کراچی میں گولیمار واقعے کے بعد مختلف مکاتبِ فکر کے علما کرام نے مذمت کرتے ہوئے عوام سے پرامن رہنے کی اپیل کی ہے۔
تفصیلات کے مطابق مختلف مکاتب فکر کے علمائے کرام نے کراچی کے علاقے گولیمار میں مذہبی ریلی پر شرپسند کارروائی کی پر زور مذمت کرتے ہوئے کراچی کے شہریوں سے شرپسند عناصر کا ایجنڈا ناکام بنانے کی اپیل کردی ہے۔
مولانا اورنگزیب فاروقی نے کہا کہ شہر کا امن خراب کرنے کی سازش کی گئی، کارکنان پر امن رہیں اور شرپسند عناصر کی بد امنی کی سازش کو ناکام بنائیں۔
مولانا سید شہنشاہ حسین نقوی نے کہا ہے کہ ہم شدت پسندی اور فرقہ واریت کی مذمت کرتے ہیں، مولانا نذیر عباس تقوی نے شرپسندوں کی کارروائی کی شدید الفاظ میں مذمت کی۔
مولانا تاج حنفی کا کہنا تھا کہ کراچی میں گولیمار کی حدود میں مذہبی مارچ پر شرپسندی کی مذمت کرتے ہیں۔
کراچی: مذہبی جماعت کی ریلی پر فائرنگ سے 2 افراد جاں بحق
واضح رہے کہ گزشتہ روز کراچی کے علاقے گولیمار میں مذہبی جماعت کی ریلی گزرنے پر تصادم کا واقعہ پیش آیا تھا، کشیدگی کے دوران فائرنگ سے 2 افراد جاں بحق اور 9 زخمی ہوگئے جبکہ مشتعل افراد نے کئی گاڑیوں کو بھی آگ لگادی تھی۔
پولیس حکام نے اس حوالے سے بتایا تھا کہ ایک مذہبی جماعت کی ریلی گولیمار کے علاقے سے گزر رہی تھی، جہاں پہلے سے ایک مذہبی جماعت کا کیمپ لگا تھا، فریقین میں نعرے بازی کے بعد کشیدگی بڑھی، پتھراؤ ہوا جس کے بعد فائرنگ کا واقعہ پیش آیا۔
