ARYNews.tv | Urdu – Har Lamha Bakhabar

Tag: علی زیدی

  • تعمیراتی شعبہ ملکی معیشت کی ریڑھ کی ہڈی ہے،علی زیدی

    تعمیراتی شعبہ ملکی معیشت کی ریڑھ کی ہڈی ہے،علی زیدی

    کراچی: وفاقی وزیر برائے بحری امور علی زیدی کا کہنا ہے کہ تعمیراتی شعبہ ملکی معیشت کی ریڑھ کی ہڈی ہے، تعمیراتی شعبے چلتے ہیں تو روزگار کے مواقع پیدا ہوتے ہیں۔

    تفصیلات کے مطابق کراچی میں وفاقی وزیر علی زیدی نے نمائش کی افتتاح کے بعد میڈیا سے گفتگو کرتے ہوئے کہا کہ تعمیراتی شعبے کو ریگولیٹ کرنا ہوگا، دنیا بھر میں تعمیراتی شعبہ اہم سیکٹر ہے۔

    وفاقی وزیر کا کہنا تھا کہ کراچی میں جو تعمیرات ہوئی اس میں بہت کچھ غیرقانونی کام بھی ہوئے، کے پی ٹی کی بھی قیمتی زمینوں پر تجاوزات کرلی گئی ہیں، دو تین علاقوں کو لے کر ایک پلان مرتب کیا ہے۔

    علی زیدی نے کہا کہ کے پی ٹی کی زمین پر جو گھر بن گئے ہیں ان پر پلان کے تحت کام ہوگا، پہلے پلان کے تحت مارچ میں تجاوزات کے خلاف کام ہوگا، دوسرے مرحلے میں تجاوزات پر کام کیا جائے گا۔

    انہوں نے کہا کہ حکومت خاص طور پر غریب افراد کے لیے کام کر رہی ہے، احساس پروگرام اس کا ثبوت ہے، ہم ایک پلان تیار کر رہے جس سے لوگوں کا لائف اسٹائل چینج ہو۔

    وفاقی وزیر کے مطابق بہت سارے علاقے ایسے جنہیں ری ڈویلپمنٹ کی ضرورت ہے، کے پی ٹی کی چھتری تلے ایک پراجیکٹ شروع کریں گے، محمدی ہاؤس آئی آئی چندریگر روڈ پر بلڈنگ کو ٹھیک کرنا ہے۔

    علی زیدی کا کہنا تھا کہ نیا پاکستان ہاؤسنگ پروجیکٹ کے لیے منصوبے کا اعلان ہوگا، کے پی ٹی کی زمین پر سستے گھروں کی تعمیر کا پلان وزیر اعظم ہاؤسنگ کا حصہ ہوگا۔

    وفاقی وزیر برائے بحری امور علی زیدی نے مزید کہا کہ تعمیراتی شعبہ ملکی معیشت کی ریڑھ کی ہڈی ہے، تعمیراتی شعبے چلتے ہیں تو روزگار کے مواقع پیدا ہوتے ہیں۔

  • وفاقی وزیر کا اہم اقدام، نیب کا دروازہ کھٹکھٹا دیا

    وفاقی وزیر کا اہم اقدام، نیب کا دروازہ کھٹکھٹا دیا

    کراچی: وفاقی وزیربرائے بحری امور علی زیدی نے محکمے میں تحقیقات کے لیے نیب سے رجوع کرلیا۔

    تفصیلات کے مطابق علی زیدی نے نیب کو خط لکھ دیا۔ متن میں کہا گیا ہے کراچی پورٹ ٹرسٹ میں مالی بے قاعدگیوں پر نیب تحقیقات کرے، ڈریجر نامی جہاز پر پہلی تفصیلی تحقیقات میں گھپلے کا انکشاف ہوا ہے۔

    خط کے متن میں کہنا ہے کہ کئی برسوں میں علی ڈریجر کی مرمت پر 15 لاکھ یورو کی رقم خرچ کی گئی، ڈریجر کے لیے مرمت کے نام پر اسپئیر پارٹس بھی خریدے گئے، 15لاکھ یورو کی رقم لگانے کے باوجود علی ڈریجر ابھی تک کام کے قابل نہیں بن سکا، ڈریجر نامی جہاز کو ٹھیک کرنے کےلیے 17کروڑ روپےخرچ کیے گئے۔

    خط کے مطابق ڈریجر ٹھیک کرنے کی محکمانہ تحقیقات میں بےقاعدگیاں ثابت ہیں، نیب ڈریجر کی مرمت میں ہونے والی بے قاعدگیوں کی تحقیقات کرے، محکمانہ تحقیقاتی رپورٹ خط کے ساتھ منسلک ہے، ڈریجر کی مرمت کی رقم یورو میں کی گئی۔ وفاقی وزیر نے خط میں زور دیا ہے کہ واقعے کی مکمل تحقیقات ہونی چاہیئے۔

  • ایشیئن کراٹے چیمپئن شپ میں ثابت ہوگیا پاکستان کسی سے پیچھے نہیں: علی زیدی

    ایشیئن کراٹے چیمپئن شپ میں ثابت ہوگیا پاکستان کسی سے پیچھے نہیں: علی زیدی

    کراچی: وفاقی وزیر برائے بحری امور علی زیدی کا کہنا ہے کہ پاکستانی کراٹے کاز ٹیم نے ثابت کردیا پاکستان ہر شعبے بالخصوص کھیل وتفریح میں بھی کسی سے پیچھے نہیں ہے۔

    تفصیلات کے مطابق علی زیدی نے یورو ایشیا چیمپئن شپ میں دوسری پوزیشن حاصل کرنے والی پاکستانی کراٹے کاز ٹیم سے کے پی ٹی آفس میں ملاقات کی، ملاقات میں رکن سندھ اسمبلی راجہ اظہر اور مولوی محمود بھی موجود تھے۔

    اس موقع پر وفاقی وزیر علی زیدی نے کھلاڑیوں کو کامیابی پر مبارکباد دی اور نوجوانوں کی کارکردگی کو سراہا علی زیدی کی جانب سے کھلاڑیوں میں تحفے و انعامات بھی دیے گئے۔

    ساؤتھ ایشیا گیمز میں 3 گولڈ میڈلسٹ کراٹے کاز کا ائیر پورٹ پرشان دار استقبال

    علی زیدی نے کہا کہ کھلاڑی راجہ عامر، شفقت، عمر فاروق اور کوچ راجہ آصف قوم کا فخر ہیں، 22 ممالک سے مقابلہ کرکے پاکستانی کراٹے کاز ٹیم نے ثابت کیا کہ پاکستان ہر شعبہ و تفریحی کھیل میں کسی سے پیچھے نہیں، نوجوانوں کی کوششوں و کاوشوں کی حوصلہ افزائی کرنا بے حد ضروری ہے۔

    ان کا کہنا تھا کہ پاکستان کا نوجوان ہی پاکستان کی مضبوط بنیاد ہے۔ وفاقی وزیر نے پاکستانی ٹیم کے ساتھ ورلڈ چمپئن شپ میں تعاون کرنے کی یقین دہانی کروائی۔ اس موقع پر رکن سندھ اسمبلی راجہ اظہر نے کہا کہ وفاقی وزیر علی زیدی کا کھلاڑیوں کی حوصلہ افزائی کرنے کے لیے شکریہ ادا کرتے ہیں۔

    ان کا مزید کہنا تھا کہ کھلاڑیوں نے غیر ملکی سرزرمین پر پاکستان کا جھنڈا لہرایا ملک کو قوم کی دعاؤں کے نتیجے میں کھلاڑیوں نے وطن کا پرچم سر بلند کیا، متوسط طبقے سے تعلق رکھنے والے نوجوان ملک کا سرمایہ ہیں۔

  • علی زیدی کا حج اور عمرے کے لیے بحری جہاز چلانے کا عندیہ

    علی زیدی کا حج اور عمرے کے لیے بحری جہاز چلانے کا عندیہ

    کراچی: وفاقی وزیر برائے بحری امور علی زیدی کا کہنا ہے کہ مسافر بحری جہاز چلانا چاہتے ہیں، حج اور عمرے کے لیے سمندری سفر سے اخراجات میں کمی آئے گی۔

    تفصیلات کے مطابق وفاقی وزیر برائے بحری امور علی زیدی کا کہنا تھا کہ پڑوسی ملک میں جو ہو رہا ہے وہ سب جانتے ہیں، پاکستان میں ریاست مدینہ کا نظام لانا چاہتے ہیں، قائد نے جو خواب دیکھا تھا اسے 2020 میں پورا کریں گے۔

    علی زیدی کا کہنا تھا کہ وزیر اعظم کا کراچی کا دورہ خوش آئند ثابت ہوگا، وزیر اعظم ارکان صوبائی و قومی اسمبلی سے ملاقاتیں کریں گے۔

    انہوں نے کہا کہ کراچی کو ٹھیک کیے بغیر معیشت ٹھیک نہیں ہوسکتی۔ کراچی میں جو نظام ہے اس کو بھی ٹھیک کر رہے ہیں۔ ایک ادارہ بناتا ہے اور دوسرا ادارہ دوسرے دن کھدائی کر دیتا ہے، یہ ادارے ایک ہی چھت کے نیچے کام کرتے ہیں۔

    علی زیدی کا کہنا تھا کہ دنیا کے پرانے روٹس سمندر کے ہیں، وزارت دفاع سے 4 جگہ سے مسافر بحری جہاز چلانے کے این او سی مانگے ہیں۔ نجی شعبے کو بھی سمندری جہاز چلانے کی دعوت دیں گے۔ میرین سیکٹر بھی نجی شعبے کے لیے کھولنا چاہتے ہیں۔

    انہوں نے کہا کہ حج اور عمرے کے لیے سمندری سفر سے اخراجات میں کمی آئے گی، کربلا جانے والے زائرین بھی بسرا سے ٹرین میں جا سکتے ہیں۔

  • کراچی جیسی کوسٹل بیلٹ والا ملک قرضے لینے والا نہیں دینے والا ہوتا ہے: علی زیدی

    کراچی جیسی کوسٹل بیلٹ والا ملک قرضے لینے والا نہیں دینے والا ہوتا ہے: علی زیدی

    کراچی: وفاقی وزیر برائے بحری امور علی زیدی کا کہنا ہے کہ ہم نے چھوٹی چھوٹی چیزوں کے لیے بڑی چیزوں کا نقصان اٹھایا، کراچی جیسی کوسٹل بیلٹ جس ملک کے پاس موجود ہو وہ ملک قرضے لینے والا نہیں دینے والا ہوتا ہے۔

    تفصیلات کے مطابق انٹرنیشنل میری ٹائم آرگنائزیشن کا سمینار منعقد ہوا جس میں فاقی وزیر برائے بحری امور علی زیدی نے شرکت کی۔

    سیمینار سے خطاب کرتے ہوئے وفاقی وزیر علی زیدی کا کہنا تھا کہ آئی ایم او نیشنل سیمینار ہانگ کانگ کنونشن کا انعقاد شپ بریکنگ انڈسٹری اور شپ انڈسٹری کے لیے اہم ہے۔ ہم شپ بریکنگ انڈسٹری میں پہلے نمبر پر تھے اب چوتھے نمبر پر چلے گئے ہیں۔

    علی زیدی کا کہنا تھا کہ ہم نے چھوٹی چھوٹی چیزوں کے لیے بڑی چیزوں کا نقصان اٹھایا، بنگلہ دیش میں کپاس پیدا نہیں ہوتی لیکن وہ ٹیکسٹائل میں کئی گنا زیادہ برآمدات کر رہا ہے۔

    انہوں نے کہا کہ ہانگ کانگ کنونشن پر اگر ابھی دستخط ہوگئے تو ہم شپ بریکنگ انڈسٹری میں 4 نمبر سے بھی مزید نیچے گر جائیں گے۔ یہ کنونشن شپ بریکنگ انڈسٹری کے لیے تحفظ اور قانون پر عملدرآمد کا ہے۔ کچھ برس پہلے تحفظ پر عملدرآمد نہ کرنے سے گڈانی پر شپ بریکنگ میں کئی قیمتی انسانی جانوں کا نقصان اٹھایا۔

    علی زیدی کا کہنا تھا کہ کراچی جیسی کوسٹل بیلٹ جس ملک کے پاس موجود ہو وہ ملک قرضے لینے والا نہیں دینے والا ہوتا ہے، شپ بریکنگ انڈسٹری میں بہتری لانا ایک چیلنج ہے۔

    انہوں نے کہا کہ وزیر اعظم عمران خان نے کہا ہے کہ کسی بھی چیلنج سے گبھرانا نہیں ہے۔ پہلے ادوار میں نئے ڈریجر خریدے گئے جو کبھی استعمال نہیں کیے گئے۔ نیب میں ان کی انکوائری بھیج چکا ہوں، بغیر استعمال ہوئے کئی بار ان کے پرزے امپورٹ کروائے گئے۔

    علی زیدی کا کہنا تھا کہ حکومت کو ہر جگہ پر ریگولیشن لانے کی ضرورت ہے، شپ بریکنگ اور میری ٹائم میں ریگولیشن لا رہے ہیں۔ بہت سے لوگوں کو تکلیف ہو رہی ہیں، کسی ماں باپ کو اچھا نہیں لگتا جب بچے کو انجکشن لگتا ہے۔ ہمیں بچے کے مستقبل کے لیے یہ تکلیف برداشت کرنا پڑتی ہے۔

    انہوں نے کہا کہ ہمیں اپنے اداروں کی استعداد کار بڑھانا ہوگی، 10 سال میں پہلی بار فشریز کے ڈائریکٹرز کی تعیناتی کی گئی۔ ماضی میں ذاتی مفاد کو قومی مفاد پر ترجیح دی جاتی رہی۔ ماہی گیری کے شعبے میں 2 ارب ڈالر تک برآمدات بڑھائی جاسکتی ہے۔ میری ٹائم شعبے میں کئی اصلاحات لا رہے ہیں۔

  • فشریز کی بہتری کی پالیسی تیار ہے بس عملدر آمد کرنا ہے: علی زیدی

    فشریز کی بہتری کی پالیسی تیار ہے بس عملدر آمد کرنا ہے: علی زیدی

    کراچی: وفاقی وزیر برائے بحری امور علی زیدی کا کہنا ہے کہ ماہی گیروں کی تربیت سے بہتر نتائج حاصل کیے جا سکتے ہیں، فشریز کی بہتری کی پالیسی تیار ہے بس عملدر آمد کرنا ہے۔

    تفصیلات کے مطابق صوبائی دارالحکومت کراچی میں ٹونا کمیشن کے حوالے سے بین الاقوامی کانفرنس منعقد ہوئی جس میں بھارت سمیت 15 ممالک کے مندوبین نے شرکت کی۔ وفاقی وزیر برائے بحری امور علی زیدی نے بھی تقریب میں شرکت کی اور شرکا سے خطاب کیا۔

    اپنے خطاب میں علی زیدی کا کہنا تھا کہ 22 ویں سیشن میں وفود کو پاکستان آمد پرخوش آمدید کہتا ہوں، سب سے پہلے ہمیں درپیش چیلنجز کی طرف دیکھنا ہوگا، ہمیں چیلنجز سے نمٹنےکے لیے اقدامات کرنا ہوں گے۔

    انہوں نے کہا کہ ماہی گیروں کی تربیت سے بہتر نتائج حاصل کیے جا سکتے ہیں، فشریز کی بہتری کی پالیسی تیار ہے عملدر آمد کرنا ہے۔ باتیں ہو رہی ہیں فشریز تباہ ہورہی ہیں، تباہ نہیں ہورہیں بہتری کی طرف جارہی ہیں۔

    علی زیدی کا کہنا تھا کہ پالیسی پر عملدر آمد کی اسٹریجی کی طرف بڑھ رہے ہیں، فنڈز کی کمی سمیت کئی چیلنجز درپیش ہیں۔ آزاد تجارتی معاہدہ پاکستان اور چین میں لازوال رشتے کا مظہر ہے۔

    انہوں نے مزید کہا کہ آنے والے دنوں میں سی پیک اور پاک چین دوستی پر اور بھی اچھی خبریں آئیں گی۔ دونوں ملکوں کےعوام اور دوستوں کے لیے اچھی خبر ہے۔

    اس سے قبل لندن میں انٹرنیشنل میری ٹائم آرگنائزیشن کے 31 ویں اسمبلی اجلاس سے خطاب کرتے ہوئے علی زیدی نے کہا تھا کہ پاکستان جنوبی، وسطی اور جنوب وسطی ایشیا کے ساتھ ساتھ بین الاقوامی تجارت میں اہم کردار ادا کر سکتا ہے۔

    انہوں نے کہا تھا کہ پاکستان پائیدار ترقیاتی اہداف او آئی ایم او کی شقوں کی پابندی کرنے کے لیے سنجیدہ ہے۔ پاکستان بین الاقوامی سطح پر میری ٹائم سیکٹر کی بہتری میں کردار ادا کرے گا اور اگلے سال ہونے والے آئی ایم او الیکشن میں حصہ بھی لے گا۔

  • پاکستان بین الاقوامی میری ٹائم سیکٹر کی بہتری کے لیے کوشاں ہے: علی زیدی

    پاکستان بین الاقوامی میری ٹائم سیکٹر کی بہتری کے لیے کوشاں ہے: علی زیدی

    لندن: وفاقی وزیر بحری امور علی زیدی کا کہنا ہے کہ پاکستان بین الاقوامی سطح پر میری ٹائم سیکٹر کی بہتری میں کردار ادا کرے گا، پاکستان پورے ایشیا کے ساتھ ساتھ بین الاقوامی تجارت میں بھی اہم کردار ادا کر سکتا ہے۔

    تفصیلات کے مطابق وفاقی وزیر بحری امور علی زیدی نے لندن میں انٹرنیشنل میری ٹائم آرگنائیزیشن کے اکتیسویں اسمبلی اجلاس سے خطاب کیا۔

    وفاقی وزیر نے اپنے خطاب کا آغاز قرآن کی سورۃ الجاثیہ کی آیت نمبر 12 سے کیا۔ علی زیدی نے پاکستان کی نمائندگی کرتے ہوئے شرکا کو پاکستانی مؤقف سے آگاہ کیا۔

    علی زیدی نے پاکستان کی عالمی سطح پر سمندری تجارت کے حوالے سے جغرافیائی اہمیت اجاگر کی۔ انہوں نے کہا کہ پاکستان جنوبی، وسطی اور جنوب وسطی ایشیا کے ساتھ ساتھ بین الاقوامی تجارت میں اہم کردار ادا کر سکتا ہے۔

    انہوں نے کہا کہ پاکستان پائیدار ترقیاتی اہداف او آئی ایم او کی شقوں کی پابندی کرنے کے لیے سنجیدہ ہے۔

    علی زیدی نے نئی شپنگ پالیسی کے بارے میں بتاتے ہوئے دنیا کو پاکستانی سی فیئرز کی سروسز سے مستفید ہونے کی دعوت بھی دی۔

    انہوں نے پاکستان کی سمندری آلودگی کم کرنے کی کوششوں کے ساتھ ساتھ خطے میں میری ٹائم سیکیورٹی بہتر کرنے کی کوششوں سے بھی شرکا کو آگاہی دی۔

    وفاقی وزیر نے پاکستان میں موجودہ بلیو اکانومی کی صلاحیت، لوگوں کے اس سے جڑے روزگار، کاروباری فوائد، وزارت کے سی فیئرز اور شپنگ انڈسٹری کی بہتری کے لیے کیے گئے اقدامات سے بھی آگاہ کیا۔

    انہوں نے کہا کہ پاکستان بین الاقوامی سطح پر میری ٹائم سیکٹر کی بہتری میں کردار ادا کرے گا اور اگلے سال ہونے والے آئی ایم او الیکشن میں حصہ بھی لے گا۔

  • معیشت کے حوالے سے مزید اچھی خبریں متوقع ہیں: علی زیدی

    معیشت کے حوالے سے مزید اچھی خبریں متوقع ہیں: علی زیدی

    اسلام آباد: وفاقی وزیر برائے بحری امور علی زیدی کا کہنا ہے کہ جب نیت صاف ہو تو اللہ کی مدد حاصل ہوتی ہے، وزیر اعظم عمران خان معاشی ٹیم کی خود مانیٹرنگ کر رہے ہیں، مزید اچھی خبروں کی توقع ہے۔

    تفصیلات کے مطابق وفاقی وزیر برائے بحری امور علی زیدی نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ جب نیت صاف ہو تو اللہ کی مدد حاصل ہوتی ہے، تمام معاشی اشاریے زبردست ریکوری کی نشاندہی کر رہے ہیں۔

    علی زیدی نے کہا کہ وزیر اعظم عمران خان معاشی ٹیم کی خود مانیٹرنگ کر رہے ہیں، مزید اچھی خبروں کی توقع ہے۔

    خیال رہے کہ چند روز قبل اسٹیٹ بینک آف پاکستان نے رپورٹ جاری کی تھی جس کے مطابق ملک کا کرنٹ اکاؤنٹ ساڑھے 4 سال بعد سر پلس ہوا، اکتوبر میں کرنٹ اکاؤنٹ 9 کروڑ 90 لاکھ ڈالر سر پلس رہا۔

    اسٹیٹ بینک کے مطابق جولائی تا اکتوبر کرنٹ اکاؤنٹ خسارے میں 4.49 ارب ڈالر ریکارڈ کمی ہوئی۔ جولائی تا اکتوبر کرنٹ اکاؤنٹ خسارہ گھٹ کر 1.47 ارب ڈالر رہ گیا۔ اسٹیٹ بینک کے مطابق گزشتہ مالی سال جولائی تا اکتوبر کرنٹ اکاؤنٹ خسارہ 5.56 ارب ڈالر تھا۔

    وزیر اعظم عمران خان نے بھی اپنے ٹویٹ میں خوشی کا اظہار کرتے ہوئے کہا تھا کہ پاکستان کی معیشت بالآخر درست سمت میں جارہی ہے، ہماری معاشی اصلاحات کا پھل ملنا شروع ہوگیا۔

    انہوں نے کہا تھا کہ اکتوبر میں پاکستان کے جاری کھاتے سرپلس ہوگئے، جاری کھاتوں کا یہ سر پلس 4 سال میں پہلی بار آیا ہے۔ جاری کھاتے 9 کروڑ 90 لاکھ ڈالر سر پلس رہے۔

  • فلم گاڈ فادر بنانے والے کو پاکستان کے شریف خاندان پر بھی فلم بنانا چاہئیے، علی زیدی

    فلم گاڈ فادر بنانے والے کو پاکستان کے شریف خاندان پر بھی فلم بنانا چاہئیے، علی زیدی

    کراچی : وفاقی وزیرپورٹ اینڈشپنگ علی زیدی نے کہا ہے کہ فلم گاڈفادربنانے والے کو پاکستان کے شریف خاندان پرفلم بنانا چاہئیے ، اللہ کا قہر ان لوگوں پرنازل ہو، جنہوں نے اس ملک کولوٹا۔

    تفصیلات کے مطابق وفاقی وزیرپورٹ اینڈشپنگ علی زیدی نے سماجی رابطے کی ویب سائٹ ٹوئٹر پر نواز شریف کی ویڈیو شیئر کرتے ہوئے پیغام میں کہا کہ فلم گاڈفادربنانے والے فرانسس فورڈ کوپاکستان کے شریف خاندان پرفلم بنانا چاہئیے، اللہ ان تمام لوگوں پرکرم فرمائے جواس عظیم ملک اوراس کے عوام کے لئے جنگ کررہے ہیں اور اللہ کا قہر ان لوگوں پر نازل ہو، جنہوں نے اس ملک کو لوٹا۔

    خیال رہے گذشتہ روز سابق وزیراعظم نواز شریف علاج کے لیے لندن میں پارک لین فلیٹس پہنچے، ذاتی معالج ڈاکٹر عدنان اور 2 ملازمین بھی ان کے ہمراہ تھے، خاندانی ذرائع کا کہنا تھا کہ نوازشریف کاعلاج اسپتال نہیں لندن میں گھرپرہوگا، اس سلسلےمیں گھرکےایک کمرے کو مختص کیاگیا ہےجس میں تمام طبی سہولیات موجود ہیں۔

    مزید پڑھیں : علی زیدی نے نوازشریف کے بیرون ملک علاج پر اعتراض اٹھا دیا

    یاد رہے وفاقی وزیربرائے بحری امور علی زیدی نے نواز شریف کی بیرون ملک روانگی اور علاج پر اعتراضات اٹھائے تھے، انھوں نے شہباز شریف کے دورحکومت کی ایک ویڈیو پوسٹ کی، ویڈیو میں شہبازشریف عظیم اسپتال کے افتتاح کے دوران جوش خطابت کا مظاہرہ کررہے تھے، اسی ویڈیو پر علی زیدی نے سوال اٹھایا کہ شہبازشریف نے اسپتال کا افتتاح کرتے ہوئے کہا تھا کہ یہاں عالمی معیار کا علاج ہوگا، علاج کی سہولتیں دنیا کے کسی بھی اسپتال سے کم نہیں ہوں گی۔ تو نوازشریف کا علاج یہاں کیوں نہیں ہوسکتا؟

  • پاکستان میں سیاحت کے فروغ کیلئے اٹلی کی معاونت، اربوں ڈالر کا فائدہ ہوگا

    پاکستان میں سیاحت کے فروغ کیلئے اٹلی کی معاونت، اربوں ڈالر کا فائدہ ہوگا

    اسلام آباد: وزیراعظم کے معاون خصوصی زلفی بخاری کا کہنا ہے اٹلی شمالی علاقوں میں سیاحتی سرگرمیاں بڑھانے کے لیے تیار ہوگیا ہے، سیاحتی ترقی سے ملکی معیشت میں 20ارب ڈالر کا اضافہ ہوگا۔

    تفصیلات کے مطابق پاکستان میں سیاحت کے فروغ سے متعلق اہم پیش رفت سامنے آگئی، اٹلی پاکستان میں سیاحتی شعبے میں تکنیکی معاونت فراہم کرنے کے لیے تیار ہوگیا، زلفی بخاری سے پاکستان میں تعینات اطالوی سفیر نے خصوصی ملاقات کی اور پاکستانی سیاحت کے فروغ کے لیے تکنیکی معاونت فراہم کرنے کی پیشکش کردی۔

    اس موقع پر اطالوی سفیر کا کہنا تھا کہ موجودہ حکومت سیاحت کے فروغ کے لیے سنجیدہ اقدامات کررہی ہے، اٹلی پاکستان میں سیاحتی منصوبوں میں تعاون کا خواہاں ہے، دوطرفہ تعلقات کی مضبوطی کے لیے مزید اقدامات کریں گے۔

    دریں اثنا زلفی بخاری نے کہا کہ سیاحت کا شعبہ وزیر اعظم کے دل کے بہت قریب ہے، سیاحت کے فروغ کے لیے اہم اور بڑے فیصلے کیے ہیں، برانڈ پاکستان کی تشکیل کا کام بھی جلد مکمل ہوجائے گا، سیاحتی ترقی سے ملکی معیشت میں 20ارب ڈالر کا اضافہ ہوگا۔

    کامیاب سکھ سیاحت کے بعد پنجاب میں بدھ سیاحت کا اعلان

    ان کا کہنا تھا کہ اٹلی شمالی علاقوں میں سیاحتی سرگرمیاں بڑھانے کی تیاری شروع کردے، کرتارپورکوریڈور پاکستان میں مذہبی سیاحت کے فروغ کی اہم کڑی ہے، کرتارپور کے اقدام سے دنیا میں پاکستان کا مثبت تشخص سامنے آیا۔

    انہوں نے بتایا کہ وزیراعظم نے صوبوں کے ساتھ مل کر سیاحت پر کام تیز کرنے کا کہا، گندھارا تہذیب اور ثقافتی ورثہ بیرون ملک سیاحوں کے لیے کشش کا باعث ہے۔ کوریا، جاپان اور چین جیسے ممالک سے سیاح پاکستان آئیں گے۔