سوات (17 اگست 2025): وزیراعلیٰ کے پی علی امین گنڈاپور نے کہا ہے کہ برملا کہتا ہوں کہ صوبے کے سیلاب متاثرین کے لیے کسی کی مدد کی ضرورت نہیں۔

اے آر وائی نیوز کے مطابق وزیراعلیٰ خیبر پختونخوا علی امین گنڈاپور نے سوات کے دورے کے موقع پر پریس کانفرنس کرتے ہوئے کہا ہے کہ یہ وہ کے پی حکومت نہیں، جس کے پاس وسائل یا تنخواہ کے پیسے نہ ہوں۔ عوام کا جو ذاتی نقصان بھی ہوا ہے، ہماری حکومت ہر شخص کے نقصان کا اازالہ کرے گی۔

علی امین نے کہا کہ ہمیں سیلاب متاثرین کی بحالی کے لیے کسی مدد کی ضرورت نہیں۔ تاہم کوئی فرض ادا کرنا چاہتا ہے تو ضرور کرے۔ سیلاب سے تباہ گھروں کو دوبارہ تعمیر کریں گے اور کے پی حکومت اپنے عوام سے کیے گئے تمام وعدے پورے کرے گی۔

وزیراعلیٰ کے پی نے کہا کہ یہ اللہ تعالیٰ کی طرف سے آنے والی آفت تھی اور قدرتی آفت کا انسان مقابلہ نہیں کر سکتا۔ ایسے نقصانات سے پوری نسل تباہ ہو سکتی ہے، انہیں تحفظ دینا ہے۔ صوبے میں اپنے لوگوں کی امداد کیلیے پوری ٹیم موجود ہے اور کابینہ کے تمام ارکان متاثرہ علاقوں میں امدادی کارروائیوں کی نگرانی کر رہے ہیں۔ ریسکیو ورکرز نے دریا میں چھلانگیں لگا کر لوگوں اور بچوں کو بچایا ہے۔

علی امین گنڈاپور نے بتایا کہ وزیراعظم اور وزرا نے رابطہ کر کے مدد کرنے کی پیشکش کی۔ یہ وفاقی حکومت کی ذمہ داری ہے کہ وہ مشکل وقت میں مدد کرے، اور سمجھتے ہیں وفاقی حکومت اپنا فرض سمجھ کر ہماری مدد کرے گی۔

ان کا کہنا تھا کہ تجاوزات کیخلاف جیسا آپریشن ڈی آئی خان میں ہوا کہیں نہیں ہوا۔ پورے صوبے میں ایسا ہی آپریشن کرنا پڑے گا۔ جنہوں نے تجاوزات بنانے کی اجازت دی، ان میں سے کئی ریٹائر اور فوت ہو چکے۔ جب تجاوزات کیخلاف آپریشن کیا تو عدالت سے اسٹے لے لیا گیا۔ عوام سے اپیل ہے کہ وہ قبضوں اور تجاوزات سے گریز کرتے ہوئے حکومت سے تعاون کریں۔

وزیراعلیٰ نے کہا کہ متاثرہ علاقوں میں ریسکیو آپریشن چل رہا ہے، جس میں تمام ادارے شامل ہیں۔ تمام اضلاع میں راستے بحال کر دیے ہیں ہی ہے۔سیلاب سے سب سے زیادہ نقصان بونیر میں ہوا۔ وہاں پانی کےراستے میں قائم عمارات سے زیادہ نقصان ہوا۔ ہمارے کچھ علاقے ابھی بھی الرٹ پر ہیں۔

واضح رہے کہ این ڈی ایم اے نے خیبر پختونخوا میں حالیہ طوفانی بارشوں، کلاؤڈ برسٹ اور آسمانی بجلی گرنے کے واقعات میں 328 اموات کی تصدیق کر دی ہے۔

https://urdu.arynews.tv/kpk-ndma-confirms-328-deaths/

پشاور (4 اگست 2025): وزیر اعلیٰ خیبر پختونخوا علی امین گنڈاپور نے صوبے کے شہید پولیس افسران واہلکاروں کی فیملیز کو پلاٹ دینے کا اعلان کیا ہے۔

اے آر وائی نیوز کے مطابق وزیراعلیٰ خیبر پختونخوا علی امین گنڈاپور نے پشاور میں یوم شہدا پولیس کی تقریب سے خطاب کرتے ہوئے صوبے کے پولیس شہدا کی فیملیز کو پلاٹ دینے کا اعلان کرتے ہوئے شہدا اور زخمیوں کی فیملیز کو جشن آزادی منانے کے لیے 50، 50 ہزار روپے بھی دینے کا اعلان کیا ہے۔

وزیراعلیٰ نے کہا کہ ان کی خواہش تھی کہ ہاؤسنگ پراجیکٹ میں شہدا کی فیملی کو ایک ایک پلاٹ دوں۔ اس حوالے سے کام مکمل ہو چکا، پولیس شہدا کے علاوہ صوبے سے تعلق رکھنے والے پاک فوج کے شہدا کی فیملیز کو بھی پلاٹ دیں گے۔ ان شہدا نے ہمارے اور ہمارے بچوں کے مستقبل کیلیے جان کا نذرانہ دیا۔ شہادت کا درجہ بہت بڑا ہے، ہم اپنے شہدا کو سلام پیش کرتے ہیں۔

ان کا کہنا تھا کہ ہماری پولیس کوئی عام دہشتگردوں، اسٹریٹ فائٹرز یا جیب کتروں سے مقابلہ نہیں کر رہی بلکہ ہمارا مقابلہ ایسے دہشتگردوں سے ہے، جس نے سپر پاور کو شکست دی۔ ہمیں طاقتور فوج اور پولیس چاہیے۔ ہم سب نے مل کر یہ جنگ لڑنی اور دشمن کا مقابلہ کرنا ہے۔ چیک پوسٹ اور دیگر کاموں کیلیے 7 ارب روپے دیے ہیں۔

وزیراعلیٰ نے کہا ہے کہ کے پی میں شہدا پیکیج میں اضافہ کیا اور اس سال شہدا کے ویلفیئر فنڈ میں ایک ارب روپے بڑھائے ہیں۔ اب کسی شہدا کے لواحقین کو کسی کے پاس جانے کی ضرورت نہیں۔ پولیس کے پاس شہدا پیکج کا فنڈ پڑا ہوگا۔ وزیراعلیٰ سمیت تمام سرکاری افسر شہدا کے اہلخانہ کو کھڑے ہو کر ملیں گے۔

علی امین گنڈاپور نے بتایا کہ ہم نے پولیس کی تنخواہ بڑھائی۔ ہم پولیس میں مزید بھرتیاں کرنے لگے ہیں۔ کوشش ہوگی کہ ہر علاقے میں مقامی لوگ بھرتی کیے جائیں۔ اب تک 284 شہدا کے بچے بھی بھرتی کر چکے ہیں۔

انہوں نے فورسز پر تنقید کرنے والوں کو مخاطب کرتے ہوئے کہا کہ تنقید کرنے سے پہلے ان شہدا کی فیملی کا سوچ لیا کریں۔ اپنی فورسز کا مورال ہائی کریں اور انہیں سپورٹ کریں۔ کسی ایک کی کوتاہی پر سب کو تنقید کا نشانہ نہ بنائیں۔