Tag: علی امین گنڈا پور

ڈیرہ اسماعیل خان : وزیراعلیٰ خیبر پختونخوا علی امین گنڈا پور نے افغانستان سے براہ راست مذاکرات کا اعلان کرکے نیا محاذ کھول دیا۔

تفصیلات کے مطابق وزیراعلیٰ خیبر پختونخوا علی امین گنڈا پور نے میڈیا سے گفتگو کرتے ہوئے کہا کہ وفاقی حکومت نے افغانستان سے بات چیت کی لیکن کامیاب نہیں رہی، میں انشااللہ بہت جلد اپنا وفد افغانستان بھیج رہا ہوں۔

علی امین کا کہنا تھا کہ صوبہ اپنا جرگہ افغانستان بھیجے گا، اس حوالے سے صوبے میں مشاورت کرلی، دو ہفتے میں وفد کابل جائے گا۔

انھوں نے مزید کہا کہ وہ ہماری بات مانیں گے تمام مسائل حل ہوجائیں گے، انشااللہ بہت جلداس مسئلے کا حل نکال کرآپ کے سامنے رکھیں گے، اُمید ہے ہمارے جرگے کے ساتھ تعاون کریں گے۔

یاد رہے گذشتہ سال بھی وزیر اعلیٰ کے پی کا کہنا تھا کہ کسی کے باپ کا نوکر یا غلام نہیں، کئی بار کہا افغانستان سے بات کریں لیکن ان کو سمجھ میں نہیں آتا، میرے لوگ مر رہے ہیں میں خاموش نہیں بیٹھ سکتا۔

ان کا کہنا تھا کہ کے پی حکومت افغانستان سے براہ راست بات کرے گی میں اپنا وفد کابل بھیج رہا ہوں۔

اسلام آباد : وزیراعلیٰ خیبرپختونخوا علی امین گنڈا پور نے طاقتور حلقوں سے بیک ڈور رابطوں کی تصدیق کردی اور کہا اعتماد بحال ہوا ہے تو یہ چیزیں ہو رہی ہیں۔

تفصیلات کے مطابق وزیراعلیٰ خیبرپختونخوا علی امین گنڈا پور نےمذاکراتی اجلاس کے بعد میڈیا سے گفتگو کرتے ہوئے کہا کہ کہیں ملاقاتیں اور مثبت پیش رفت ہو رہی ہے اعتماد قائم ہوا ہے تو ہی سب ہو رہا ہے۔

مولانا فضل الرحمان سے متعلق سوال پر علی امین کا کہنا تھا کہ مولانا کہتے ہیں میری تیسرے درجے کی لیڈر شپ بانی پی ٹی آئی سے ملے گی، مولانا فضل الرحمان کی سیاسی حیثیت بانی پی ٹی آئی جتنی نہیں ہے، ان کو کے پی انتخابات پر اعتراض ہے تو آئیں حلقے کھول لیتےہیں، اگر کوئی اس طرح کے بیانات دے گا تو بطور وزیراعلیٰ اس کا جواب دوں گا۔

انھوں نے کہا کہ مولانا صاحب آپ کے ساتھ دھوکا ضرور ہوا جو وعدے ہوئے وہ پورے نہیں ہوئے، جنہوں نے آپ کے ساتھ دھوکہ کیا ان کا نام لیں ہمارے اوپر بات نہ کریں۔

وزیراعلیٰ خیبرپختونخوا نے مزید کہا کہ وہ دن دور نہیں جب بانی پی ٹی آئی ہمارے درمیان ہونگے، جب تک سانسیں ہیں بانی پی ٹی آئی کے ساتھ کھڑا ہوں، 26 نومبرکو جو ہوا فارم 47 سے بنی جعلی حکومت کو حساب دینا ہوگا۔

فیصل کریم کنڈی پر تنقید کرتے ہوئے ان کا کہنا تھا کہ حلقے کے عوام جانتے ہیں گورنر اور مجھ میں کون زیادہ طاقتور ہے، فیصل کریم کنڈی کو چاہیے گورنر ہاؤس میں رہتے ہیں، نمک حلال کریں، کوئی اس طرح کے فورم پر غلط اعداد و شمار دے گا تو بات نہیں کرنے دوں گا، پسند آئے تو ٹھیک ہے، نہ آئے تو بھاڑ میں جائے۔

اسلام آباد : غیرقانونی اسلحہ و شراب برآمدگی کیس میں وزیراعلی کے پی علی امین گنڈاپور کو گرفتارکر کے پیش کرنے کا حکم دے دیا گیا۔

تفصیلات کے مطابق اسلام آباد میں جوڈیشل مجسٹریٹ مبشر حسن چشتی نے وزیراعلی کے پی علی امین گنڈاپور کیخلاف غیرقانونی اسلحہ اورشراب برآمدگی کیس کی سماعت کی۔

مقدمے کے تفتیشی افسر اور علی امین کے وکیل راجہ ظہورالحسن بھی عدالت پیش نہ ہوئے، جج نے برہمی کا اظہار کرتے ہوئے کہا کہ نہ ملزم پیش ہوااور نہ ہی وکیل۔

عدالت نے مسلسل عدم پیشی پر علی امین کوگرفتارکرکےپیش کرنے کا حکم دے دیا اور کہا کہ ایس ایس پی آپریشنز علی امین گنڈاپور کو گرفتار کرکے پیش کریں۔

بعد ازاں عدالت نے غیرقانونی اسلحہ اورشراب برآمدگی کیس کی سماعت 21 جنوری تک ملتوی کردی۔

یاد رہے گذشتہ سال نومبر میں اسلام آباد کی عدالت نے وزیرِ اعلیٰ خیبرپختونخوا علی امین گنڈاپور کو اسلحہ اور شراب برآمدگی کیس میں اشتہاری قرار دیا تھا اور کیس کو دیگر ملزمان سے الگ کر دیا تھا۔‘

ملزمان راجا خرم نواز، فیصل جاوید، راجا راشد حفیظ، واثق قیوم، اور عمر تنویر کے ناقابلِ ضمانت وارنٹ گرفتاری جاری کیے تھے جبکہ اس دوران تمام غیر حاضر ملزمان کے وکلا نے حاضری سے استثنیٰ کی درخواست دائر کی، تاہم عدالت نے ان درخواستوں کو مسترد کر دیا تھا۔

پشاور : وزیراعلیٰ خیبرپختونخوا علی امین گنڈا پور نے حکومت کو خبردار کیا ہے کہ ہمارے مطالبات نہ مانے گئے تو تحریک کیلئے تیار ہیں ، یہ لوگ شام اور بنگلادیش کی طرح ہیلی کاپٹرمیں بھاگیں گے۔

تفصیلات کے مطابق وزیراعلیٰ خیبر پختونخواعلی امین گنڈاپور نے اےآروائی نیوز سے گفتگو کرتے ہوئے کہا کہ بانی پاکستان کیلئے مذاکرات کر رہے ورنہ ان کیساتھ مذکرات بنتے بھی نہیں، موجودہ حکومت نے مینڈیٹ چوری کیا عوام کے ووٹوں کے بغیر آئی ہے۔

وزیراعلیٰ خیبر پختونخوا کا کہنا تھا کہ امید ہے مذکرات میں ہمارے مطالبات منظور کیے جائیں گے، اگر مطالبات منظور نہیں کیے گئے تو پھر ہم تحریک کیلئے تیار ہیں، مطالبات میں بانی پی ٹی آئی سمیت جتنے اسیران ہے ان کی رہائی ہے۔

انھوں نے کہا کہ 9 مئی کی تحقیقات کیلئے کمیشن بنایا جائے، 26 نومبر کی تحقیقات کی جائیں اور مینڈیٹ چوری کیا ہوا ہے فارم 47 ان لوگوں کے پاس نہیں وہ دکھائیں۔

وزیراعلیٰ کے پی نے مزید کہا کہ ہمارےمطالبات میں حقیقی آزادی بھی شامل ہیں، حکومت آئین اورقانون کی دھجیاں اڑا رہی ہے ، 2025 حقیقی آزادی کا سال ہو گا۔

انھوں نے خبردار کیا کہ اگر مذاکرات میں ہمارے مطالبات پر بات نہیں کی جائے گی تو پھر ان لوگوں کو بھاگنے پر مجبور کر دیں گے، یہ لوگ پھرشام اور بنگلادیش کی طرح ہیلی کاپٹرمیں بھاگیں گے، لیکن ہم لوگ انہیں بھاگنے نہیں دیں گے، ہم ملک کا پیسہ لوٹنے والوں کو نہیں چھوڑیں گے۔

وزیراعلیٰ خیبر پختونخوا کا کہنا تھا کہ مذکرات کے لیے بیٹھوں اوراپنی غلطی تسلیم کرو ،انسان بن جاؤاگر نہیں بنتےتوپھر ہمیں بنانا آتا ہے، ہمارے پاس عوامی طاقت ہے، بیرونی طاقتوں کی ضرورت نہیں، بیرونی طاقتوں کا سہارا تو یہ لوگ لیتے ہیں، فضل الرحمان اور حیدر ہوتی نے خود مانا پی ٹی آئی کی حکومت کیسے گرائی گئی۔

راولپنڈی : جی ایچ کیو حملہ کیس میں وزیراعلیٰ کے پی علی امین گنڈاپور سمیت 46ملزمان کے ناقابل ضمانت وارنٹ گرفتاری جاری کردیئے گئے۔

تفصیلات کے مطابق راولپنڈی کی انسداد دہشت گردی کی عدالت میں جی ایچ کیو حملہ کیس کی سماعت ہوئی، مسلسل غیر حاضری پر وزیراعلیٰ خیبرپختونخوا کے ناقابل ضمانت وارنٹ گرفتاری جاری کردیئے گیے

کیس میں دیگر46 ملزمان کے بھی وارنٹ گرفتاری جاری گئے ، جس میں راجہ بشارت، زرتاج گل، بلال اعجاز اور دیگر شامل ہیں، پراسیکیوٹرز  نے مسلسل غیر حاضری پر ضمانتوں کی منسوخی اور وارنٹ اجرا کی استدعا کی تھی۔

انسداد دہشت گردی عدالت نے ملزمان کو گرفتار کرکے پیش کرنے کا حکم دے دیا، جج امجد علی شاہ نے ملزمان کے تحریری وارنٹ گرفتاری جاری کیے

ملزمان کےخلاف جی ایچ کیوحملےکامقدمہ تھانہ آراےبازارمیں درج ہے اور ملزمان پر توڑ پھوڑ، جلاؤ گھیراؤ، ہنگامہ آرائی اور کار سرکار میں مداخلت کا الزام ہے۔

یاد رہے گذشتہ روز جی ایچ کیو حملہ کیس میں بانی پی ٹی آئی اور شاہ محمود قریشی سمیت دیگر پر فرد جرم عائد کرنے کی کارروائی چھٹی بار ملتوی کردی گئی تھی۔

دوران سماعت میں وکلا صفائی نے انسداد دہشت گردی عدالت کے دائرہ اختیار کو چیلنج کیا تھا، وکلا کا موقف تھا کہ عدالتی دائرہ اختیار کی درخواست پر فیصلہ ہونے تک ملزمان پر فرد جرم عائد نہ کی جائے۔

بانی پی ٹی ائی کے وکیل محمد فیصل ملک کی جانب سے انسداد دہشت گردی عدالت کے دائرہ اختیارکو چیلنج کیا گیا تھا۔