اسلام آباد : آڈیو لیکس کی عدالتی انکوائری کے لئے صدر پاکستان، وزیراعظم و کابینہ کو مراسلہ بھیج دیا گیا، جس میں کہا ہے کہ آڈیو لیکس کے بعد پاکستان کی سلامتی پر بڑے سوالیہ نشان اٹھ گئے ہیں۔
تفصیلات کے مطابق آڈیو لیکس کی عدالتی انکوائری کے لئے مراسلہ صدر مملکت ، وزیراعظم وکابینہ کو بھیج دیا گیا ہے۔
قانون دان اظہر صدیق کی جانب سے مراسلہ بھجوایا گیا ہے ، مراسلے کےمتن میں کہا گیا ہے کہ آڈیو لیکس کے بعد پاکستان کی سلامتی پہ بڑے سوالیہ نشان اٹھ گئے ہیں، جس طرح سائبر سکیورٹی نے معاملات درہم برہم کیے، اس طرح یہ بڑے نظام خراب کرسکتا ہے۔
مراسلے میں کہنا ہے کہ اس عمل کے پیچھے چھپے تمام چہرے سامنے آنے چاہیں، آڈیولیکس سے پوری قوم ہیجان میں مبتلا اور سکیورٹی سے متعلق عوامی تحفظات سامنے آئے ہیں۔
مراسلے میں کہا ہے کہ قوم کے اعتماد کی بحالی کےلئے تمام حقائق سامنے لانا اداروں کی آئینی ذمہ داری ہے۔ضروری ہے کہ اس کی انکوائری جوڈیشل کمیشن کرے۔
مراسلے کے مطابق اگر اس کی انکوائری کے لیے کوئی ایکشن نہیں لیا جاتا تو اعلی عدالتوں سے رجوع کیا جائے گا۔