ابو ظہبی: بعض دوست آپ کے لیے جان بھی دے سکتے ہیں، لیکن مال و زر ایسی شے ہے جسے دیکھ کر دوستوں کا ایمان بھی ڈگمگا جاتا ہے، ایسا ہی کچھ عرب شہری کے ساتھ ہوا۔
اردو نیوز کے مطابق متحدہ عرب امارات راس الخیمہ میں مقیم ایک عرب شہری کو اپنے دوستوں پر اندھا اعتماد مہنگا پڑ گیا، دوستوں نے اعتماد کا فائدہ اٹھا کر عرب شہری کو مالی نقصان پہنچا دیا۔
عرب شہری نے اپنے دوستوں کو، جو اس کے ہم وطن بھی تھے 2 قیمتی موبائل، سونے کے زیورات اپنی فیملی کو پہنچانے کے لیے حوالے کیے۔ دونوں کا ٹکٹ بھی دیا تاہم دونوں دوست غائب ہوگئے اور سفر بھی نہیں کیا۔
عرب شہری نے دوستوں کی دھوکا دہی کے خلاف عدالت سے رجوع کر کے اشیا واپس دلانے کی درخواست کی ہے۔
متاثرہ شہری کے دوستوں نے عدالت میں اعتراف کیا کہ ان کے دوست نے کچھ اشیا فیملی تک پہنچانے کےلیے دی تھیں تاہم ان کا سفر کا پروگرام ملتوی ہوگیا، انہوں نے یہ اشیا دوسرے دو دوستوں کے حوالے کیں جو سفر کرنے والے تھے تاہم انہوں نے ہمیں دھوکا دیا۔
عرب شہری نے عدالت میں 1 لاکھ 36 ہزار 838 درہم دلانے کا دعوی دائر کیا تھا۔
عدالت نے پیش کردہ دستاویز پر عرب شہری کے دوستوں کو 68 ہزار درہم اور عدالتی اخراجات ادا کرنے کا حکم دیا تاہم ثبوت نہ ہونے پر دیگر مطالبات مسترد کردیے۔
