کراچی: ایم کیو ایم پاکستان کے رہنما فاروق ستار نے کہا ہے کہ آج ہم سے ہمارا شہزادہ چھین لیا گیا ہے صرف یہی پوچھنا ہے ہمارا قصور کیا ہے۔
تفصیلات کے مطابق ایم کیو ایم پاکستان کے رہنما ڈاکٹر فاروق ستار نے کہا ہے کہ علی رضا عابدی ایم کیو ایم کا نہیں ملک کا اثاثہ تھا، علی رضا عابدی کو چار دن پہلے بھی اطلاع ملی تھی کہ ان کی زندگی کو خطرہ ہے، کراچی میں کئی دنوں سے بدامنی کی لہر آگئی ہے۔
فاروق ستار نے کہا کہ کراچی میں ایک بار پھر خون کی ہولی شروع ہوگئی ہے، علی رضا عابدی کو ٹارگٹ کرکے شہید کیا گیا، علی رضا عابدی پاکستان بنانے والوں کا بیٹا تھا، ہم کب تک لاشیں اُٹھائیں گے۔
انہوں نے کہا کہ علی رضا عابدی کی سیکیورٹی کا خیال کیوں نہیں رکھا گیا، سازش کے تحت کراچی میں پھر بدامنی کی فضا پھیلائی جارہی ہے، مجھے پی این ایس شفا بھی جانے نہیں دیا گیا، ہم کون سا اسپتال میں ہنگامہ کرنے جارہے تھے، ہم کون سا شہر کو بند کرنے جارہے تھے۔
مزید پڑھیں: کراچی: سابق رکن قومی اسمبلی علی رضا عابدی قاتلانہ حملے میں جاں بحق
فاروق ستار نے کہا کہ قاتل دندناتے پھر رہے ہیں، وفاقی و صوبائی حکومت کو نوٹس لینا چاہئے، علی رضا عابدی کے قاتلوں کو فوری گرفتار کیا جائے، اس واقعے کے بعد اب کیا پڑھے لکھے لوگ سیاست میں آئیں گے۔
ایم کیو ایم پاکستان کے رہنما نے کہا کہ ایم کیو ایم کی میلاد پر حملہ، پی ایس پی کے دو کارکن قتل اور آج علی رضا عابدی کو قتل کردیا گیا، ہمیں بتایا جائے یہ سب کیا ہورہا ہے، حکومت ہمیں جواب دے کون حملے کررہا ہے، کراچی کے معاشی قتل کے بعد اب جسمانی قتل ہورہا ہے، کراچی کے ساتھ بہت ہوگیا کھلواڑ اب اسے بند ہونا چاہئے۔
