Tag: علی امین گنڈاپور

  • پنجاب پولیس کو وارننگ دے رہا ہوں غلط حکم نہ مانیں: علی امین گنڈاپور

    پنجاب پولیس کو وارننگ دے رہا ہوں غلط حکم نہ مانیں: علی امین گنڈاپور

    وزیراعلیٰ خیبرپختونخواعلی امین گنڈاپور نے کہا ہے کہ پنجاب پولیس کو وراننگ دے رہا ہوں غلط حکم نہ مانیں ورنہ نتائج آپ نے خود بھگتنے ہوں گے۔

    تفصیلات کے مطابق وزیراعلیٰ خیبرپختونخوا علی امین گنڈاپور نے پشاور ہائیکورٹ میں میڈیا سے گفتگو میں کہا کہ 2017 کے پولیس ایکٹ پر کام کررہے ہیں، کوئی بھی اپنی طاقت کو بے جا استعمال نہیں کرسکتا۔

    علی امین گنڈاپور کا کہنا تھا کہ نگراں حکومت میں پولیس سے وہ کام کرائے گئے جو وہ نہیں کرنا چاہتے تھے، غیر جمہوری طریقے سے آئے ہوئے لوگوں نے آئین کو تباہ کردیا ہے۔

    وزیر اعلیٰ خیبرپختونخوا کا کہنا تھا کہ جہاں جہاں ہمیں حکم ملے گا جلسہ کریں گے یہ گولیاں، تشدد ہمارا وقت ضائع کرسکتا ہے لیکن مقصد تبدیل نہیں کرسکتا میں وزیراعلیٰ ہوں اپنے وسائل استعمال کروں گا۔

    علی امین گنڈاپور کا کہنا تھا کہ پنجاب پولیس کو وراننگ دے رہا ہوں وہ کسی کا غلط حکم نہ مانیں، نتائج آپ نے خود بھگتنے ہوں گے، عظمیٰ بخاری کہتی ہے میں خبیر پختونخوا میں جلسہ کروں، میں کیوں یہاں جلسہ کروں، پورے پاکستان میں جلسہ کرونگا، بلاول، مولانا فضل الرحمان اور دیگر جلسے کررہے ہیں انہیں کوئی روکنے والا نہیں۔

    علی امین کا مزید کہنا تھا کہ مولانا فضل الرحمان نے خود بولا کہ مجھے کہا گیا کہ پی ٹی آئی کی حکومت ختم کرو، مولانا آپ مان گئے امریکا کے کہنے پر آپ نے پی ٹی آئی کی حکومت گرائی ہے۔

  • آج انقلاب کا اعلان کررہا ہوں، اب کوئی حل نہیں ہے: علی امین گنڈاپور

    آج انقلاب کا اعلان کررہا ہوں، اب کوئی حل نہیں ہے: علی امین گنڈاپور

    پشاور: وزیراعلیٰ خیبرپختونخوا علی امین گنڈاپور کہتے ہیں آج انقلاب کا اعلان کررہا ہوں، اس کے سوا اب کوئی حل نہیں ہے۔

    تفصیلات کے مطابق وزیراعلیٰ خیبرپختونخوا علی امین گنڈاپور نے کہا ہے کہ پہلے ہماری عزتوں اور چادر و چار دیواری کو پامال کیا گیا، ہم نے  قوم و ملک کیلئے اف تک نہیں کی، اب گولیاں برسائی جارہی ہیں۔

    وزیراعلیٰ خیبرپختونخوا کا کہنا تھا کہ آج ہمارے 2 کارکنوں کو گولیاں ماری گئیں، تیسرے کا پتہ نہیں چل رہا شیل مارکر 50 سے زائد کارکنوں کو زخمی کیا گیا، ہر 3 کلو میٹر پر شیل مارے گئے، گولیاں برسائی جاتی رہیں۔

     علی امین گنڈا پور کا کہنا تھا کہ اب ہر گولی، شیل اور لاٹھی مارنے کا جواب دیا جائے گا، راولپنڈی اور پختونخوا کی عوام کو سلام پیش کرتا ہوں، آج کئی پولیس اہلکار ہمارے ہتھے چڑھے میں نے انہیں ریسکیو کیا۔

    انہوں نے کہا کہ آج انقلاب کا اعلان کر رہاہوں، اس کے علاوہ کوئی حل نہیں، ہم پر گولیاں برسائی گئیں، شیل پرشیل فائر کیے گئے، ہینڈ گرینڈ پھینکے گئے بس اب بہت ہوگیا، اب جو تم کرو گے وہ ہم کریں گے۔

  • پی ٹی آئی عدلیہ کیساتھ کھڑی ہے: امین گنڈاپور نے آئینی ترامیم کی مخالفت کردی

    پی ٹی آئی عدلیہ کیساتھ کھڑی ہے: امین گنڈاپور نے آئینی ترامیم کی مخالفت کردی

    پشاور: وزیراعلیٰ خیبرپختونخوا علی امین گنڈاپور نے آئینی ترامیم کی کھل کر مخالفت کردی۔

    وزیراعلیٰ خیبرپختونخوا علی امین گنڈاپور نے پشاور میں میڈیا سے گفتگو میں کہا آئینی ترامیم کرنے والوں کو شرم آنی چاہئے، یہ جمہوریت پر حملہ ہے اور ہم انھیں کامیاب نہیں ہونے دینگے۔

    وزیراعلیٰ کے پی نے کہا کہ یہ جو اپنے آپ کو جمہوری پارٹیاں کہتی ہیں انھیں شرم آنی چاہیے، انہوں نے سوچا کیسے یہ جمہوریت کے ہوتے ہوئے ایسا بل لائیں گے، پہلے پارلیمنٹ میں اور پھر عدالت میں جاکر ان کو شکست دینگے۔

    علی امیں گنڈا پور نے کہا کہ پاکستان تحریک انصاف عدلیہ کیساتھ کھڑی ہے، جائز حق لینے کیلئے ہر طرح  کا آئینی طریقہ کار استعمال کریں گے، ایسا بل منظور ہونا تو دور کی بات، اسے پیش کرنے کی بھی جرات نہیں ہوگی۔

    علی امین گنڈاپور نے مزید کہا کہ اسلام امن کا پیغام دیتا ہے اور ہم پر امن لوگ ہیں، میری دعا ہے کہ اللہ تعالیٰ ہمارے دلوں سے نفرتیں نکالے۔

  • علی امین گنڈاپور ساری رات کوہسار میں ایک ادارے کے پاس بیٹھے رہے، خواجہ آصف

    علی امین گنڈاپور ساری رات کوہسار میں ایک ادارے کے پاس بیٹھے رہے، خواجہ آصف

     وفاقی وزیر دفاع خواجہ آصف نے کہا ہے کہ علی امین گنڈاپور ساری رات کوہسار میں ایک ادارے کے پاس بیٹھے رہے، امین گنڈاپور سے پوچھیں کوہسار کیا کرنے گئے تھے۔

    تفصیلات کے مطابق وزیر دفاع خواجہ آصف نے قومی اسمبلی اجلاس میں خطاب کرتے ہوئے کہا کہ دو روز پہلے جو واقعہ ہوا اس پر احتجاج بھی کیا اور پی ٹی آئی کا ساتھ بھی دیا، پارلیمان کے کسی ممبر نے دو روز پہلے ہونے والے واقعے کی حمایت نہیں کی۔

    خواجہ آصف کا کہنا تھا کہ اسمبلی میں اتفاق رائے پیدا ہوا اور ایک کمیٹی بنادی گئی جو کہ اچھی بات ہے، کمیٹی میں کہا گیا مجھے مکے مارے گئے یہ ہوا وہ ہوا یہ باتیں شروع ہوگئیں، کمیٹی میں بھی اس قسم کی باتیں شروع ہوئیں تو وہاں بھی احتجاج کیا۔

    ’اس قسم کی باتیں شروع کی گئی تو اسی وقت کہا اس کمیٹی کا فائدہ نہیں رہا، کمیٹی میں ایک لمبی داستان سنائی گئی جبکہ اسمبلی میں بھی وہی داستان سنائی جاچکی تھی، ہمیں بھی پارلیمنٹ لاجز سے اٹھایا گیا تھا کیا اس کی کسی نے مذمت کی تھی ‘۔

    وفاقی وزیر دفاع خواجہ آصف نے کہا کہ کمیٹی ہاؤس کے تحفظ کیلئے بنائی گئی تھی لیکن اس کو بیانیہ بنانے کیلئے استعمال کیا گیا، پارلیمنٹ کی مضبوطی کیلئے سب کو مل کر کام کرنا ہوگا۔

    انہوں نے کہا کہ نوازشریف کی اہلیہ کا انتقال ہوا، فون پر بات کرانے کیلئے درخواستیں کی گئی، نوازشریف کی اہلیہ کے انتقال پربھی سیاست کی گئی۔

    خواجہ آصف کا کہنا تھا کہ بلاول بھٹو کی درخواست پر ایوان کی کمیٹی قائم کی گئی تھی تو کل ایسے لگا کمیٹی پی ٹی آئی کے تحفظ اور اس جماعت کو مضبوط بنانے کیلئے بنائی گئی، میں اس کمیٹی کا حصہ نہیں بننا چاہتا، وزیراعظم اور پارٹی کو آگاہ کردیا ہے۔

    مسلم لیگ ن کے رہنما نے کہا کہ کمیٹی کی جب کل کارروائی شروع ہوئی تو لگ رہا تھا پی ٹی آئی کیلئے بنائی گئی ہے، مریم نواز سے متعلق علی امین گنڈا پور نے کس قسم کی گفتگو کی، پی ٹی آئی کے دور میں نیب کا ہمارے خلاف استعمال ہوا۔

    خواجہ آصف نے کہا کہ وزیراعلیٰ پنجاب ایک بیٹی، ماں ہے اس کیلئے جو الفاظ ادا کیے دہرانا نہیں چاہتا، پی ڈی ایم حکومت اور موجودہ حکومت کا وقت دیکھا جائے تو 2 سال بنتے ہیں، اس دوران  کیا ہم نے کسی کیخلاف نیب کا استعمال کیاہے؟ کسی کیخلاف نیب کا کیس بنا؟ چیئرمین نیب جس طرح استعمال ہوا مثال نہیں دینا چاہتا۔

    خواجہ آصف نے کہا کہ میں نے گوہر صاحب کو کہا ضرور احتجاج کریں لیکن ماضی پر بھی نظر ڈالیں، نئی روایات کو جنم دینا ہے تو ماضی کی غلطیوں پر پشیمانی کا اظہار کرنا چاہیے، علی امین گنڈاپور ساری رات کوہسار میں ایک ادارے کے پاس بیٹھے رہے۔

    خواجہ آصف نے کہا کہ علی امین گنڈاپور سے پوچھیں کوہسار کیا کرنے گئے تھے، یہ کوئی سیاست ہے یہ تو ذاتی دشمنیاں ہیں، ایجنسیوں کی باتیں ہورہی ہیں۔

    انہوں نے کہا کہ اسد قیصر کے گھر میٹنگ ہوتی تھی میں نام بتا سکتا ہوں باہر کون بیٹھے ہوتے تھے، تلخی کم کرنی ہے تو اس کے طریقے موجود ہیں، بلاول بھٹونے جو تجاویز دیں تو اس میں ماضی کا اظہار بھی ہوناچاہیے، پرسوں جو واقعہ ہوا اس پر معذرت کی، کل کسی نے کہا ایوان کمزور تھا، ہم نے کوئی کنڈیشن نہیں لگائی براہ راست معذرت کی۔

    خواجہ آصف نے کہا کہ اس دور میں ایوان کمزور نہیں تھا آپ نے ایوان کو اسٹیبلشمنٹ کے پاس یرغمال رکھا ہوا تھا، اگر ماضی کو ڈیلیٹ کرنا چاہتے ہیں تو ایک مرتبہ اس پر معذرت کرلیں، کمیٹی کی ڈیمانڈ آئی اسپیکر صاحب نے فوری کمیٹی بنادی۔

    خواجہ آصف نے مزید کہا کہ میری درخواست ہے 4 سال جو کچھ اپوزیشن کیساتھ ہوا اس پر معذرت کرلیں، نوازشریف، شہبازشریف، سعدرفیق، شاہد عباسی سارے قید میں تھے، ہاتھ جوڑ کر کہتا ہوں گنڈاپور دو نمبر آدمی ہے اس پربھروسہ نہ کریں۔

  • سرجھکاؤں گا نہیں کٹواؤں گا  لیکن اپنی آزادی پر سمجھوتہ نہیں کروں گا، علی امین گنڈاپور

    سرجھکاؤں گا نہیں کٹواؤں گا لیکن اپنی آزادی پر سمجھوتہ نہیں کروں گا، علی امین گنڈاپور

    پشاور : وزیراعلیٰ خیبرپختونخوا علی امین گنڈاپور نے 9 ستمبر واقعے کے بعد پہلے خطاب میں کہا کہ سرجھکاؤں گا نہیں کٹواؤں گا لیکن اپنی آزادی پر سمجھوتہ نہیں کروں گا۔

    تفصیلات کے مطابق وزیراعلیٰ خیبرپختونخواعلی امین گنڈاپور نے بارکونسل ایسوسی ایشنز کی تقریب سے خطاب کرتے ہوئے کہا کہ ہم نے کسی سے انتقام نہیں لیااورنہ ہی صوبائی اداروں کوذاتی انتقام کیلئےاستعمال کیا، ہم نفرتیں نہیں پیدا کرنا چاہتے کیونکہ اس کانقصان ملک کو ہوتا ہے۔

    وزیراعلیٰ کے پی کا کہنا تھا کہ اپنے حق،انصاف اورحقیقی آزادی کےلیےبات کرناترک نہیں کریں گے، آئین اجازت دیتاہےکہ ہم اپنے حقوق کا دفاع کریں۔

    انھوں نے کہا کہ جب تک ہم اس صورتحال سےباہرنہیں آتے،آگےنہیں بڑھ سکتے، ہمارے ملک میں یہ آئین بار بار ٹوٹ چکا آج تک سزا نہیں ہوئی ، یہ آئین پھر ٹوٹے گا ، بار بار ٹوٹے گا کیونکہ سزا نہیں ہو رہی۔

    علی امین کا کہنا تھا کہ آئین توڑنے پر جب سزا ہو گی تو کوئی جرات نہیں کرے گا، فیصلہ کرنا ہے آئین توڑنے والوں کو آئین کے مطابق جو سزا بتائی گئی وہ دلوانی ہے۔

    انھوں بتایا کہ مجھےکہتے ہیں کہ آپ کالہجہ بڑاسخت ہے، ٹھیک ہےمیں لہجہ نرم کرلیتا ہوں لیکن میری سوچ، نظریہ کوئی نہیں بدل سکتا۔

    وزیراعلیٰ کے پی نے کہا کہ میری سوچ،میرے نظریے کوکبھی بھی کوئی قیدنہیں کر سکتا، میں سر جھکاؤں یا کٹواؤں میں اپنی آزادی پرکمپرومائزنہیں کروں گا۔

    ان کا کہنا تھا کہ کسی کےکان پرجوں نہیں رینگتی،للکاروں توبات پسندنہیں آتی، میں تمہارے باپ کا نوکر ہوں، ملازم ہوں، مزارع ہوں؟ جواب دینا پڑے گا،جواب نہیں دیں گے تو آواز اونچی کروں گا اور نکلوں گا۔

    علی امین نے اپنے خطاب میں افغانستان سے خود مذاکرات شروع کرنے کا بھی اعلان کردیا۔

  • وزیراعلی خیبرپختونخوا علی امین گنڈاپور  پشاور پہنچ گئے

    وزیراعلی خیبرپختونخوا علی امین گنڈاپور پشاور پہنچ گئے

    پشاور : وزیراعلی خیبرپختونخوا علی امین گنڈا پور پشاورپہنچ گئے، ان کے بھائی کا کہنا ہے کہ وزیراعلیٰ اسلام آباد میں طویل میٹنگ میں مصروف تھے۔

    تفصیلات کے مطابق وزیراعلی خیبرپختونخوا علی امین گنڈا پور اسلام آباد سے وزیراعلی ہاؤس پشاور پہنچ گئے۔

    وزیراعلیٰ کے پی کے بھائی فیصل امین نے پشاور پہنچنے کی تصدیق کردی اور کہا وزیراعلیٰ اسلام آباد میں طویل میٹنگ میں مصروف تھے۔

    علی امین گنڈا پور نے وزیراعلی ہاؤس پشاور پہنچ کرپارٹی قیادت سےرابطہ کیا اور پارٹی رہنماؤں سے زوم میٹنگ میں سیاسی حالات پر تبادلہ خیال کیا۔

    انہوں نے پارٹی رہنماؤں کو اسلام آباد میں اپنی طویل میٹنگ سے آگاہ کیا اور پارٹی رہنماؤں کی گرفتاری اور کے پی اسمبلی اجلاس پر مشاورت بھی کی۔

    مزید پڑھیں : علی امین گنڈا پور7 گھنٹے بعد منظرعام پر آگئے

    گزشتہ روز وزیراعلیٰ کے پی کے ایک ملاقات کیلئےاسلام پہنچے تھے اور پھر ان کا پارٹی رہنماؤں سے رابطہ منقطع ہوگیا تھا۔

    علی امین سے رابطہ نہ ہونے پر اپوزیشن لیڈرعمرایوب اورکےپی حکومت کے ترجمان بیرسٹر سیف نے تشویش کا اظہار کیا تھا۔

    بعد ازاں وزیراعلیٰ کے پی کے پیرکےروزایک ملاقات کیلئےاسلام پہنچےاورپھرانکا پارٹی رہنماؤں سے رابطہ منقطع ہوگیا،

    بعد ازاں وزیراعلیٰ کے پی پراسرار گمشدگی کے پارٹی رہنماؤں سےرابطہ میں آئے ، سات گھنٹےبعد پی ٹی آئی کے ایم این اےشاہد خٹک نے ٹویٹ کیا تھا کہ علی امین گنڈا پورکا فون کھل گیا، وزیراعلیٰ کے پی کےنےحفاظتی عملےسےرابطہ کیا۔

    اس حوالے سے نمائندہ اے آر وائی نیوز نے بتایا تھا کہ وہ کسی میٹنگ تھے جہاں موبائل جیمرز لگے ہوئے تھے جس وجہ سے ان سے رابطہ نہیں ہو پارہا تھا اور وہ جس مقام پر گئے وہاں انکی سیکیورٹی بھی نہیں گئی تھی تاہم اب انہوں نے اپنی سیکورٹی کو طلب کرلیا اور وہاں سے روانہ ہوئے۔

  • پی ٹی آئی جلسہ : علی امین گنڈاپور کے خلاف مقدمہ درج

    پی ٹی آئی جلسہ : علی امین گنڈاپور کے خلاف مقدمہ درج

    وزیر اعلیٰ کے پی علی امین گنڈاپور کے خلاف مقدمہ درج کرلیا گیا، مذکورہ مقدمہ سنگجانی تھانے میں درج کیا گیا ہے۔

    ایف آئی آر میں ضلعی انتظامیہ کے افسر کو حبس بےجا میں رکھنے کی دفعات شامل کی گئی ہیں۔ ذرائع کے مطابق جلسے کا وقت ختم ہونے کا نوٹس دینے والے افسر کو روکنے کا الزام ہے۔

    ذرائع کا کہنا ہے کہ علی امین گنڈا پور کے خلاف مقدمہ جلسہ ضوابط کی خلاف ورزی اور ریاست مخالف تقاریر پر درج کیا گیا۔

    یاد رہے کہ علی امین گنڈا پور پر الزام ہے کہ ایک روز قبل اسلام آباد میں ہونے والے جلسے کا وقت ختم ہونے پر ضلعی انتظامیہ کا افسر وزیراعلیٰ اور منتظمین کو متنبہ کرنے اور وقت ختم ہونے کا نوٹس دینے گیا تھا جس پر اُسے بٹھا لیا گیا تھا۔

    واضح رہے کہ اسلام آباد میں پرامن اجتماع اور امن عامہ بل کے تحت تین مقدمے درج کیے گئے ہیں،پی ٹی آئی رہنماؤں کیخلاف جلسہ این او سی کی خلاف ورزی پر پرچے کاٹے گئے۔

    اسلام آباد : پی ٹی آئی کے مزید 9 رہنماؤں کو حراست میں لے لیا گیا

    ایف آئی آر میں بیرسٹر گوہرعلی ،شیر افضل مروت ،شعیب شاہین، عمر گل، زرتاج گل، عامر مغل، سیمابیہ طاہر اور راجہ بشارت سمیت 28رہنماؤں کو نامزد کیا گیا ہے۔

     

  • علی امین گنڈاپور کی صحافیوں کیخلاف نامناسب زبان پر بانی پی ٹی آئی نے کیا کہا؟

    علی امین گنڈاپور کی صحافیوں کیخلاف نامناسب زبان پر بانی پی ٹی آئی نے کیا کہا؟

    راولپنڈی: بانی پی ٹی آئی نے صحافیوں سے غیررسمی گفتگو کرتے ہوئے علی امین گنڈاپور کے حوالے سے صحافی کے سوال کا جواب دیدیا۔

    وزیراعلیٰ خیبر پختونخوا علی امین گنڈاپور کی صحافیوں کیخلاف نامناسب زبان پر صحافیوں نے بانی پی ٹی آئی سے احتجاج کیا، صحافی نے بانی تحریک انصاف سے سوال کیا کہ علی امین گنڈاپور نے صحافیوں کو دھمکیاں دیں اور نامناسب زبان استعمال کی۔

    بانی پی ٹی آئی نے صحافیوں سے گفتگو کرتے ہوئے کہا کہ مجھے نہیں معلوم علی امین گنڈاپور نے کیا کہا، مجھے نہیں معلوم میں جیل میں ہوں۔

    بانی پی ٹی آئی نے کہا کہ میرے سارے کیسز جھوٹے ہیں کچھ بھی ثابت نہ کرسکے، نیب ترامیم اب ملک کا قانون بن چکا ہے، اس کو چھوڑیں یہ قانونی معاملہ ہے۔

    دریں اثنا علی امین گنڈاپورکی صحافیوں سے متعلق گفتگو پر صحافیوں کی جانب سے قومی اسمبلی میڈیا گیلری سے واک آؤٹ کیا گیا۔

    قومی اسمبلی میں رہنما تحریک انصاف عمر ایوب کا کہنا تھا کہ تحریک انصاف صحافی برادری سے غیرمشروط معافی مانگتی ہے، وزیراعلٰی کے پی صحافی برادری سے خود معذرت کریں گے۔

    اپوزیشن لیڈرقومی اسمبلی عمر ایوب نے کہا کہ صحافی مشکل ترین حالات میں کوریج کرتےہیں، پی ٹی آئی صحافی برادری کی خدمات کو قدرکی نگاہ سےدیکھتی ہے۔

    بعدازاں صحافیوں نے قومی اسمبلی اجلاس کا بائیکاٹ ختم کردیا، قومی اسمبلی اجلاس کا بائیکاٹ عمر ایوب کی معذرت کے بعد ختم کیا گیا۔

  • عدالت نے علی امین گنڈاپور کے ناقابل ضمانت وارنٹ گرفتاری منسوخ کر دیے

    عدالت نے علی امین گنڈاپور کے ناقابل ضمانت وارنٹ گرفتاری منسوخ کر دیے

    اسلام آباد: ڈسٹرکٹ اینڈ سیشن کورٹس اسلام آباد نے وزیر اعلیٰ خیبر پختونخوا علی امین گنڈاپور کے ناقابل ضمانت وارنٹ گرفتاری منسوخ کر دیے۔

    تفصیلات کے مطابق علی امین گنڈاپور کے خلاف شراب اور اسلحہ برآمدگی کیس میں وکیل ظہور الحسن جوڈیشل مجسٹریٹ شائستہ کنڈی کی عدالت میں پیش ہوئے، جج نے علی امین گنڈاپور کے وکیل کی یقین دہانی پر وارنٹ گرفتاری منسوخ کر دیے۔

    وکیل ظہور الحسن نے کہا کہ عدالت نے کہا کہ وارنٹ منسوخی کے لیے درخواست دائر کریں لیکن ابھی تحریری آرڈر نہیں آیا ہے، جب کہ نظر ثانی درخواست پر عدالت نے کہا ہے کہ ٹرائل کورٹ کے پاس احتیار ہے کہ وارنٹ منسوخ کرے۔

    جوڈیشل مجسٹریٹ شائستہ کنڈی نے کہا کہ چلیں پھر آپ درخواست دیں مجھے مطمئن کریں کہ کیوں وارنٹ منسوخ کروں، وکیل نے کہا پشاور ہائی کورٹ نے علی امین گنڈاپور کو تحفظ دیا ہے کہ اسلام آباد پولیس انھیں گرفتار نہ کرے۔

    جوڈیشل مجسٹریٹ نے استفسار کیا کہ آپ یہ چاہتے ہیں کہ عدالت کوئی بھی گارنٹی لے لے کہ ملزم پیش ہوں گے اور وارنٹ منسوخ کرے، اگر اگلی تاریخ دی جائے تو کب ملزم کو پیش کریں گے؟

    وکیل نے کہا میں حلف نامہ نہیں دیتا لیکن 21 ستمبر کو انسداد دہشت گردی عدالت میں بھی کیس ہے، 21 کو پیش ہو جائیں گے۔ مجسٹریٹ نے کہا کوئی جیالا لائیں جو ضمانت دے کہ علی امین گنڈاپور کو پیش کرے گا، لیکن ضمانت دینے والا اسلام آباد کا ہو اور شخصی ضمانت دے۔

    جج شائستہ کنڈی نے کہا کہ نظر ثانی درخواست میں ڈائریکشن آئی ہے کہ بریت کی درخواست پر فیصلہ کیا جائے، آئندہ سماعت پر بریت کی درخواست کو سن کر فیصلہ کروں گی۔

  • گرفتاری کا  خدشہ،  علی امین گنڈاپور عدالت پہنچ گئے

    گرفتاری کا خدشہ، علی امین گنڈاپور عدالت پہنچ گئے

    پشاور : وزیراعلٰی خیبرپختونخوا علی امین گنڈا پور گرفتاری کے خدشے کے پیش عدالت پہنچ گئے اور راہداری ضمانت کیلئے رجوع کرلیا۔

    تفصیلات کے مطابق وزیراعلٰی خیبرپختونخوا علی امین گنڈا پور  نے پشاور ہائیکورٹ میں راہداری ضمانت کیلئے درخواست دائرکردی۔

    جس میں درخواست آج ہی سماعت کے لئے مقرر کرنے کی استدعا کی گئی ہے۔

    گذشتہ روز اسلام آباد کی مقامی عدالت نے وزیراعلٰی خیبر پختونخوا کی عدم پیشی پر ناقابل ضمانت وارنٹ گرفتاری جاری کیے تھے۔

    اسلام آباد کی عدالت نے وزیر اعلی کو گرفتار کر کے پیش کرنے کا حکم دیا تھا۔

    جوڈیشل مجسٹریٹ شائستہ کنڈی نے تحریری حکم نامے میں کہا تھا کہ راجہ ظہور الحسن ایڈووکیٹ نے وزیراعلٰی خیبرپختونخوا کی آج عدالت پیشی کی یقین دہانی کرائی تھی لیکن آج بھی پیش نہ ہوئے اور حاضری سے استثنٰی کی درخواست دائر کی گئی۔

    حکم نامے میں کہا گیا کہ حاضری سے استثنیٰ کی درخواست کے ساتھ وزیراعلیٰ کے پی کا میڈیکل سرٹیفیکیٹ بھی لگایا گیا، ریکارڈ سے معلوم ہوتا ہے کہ وہ متعدد سماعتوں پر پیش نہیں ہوئے۔

    عدالت کا کہنا تھا کہ متعدد مواقع فراہم کیے جانے کے باوجود علی امین گنڈاپور 342 کا بیان ریکارڈ نہیں کروا رہے، ایس ایچ او تھانہ بارہ کہو وزیراعلیٰ کو گرفتار کر کے 5 ستمبر کو عدالت میں پیش کریں۔