدوار عثمان ڈار کی درخواست پر سماعت کی ۔

    درخواست گزار نے مؤقف اختیار کیا کہ اس نے سیالکوٹ این اے 73 سے انتخاب لڑا اور دوسرے نمبر پر رہا تاہم گنتی کے عمل میں متعدد بے ضابطگیاں سامنے آئیں اور پریزائیڈنگ افسران نے فارم 45 پولنگ ایجنٹس کو فراہم نہیں کیا ۔

    درخواست میں کہا گیا خواجہ آصف سے صرف 1406 ووٹوں سے شکست ہوئی جبکہ حلقے میں 7 ہزار 346 ووٹ مسترد ہوئے۔

    دائر درخواست میں استدعا کی گئی ریٹرننگ افسر، کو حلقے کی دوبارہ گنتی کی درخواست دی جسے مسترد کردیا گیا لہذا عدالت حلقے میں دوبارہ گنتی کروانے کا حکم دے اور گنتی تک خواجہ آصف کی کامیابی کا نوٹیفیکیشن روکنے کا حکم دے۔

    جس کے بعد لاہور ہائی کورٹ نے این اے 73 میں دوبارہ گنتی اور خواجہ آصف کی کامیابی کا نوٹیفکیشن روکنے کی درخواست مسترد کر دی۔

    واضح رہے کہ این اے 73 سے ن لیگ کے خواجہ آصف 116975 ووٹ لے کر 1406 کی لیڈ سے جیتے تھے۔

  • این اے 73 میں ووٹوں کی دوبارہ گنتی‘ خواجہ آصف کی جیت برقرار

    این اے 73 میں ووٹوں کی دوبارہ گنتی‘ خواجہ آصف کی جیت برقرار

    سیالکوٹ: قومی اسمبلی کے حلقہ این اے 73 سیالکوٹ میں ووٹوں کی دوبارہ گنتی کے بعد مسلم لیگ ن کے رہنما خواجہ آصف اپنی جیت برقرار رکھنے میں کامیاب رہے۔

    تفصیلات کے مطابق سیالکوٹ کے حلقہ این اے 73 میں سات ہزار تین سو مسترد ووٹ اور 174 پوسٹل بیلٹ کی دوبارہ جانچ پڑتال اور گنتی کی گئی۔

    ووٹوں کی دوبارہ گنتی کے نتیجے میں تحریک انصاف کے عثمان ڈار کے 132 ووٹ جبکہ مسلم لیگ ن کے خواجہ آصف کے 45 ووٹوں میں اضافہ ہوگیا۔

    خواجہ آصف نے ایک لاکھ 16 ہزار 957 ووٹ حاصل کیے تھے جو اب بڑھ کر ایک لاکھ 17 ہزار 2 ہوچکے ہیں۔

    پاکستان تحریک انصاف کے عثمان ڈار نے ایک لاکھ 15 ہزار 464 ووٹ حاصل کیے تھے تاہم دوبارہ گنتی کے بعد ان کے مجموعی ووٹوں کی تعداد بڑھ کر ایک لاکھ 15 ہزار 596 ہوگئی۔

    خیال رہے کہ تحریک انصاف کےامیدوارعثمان ڈار نے حلقے میں ووٹوں کی دوبارہ گنتی کی درخواست کی تھی، آراو نے15 پولنگ اسٹیشنز کی دوبارہ گنتی کرائی جس پرخواجہ آصف نے اپنی فتح برقرار رکھی ہے۔

    واضح رہے کہ 2013 کے الیکشن میں بھی خواجہ آصف نے عثمان ڈار کو شکست دی تھی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • این اے 129 اور این اے 73 میں دوبارہ گنتی کی درخواست منظور، پی ٹی آئی، ن لیگی امیدوار کل طلب

    این اے 129 اور این اے 73 میں دوبارہ گنتی کی درخواست منظور، پی ٹی آئی، ن لیگی امیدوار کل طلب

    لاہور: آر او نے این اے 129 میں دوبارہ گنتی کی علیم خان کی درخواست منظور کرتے ہوئے علیم خان اور ایاز خان کل صبح 10 بجے طلب کرلیا ہے۔

    تفصیلات کے مطابق آر او نے این اے 129 میں پی ٹی آئی کے علیم خان کی دوبارہ گنتی کی درخواست منظور کرتے ہوئے کل صبح 10 بجے علیم خان اور ایاز صادق کو طلب کرلیا ہے، ریٹرننگ افسر غلام مرتضیٰ نے کل ووٹوں کی گنتی دوبارہ کرانے کا حکم دیا ہے۔

    تحریک انصاف کے علیم خان نے درخواست میں موقف اختیار کیا تھا کہ این اے 129 کے انتخابی نتائج حقائق کے برعکس دئیے گئے، پولنگ ایجنٹس کو فارم 44 اور 45 کی کاپیاں فراہم نہیں کی گئیں جبکہ بیلٹ پیپرز کی گنتی کے وقت پولنگ ایجنٹس کوباہر نکال دیا گیا۔

    علیم خان نے پی پی 162 میں بھی دوبارہ گنتی کے لیے درخواست دی تھی، آر او نے یاسین سوہل سمیت امیدواروں کو کل کا نوٹس جاری کردیا ہے۔

    علیم خان نے پی پی 162 سے یاسین سوہل کے خلاف حصہ لیا تھا، امیدوار پی پی 162 علیم خان کا کہنا تھا کہ قوانین سے ہٹ کر ووٹوں کی
    گنتی کی گئی۔

    دوسری جانب این اے 73 میں ووٹوں کی دوبارہ گنتی اب کل صبح کرائی جائے گی، پی ٹی آئی کے عثمان ڈار اور ن لیگ کے خواجہ آصف کو کل طلب کرلیا گیا ہے۔

    این اے 73 میں خواجہ آصف 116975 ووٹ لے کر 1453 کی لیڈ سے جیتے تھے، عثمان ڈار کا کہنا تھا کہ 7 ہزار سے زائد ووٹ مسترد ہوئے اس لیے دوبارہ گنتی کی جائے۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات  کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • خواجہ آصف ، فردوس عاشق ،عثمان ڈار اور عائشہ گلالئی کو الیکشن لڑنے کی اجازت مل گئی

    خواجہ آصف ، فردوس عاشق ،عثمان ڈار اور عائشہ گلالئی کو الیکشن لڑنے کی اجازت مل گئی

    اسلام آباد : خواجہ آصف ، فردوس عاشق ،عثمان ڈار اور عائشہ گلہ لئی کو الیکشن لڑنے کی اجازت مل گئی، اپیلیٹ ٹربیونل نے کاغذات نامزدگی منظوری کے خلاف درخواستیں مسترد کردیں جبکہ فاروق ستار ،آفتاب شیرپاو سمیت دیگر سیاسی رہنماوں کو بھی الیکشن ٹریبونل نے کلئیر کردیا گیا ہے
    ۔

    تفصیلات کے مطابق کاغذات نامزدگی مسترد کئے جانے کے خلاف ایلیٹ ٹربیونل میں سماعت ہوئی ، سماعت جسٹس محسن اختر کیانی نے کی ، الیکشن ٹربیونل نے خواجہ آصف ، فردوس عاشق ،عثمان ڈار اور عائشہ گلہ لئی کو الیکشن لڑنے کا گرین سگنل دے دیا۔

    الیکشن اپیلیٹ ٹریبونل نے خواجہ آصف اور عثمان ڈار کے کاغذات نامزدگی منظوری کے خلاف درخواستیں مسترد کردیں، لاہورہائی کورٹ نے عثمان ڈار کے خلاف عائد اعتراضات بے بنیاد قرار دے دیے، این اے تہتر سیالکوٹ سے خواجہ آصف اور عثمان ڈار کے درمیان ٹاکرا ہوگا۔

    فردوس عاشق اعوان کو بھی این اے بہتر سے الیکشن لڑنے کی اجازت مل گئی، ان پرکاغذات نامزدگی میں اثاثےظاہرنہ کرنےکاالزام لگایا گیا تھا جبکہ عائشہ گلالئی کوانتخابات میں حصہ لینے کی کلین چٹ دے دی، عائشہ گلہ لئی کے کاغذات نامزدگی شق این پر مسترد ہوئے تھے۔

    الیکشن ٹربیونل نے فاروق ستارکے خلاف الزامات اوراپیل مسترد کرتے ہوئے این اے245سے الیکشن لڑنے کی اجازت دے دی جبکہ آفتاب شیر پاؤ کو الیکشن کے لیے اہل قرار دیا، وہ حلقہ این اے 23 چارسدہ سے الیکشن لڑیں گے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • خواجہ آصف ن لیگ کے خالی ہونے کا رونا رو رہے ہیں، عثمان ڈار

    خواجہ آصف ن لیگ کے خالی ہونے کا رونا رو رہے ہیں، عثمان ڈار

    اسلام آباد : تحریک انصاف کے رہنما عثمان ڈار نے کہا ہے کہ خواجہ آصف کی بےچینی اور اضطراب کا سبب جانتے ہیں وہ ن لیگ کے خالی ہونے کا رونا رو رہے ہیں، معلوم تھا کہ ٹکٹوں کا اعلان ہوتے ہی ن لیگ کی چیخیں نکلیں گی۔

    ان خیالات کا اظہار انہوں نے اے آر وائی نیوز کے پروگرام سوال یہ ہے میں میزبان ماریہ میمن سے خصوصی گفتگو کرتے ہوئے کیا، خواجہ آصف کے بیان پر رد عمل دیتے ہوئے عثمان ڈار کا کہنا تھا کہ خواجہ آصف اپنی جماعت خالی ہونے کا رونا رو رہے ہیں۔

    پی ٹی آئی میں شامل ہونیوالوں نے نوازشریف پر عدم اعتماد کا اعلان کیا، لوگ عمران خان اور پارٹی کے نظریے کو دیکھ کر آرہے ہیں، معلوم تھا ٹکٹوں کا اعلان ہوتے ہی ن لیگ کی چیخیں نکلیں گی۔

    عثمان ڈار کا مزید کہنا تھا کہ اراکین کی پی ٹی آئی میں شمولیت پارٹی کی مقبولیت کا منہ بولتا ثبوت ہے، اس بار عمران خان وزیراعظم ہوگا اور خواجہ آصف ایوان سے باہر ہونگے، خواجہ آصف کا فیصلہ عوام کی عدالت میں لے جارہے ہیں، سیالکوٹ کے عوام خواجہ آصف سے ووٹ کی توہین کا بدلہ لیں گے۔

    انہوں نے بتایا کہ پارلیمانی بورڈ نے منظم طریقے سے ٹکٹس کا اعلان کیا ہے، پی ٹی آئی کو تقریباً ساڑھے4ہزار درخواستیں ملی تھیں، سیالکوٹ میں 16 ٹکٹ کیلئے125درخواستیں آئی ہیں، پارٹی میں نئے آنے والوں اور نظریاتی لوگوں کو ٹکٹ دیئے گئے، ٹکٹ نہ ملنے پر دیگر سیاسی جماعتوں میں بھی شور ہوگا، ٹکٹ جسے نہیں ملتا وہ مایوس اور سمجھتا ہے زیادتی ہورہی ہے۔

    ایک سوال کے جواب میں عثمان ڈار نے کہا کہ پاکستان کے حکمران کرپشن میں ملوث پائے گئے ہیں، سیاسی جماعتوں میں تمام لوگ کرپٹ نہیں ہوتےاچھے بھی ہوتےہیں، پارلیمانی بورڈ نےایک ایک حلقے کا سروے کرایا گیا ہے، ٹکٹ دینے پرپارلیمانی بورڈ نے اپنی معلومات کو بھی مدنظر رکھاہے۔

    مزید پڑھیں: پی ٹی آئی میں وہ لوگ شامل ہورہے ہیں جو ہر الیکشن میں ضمیر بیچتے ہیں، خواجہ آصف

    واضح رہے کہ خواجہ آصف نے اپنے ایک بیان میں کہا ہے کہ پی ٹی آئی میں وہ لوگ شامل ہورہے ہیں جو ہر الیکشن میں اپنا ضمیر بیچتے ہیں، انہوں نے کہا کہ جنہیں گٹرمیں پھینکنا چاہیے تھا، انھیں پی ٹی آئی نے ٹکٹ دے دیئے، آخر میں عمران خان کے ارد گرد سیاسی ورکر نہیں، صرف پیسے والے لوگ ہوں گے۔

    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • خواجہ آصف کا فیصلہ اب عوام کی عدالت میں ہوگا: عثمان ڈار

    خواجہ آصف کا فیصلہ اب عوام کی عدالت میں ہوگا: عثمان ڈار

    اسلام آباد: سابق وزیر خارجہ خواجہ آصف کی نااہلی کی درخواست دائر کرنے والے تحریک انصاف کے رہنما عثمان ڈار کا کہنا ہے کہ عمران خان سے مشاورت کر کے نظر ثانی اپیل پر جائیں گے، خوشی ہے خواجہ آصف کا فیصلہ اب عوام کی عدالت میں ہوگا۔

    تفصیلات کے مطابق خواجہ آصف کی نااہلی کو سپریم کورٹ کی جانب سے معطل کیے جانے کے فیصلے کے بعد درخواست گزار عثمان ڈار کا کہنا تھا کہ تفصیلی فیصلہ ملنے کے بعد مستقبل کا لائحہ عمل طے کریں گے۔

    انہوں نے کہا کہ تفصیلی فیصلہ آنے کے بعد چیئرمین عمران خان سے مشاورت کروں گا اور مشاورت کے بعد نظر ثانی کی اپیل پر جائیں گے۔

    عثمان ڈار نے کہا کہ خوشی ہے سیالکوٹ میں خواجہ صاحب کا الیکشن میں سامنا کروں گا، ان کا فیصلہ اب عوام کی عدالت میں ہوگا۔ ’خواجہ صاحب کو مبارک باد دیتا ہوں اب زبردست مقابلہ ہوگا‘۔

    انہوں نے کہا کہ نواز شریف اور مریم نواز صاحبہ سن لیں کہ یہ وہی عدالت ہے جس کی آپ تضیحک اور توہین کرتے ہیں۔

    خیال رہے کہ عثمان ڈار نے خواجہ آصف کی نا اہلی کے لیے درخواست اسلام آباد ہائی کورٹ میں دائر کی تھی جس میں مؤقف اختیار کیا تھا کہ وزیر خارجہ دبئی میں ایک پرائیویٹ کمپنی کے ملازم ہیں جہاں سے وہ ماہانہ تنخواہ بھی حاصل کرتے ہیں۔

    درخواست میں کہا گیا تھا کہ خواجہ آصف نے اقامہ الیکشن کمیشن سے چھپایا اور سرکاری عہدے پر غیر ملکی کمپنی کی ملازمت کی۔ خواجہ آصف کروڑوں روپے کی منی لانڈرنگ میں ملوث ہیں۔

    درخواست میں مزید کہا گیا تھا غیر ملکی کمپنی میں ملازمت کرنے والا شخص وزیر خارجہ کے اہم منصب پر کیسے فائز رہ سکتا ہے۔ وزیر دفاع ہوتے ہوئے غیر ملکی کمپنی کی ملازمت مفادات کا تصادم تھا۔

    عثمان ڈار کی درخواست پر فیصلہ سناتے ہوئے اسلام آباد ہائی کورٹ نے 26 اپریل کو خواجہ آصف کو نااہل قرار دیا تھا۔

    بعد ازاں خواجہ آصف نے فیصلے کے خلاف سپریم کورٹ میں اپیل دائر کی جس کا فیصلہ سناتے ہوئے آج سپریم کورٹ نے ہائی کورٹ کا فیصلہ معطل کردیا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • خواجہ آصف کی تاحیات نااہلی کا اسلام آباد ہائی کورٹ کا فیصلہ معطل

    خواجہ آصف کی تاحیات نااہلی کا اسلام آباد ہائی کورٹ کا فیصلہ معطل

    اسلام آباد : سپریم کورٹ آف پاکستان نے سابق وزیرخارجہ خواجہ آصف کی نااہلی کے خلاف نظرثانی اپیل پرمحفوظ فیصلہ سناتے ہوئے اسلام آباد ہائی کورٹ کا فیصلہ معطل کردیا۔

    تفصیلات کے مطابق سپریم کورٹ میں جسٹس عمرعطابندیال کی سربراہی میں 3 رکنی خصوصی بینچ نے سابق وزیرخارجہ خواجہ آصف کی نااہلی کے خلاف نظرثانی اپیل کی سماعت کی۔

    جسٹس عمرعطابندیال کی سربراہی میں سپریم کورٹ کے تین رکنی بینچ نے فیصلہ سناتے ہوئے سابق وزیرخارجہ خواجہ آصف کی تاحیات نااہلی کے اسلام آباد ہائی کورٹ کے فیصلے کو معطل کردیا۔

    فاضل جج نے کہا کہ اسلام آباد ہائی کورٹ کا فیصلہ کالعدم قرار دینے سے متعلق وجوہات بعد میں بتائی جائیں گی۔

    عدالت عظمیٰ کے فیصلے کے بعد خواجہ آصف کی تا حیات نا اہلی بھی ختم ہوگئی اور اب وہ آئندہ عام انتخابات میں حصہ لینے کے لیے اہل ہوں گے۔

    سپریم کورٹ میں آج سماعت کے آغاز پرتحریک انصاف کے رہنما عثمان ڈار کے وکیل نے دلائل دیتے ہوئے کہا تھا کہ خواجہ آصف کی مدت بطور کابینہ ممبر کا ریکارڈ جمع کروایا ہے اور ان کا حلف بطور وزیردیکھ لیا جائے۔

    عثمان ڈار کے وکیل نے کہا تھا کہ حلف یہ اٹھایا کہ وہ ذاتی مفاد کو خاطر میں نہیں لائیں گے لیکن وہ وزیر ہوتے ہوئے بیرون ملک ملازم بھی رہے۔

    جسٹس عمرعطا بندیال نے ریمارکس دیے تھے کہ کوئی وزیریہاں لیگل ایڈوائزرہوتو یہ بھی مفاد کا ٹکراؤ ہوگا، ٹرمپ کی مثال دیکھ لیں، اس کی بیٹی اورداماد بزنس کرتے ہیں۔

    انہوں نے کہا تھا کہ ٹرمپ صدارت اورکاروباردونوں کررہے ہیں، اس بنیاد پرکیا انہیں نا اہل کیا جاسکتا ہے جس پرعثمان ڈار کے وکیل نے کہا تھا کہ وزیرخارجہ ہوکرکیسےغیرملکی کمپنی کا ملازم رہا جاسکتا ہے۔

    جسٹس عمرعطا بندیال نے کہا تھا کہ خواجہ آصف نے 2012 میں کاروبارسے متعلق بتایا جس پر وکیل نے جواب دیا تھا کہ خواجہ آصف 2015 تک کام کرتے رہے ہیں۔

    عثمان ڈار کے وکیل نے کہا تھا کہ خواجہ آصف غیرملکی کمپنی سے تنخواہیں وصول کرتے رہے۔

    خواجہ آصف کے وکیل منیر اے ملک نے کہا تھا کہ سیکشن42 اے کی خلاف ورزی کہاں ہوئی ہے؟ میں نےتنخواہ خرچ بھی کی ہے۔

    جسٹس عمرعطا بندیال نے کہا تھا کہ آپ کے2013 کے معاہدے کے مطابق 9000 درہم تنخواہ لے رہے تھے؟ جس پرخواجہ آصف کے وکیل نے کہا کہ سالانہ ڈکلیئریشن اورکاغذات نامزدگی کا ڈکلیئریشن مختلف ہے۔

    عدالت عظمیٰ نے فریقین کے دلائل سننے کے بعد خواجہ آصف کی نا اہلی کے خلاف نظرثانی اپیل پرفیصلہ محفوظ کیا تھا۔

    خواجہ آصف تاحیات نااہل

    یاد رہے کہ اسلام آباد ہائی کورٹ نے رواں سال 26 اپریل کو تحریک انصاف کے رہنما عثمان ڈار کی درخواست پر فیصلہ سناتے ہوئے خواجہ آصف کو تا حیات نا اہل قرار دیا تھا۔

    جسٹس اطہرمن اللہ، جسٹس عامرفاروق اور جسٹس محسن اخترکیانی پرمشتمل اسلام آباد ہائی کورٹ کے تین رکنی لارجر بینچ نے فیصلہ سنایا تھا۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • خواجہ آصف مک گیا تیرا بھی شو، عثمان ڈارکا ردعمل

    خواجہ آصف مک گیا تیرا بھی شو، عثمان ڈارکا ردعمل

    اسلام آباد : پاکستان تحریک انصاف کے رہنما عثمان ڈار نے کہا کہ خواجہ آصف مک گیا تیرا بھی شو، آج5سال کی جدوجہدرنگ لائی ہے، خواجہ آصف کی گردن سےسریانکال دیا ہے۔

    تفصیلات کے مطابق پی ٹی آئی رہنما عثمان ڈار نے اسلام آباد ہائی کورٹ کے باہر میڈیا سے گفتگو میں خواجہ آصف کی نااہلی کے فیصلے پر ردعمل کا اظہار کرتے ہوئے کہا کہ خواجہ آصف مک گیا تیرا بھی شو، اللہ کا شکر ادا کرتاہوں آج 5سال کی جدوجہد رنگ لائی ہے، آج میں پاکستان بالخصوص سیالکوٹ کی عوام کے سامنے سرخرو ہوا۔

    عثمان ڈار کا کہنا تھا کہ سیالکوٹ سمیت پاکستان کےعوام کومبارکباد دیتا ہوں، آج ہم نےعوام کو ایک اورگاڈ فادرسے نجات دلائی ہے، ہماری کامیابی کا سہرا عمران خان کو جاتا ہے کیونکہ انہوں نے سرپرستی کی،عمران خان سرپرستی نہ کرتے تو شاید کیس کو منطقی انجام تک نہ پہنچاتا۔

    پی ٹی آئی رہنما نے کہا کہ جہانگیرترین اوراپنےوکیل کابھی شکریہ اداکرتاہوں، خواجہ آصف کوبہت پہلے کہا تھا میں عمران خان کا سپاہی ہوں، خواجہ آصف کی گردن سے سریا نکال دیاہے، نوازشریف اورخواجہ آصف قومی مجرم اور کاروبار کرپشن ہے۔

    عثمان ڈار نے سماجی رابطے کی ویب سائٹ ٹوئٹر پر اپنے پیغام میں کہا کہ خواجہ آصف کی گردن سے سریانکل گیا ، بنی گالہ جا کر سریے کو اپنے لیڈر کے قدموں میں رکھوں گا، 5سال کی جدوجہد رنگ لے آئی، 32سال کے بعد سیالکوٹ گاڈ فادر کے چنگل سے آزاد ہوا۔

    انھوں نے کہا کہ میرے لیڈر عمران خان پر پارلیمنٹ میں توہین آمیز زبان استعمال کرنے والے خواجہ آصف کو آج پارلیمنٹ سے ہمیشہ کیلیے باہر پھینک دیا گیا۔

    عثمان ڈارنےخواجہ آصف کوبتایا ہے شرم اورحیاکیاہوتی ہے، فواد چوہدری

    دوسری جانب تحریک انصاف کے رہنما فوادچوہدری نے فیصلے پر کہا کہ آج کاعدالتی فیصلہ آرٹیکل62ون ایف کےتحت آیاہے، آرٹیکل62ون ایف کےتحت نااہلی تاحیات ہوتی ہے، عثمان ڈارنےخواجہ آصف کوبتایا ہے شرم اور حیا کیاہوتی ہے۔

    مزید پڑھیں : عدالت نے خواجہ آصف کو نااہل قرار دے دیا

    فوادچوہدری کا کہنا تھا کہ علی باباکےساتھ 40چوروں کابھی احتساب ہورہاہے، یہ لوگ اقامےاپنےاکاؤنٹس باہررکھنےکیلئےحاصل کرتےہیں، اکاؤنٹس اس لیےباہررکھتےہیں تاکہ کمیشن وصول کرسکیں۔

    یاد رہے کہ وفاقی دارالحکومت اسلام آباد کی ہائیکورٹ نے وزیر خارجہ خواجہ آصف کو نااہل قرار دے دیا، نااہلی کا فیصلہ آنے کے بعد اب وہ وزیر خارجہ نہیں رہے اور آئندہ انتخابات میں بھی حصہ نہیں لے سکتے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔