Tag: علی اسجد ملہی

ڈسکہ: این اے 75 سے ضمنی انتخاب لڑنے والے پی ٹی آئی امیدوار علی اسجد ملہی نے الیکشن کمیشن پر تنقید کرتے ہوئے کہا ہے کہ ’گلاس مانگنے پر الیکشن کمیشن نے پورا ڈرم دے دیا۔‘

میڈیا سے گفتگو کرتے ہوئے علی اسجد ملہی نے کہا ریٹرننگ آفیسر کے پاس فارم 45 آنے پر نتیجہ جاری کرنا قانونی طور پر لازم تھا، ہم نے سپریم کورٹ سے رٹ پٹیشن میں نتیجہ جاری کرنے کا مطالبہ کیا ہے۔

علی اسجد ملہی نے کہا کہ مخالفین نے 14 پولنگ اسٹیشنز کا نتیجہ مانگا تھا، لیکن الیکشن کمیشن نےگلاس مانگنے پر پورا ڈرم ہی دے دیا، ہم بھی پورے حلقے میں انتخاب کے لیے 200 فی صد تیار ہیں۔

پی ٹی آئی امیدوار کا کہنا تھا کہ این اے 75 میں پی ٹی آئی کے 55 ہزار ووٹ بڑھ گئے ہیں، کس نے معرکہ مارا، کون جیتا، مریم نواز یہ سب دیکھ لیں۔

علی اسجد ملہی نے سینیٹ انتخابات پر تبصرہ کرتے ہوئے کہا بے شک حفیظ شیخ ہارگئے لیکن عمران خان کا بیانیہ جیت گیا، عمران خان کے پاس اخلاقی قوت ہے، اور قوم ان کے ساتھ کھڑی ہے۔

انھوں نے نکتہ اٹھایا کہ الیکشن کمیشن این اے 75 کے لیے رات 3 بجے چیف سیکریٹری کو کال کرتا رہا، لیکن یوسف رضاگیلانی کی بات آئی تو شام 7 بجے الیکشن کمیشن بند ہو گیا تھا۔

واضح رہے کہ این اے 75 ڈسکہ میں پی ٹی آئی امیدوار علی اسجد ملہی نے گزشتہ روز الیکشن کمیشن کا فیصلہ سپریم کورٹ میں چیلنج کر دیا ہے۔