کراچی: سابق گورنر سندھ اور میری پہچان پاکستان پارٹی کے سربراہ عشرت العباد کی پاکستان واپسی کے حوالے سے ان کی ترجمان نے اعلان کر دیا۔
ترجمان میری پہچان پاکستان نے بتایا کہ عشرت العباد کی دسمبر کے آخری ہفتے میں وطن واپسی ہوگی اور پارٹی نے اسلام آباد میں استقبالیہ کمیٹی تشکیل دے دی۔
عشرت العباد طویل عرصہ سیاست سے دور گمنامی میں رہے اور اب ان کی نہ صرف سیاست میں واپسی ہوئی بلکہ اگست میں انہوں نے نئی سیاسی جماعت بنانے کا بھی اعلان کیا تھا۔
پچھلے کچھ ماہ کے دوران سابق گورنر سندھ سیاسی طور پر کافی سرگرم نظر آئے اور سیاسی رہنماؤں سے ملاقاتوں کا سلسلہ شروع کیا۔ وہ مولانا فضل الرحمان، مخدوم جمیل الزمان، شیر افضل مروت و دیگر سے ملاقاتیں کر چکے ہیں۔
انہوں نے اے آر وائی نیوز کے مارننگ شو ’باخبر سویرا‘ میں گفتگو کے دوران بتایا تھا کہ وہ سندھ، پنجاب، خیبر پختونخوا، بلوچستان، گلگت بلتستان اور آزاد کشمر سمیت پورے ملک میں رابطے ہیں۔
ان کا کہنا تھا کہ میں نے 14 سالہ سندھ کیلیے خدمات انجام دیں اور اب اس خدمت کا دائرہ پورے ملک تک وسیع کرنا چاہتا ہوں، سیاست میں طویل عرصہ خاموش رہا لیکن رابطے پھر بھی سب سے تھے۔
عشرت العباد نے کہا تھا کہ ملک کو بحران اور عوام کو مایوسی سے نکالنے کیلیے وہ اپنی حکمت عملی ترتیب دے رہے ہیں اور اسی کے مطابق چل رہے ہیں۔
