Tag: عزم الحسنین عزمی

درس و تدریس سے وابستہ عزم الحسنین عزمی کا تعلق پنجاب کے شہر گجرات کے گاؤں ڈوڈے سے ہے۔ کم عمری میں مطالعے کا شوق ہوگیا تھا۔ یوں مختلف موضوعات پر کتابیں اور اخبارات و رسائل ان کے زیرِ مطالعہ رہے۔ اسی زمانے میں شاعری میں‌ دل چسپی پیدا ہوئی اور طبیعت کو موزوں پایا تو مشقِ سخن کا آغاز کیا۔ وقت کے ساتھ ان کا فن نکھرتا اور خیالات میں پختگی آتی چلی گئی۔ آج ان کا کلام ملک اور بیرونِ ملک مختلف ادبی پرچوں‌ میں شایع ہوتا ہے۔

یہاں‌ ہم عزم الحسنین عزمی کی ایک غزل اپنے باذوق کی نذر کررہے ہیں۔ ملاحظہ کیجیے۔

جہاں تھی، جس سے تھی، جتنی بنی بنائی گئی
تمہیں ملے تو زمانے سے آشنائی گئی

ہم آخری تھے جنہیں قہقہے نصیب ہوئے
ہمارے بعد ہنسی تک نہیں بنائی گئی

گناہگار تھا کچھ ہو گیا مزید میاں
کہ مے کشی سے کہاں میری اولیائی گئی

کبھی دیا نہ گیا خود پہ اختیار مجھے
یہ کائنات کبھی دسترس میں لائی گئی

فقط میں بیچتا ہوں عشق شہر میں خالص
کہ مجھ سے رتّی ہوس بھی نہیں ملائی گئی

کیے ہی جاتا ہوں پھر بھی یہ زندہ رہنے کا کام
اگرچہ کام کی اجرت نہیں بتائی گئی

کہتے ہیں شاعری سچ بولتی ہے، دلوں کے بھید کھولتی ہے۔

خواجہ حیدر علی آتش نے بھی اپنے ایک شعر میں شاعری کو کسی مرصّع ساز کا کام قرار دیا ہے اور کہتے ہیں کہ بندشِ الفاظ نگوں کے جڑنے سے کم نہیں ہے۔

عزم الحسنین عزمی کا تعلق پنجاب کے شہر گجرات کے گاؤں ڈوڈے سے ہے۔ وہ شاعر ہیں اور ان کا پیشہ درس و تدریس۔ شروع ہی سے کتاب دوست اور مطالعے کا شوق رہا۔ اردو ادب سے لگاؤ نے انھیں شاعری کی طرف راغب کیا اور غزل گوئی کا سفر شروع ہوا۔ شوق نے فکر اور فن کو پختگی عطا کی اور ان کا کلام مختلف ادبی جرائد میں شایع ہونے لگا۔ یہاں‌ ہم عزم الحسنین عزمی کی ایک غزل اپنے باذوق کی نذر کررہے ہیں۔ ملاحظہ کیجیے۔

غزل
فضول زادِ سفر کو بڑھا لیا میں نے
طلب تھی بوند کی دریا اٹھا لیا میں نے

ہدف تو روح تھی اس تیر کا مری لیکن
بدن پہ اپنی مہارت سے کھا لیا میں نے

مری طلب کا مکمل نہ بن سکا چاہے
کسی کو حسبِ ضرورت بنا لیا میں نے

شکستہ جسم بھی چلنے لگا ہے اچھا بھلا
بس ایک ضبط کا پرزہ نیا لیا میں نے

قریب تھا مرا سارا بدن جلا دیتا
پھر ایک آگ سے پانی بجھا لیا میں نے

طویل بحث سے قائل نہ دل ہوا گاہے
تو گاہے عقل کو پَل میں منا لیا میں نے

عزم الحسنین عزمی کا تعلق پنجاب کے شہر گجرات کے ایک گاؤں ڈوڈے سے ہے۔ وہ درس و تدریس سے وابستہ ہیں۔ اردو ادب سے لگاؤ رکھنے والے اس نوجوان نے شاعری کا آغاز کیا تو غزل کو اپنے خیالات اور جذبات کے اظہار کا وسیلہ بنایا۔ ان کا کلام مختلف ادبی جرائد میں شایع ہوتا رہتا ہے۔ یہاں‌ ہم عزم الحسنین عزمی کی ایک غزل اپنے باذوق کی نذر کررہے ہیں۔ ملاحظہ کیجیے۔

غزل
دستبردار نہیں ہوں میں رہا ہونے سے
قید گھٹتی نہیں زندان بڑا ہونے سے

اتنی مہلت نہ ملی خود کو سمیٹوں سارا
رہ گیا اس میں، میں عجلت میں جدا ہونے سے

ہیں بیک وقت کئی عشق سو معلوم نہیں
دل پریشاں ہے بھلا کس کے خفا ہونے سے

اتنا کافی ہے مری رہ گئی ہے بات یہاں
سر تو جاتا ہے نا مٹی میں انا ہونے سے

دل بھی مل جائیں تو ہمسائیگی رشتہ ہے میاں
ورنہ کیا فرق پڑے گھر کے ملا ہونے سے

مجھ سے پہلے تھے ابھی کتنے مناظر اوجھل
کتنے الفاظ تھے محروم صدا ہونے سے

غزل

بھنور میں تُو ہی فقط میرا آسرا تو نہیں
تُو ناخدا ہی سہی  پر  مرا  خدا تو  نہیں

اک اور مجھ کو  مری طرز کا ملا ہے یہاں
سو اب یہ سوچتا ہوں میں وہ دوسرا تو نہیں

ابھی بھی چلتا ہے سایہ جو ساتھ ساتھ مرے
بتا اے وقت کبھی  میں شجر  رہا  تو  نہیں

ہیں گہری جڑ سے شجر کی بلندیاں مشروط
سو  پستیاں یہ کہیں میرا  ارتقا تو  نہیں

جو پاس یہ مرے بے خوف چلے آتے ہیں
مرے بدن پہ پرندوں کا گھونسلا تو نہیں

اے آئنے تُو ذرا دیکھ غور سے مری آنکھ
گرے ہیں اشک کوئی خواب بھی گرا تو نہیں

اس غزل کے خالق عزم الحسنین عزمی ہیں جن کا تعلق گجرات کے گاؤں ڈوڈے سے ہے، ان کا کلام مختلف اخبارات، رسائل اور ویب سائٹس پر شایع ہوچکا ہے