Tag: علی امین گنڈاپور

پاکستان تحریک انصاف کے رہنما سلمان اکرم راجہ نے انکشاف کیا ہے کہ علی امین گنڈاپورکے ہی کہنے پر پارٹی کا عہدہ ان سے واپس لیا گیا۔

اے آر وائی کے پروگرام سوال یہ ہے میں گفتگو کرتے ہوئے سلمان اکرم راجہ کا کہنا تھا کہ علی امین گنڈاپور پر بطور وزیراعلیٰ بہت ذمہ داریاں ہیں، علی امین چاہتے ہیں صوبے کے انتظامی معاملات بہتر طریقے سے چلا سکیں، پنجاب میں تنظیمی معاملات میں تبدیلی کی ضرورت نہیں۔

سلمان اکرم راجہ نے کہا کہ صوبے کو چلانا الگ اور پارٹی کی تنظیم کو متحرک رکھنا الگ کام ہے، پی ٹی آئی بالکل کمیٹی کمیٹی نہیں کھیلنا چاہتی۔

رہنما پی ٹی آئی نے کہا کہ تحریک انصاف بند کمروں کی سیاست نہیں کرنا چاہتی، ہمارا مؤقف تھا حکومت کے پاس اختیار نہیں، چاہتے تھے گفتگو کے ذریعے معاملات آگے بڑھیں، آئین کا آرٹیکل 15، 17 احتجاج اور آواز بلند کرنے کا اختیار دیتا ہے۔

انھوں نے کہا کہ پیکا ایکٹ کے ذریعے انسانی حقوق اور آواز بلند کرنے پر ضرب لگائی گئی، پارلیمنٹ سمیت سڑکوں پر بھی احتجاج کا آپشن موجود ہے۔

سلمان اکرم نے کہا کہ ہم اپنے حقوق کے لئے کھڑے ہیں اور کھڑے رہیں گے، واضح کیا تھا اگلی نشست سے قبل خلوص کا اظہار کرنا ہے جو نہیں کیا گیا، صاحبزادہ حامد رضا کے مدرسے پر چھاپے مارے گئے۔

پشاور : وزیر اعلیٰ علی امین گنڈاپور کے افغانستان سے مذاکرات کے اعلان پر عوام کا سخت ردعمل دیتے ہوئے کہا کہ جب سےموجودہ حکومت خیبر پختونخوا میں آئی ہے صوبہ تباہ ہوگیا ہے۔

تفصیلات کے مطابق وزیر اعلیٰ علی امین گنڈاپور کے افغانستان سے مذاکرات کیلئے قبائلی عمائدین کے جرگہ بھیجنے کے اعلان پر خیبرپختونخوا کے عوام کا سخت ردعمل سامنے آیا۔

عوام نے کہا کہ صوبائی حکومت کو انفراسٹرکچر، عوامی فلاح وبہبود، بیروزگاری خاتمے اور تعلیم وصحت کے شعبوں میں اصلاحات پرتوجہ دینی چاہیے، سب سےبڑاسوال یہ ہےکہ صوبےمیں بیروزگاری دن بہ دن بڑھ رہی ہے اور بیروزگاری کابراہ راست اثرعوام کی زندگیوں پرپڑرہا ہے۔

عوام کا کہنا تھا کہ وزیراعلیٰ غیرآئینی طورپر افغانستان سے مذکرات کا شوشہ چھوڑرہےہیں، جب سے یہ صوبائی حکومت آئی ہے یہ لوگ ہمیشہ وہی کام کرتے ہیں جو ان کے اختیار میں نہیں ہوتے۔

کے پی کے شہریوں نے کہا کہ جب سے موجودہ حکومت خیبرپختونخوا میں آئی ہے صوبہ تباہ ہوگیا ہے، نہ تعلیم ہے،نہ روزگار،لوگ بدامنی کا سامنا کر رہے ہیں، چاہیے تو یہ تھا کہ یہ لوگ تعلیم کیلئے کام کرتے، صوبے میں امن کیلئے اقدامات کرتے اور روزگار فراہم کرتے کیونکہ لوگ بے روزگار ہوگئے۔

عوام نے مزید کہا کہ خیبرپختونخوا حکومت وہ کام کرے جو ان کے اختیار میں ہوں، وفاق کے اختیار میں جو کام ہوں وہ نہ کریں ، صوبہ تباہ ہو رہا ہے اور حکومت وفاق کی باتیں کر رہی ہے، یہ نہ کریں اورنہ ہی لوگوں کو دھوکہ دیں۔

خیبرپختونخوا کے عوام کا کہنا تھا کہ حکومت کرناجرگہ نہیں ہوتا، جرگہ کرنا حکومت کا کام نہیں ہے، حکومت کو چاہیے کہ اپنے عوام کیلئے ٹھوس اقدامات کریں، ہم وزیراعلیٰ خیبرپختونخوا سے درخواست کرتے ہیں کہ وہ سب سے پہلے اپنے لوگوں، خصوصاً قبائلی عوام کے بارے میں سوچیں۔

عوام نے خبردار کیا اگر یہ اقدامات نہ کئےگئےتولوگ صوبےسےباہرنکلنےپرمجبورہوجائیں گے، ہم وزیر اعلیٰ سے گزارش کرتے ہیں جو مذاکرات افغانستان کیساتھ ہورہے ہیں،وہ جس کا کام ہے ان کو وہی کرنے دیں ، آپ کا کام صحت، روزگار اور تعلیم فراہم کرنا ہے اور آپ یہ اپنے عوام کو دیں، ہم کبھی ایک جگہ اور کبھی دوسری جگہ کام تلاش کرتے ہیں، اگر اپنے صوبے میں روزگار ہوتا تو ہم یہاں رہ کر اپنا روزگار کماتے۔

پشاور: وفاقی وزیر داخلہ محسن نقوی نے وزیراعلیٰ خیبرپختونخوا علی امین گنڈاپور سے ملاقات کرکے صوبے میں قیام امن کے حوالے سے ہر ممکن تعاون کی یقین دہانی کرادی۔

تفصیلات کے مطابق وزیراعلی خیبرپختونخوا علی امین گنڈاپور نے ایوان وزیراعلیٰ آمد پر وفاقی وزیر داخلہ محسن نقوی کا خیر مقدم کیا، دونوں رہنماؤں کی ملاقات میں صوبے میں امن و امان کی صورتحال اور کرم میں قیام امن کے لیے اقدامات پر تبادلہ خیال کیا گیا۔

وزیرداخلہ محسن نقوی نے وزیراعلیٰ کے پی کو امن کیلئے ہرممکن تعاون کی یقین دہانی کرائی اور کہا کہ کےپی میں قانون نافذ کرنیوالے اداروں کی استعداد کار بڑھانے میں تعاون کرینگے۔

محسن نقوی نے کہا کہ کرم میں قیام امن اولین ترجیح ہے، اسٹیک ہولڈرز کی مشاورت سے کرم میں امن کیلئے اقدامات کی ضرورت ہے۔

محسن نقوی اور علی امین نے دہشتگردی کیخلاف جنگ میں سیکیورٹی اداروں کے شہدا کو خراج عقیدت پیچ کرتے ہوئے کہا کہ شہدا ہمارے لئے سرمایہ افتخار ہیں، لازوال قربانیوں کو سلام پیش کرتے ہیں

دوسری جانب وزیراعلیٰ خیبرپختونخوا علی امین گنڈاپور نے کہا کہ شہدا کی قربانیاں ناقابل فراموش ہیں، دہشتگردی کے عفریت کا ملکر مقابلہ کرینگے۔