Tag: عدالتی نظام

لاہور: چیف جسٹس لاہور ہائی کورٹ مامون رشید کا کہنا ہے کہ قانون کے مطابق فیصلے کرنے والے ججوں کے ساتھ ہوں۔

تفصیلات کے مطابق چیف جسٹس لاہور ہائی کورٹ نے تربیت مکمل کرنے والے ججوں سے خطاب کرتے ہوئے کہا کہ عدالتی نظام سائلین کے لیے ہے، سائلین کی دادرسی کے لیے جج بروقت فیصلے کریں۔

چیف جسٹس نے کہا کہ قانون کے مطابق فیصلے کرنے والے ججوں کے ساتھ ہوں، قوانین میں تبدیلیوں سے ججوں کو آگاہ ہونا ضروری ہے، تفتیش کے نظام کی بہتری کے لیے پولیس کو کہا ہے۔

مامون رشید نے کہا کہ دہشت گردی عدالتوں کے ججوں کو مشکلات درپیش ہیں، مشکلات کے خاتمے کے لیے اقدامات کیے گئے بار ایسویسی ایشنز نے یقین دلایا ہڑتالی کلچر کا خاتمہ کریں گے۔

خیال رہے کہ دو روز قبل چیف جسٹس لاہور ہائی کورٹ جسٹس مامون رشید نے لاہور ہائی کورٹ بار ایسوی ایشن میں اسپتال کا سنگ بنیاد رکھا تھا۔

ججز،وکلا اور عملے کی تربیت پر توجہ دے رہے ہیں، چیف جسٹس

واضح رہے کہ گزشتہ ماہ چیف جسٹس آف پاکستان کا کہنا تھا کہ ججز، وکلا اور عملے کی تربیت پر توجہ دے رہے ہیں، کسی بھی معاشرے کے اقدار جانے بغیر اصلاحات کا عمل بے اثر رہتا ہے۔

اسلام آباد: چیف جسٹس آف پاکستان نے صنفی بنیادوں پر تشدد کے تیز تر ٹرائل کے لیے خصوصی عدالتیں قائم کرنے کا حکم دے دیا، انھوں نے کہا کہ 4 نومبر تک خصوصی عدالتیں قائم کر لی جائیں۔

تفصیلات کے مطابق چیف جسٹس آصف سعید کھوسہ نے حکم جاری کیا ہے کہ صنفی تشدد کے کیسز کی تیز ترین سماعتوں کے لیے خصوصی عدالتیں چار نومبر تک قائم کی جائیں۔

اس سلسلے میں لا اینڈ جسٹس کمیشن نے تمام ہائی کورٹس کو مراسلہ جاری کر دیا ہے۔

مراسلے میں کہا گیا ہے کہ ہائی کورٹس 4 نومبر تک صنفی بنیاد پر تشدد کی خصوصی عدالتیں قائم کریں اور ان عدالتوں میں خواتین اور بچوں کو ساز گار ماحول فراہم کیا جائے۔

مراسلے میں یہ بھی کہا گیا کہ خصوصی عدالتوں کے قیام کا مقصد خواتین سمیت کمزور طبقے کو فوری انصاف فراہم کرنا ہے۔

واضح رہے کہ قومی عدالتی پالیسی ساز کمیٹی نے صنفی بنیادوں پر عدالتیں قائم کرنے کا فیصلہ کیا تھا، اس سلسلے میں خصوصی طور پر تربیت یافتہ ججز کو خصوصی عدالتوں میں تعینات کیا جائے گا۔

خیال رہے کہ اس سے قبل چیف جسٹس کے حکم پر عدالتوں پر ہزاروں مقدمات کا بوجھ کم کرنے کے لیے ماڈل کورٹس قائم کی گئی تھیں، جہاں تیز ترین سماعتوں کا سلسلہ بدستور جاری ہے۔

آج بھی ان 373 ماڈل کورٹس نے مجموعی طور پر 579 مقدمات کا فیصلہ کیا، 167 ماڈل کورٹس نے قتل اور منشیات کے 129 مقدمات کا فیصلہ سنایا۔

پنجاب میں قتل کے 11، منشیات کے 39، اسلام آباد میں قتل کا 1، سندھ میں قتل کے 20 اور منشیات کے 9 مقدمات نمٹائے گئے، خیبر پختون خواہ میں قتل کے 12، منشیات کے 33 جب کہ بلوچستان میں قتل اور منشیات کے دو دو مقدمات کا فیصلہ ہوا۔

اسلام آباد: قومی عدالتی پالیسی کمیٹی نے عدالتوں اور ٹریبونلز میں ججز اور عملے کی عدم تعیناتی کا معاملہ حکومتوں سے اٹھانے کا فیصلہ کیا ہے۔

تفصیلات کے مطابق آج اسلام آباد میں چیف جسٹس پاکستان آصف سعید کھوسہ کی سربراہی میں قومی عدالتی پالیسی کمیٹی کا اجلاس منعقد ہوا، جس میں فیصلہ کیا گیا کہ عدالتوں میں ججز اور عملے کی عدم تعیناتی کا معاملہ حکومتوں سے اٹھایا جائے گا۔

اجلاس میں ماڈل سول، فیملی، رینٹ اور مجسٹریٹ کورٹس قایم کرنے کا بھی فیصلہ کیا گیا۔

چیف جسٹس نے ماڈل کورٹس کے لیے ہائی کورٹس کے چیف جسٹس صاحبان کو ججز نامزد کرنے کی ہدایت کی، فیصلہ کیا گیا کہ یہ ماڈل کورٹس روزانہ کی بنیاد پر سماعت کر کے فیصلہ کریں گی، اور ان کورٹس میں التوا نہیں دیا جائے گا۔

یہ بھی پڑھیں:  عوامی نمائندوں کا ایوان ہو یا کرکٹ کا میدان، کسی ادارے سے اچھی خبریں نہیں آرہیں: چیف جسٹس

عدالتی پالیسی کمیٹی کے اجلاس میں صنفی اور چائلڈ کورٹس کے قیام سے پہلے ججز کی ٹریننگ کا فیصلہ بھی کیا گیا، ہائی کورٹس کے چیف جسٹس صاحبان کو ذمہ داری دی گئی کہ ٹریننگ کے لیے ججز کی نامزدگیاں کریں گے۔

یاد رہے کہ چند دن قبل اسلام آباد میں ماڈل کورٹس کے ججز کے لیے فوری انصاف کی فراہمی سے متعلق تقریب میں چیف جسٹس نے کہا تھا کہ پالیسی ساز کمیٹی 24 جون کو سول اور فیملی ماڈل کورٹس کا فیصلہ کرے گی، کرایہ داری اور مجسٹریٹ ماڈل کورٹس بھی قائم کیے جائیں گے۔

انھوں نے بتایا کہ جنس کی بنیاد پر تشدد اور کم عمر ملزمان کے لیے نئی عدالتیں بنائی جائیں گی، 116 اضلاع میں خواتین پر تشدد کے خلاف عدالتیں بنا رہے ہیں، اب خواتین کو آزادی ہوگی کہ ان عدالتوں میں کھل کر بات کریں، جب کہ ملک کے تمام اضلاع میں چائلڈ کورٹس بنائے جائیں گے، جن میں عملہ سادہ لباس میں ہوگا تاکہ بچے خوف زدہ نہ ہوں۔

اسلام آباد: چیف جسٹس پاکستان آصف سعید کھوسہ نے ماڈل کورٹس کی کارکردگی کو تسلی بخش قرار دیتے ہوئے خراج تحسین پیش کیا، رمضان کے بعد ماڈل دیوانی عدالتیں بھی کام شروع کر دیں گی۔

تفصیلات کے مطابق سپریم کورٹ میں قومی عدالتی پالیسی ساز کمیٹی کا اجلاس منعقد ہوا جس میں ماڈل عدالتوں کی یکم اپریل سے 27 اپریل تک کی کارکردگی سے متعلق رپورٹ پیش کی گئی۔

رپورٹ میں بتایا کہ قتل کے 888، منشیات کے 1413 مقدمات پر فیصلہ سنایا گیا، 67 مجرمان کو سزائے موت اور 195 کو عمر قید کی سزا سنائی گئی۔

رپورٹ کے مطابق 520 دیگر مجرمان کو کل 1639 سال 8 ماہ اور 2 دن قید کی سزا دی گئی، مجموعی طور پر 8 کروڑ 70 لاکھ 75 ہزار سے زائد جرمانہ بھی عائد کیا گیا۔

یہ بھی پڑھیں:  ماڈل کورٹس کی تیز ترین سماعت جاری، ایک دن میں 71 مقدمات کا فیصلہ

اجلاس میں چیف جسٹس آصف سعید کھوسہ اور دیگر ججز نے ماڈل کورٹس کی کارکردگی کو خراج تحسین پیش کیا، اور ماڈل کورٹس کے تمام ججز کو تعریفی اسناد دینے کا فیصلہ کیا گیا۔

اجلاس میں سول ماڈل کورٹس کے لیے تجاویز کو حتمی شکل دینے کے لیے بھی مشاورت کی گئی، بتایا گیا کہ رمضان کے بعد ماڈل دیوانی عدالتیں بھی کام شروع کر دیں گی۔

خیال رہے کہ سائلین کو جلد از جلد انصاف کی فراہمی کے لیے پاکستان کی ماڈل کورٹس میں مقدمات کی تیز ترین سماعت کا سلسلہ جاری ہے، اس سلسلے میں 116 ماڈل عدالتوں نے 24 اپریل کو مجموعی طور پر 71 مقدمات نمٹائے۔

لاہور: جماعت الدعوہ پاکستان ملکی عدالتی نظام پر مکمل یقین رکھتی ہے جس کا ثبوت اس کا پاکستانی عدالتوں سےحصول انصاف کے لیئے مسلسل رجوع ہے۔

جماعت الدعوہ کی قائم کردہ ثالثی کونسل کا مقصد علماء کرام کی رہنمائی میں فریقین کی رضامندی سے کتاب و سنت کی روشنی میں ثالثی کا کردار ادا کرانا ہے،بعض حلقوں کی طرف سے اسے غلط رنگ میں پیش کیا جارہا ہے۔

یہاں یہ بات واضح رہے کہ ثالثی کونسل متبادل عدالت نہیں ہے اور نہ ہی کسی قسم کا سمن جاری کرتی ہے اور نہ ہی ثالثی کے لئے کوئی فیس لی جاتی ہے۔