کراچی: سندھ حکومت کے کرونا ایمرجنسی فنڈ میں شہریوں کی جانب سے عطیات پر ترجمان سندھ حکومت مرتضیٰ وہاب نے شکریہ ادا کرتے ہوئے کہا ہے کہ قوم کا ایک ایک پیسہ شفاف طریقے سے استعمال کریں گے۔
تفصیلات کے مطابق ترجمان سندھ حکومت مرتضیٰ وہاب نے سماجی رابطے کی ویب سائٹ ٹویٹر پر اپنے ٹویٹ میں عطیات دینے والے افراد سے اظہار تشکر کرتے ہوئے کہا ہے کہ شہریوں کے حکومت پر اعتماد پر خراج تحسین پیش کرتے ہیں۔
مرتضیٰ وہاب کا کہنا تھا کہ شہریوں اور اوور سیز کے بھرپور اعتماد سے ہمارے حوصلے مزید بلند ہوئے ہیں، 861 مختلف شخصیات نے کرونا ایمرجنسی فنڈ میں عطیات جمع کروائے۔
#SindhGovt #COVIDー19 Fund as on 3rd April had received a contribution of Rs 68,445,108 from private donors. This donation has come from various 871 generous people & is in addition to Rs 3 Billion contributed by Sindh Govt for Corona pandemic. Thank u everyone for ur kindness
— SenatorMurtaza Wahab (@murtazawahab1) April 5, 2020
انہوں نے کہا کہ فنڈ کے استعمال کے لیے 5 نجی اور سرکاری افسران پر مشتمل کمیٹی قائم کی۔ کمیٹی میں فیصل ایدھی، مشتاق چھاپرا اور ڈاکٹر عبد الباری شامل ہیں، عوام کے تعاون کے بغیر حکومت کا تنہا وبا سے نمٹنا آسان نہیں۔
مرتضیٰ وہاب نے یقین دہانی کروائی کہ اس قوم کا ایک ایک پیسہ شفاف طریقے سے استعمال کریں گے۔
اس سے قبل ایک موقع پر ترجمان کا کہنا تھا کہ جنگ میں بھی لوگوں کی آمد و رفت پر پابندی لگائی جاتی ہے،ا س وقت ہم بھی جنگ جیسی صورت حال میں ہیں۔
انہوں نے کہا تھا کہ وبا کی صورت میں ریاست کو سخت فیصلے کرنا ہوتے ہیں، ہمیں سپلائی چین کو بہتر کرنا ہوگا تاکہ لوگوں کو سامان مل سکے، حالات کنٹرول میں رہیں گے تو ہم کیوں کرفیو کی طرف جائیں گے۔
مرتضیٰ وہاب کا مزید کہنا تھا کہ ہم درست سمت میں جا رہے ہیں، خاطر خواہ نتائج ملیں گے۔
