راولپنڈی : انسداد دہشت گردی کی عدالت راولپنڈی نے 26 نومبر کے مقدمات میں علیمہ خان، علی امین گنڈا پور، شیخ وقاص اکرم سمیت پی ٹی آئی کے 18 رہنماؤں کو گرفتار کرکے پیش کرنے کا حکم دے دیا۔

تفصیلات کے مطابق راولپنڈی میں انسداد دہشت گردی کی عدالت نے 26 نومبر کو ہونے والے احتجاج کے مقدمے میں عدم پیشی پر پاکستان تحریک انصاف (پی ٹی آئی) کے 18 رہنماؤں کے ناقابلِ ضمانت وارنٹ گرفتاری جاری کر دیے۔

جج امجد علی شاہ کی عدالت میں تھانہ واہ کینٹ کے مقدمے کی سماعت کے دوران پراسیکیوشن ٹیم کی درخواست پر یہ وارنٹس جاری کیے گئے۔

عدالت نے حکم دیا ہے کہ تمام ملزمان کو گرفتار کر کے 8 اگست کو عدالت میں پیش کیا جائے۔

ناقابلِ ضمانت وارنٹ گرفتاری جاری ہونے والوں میں علیمہ خانم، علی امین گنڈاپور، شیخ وقاص اکرم، کنول شوزب، سردار منصور سلیم، زبیر خان نیازی، اجمل صابر، عامر مغل اور دیگر شامل ہیں۔

پراسیکیوشن ٹیم کے مطابق نامزد ملزمان گرفتاری سے بچنے کے لیے روپوش ہو چکے ہیں تاہم عدالت نے مقدمے کے تفتیشی افسر کو آئندہ سماعت پر مکمل ریکارڈ کے ساتھ پیش ہونے کا حکم بھی دیا ہے۔

یاد رہے کہ 26 نومبر کو ہونے والے احتجاج کے دوران مختلف دفعات کے تحت مقدمہ درج کیا گیا تھا، جس میں اشتعال انگیزی، نقصِ امن، اور پولیس سے مزاحمت جیسے الزامات شامل ہیں۔

اسلام آباد : وزیراعلیٰ خیبر پختونخواہ علی امین گنڈا پور عدالت کے سامنے سرینڈر کردیا، جس کے بعد وارنٹ گرفتاری منسوخ کردیئے۔

تفصیلات کے مطابق ڈسٹرکٹ اینڈ سیشن کورٹس اسلام آباد میں وزیر اعلیٰ کے پی علی امین گنڈا پور کیخلاف شراب و اسلحہ برآمدگی کیس کی سماعت ہوئی۔

جوڈیشل مجسٹریٹ مبشرحسن چشتی نے کیس پر سماعت کی ، علی امین نے عدالت کے سامنے سرینڈر کردیا، جس پر ان کے وارنٹ گرفتاری منسوخ کردیئے گئے۔

عدالت نے وزیراعلیٰ خیبر پختونخواہ کے ضمانتی کو دیا گیا شوکاز نوٹس بھی واپس لے لیا اور علی امین کو جانے کی اجازت دے دی۔

راجہ ظہور الحسن نے کہا آج ہم اپنا 342 کا بیان ریکارڈ نہیں کروائیں گے، عدالت پہلے بریت کی درخواست پر دلائل سنے اس حوالے سے آڈر موجود ہے۔

جس ہر جج مبشر حسن چشتی کا کہنا تھا کہ چلیں آپ اپنے دلائل شروع کریں میں سن رہا ہوں، وکیل صفائی نے کہا میں آج دلائل نہیں دے سکتا، مجھے کم از کم 5 گھنٹے چاہیے۔

مزید پڑھیں : علی امین گنڈا پور کو گرفتار کرکے عدالت میں پیش کرنے کا حکم

جج مبشر حسن چشتی کا کہنا تھا کہ ہمارے پاس 5 گھنٹے ہیں آپ شروع کریں تو وکیل صفائی راجہ ظہور الحسن نے کہا اگر میں نے 5 گھنٹے دلائل دینے ہیں تو کم از کم 5 دن تیاری کیلئے بھی چاہیے، عدالت نے ہمیں ترمیم والا 342 کا سوالنامہ دے دے ہم دلائل اور بیانات اکٹھے دے دیں گے۔

جج مبشر نے ریمارکس دیئے آج 3 بجے آپ کو 342 کا سوالنامہ مل جائے گا، جس پر وزیراعلیٰ کے پی نے کہا سر میں 21 تاریخ کو نہیں آیا تھا کیونکہ سینٹ الیکشن تھے میں وزیر اعلیٰ کیساتھ ووٹر بھی ہوں۔

جج مبشر حسن چشتی نے مزید کہا کہ ہم نے تو آپشن دیا تھا آپ آنلائن اپنا بیان ریکارڈ کروا دیتے تو وزیراعلیٰ نے کہا میں آن لائن آگیا تھا عدالت کا نیٹ ایشو ہے تاہم کیس کی سماعت میں 3 بجے تک کا وقفہ کردیا گیا۔

اسلام آباد : سیشن عدالت نے شراب واسلحہ برآمدگی کیس میں وزیر اعلیٰ کے پی علی امین گنڈا پور کو گرفتار کرکے عدالت میں پیش کرنے کا حکم دے دیا۔

تفصیلات کے مطابق وزیر اعلیٰ کے پی علی امین گنڈا پور کیخلاف شراب واسلحہ برآمدگی کیس کی سماعت ہوئی۔

سیشن عدالت نے علی امین گنڈا پور کے وارنٹ گرفتاری جاری کردیئے اور وزیراعلیٰ کو گرفتار کرکے عدالت میں پیش کرنے کا حکم دے دیا۔

جوڈیشل مجسٹریٹ مبشر حسن چشتی نے وارنٹ گرفتاری جاری کئے ساتھ ہی وزیراعلیٰ کے پی کی حاضری سے استثنیٰ کی درخواست مسترد کردی۔

عدالت نے کہا کل 342 کا بیان ریکارڈ کرانے کیلئے آخری موقع ہے ورنہ یہ حق ختم کردیا جائے گا، بعد ازاں کیس کی سماعت کل تک ملتوی کردی۔

مزید پڑھیں : شراب و اسلحہ برآمدگی کا کیس، علی امین کو بیان ریکارڈ کروانے کا آخری موقع مل گیا

یاد رہے گذشتہ سماعت میں وزیر اعلیٰ کے پی علی امین کو عدالت نے شراب و اسلحہ برآمدگی کیس میں بیان ریکارڈ کروانے کا آخری موقع دیا تھا۔

جوڈیشل مجسٹریٹ مبشر حسین چشتی نے تحریری فیصلے میں کہا تھا کہ 21 جولائی کو علی امین نے 342 کا بیان ریکارڈ نہ کروایا تو مزید موقع نہیں دیا جائے گا۔

حکم نامے میں کہا گیا تھا کہ آئندہ سماعت پر بیان ریکارؑڈ نہ کروانے پر عدالت کیس کا فیصلہ بھی سناکتی ہے، 8 سال سے کیس زیر التوا ہے، مئی 2024 سے پراسیکیوشن گواہوں کے بیانات ریکارڈ کرواچکی ہے۔

اسلام آباد: ڈسٹرکٹ اینڈ سیشن کورٹ نے شراب و اسلحہ برآمدگی کیس میں علی امین گنڈاپور کو گرفتار کر کے پیش کرنے کا حکم دے دیا۔

تفصیلات کے مطابق اسلام آباد کی ڈسٹرکٹ اینڈ سیشن کورٹ میں وزیراعلیٰ خیبر پختونخواہ علی امین گنڈا پور کے خلاف شراب و اسلحہ برآمدگی کیس کی سماعت ہوئی۔

عدالت نے وزیراعلیٰ خیبر پختونخواہ کے وارنٹ گرفتاری جاری کر دیے اور ان کو گرفتار کر کے پیش کرنے کا حکم دیا۔

عدالت نے وزیراعلیٰ کی حاضری سے استثنیٰ کی درخواست مسترد کردی، جوڈیشل مجسٹریٹ مبشر حسن چشتی نے وارنٹ جاری کیے

بعد ازاں کیس کی سماعت 21 جولائی تک ملتوی کر دی گئی۔

اس سے قبل ڈسٹرکٹ اینڈ سیشن کورٹس اسلام آباد میں وزیر اعلیٰ خیبرپختونخوا کے خلاف آڈیو لیک کیس کی سماعت ہوئی تھی ، جس میں ان کی جانب سے
حاضری سے استثنیٰ کی درخواست دائر کی تھی۔

وکیل نے بتایا تھا کہ علی امی کی پشاور ہائیکورٹ سے ضمانت ہوچکی ہے، لمبی تاریخ دے دیں، 23 ستمبر تک ضمانت منظور ہوچکی ہے۔

عدالت نے وزیراعلیٰ کے پی پر فرد جرم عائدکرنےکی کارروائی ایک بار پھر مؤخر کرتے ہوئے کیس کی سماعت 29 ستمبر تک ملتوی کردی تھی۔

اسلام آباد : کوہستان کرپشن اسکینڈل پر پیپلز پارٹی نے وزیراعلیٰ کے پی علی امین گنڈا پور کے استعفے کا مطالبہ کردیا۔

تفصیلات کے مطابق کوہستان کرپشن اسیکنڈل پر پیپلز پارٹی کے سیکریٹری جنرل نیئربخاری نے شفاف تحقیقات کیلئے وزیراعلیٰ کے پی کے استعفے کا مطالبہ کردیا۔

نیئربخاری کا کہنا تھا کہ شفاف تحقیقات کیلئے وزیراعلیٰ فوری استعفیٰ دیں، یہ ہے تبدیلی کہ خیبرپختونخوا کوکرپشن کا گڑھ بنا دیا گیا ہے۔

پیپلز پارٹی کے سیکریٹری جنرل نے کہا کہ سرکاری وسائل سے ذاتی تجوریاں بھرنے والوں کا احتساب بھی ہوگا اور حساب بھی ، صوبائی حکومت کی خیبرپختونخوا کے خزانے پر لگاتار ڈکیتیاں سوالیہ نشان ہیں۔

ان کا مزید کہنا تھا کہ شہریوں کے ٹیکس پرمشتمل صوبائی خزانے کو ہڑپ کرنیوالے ناقابل معافی ہیں، صوبائی خزانے کے خائنوں کو ایک ایک پائی وصولی کیلئے قانون کی گرفت میں لایا جائے۔

رہنما پی پی نے مزید کہا کہ بلین ٹری ، بی آر ٹی مالم جبہ اسکینڈلز میں ریکارڈ کرپشن کیخلاف کارروائی نہیں کی گئی، کے پی میں حکومتی اور پی ٹی آئی عہدیداران ایک دوسرے پرکرپشن الزامات لگاتے ہیں۔

اسلام آباد : وزیر دفاع خواجہ آصف کا کہنا ہے کہ وفاقی حکومت اور اداروں پر علی امین گنڈا پور کی تنقید کا جواب ضرور دیا جائے گا۔

تفصیلات کے مطابق وزیر دفاع خواجہ آصف نے اے آر وائی نیوز کے پروگرام خبر میں انٹرویو دیتے ہوئے کہا کہ خیبرپختونخوامیں پولیس نےبھی دہشت گردی کیخلاف قربانیاں دیں، خیبرپختونخوامیں فوج نے جتنی شہادتیں اٹھائیں سب کومعلوم ہے۔

وزیر دفاع کا کہنا تھا کہ دہشت گردی کی ذمہ داری اداروں پر ڈالنا غلط بات ہے، علی امین گنڈاپور کے لیڈر نے دہشت گردوں کو کےپی میں بسایا تھا، ان کے لیڈر بارڈر سے لوگوں کو لائے اور شہروں میں بسایا تھا۔

انھوں نے کہا کہ علی امین نے وفاقی حکومت اوراداروں پرتنقیدکی ہے، وفاقی حکومت کی جانب سے ان کو ضرور جواب دیا جائے گا۔

عمران خان سے متعلق سوال پر خواجہ آصف کا کہنا تھا کہ بانی پی ٹی آئی نے جتنی غلطیاں کیں، کسی سول حکمران نے نہیں کیں وقت آگیا پاکستان کو بانی کی طرز سیاست سے پاک کیا جائے۔

پی ٹی آئی کے اندورونی معاملات کے حوالے سے انھوں نے کہا کہ کے پی کے دوسرے علاقوں میں دیکھ لیں کیا ہو رہا ہے، پی ٹی آئی کے اپنے لوگ علی امین اور ان کی قیادت پر تنقید کر رہے ہیں ، پی ٹی آئی کے اپنے لوگ ان پر دو نمبری کے الزامات لگا رہے ہیں۔

وفاقی وزیر نے بتایا کہ علی امین میٹنگز میں وہ گفتگو کرتے ہیں جو بیان نہیں کرسکتا، ان کی گفتگو سن کر وزیراعظم کو کہنا پڑا کہ خوشی ہورہی ہے، وہ اندر کچھ بات کرتے ہیں اور باہر کچھ گفتگو کرتے ہیں، ان جیسے لوگوں کے بیانات کو نظر انداز کرنا چاہیے، ایسے لوگوں کی گفتگو پر ان کی اپنی جماعت یقین نہیں کرتی۔

اسلام آباد : بانی پی ٹی آئی سے ملاقات پر وزیراعلیٰ خیبرپختونخوا کی درخواست پر جسٹس منصور علی شاہ نے ریمارکس دیئے آپ نے غلط دروازہ کھٹکھٹایا ہے، چیف جسٹس یا رجسٹرا رسپریم کورٹ سے رجوع کریں۔

تفصیلات کے مطابق وزیراعلیٰ علی امین گنڈاپور نے سپریم کورٹ میں بانی پی ٹی آئی سے ملاقات کی درخواست کردی۔

علی امین گنڈاپورسپریم کورٹ میں جسٹس منصورعلی شاہ کی عدالت میں پیش ہوئے۔

لطیف کھوسہ اور ایڈووکیٹ جنرل خیبر پختونخواشاہ فیصل بھی پیش ہوئے ، لطیف کھوسہ نے کہا کہ ارجنٹ مسئلہ درپیش ہے، کے پی کا بجٹ سیشن چل رہا ہے، عمران خان سےملاقات کی درخواست ارجنٹ سنی جائے۔

جسٹس منصور علی شاہ نے ریمارکس دیئے جوڈیشل سائیڈپر ہم کچھ نہیں کر سکتے، آپ نے غلط دروازہ کھٹکھٹایاہے، چیف جسٹس یا رجسٹرارسپریم کورٹ سےرجوع کریں۔

جسٹس منصور کا کہنا تھا کہ یہی بہترین طریقہ ہےآپ کاوقت بچے گا، چیف جسٹس پریکٹس پروسیجر کمیٹی کے چیئرمین ہیں۔

دوران سماعت وزیراعلیٰ خیبرپختونخواعلی امین گنڈا پور روسٹرم پر آئے اور بتایا کہ بجٹ منظوری کا پروسس اسمبلی میں چل رہا ہے، پارٹی سربراہ کاایک ویژن ہوتا ہے، بار بار درخواست کےباوجود بانی سےملاقات نہیں کرائی گئی۔

وزیراعلیٰ کے پی کا کہنا تھا کہ تحریک انصاف کی بجٹ کمیٹی بانی پی ٹی آئی سے ملاقات کرے گی، بانی پی ٹی آئی نے سپریم کورٹ کو خط بھی لکھا تھا، خط پرچیف جسٹس نے بڑے اچھے ریمارکس دیے تھے۔

خط کیساتھ بانی پی ٹی آئی نے ثبوت بھی لگائے تھے تاہم بانی پی ٹی آئی کےخط پر کوئی عمل نہیں ہوا، جس پر جسٹس منصور نے کہا کہ چیف جسٹس لاہورمیں ہیں ان سےرجوع کریں۔

وکیل لطیف کھوسہ کا کہنا تھا کہ آپ کاآشیرباد چاہتے ہیں،آپ معاملہ چیف جسٹس کوبجھوا سکتے، جس پر جسٹس منصور نے ریمارکس دیے بہتر یہ ہےرجسٹرار یا چیف جسٹس سے رجوع کرہیں،جسٹس منصو

جسٹس منصور علی شاہ نے معاملہ سننے سے معذرت کرلی اور کہا آپ نے غلط دروازہ کھٹکھٹایا ہے، چیف جسٹس یا رجسٹرا رسپریم کورٹ سے رجوع کریں۔

پشاور : وزیراعلیٰ خیبر پختونخواہ علی امین گنڈا پور کا کہنا ہے کہ میں کسی بھی وقت اسمبلی کو تحلیل کرسکتا ہوں ، یہ میرا اختیارہے۔

تفصیلات کے مطابق وزیراعلیٰ خیبر پختونخواہ نے میڈیا سے گفتگو کرتے ہوئے کہا بجٹ پر ووٹنگ کا عمل شروع ہوناہےلیکن بانی سےملاقات نہیں کرائی گئی، ارکان پارلیمنٹ کو کہتا ہوں اسمبلی میں جاکر ووٹنگ نہیں کرنی، ہم بجٹ پاس نہیں کرتے تو یہ فنانشل ایمرجنسی کی بنیاد پر ٹیک اوور کرسکتے ہیں۔

وزیراعلیٰ کے پی کا کہنا تھا کہ ان کی فنانشل ایمرجنسی کی بنیاد پر صوبے کواوورٹیک کرنے کی سازش ہے، پہلے دن سے ہی یہ نظام کے پی حکومت کو ختم کرنےکیلئےسازشیں کررہاہے، بجٹ کا اجلاس بلانا گورنر کا آئینی طور پر فرض ہے۔

علی امین نے کہا کہ گورنر کے پی نے بجٹ اجلاس نہیں بلایا، سازش یہاں سے شروع ہوئی، ہم نے بجٹ بانی کے پاس پیش کیا تاکہ ان کا اِن پٹ اس میں آئے، بجٹ پر بانی پی ٹی آئی کا رائے دینا سیاسی حق ہے۔

مزید پڑھیں : بڑی سیاسی تحریک کیلیے کارکنان کو متحرک کر رہے ہیں، علی امین گنڈاپور

ان کا کہنا تھا کہ ہر فورم پر ہم نے کہا کہ بجٹ بانی کوپیش کریں گےاوران کےاحکامات پرچلیں گے، احکامات یہ ہیں کہ پاس کرنے سے پہلے بجٹ بانی کے سامنے لایا جائے۔

وزیراعلیٰ کے پی نے وفاقی حکومت کو پیغام دیتے ہوئے کہا آپ ہمیں قانونی طور پر ڈسکوالیفائی نہیں کرسکتے، میں کسی بھی وقت اسمبلی کو تحلیل کرسکتا ہوں یہ میرا اختیار ہے، اسمبلی کو تحلیل کرنے کا اختیار بانی پی ٹی آئی کے پاس ہے۔

انھوں نے کہا کہ ارکنان تیار رہیں ،ا ن کی سازشوں کومیں کامیاب نہیں ہونے دوں گا، ان کی سازش سے پہلے جو ہم کریں گے ان کی نسلیں یاد رکھیں گی، ہم اپنے آئینی حق کے لیے بھرپور طریقے سے نکلیں گے، ایسی تحریک چلائیں گے جس کے بعد یہ نظام نہیں چل سکے گا۔

لاہور : وزیراعلیٰ خیبرپختونخوا علی امین گنڈاپور کا کہنا ہے کہ بانی پی ٹی آئی ملک کی خاطرمذاکرات کیلئے تیار ہیں۔

تفصیلات کے مطابق وزیراعلیٰ خیبرپختونخوا علی امین گنڈاپور نے لاہور ہائی کورٹ بار سے خطاب کرتے ہوئے کہا کہ وکلابرادری لوگوں کوانصاف دلاتی ہے، ریاست مدینہ انصاف پرقائم تھی، ہمارے آباؤ اجداد نے پاکستان حاصل کرنےکیلئےجانی ومالی قربانیاں دیں۔

وزیراعلیٰ خیبرپختونخوا کا کہنا تھا کہ آج بانی پی ٹی آئی بے گناہ جیل میں ہے، وہ پاکستان میں رول آف لاچاہتا ہے، بانی پی ٹی آئی کہتے ہیں پاکستان کی خاطر مذاکرات کیلئے تیار ہوں، وہ قوم کو خود مختار اور آزاد بنانا چاہتے ہیں۔

انھوں نے کہا کہ پاکستان بنانے کے لیے سیاسی تحریک چلائی گئی، پاکستان پر حکومتیں مسلط کی گئیں جس سے ملک تباہ ہوا، ہم نے جب جلسہ کیا تو روکا گیا، ہماری لیڈرشپ جیلوں میں ہے۔

علی امین نے پی ٹی آئی قیادت اور کارکنوں کو مشورہ دیا کہ پی ٹی آئی سے کہتا ہوں کوئی بھی ایسی تنقیدنہ کرو، جس سے تمہیں نقصان پہنچے، وہ وقت قریب ہے جب ہماری جیت ہوگی۔

ان کا مزید کہنا تھا کہ ہم نے خیبرپختونخوا میں کرپشن پرکنٹرول کر کے بہت پیسہ جمع کرلیا ہے، آج خیبرپختونخوا پاکستان کا امیر ترین صوبہ ہے۔

وزیراعلیٰ کے پی نے کہا کہ اپنے لوگوں کےخلاف نہیں، حق، سچ اور امر بالعروف کی بات آئی تو قوم کا ہر بندہ باہر نکلے گا اور فیصلہ کرے گا کہ میں اپنے بچوں کو غلام پاکستان میں نہیں رہنے دوں گا۔

پشاور : وزیراعلیٰ خیبر پختونخواہ علی امین گنڈا پور نے بانی پی ٹی آئی کی رہائی کا معاملہ اللہ پر چھوڑ دیا۔

تفصیلات کے مطابق وزیراعلیٰ خیبر پختونخواہ علی امین گنڈا پور نے بانی پی ٹی آئی کی رہائی کے لیے اپنی خدمات گنوادیں۔

وزیراعلیٰ خیبرپختونخوا نے میڈیا سے گفتگو کرتے ہوئے کہا کہ بانی پی ٹی آئی عمران خان کی رہائی کے لیے کیا کچھ نہیں کیا لیکن اللہ کی طرف سے ہر چیز کا وقت مقرر ہے،کوشش انسان کرتا ہے اور صلہ اللہ دیتا ہے

ان کا کہنا تھا کہ کوشش کرنے میں کوئی کسر نہیں چھوڑی، میرا ضمیر مطمئن ہے، ہر بندے کو خوش نہیں کرسکتا، کارکنوں کو جلد خوشخبری ملے گی۔

مزید پڑھیں : بانی پی ٹی آئی کی بہنوں کیساتھ ناروا سلوک ، علی امین گنڈا پور کی دھمکی

وزیراعلیٰ کے نے پارٹی میں اپنے مخالفین پر چڑھائی کردی اور کہا دشمنی کا شوق ہے تو میرے خلاف اعلان جنگ کر دو۔

ان کا مزید کہنا تھا کہ بیان کوئی دیتا ہے، تشریح کوئی کرتا ہے، اختلافات پارٹی کے اندر حل کرنے چاہئیں۔

گذشتہ روز وزیراعلیٰ خیبر پختو ںخواہ نے بانی پی ٹی آئی کی بہنوں کیساتھ ناروا سلوک کی مذمت کرتے ہوئے کہا تھا کہ وقت آنے پر حساب لیا جائے گا۔

ان کا کہنا تھا کہ حکومت کی فسطائیت کا ڈٹ کر مقابلہ کرتے آرہے ہیں آگے بھی کرتے رہیں گے، بانی پی ٹی آئی نا حق قید ہیں، ان کی رہائی تک ہماری جدو جہد جاری رہے گی۔

علی امین نے کہا تھا حکومت بانی پی ٹی آئی کی دشمنی میں انسانی حقوق کی خلاف ورزیوں کی تمام حدیں پار کر رہی ہے، اس طرح کےغیر انسانی اور غیر قانونی ہتھکنڈے ہمارے حوصلے پست نہیں کر سکتے