Tag: عثمان ڈار

اسلام آباد: وزیراعظم عمران خان کا کہنا ہے کہ نوجوان ملکی معیشت میں ریڑھ کی ہڈی کی حیثیت رکھتے ہیں، نوجوانوں کے لیے وہ سب کریں گے جس سے کامیابی کی راہ ہموار ہو۔

تفصیلات کے مطابق معاون خصوصی یوتھ افیئرزعثمان ڈار نے وزیراعظم عمران خان کو کامیاب جوان پروگرام کی ماہانہ رپورٹ پیش کر دی۔ انہوں نے وزیراعظم کو پروگرام کی شفافیت، میرٹ اور درخواستوں پر بریفنگ کے دوران بتایا کہ صرف 20 دنوں میں 10لاکھ سے زائد درخواستیں موصول ہوئیں۔

عثمان ڈار نے بتایا کہ نوجوانوں کی بڑی تعداد نے 1 سے5 لاکھ تک قرض کی درخواستیں دیں، 6 لاکھ سے زائد نوجوان نئے کاروبار کا آغاز کرنا چاہتے ہیں۔ انہوں نے بریفنگ کے دوران بتایا کہ سب سے زیادہ درخواستیں پنجاب اور پختونخواسےموصول ہوئیں، درخواستوں کی اسکروٹنی کا عمل شروع کردیا ہے، قرض کی تقسیم آئندہ ماہ ہوگی۔

وزیراعظم عمران خان نے پروگرام کی زبردست پذیرائی پر اظہار اطمینان کرتے ہوئے میرٹ اور شفافیت یقینی بنانے پر معاون خصوصی عثمان ڈار کو شاباشی دی۔

وزیراعظم نے کہا کہ نوجوانوں کے لیے وہ سب کریں گے جس سے کامیابی کی راہ ہموار ہو، نوجوان ملک کا اثاثہ ہیں حکومتی سرپرستی ہرحال میں یقینی بنائیں گے۔

انہوں نے کہا کہ نوجوان ملکی معیشت میں ریڑھ کی ہڈی کی حیثیت رکھتے ہیں، یقین ہے کامیاب جوان پروگرام معاشی بہتری میں سازگار ثابت ہوگا، نئے کاروبار سے اقتصادی صورت حال میں بھی بہتری آئے گی۔

وزیراعظم عمران خان نے مزید کہا کہ نوجوانوں کے درپیش روزگار کے مسائل حل کرنا ترجیح ہے، میرٹ اور شفافیت پر کسی صورت سمجھوتہ نہیں ہونا چاہئیے۔

اسلام آباد: وزیراعظم عمران خان کے معاون خصوصی عثمان ڈار کا کہنا ہے کہ مولانا کو اندازہ ہوگیا ہے کہ وہ غلط مطالبات کر رہے ہیں، حکومت کی کوشش ہے کہ صورت حال کو جلد معمول پر لایا جائے۔

تفصیلات کے مطابق اے آروائی نیوز کے پروگرام باخبرسویرا میں بات چیت کرتے ہوئے معاون خصوصی عثمان ڈار نے کہا کہ مولانا کو اندازہ ہوگیا ہے کہ وہ غلط مطالبات کر رہے ہیں۔

عثمان ڈار نے کہا کہ دھرنے سے پہلے بھی ایک معاہدہ تھا اس کی بھی پاسداری کرنی ہے، استعفے کا مطالبہ غیرآئینی ہے انہیں مذاکرات کی ٹیبل پر آنا ہوگا۔

انہوں نے کہا کہ امید ہے حکومتی اور رہبر کمیٹیاں حتمی نتیجے پرپہنچ جائیں گی، امید ہے دھرنے کے شرکا جمعہ گھروں کی مساجد میں ادا کریں گے۔

وزیراعظم کے معاون خصوصی نے مزید کہا کہ حکومت کی کوشش ہے کہ صورت حال کو جلد معمول پر لایا جائے، مولانا نے لچک دکھائی ہے تو حکومت پرامید ہے۔

مارچ والوں کو وزیراعظم کا استعفیٰ کسی صورت نہیں ملے گا، علی محمد خان

یاد رہے کہ گزشتہ روز وزیر مملکت علی محمد خان کا کہنا تھا کہ آزادی مارچ والوں کو وزیراعظم عمران خان کا استعفیٰ کسی صورت نہیں ملے گا، ہم نے مارچ والوں کو پورے پاکستان میں کہیں نہیں روکا۔

علی محمد خان کا کہنا تھا کہ ہمارے وزیراعلیٰ پنجاب بھی جے یو آئی ف کا مارچ روک سکتے تھے لیکن انہوں نے ایسا کچھ نہیں کیا، وزیراعظم عمران خان نے سب کو ہدایت دی تھی کہ مارچ والوں کو آنے دیں۔

اسلام آباد: وزیراعظم عمران خان کے معاون خصوصی عثمان ڈار نے کہا ہے کہ نوجوانوں نے کامیاب جوان پروگرام کا زبردست خیرمقدم کیا ہے، جدید نظام کے تحت نوجوان گھر بیٹھے 5 منٹ میں اپلائی کرسکتے ہیں۔

تفصیلات کے مطابق وزیراعظم کامیاب جوان پروگرام کو ملک بھر میں زبردست پذیرائی مل رہی ہے، لانچنگ کے 72 گھنٹوں میں 18 لاکھ نوجوان نے ویب سائٹ وزٹ کیا، کامیاب جوان پروگرام کے تحت اب تک 1 لاکھ 90 ہزار آن لائن درخواستیں موصول ہوئیں ہیں۔

کامیاب جوان پروگرام نے ماضی کے تمام ریکارڈ توڑ دیے ہیں ، سابق دور میں مریم نواز کی جانب سے شروع کیا گیا پروگرام بھی پیچھے رہ گیا، لیگی حکومت کے یوتھ پروگرام کے5 سال میں 90 ہزاردرخواستیں موصول ہوئی تھیں۔

وزیراعظم عمران خان کے معاون خصوصی نے کہا کہ نوجوانوں نے کامیاب جوان پروگرام کا زبردست خیرمقدم کیا ہے، جدید نظام کے تحت نوجوان گھر بیٹھے 5 منٹ میں اپلائی کرسکتے ہیں۔

عثمان ڈار کا کہنا تھا کہ ماضی کے منصوبوں میں تکنیکی رکاوٹیں زیادہ تھیں، درخواست گزاروں میں بڑی تعداد طلبا اور فارغ التحصیل جوانوں کی ہے۔ انہوں نے کہا کہ پروگرام سے متعلق معلومات کے لیے KamyabJawan.gov.pk وزٹ کریں۔

پروگرام اتنا شفاف ہے کہ میں بھی کسی کو قرض نہیں دلا سکوں گا: عثمان ڈار

یاد رہے 17 اکتوبر کو وزیراعظم عمران خان نے ملکی تاریخ کے سب سے بڑے فلاحی منصو بے کامیاب جوان پروگرام کا افتتاح کیا تھا ، پروگرام کے تحت نوجوانوں کو ایک لاکھ روپے تک کا بلاسود جبکہ پچاس لاکھ روپے تک کا کم شرح سود پر قرض مل سکے گا۔

وزیراعظم نے افتتاحی تقریب سے خطاب میں کہا تھا کہ ہمارا ٹارگٹ ہوگا اپنے کاروبار کے لیے 10 لاکھ نوجوانوں کو قرضے دیے جائیں، کامیاب جوان پروگرام میں سفارش نہیں چلے گی، میرٹ پر کام ہوگا۔

عمران خان کا کہنا تھا کہ کامیاب جوان پروگرام وزیر اعظم آفس سے مانیٹر کیا جائے گا، میں خود اس کو مانیٹر کروں گا، سارے پاکستان کے لیے ایک یوتھ فاؤنڈیشن بنائیں گے، جس میں نوجوانوں کو ایک دوسرے کو سمجھنے کا موقع ملے گا، کوشش کریں گے پاکستان میں تعلیم کا ایک ہی نصاب آئے، بچوں کو دینی تعلیم کے ساتھ دنیاوی تعلیم اور ٹیکنالوجی بھی دینی ہے۔

اسلام آباد: پی ٹی آئی کے سینئر رہنما اسد عمر نے کہا ہے کہ کامیاب جوان پروگرام کو حقیقت بنانے کے لیے پہلے سے بھی زیادہ محنت کرنی ہوگی۔

تفصیلات کے مطابق سابق وزیر خزانہ نے ٹویٹ کرتے ہوئے کامیاب جوان پروگرام کے انعقاد پر عثمان ڈار کو مبارک باد دی، اور سراہا کہ یہ پروگرام یہاں تک آپ کی محنت سے پہنچا ہے۔

اسد عمر کا کہنا تھا پروگرام سے لاکھوں پاکستانی نوجوانوں کی زندگی بہتر ہوگی، لیکن ابھی عشق کے امتحاں اور بھی ہیں، اسے حقیقت بنانے کے لیے اور بھی محنت کرنی ہوگی۔

اسد عمر کے ٹویٹ پر معاون خصوصی عثمان ڈار نے بھی اظہار تشکر کیا، انھوں نے کہا کام یاب جوان پروگرام کی تشکیل و ترتیب میں آپ کی رہنمائی ہمیشہ ساتھ رہی، پروگرام کو حقیقت بنانے میں آپ کا کردار سب سے اہم تھا۔

یہ بھی پڑھیں:  وزیراعظم عمران خان نے کامیاب جوان پروگرام کا افتتاح کردیا

عثمان ڈار نے اسد عمر کو مخاطب کر کے کہا یہ پراجیکٹ آپ کی دل چسپی اور مدد سے ممکن ہو سکا، میں اور پاکستان کے نوجوان آپ کے شکر گزار ہیں۔

یاد رہے 17 اکتوبر کو وزیر اعظم عمران خان نے اسلام آباد کنونشن سینٹر میں ایک شان دار تقریب کے دوران کامیاب جوان پروگرام کا افتتاح کیا تھا، پروگرام کے تحت نوجوانوں کو ایک لاکھ روپے تک کا بلا سود جب کہ پچاس لاکھ روپے تک کا کم شرح سود پر قرض مل سکے گا۔

وزیر اعظم نے کہا کہ ہمارا ٹارگٹ ہوگا اپنے کاروبار کے لیے 10 لاکھ نوجوانوں کو قرضے دیے جائیں، کامیاب جوان پروگرام میں سفارش نہیں چلے گی، میرٹ پر کام ہوگا۔

اسلام آباد: مشیر برائے نوجوان امور عثمان ڈار نے کہا ہے کہ کامیاب جوان پروگرام نوجوانوں کو خود مختار بنانے کی جانب پہلا قدم ہے، نوجوان ووٹ نہ دیتے تو ہم حکومت میں نہ ہوتے۔

ان خیالات کا اظہار انھوں نے اسلام آباد کنونشن سینٹر میں کامیاب جوان پروگرام کی افتتاحی تقریب سے خطاب میں کیا، عثمان ڈار نے کہا اس پروگرام میں شفافیت کو یقینی بنایا گیا ہے، بینک بھی نہیں جانا پڑے گا، آن لائن فارم بھریں، پروگرام اتنا شفاف ہے کہ عثمان ڈار بھی کسی کو لون نہیں دلا سکے گا۔

انھوں نے کہا پاکستان میں پہلی یوتھ کونسل بن چکی ہے، جو عالمی سطح پر پاکستان کی نمایندگی کر رہی ہے، ماضی کی حکومتوں نے نوجوان طبقے کو نظر انداز کیا، پی ٹی آئی حکومت کے قیام میں نوجوان طبقے کا کلیدی کردار ہے۔

تازہ ترین:  اپنے کاروبار کے لیے 10 لاکھ نوجوانوں کو قرضے دیں گے: وزیر اعظم عمران خان

عثمان ڈار کا کہنا تھا پاکستان کے مشکل ترین معاشی حالات کے باوجود نوجوانوں کے لیے اربوں روپے کی لاگت سے کامیاب جوان پروگرام شروع کرنے پر وزیر اعظم عمران خان کا شکریہ ادا کرتے ہیں۔

خیال رہے کہ کامیاب جوان پروگرام کے معاملات کامیابی کے ساتھ دیکھنے پر وزیر اعظم عمران خان نے بھی اپنے مشیر عثمان ڈار کا شکریہ ادا کیا۔

آج اسلام آباد کنونشن سینٹر میں اس پروگرام کا افتتاح وزیر اعظم نے خود کیا، تقریب سے خطاب میں انھوں نے کہا کہ پروگرام میں میرٹ کو مد نظر رکھا جائے گا اور وہ خود وزیر اعظم ہاؤس سے اس پروگرام کو مانیٹر کریں گے۔

اسلام آباد: وزیراعظم عمران خان کے معاون خصوصی عثمان ڈار کا کہنا ہے کہ عمران خان کی شکل میں سچا اور ایماندار لیڈر پاکستان کی خوش قسمتی ہے۔

تفصیلات کے مطابق وزیراعظم عمران خان کے معاون خصوصی عثمان ڈار نے کہا کہ ملک وقوم کی ترقی کے لیے محنت کرنے والے وزیراعظم کو سالگرہ مبارک ہو۔

انہوں نے کہا کہ پوری قوم وزیراعظم کی صحت اوردرازی عمر کے لیے دعاگو ہے، عمران خان کی شکل میں سچا اور ایماندار لیڈر پاکستان کی خوش قسمتی ہے۔

وزیراعظم عمران خان کے معاون خصوصی نے کہا کہ دعا ہے اللہ وزیراعظم کے نئے پاکستان کا خواب جلد پورا کرے۔

عثمان ڈار نے کہا کہ نوجوان مقصد کے حصول میں صرف وزیراعظم کو آئیڈیل سمجھتے ہیں، وزیراعظم عزم حوصلے، استقامت کے ذریعے ملک کی تقدیر ضرور بدلیں گے۔

واضح رہے کہ وزیراعظم اور پاکستان تحریک انصاف کے سربراہ عمران خان نے 67 بہاریں دیکھ لیں۔ عمران خان 5 اکتوبر 1952 کو لاہور میں پیدا ہوئے۔

پاکستان میں سماجی رابطے کی ویب سائٹ ٹویٹر پر وزیراعظم عمران خان کی سالگرہ کے حوالے سے ٹاپ ٹرینڈ بن گیا ہے۔