ARYNews.tv | Urdu – Har Lamha Bakhabar

Tag: علی زیدی

  • علی زیدی نے نوازشریف کے بیرون ملک علاج پر اعتراض اٹھا دیا

    علی زیدی نے نوازشریف کے بیرون ملک علاج پر اعتراض اٹھا دیا

    کراچی: وفاقی وزیربرائے بحری امور علی زیدی نے نواز شریف کی بیرون ملک روانگی اور علاج پر اعتراضات اٹھاتے ہوئے کہا ہے کہ نوازشریف کا علاج پاکستان میں کیوں نہیں ہوسکتا؟

    تفصیلات کے مطابق سماجی رابطے کی ویب سائٹ ٹوئٹر پر علی زیدی نے شہباز شریف کے دورحکومت کی ایک ویڈیو پوسٹ کی، ویڈیو میں شہبازشریف عظیم اسپتال کے افتتاح کے دوران جوش خطابت کا مظاہرہ کررہے ہیں۔

    اسی ویڈیو پر علی زیدی نے سوال اٹھایا کہ شہبازشریف نے اسپتال کا افتتاح کرتے ہوئے کہا تھا یہاں عالمی معیار کا علاج ہوگا، علاج کی سہولتیں دنیا کے کسی بھی اسپتال سے کم نہیں ہوں گی۔ تو نوازشریف کا علاج یہاں کیوں نہیں ہوسکتا؟

    گزشتہ روز بھی وفاقی وزیر علی حیدر زیدی نے سماجی رابطے کی ویب سائٹ ٹوئٹر پر اپنے پیغام میں کہا تھا کہ نواز شریف اب ن لیگ اور شریف قبیلے کے قیدی ہیں، میں یہ سمجھنے سے قاصر ہوں کہ شریف فیملی اور ان کے قریبی ساتھی گارنٹی بانڈ کیوں جمع نہیں کراتے۔

    انہوں نے لکھا تھا کہ ‘یہ نواز شریف کے لیے بانڈ جمع کرائیں اور انہیں باہر لے جاکر علاج کرالیں۔‘

    نواز شریف کا نام ای سی ایل سے نکالنے کا حکم، تحریری فیصلہ جاری

    واضح رہے کہ لاہور ہائیکورٹ نے سابق وزیراعظم کا نام ای سی ایل سے نکالنے کا حکم دیتے ہوئے نوازشریف کو بیرون ملک جانے کی اجازت دے دی ہے۔

    ذرائع کا کہنا ہے کہ نوازشریف کی طبیعت بہتر ہوئی تو کل یا پھر منگل تک لندن روانگی کا امکان ہے، نواز شریف پہلے لندن جائیں گے اور ڈاکٹرز نے تجویز دی تو انہیں کسی اور ملک لے جایا جائے گا۔

  • ’پاکستان میں کام کرنے والا فری کی زمین بھول جائے‘

    ’پاکستان میں کام کرنے والا فری کی زمین بھول جائے‘

    کراچی: وفاقی وزیر برائے بحری امور علی زیدی نے کہا ہے کہ پاکستان میں کام کرنے والا فری کی زمین بھول جائے، کم از کم پورٹ اینڈ شپنگ کی زمین فری میں نہیں دی جائے گی۔

    تفصیلات کے مطابق کراچی میں میڈیا سے بات کرتے ہوئے وفاقی وزیر بحری امور علی زیدی نے کہا کہ کےپی ٹی کی ہزاروں ایکڑ زمین پر قبضہ ہے، کیا زمینوں پر قبضہ کےپی ٹی سے مدد کے بغیر ہوسکتا تھا؟ خالی نعرے لگانے سے مسائل حل نہیں کئےجاسکتے۔

    انہوں نے کہا کہ سی فیئرزملکی معیشت میں اہم کردار ادا کرسکتے ہیں، سی فیئرزقیمتی زرمبادلہ کما کرلاتے ہیں ، بحری جہاز پر سی فیئریزکیلئےسائن ان اورسائن آف ختم کردیا ہے۔

    وفاقی وزیر کا کہنا تھا کہ پہلے ایک پورٹ ہیلتھ آفس تھا اب 9 ہیں، 60 سال سے زائدسیلرزکی سروس کی معیاد ایک سال بڑھادی جب کہ پبلک شپنگ آفس کاڈیلنگ ٹائم کو3 بجے تک بڑھادیا گیاہے۔

    علی زیدی کا کہنا تھا کہ کہ پاکستان میں کام کرنے والا مفت کی زمین بھول جائے ،کم از کم پورٹ اینڈ شپنگ کی زمین فری میں نہیں دی جائے گی۔

    ان کا کہنا تھا کہ دھرنےسےحکومت جانےوالی نہیں ہے، دھرنےکےشرکامعصوم ہیں وہ جب تک چاہیں بیٹھے رہیں، ان کو کہیں نہیں بھیج رہے۔

  • جعلی مولویوں نےلاکھوں سادہ لوح افرادکوگمراہ کر رکھاہے، علی زیدی

    جعلی مولویوں نےلاکھوں سادہ لوح افرادکوگمراہ کر رکھاہے، علی زیدی

    کراچی: وفاقی وزیر برائے بحری امور علی زیدی نے کہا ہے کہ کئی دہائیوں سےجعلی مولویوں نےمذہب کاغلط استعمال کیا اور ان جعلی مولویوں نےلاکھوں سادہ لوح افراد کو گمراہ کر رکھا ہے۔

    تفصیلات کے مطابق مولانا فضل الرحمان کے اسلام آباد میں آزادی مارچ پر وفاقی وزیر علی زیدی نے سماجی رابطے کی ویب سائٹ ٹوئٹر پر اپنے بیان میں لکھا کہ جعلی مولوی ایسے کام کراتے ہیں جو دین اور عقل کے خلاف ہیں۔

    علی زیدی نے لکھا کہ کئی دہائیوں سے ان جعلی مولویوں نے مذہب کا غلط استعمال کرکے لاکھوں سادہ لوگوں کو گمراہ کر رکھاہے! بجائے سیدھا راستہ دکھانے کے، یہ ان سےایسے کام کرواتے ہیں جو کہ دین اور عقل دونوں کے خلاف ہیں.

    وفاقی وزیر نے کہا کہ علماء پر معاشرے کی اصلاح کی ذمہ داری ہے نہ کہ اس میں فتنہ فساد برپا کرنے کی۔

    اس قبل گزشتہ روز مولانا فضل الرحمان پر طنزیہ شاعری کرتے ہوئے علی زیدی نے کہا تھا کہ ’ہم کو معلوم ہے دھرنے کی حقیقت لیکن ، دل کے خوش رکھنے کو فضلو یہ خیال اچھا ہے۔

    واضح رہے کہ مولانا فضل الرحمان نے آزادی مارچ کے دوران وزیراعظم کو مستعفی ہونے کے لیے 2 دن کی مہلت دیتے کہا تھا کہ یہ مجمع قدرت رکھتاہےکہ وزیراعظم کوگھرسےگرفتارکرلے،ادارے2دن میں بتادیں موجودہ حکومت کی پشت پرنہیں کھڑے۔

    یہ بھی پڑھیں: فضل الرحمان کی تنقید،حکومت کو2 دن کی مہلت

    دوسری جانب وفاقی وزیر برائے مذہبی امور پیر نور الحق قادری نے مولانا فضل الرحمان کے بیان پر ردعمل دیتے ہوئے کہنا تھا کہ ناموسِ رسالت ﷺ کے مقدس نام پر لوگوں کو ورغلانا سمجھ سے بالاتر ہے۔

    اُن کا کہنا تھا کہ ختم نبوت ﷺ پر کوئی سمجھوتہ نہیں کرسکتا، عمران خان عالمی سطح پر ناموسِ رسالت ﷺ کا دفاع کررہے ہیں، ہم اپنے جان و دل سے ناموس رسالت کا تحفظ کریں گے۔

  • ’’کہیں نہیں جارہے، حکومت مدت پوری کرے گی‘‘

    ’’کہیں نہیں جارہے، حکومت مدت پوری کرے گی‘‘

    اسلام آباد: وفاقی وزیر برائے بحری امور علی زیدی نے کہا ہے کہ مولانا فضل الرحمان کے مطالبات نہ قابلِ فہم ہیں، حکومت اپنی پانچ سال کی مدت پوری کرے گی۔

    مولانا فضل الرحمان کی تقریر پر ردعمل دیتے ہوئے علی زیدی کا کہنا تھا کہ اگر معاہدہ توڑا گیا تو وہ ہوگا جو اپوزیشن بھی نہیں جانتی، حکومت اپنی حکمت عملی طے کرچی البتہ اُسے ابھی ٹی وی پر بتایا نہیں جاسکتا۔

    اُن کا کہنا تھا کہ حکومت پر تنقید کرنے والے پاکستان کو سوئٹزرلینڈ توبنا نہ سکے بلکہ ملکی دولت لوٹ کرلےگئے، اپوزیشن نےاقتدارمیں رہ کرملک کو دونوں ہاتھوں سےلوٹا۔

    مزید پڑھیں: حکومت کا مولانا فضل الرحمان سے پھر رابطے کا فیصلہ

    علی زیدی نےاپوزیشن جماعتوں کےمارچ کومکس اچارقرار دیتے ہوئے کہا کہ حزب اختلاف کی جماعتوں کا احتجاج سوائےکنفیوژن کےکچھ نہیں، شہبازشریف اس سےپہلےبھی کئی دعوےکرچکے، بلاول بھٹو کو مشورہ ہے کہ وہ اپنےصوبےپر تو توجہ دیں۔

    قبل ازیں سابق وفاقی وزیر خزانہ اور تحریک انصاف کے رہنما  اسد عمر کا کہنا تھا کہ مولانا نے ابھی تک رابطہ کیا اور نہ ہی مطالبات سامنے رکھے، یہ لوگ 48 گھنٹے مشاورت کے بعد واپس چلے جائیں گے۔

    یہ بھی پڑھیں: ضروری نہیں کہ مولانا فضل الرحمان کے تمام مطالبات مانے جائیں، علی محمد خان

    یاد رہے کہ مولانا فضل الرحمان نے آزادی مارچ کا آغاز 27 اکتوبر کو کراچی سے کیا اور آج وہ اسلام آباد پہنچے جہاں جلسے کا اہتمام کیا گیا، اپوزیشن جماعتوں کے قائدین اور مولانا فضل الرحمان نے جلسے سے خطاب بھی کیا۔

  • کراچی میں سڑکوں کی صورتحال بہت خراب ہے: علی زیدی

    کراچی میں سڑکوں کی صورتحال بہت خراب ہے: علی زیدی

    کراچی: وفاقی وزیر برائے بحری امور علی زیدی کا کہنا ہے کہ کراچی میں سڑکوں کی صورتحال بہت خراب ہے، بڑے صنعتکاروں نے کراچی میں سائٹ ایریا جانا چھوڑ دیا ہے۔

    تفصیلات کے مطابق وفاقی وزیر برائے بحری امور علی زیدی نے فیڈریشن آف پاکستان چیمبرز آف کامرس کی تقریب سے خطاب کرتے ہوئے کہا کہ میری ٹائم کا معیشت سے گہرا تعلق ہے، دنیا کہاں پہنچ گئی اور ہم وہیں کھڑے ہیں۔

    علی زیدی نے کہا کہ اپنی وزارت کو ڈیجیٹل کرنے کی طرف لے جا رہے ہیں، اگلے ہفتے سے فائلز کو ای فائل پر منتقل کرنے جا رہے ہیں۔ کراچی کا انفرا اسٹرکچر تباہ اور جگہ جگہ کچرا پڑا ہے۔ کراچی کے انفرا اسٹرکچر میں تمام انتظامی امور آتے ہیں۔ پاکستان کو آگے لے جانے کے لیے نئی چیزوں کے بارے میں سوچنا ہوگا۔

    انہوں نے کہا کہ شہر پورٹ نہیں چلاتے بلکہ پورٹ شہر چلاتے ہیں، معیشت تب تک درست نہیں ہوسکتی جب تک مسائل حل نہ ہوں۔ انرجی، فیول، درآمد اور برآمدات کا تعلق پورٹ سے ہوتا ہے۔ کنٹینر کی اسکینر پر 5 ڈالر کی وصولی روک دی ہے۔

    علی زیدی نے کہا کہ ایف ڈبلیو او کے تعاون سے نالوں کی صفائی کا کام سنبھالا، اگلے دن ڈی ایم سی کھڑی ہوجاتی ہے کہ ہم کچرا اٹھائیں گے۔ کچرا کنڈیوں کو ٹھیکے پر فروخت کیا جاتا ہے۔ کچرےمیں لوہے کا سامان، تاریں وغیرہ ہوتی ہیں۔

    انہوں نے کہا کہ کراچی میں سڑکوں کی صورتحال بہت خراب ہے، صنعتکاروں نے گھروں سے فیکٹریاں چلانا شروع کردیں۔ بڑے صنعتکاروں نے کراچی میں سائٹ ایریا جانا چھوڑ دیا ہے۔ معاشی حالات بہتر کرنے سے روزگار کے مواقع ملیں گے۔

    وزیر اعظم کی اقوام متحدہ میں تقریر کے بارے میں ان کا کہنا تھا کہ وزیر اعظم نے تقریر میں پاکستان اور اسلام کا دفاع کیا، مغرب نہیں سمجھتا ہمارے ناموس رسالت پر کیا جذبات ہیں۔ ہم ہولو کاسٹ پر بات کرتے تھے تو وہ بہت مشکل میں آتے تھے۔ وزیر اعظم نے تقریر میں کشمیر پر ہونے والے مظالم پر بات کی۔

  • عمران خان انسانیت کے سفیر بن کر اقوام متحدہ گئے ہیں: علی زیدی

    عمران خان انسانیت کے سفیر بن کر اقوام متحدہ گئے ہیں: علی زیدی

    اسلام آباد: وفاقی وزیر برائے بحری امور علی زیدی نے کہا ہے کہ مقبوضہ کشمیر میں جو کچھ مودی حکومت کررہی ہے، ہٹلر نے بھی یہی کیا تھا، وزیر اعظم نے پریس کانفرنس میں واضح کر دیا عالمی برادری کو کشمیر کے معاملے پر کھڑا ہونا پڑے گا۔

    اپنے ایک بیان میں علی زیدی کا کہنا تھا کہ عمران خان انسانیت کے سفیر بن کر اقوام متحدہ گئے ہیں، مقبوضہ کشمیر میں انسانی بحران پیدا ہو چکا ہے، فوری کرفیو ہٹایا جائے۔

    انہوں نے کہا کہ ہٹلر نے 1939 میں بڑا جلسہ کیا اور تین ماہ بعد جنگ شروع کر دی تھی، لوگ پریشان ہیں مودی نے پچاس ہزار لوگ کیسے اکٹھے کر لئے۔

    ان کا کہنا تھا کہ مودی ہٹلر اور آر ایس ایس کے نظریے پر چلتا ہے، ہم صرف یہ کہہ رہے ہیں کہ اقوام متحدہ کی قراردادوں پر عمل درآمد کروایا جائے، کشمیر سے فوری طور پر کرفیو ہٹایا جائے۔

    بھارت مسئلہ کشمیر کو دوطرفہ کہہ کر امریکا اور عالمی برادری سے فریب کررہا ہے، شاہ محمود

    وفاقی وزیر کا کہنا تھا کہ مقبوضہ کشمیر میں انسانی بحران پیدا ہو چکا ہے، غزہ میں انسانی بحران پیدا ہوا تو ترکی نے انسانی بنیادوں پر اپنے بحری جہاز بھیج تھے، ترکی نے اپنے بحری جہاز کے ذریعے کھانے پینے کی اشیا اور ادویات ترکی بھیجی تھی، یہ نہ ہو پاکستان کو بھی بحری جہاز مقبوضہ کشمیر میں بھیجنے پڑیں۔

    علی زیدی کا مزید کہنا تھا کہ جنگ کے حق میں نہیں، جنگ سے اور لوگ مر جاتے ہیں، اس کا مطلب یہ نہیں کہ ہم ڈرپوک ہیں، ہمارا پیغام واضح اور کلیئر ہے۔

  • علی زیدی کا شپنگ پالیسی لانے کا اعلان

    علی زیدی کا شپنگ پالیسی لانے کا اعلان

    اسلام آباد: وفاقی وزیر برائے بحری امور علی زیدی کا کہنا ہے کہ آئندہ کابینہ اجلاس میں شپنگ پالیسی سامنے لائیں گے۔ ایک زمانہ تھا جب ہر کوئی پاکستان میں شپنگ انڈسٹری سے جڑا تھا، فشریز کے سابق وزیر نے اس ادارے کا بیڑہ غرق کردیا۔

    تفصیلات کے مطابق وفاقی وزیر برائے بحری امور علی زیدی نے پریس کانفرنس کرتے ہوئے کہا کہ پاکستان میں ہر شریف آدمی کہتا ہے سیاست میں نہیں آؤں گا، سیاست بری اس لیے تھی کہ اچھے لوگ باہر ہیں۔ اگر اچھے لوگ سیاست میں آجائیں تو سیاست بھی اچھی ہو۔

    علی زیدی نے کہا کہ اللہ کا شکر ہے عمران خان کی وجہ سے سیاست میں اچھے لوگ آئے۔ اسد عمر اور ڈاکٹر عارف علوی جیسے اچھے لوگ سیاست میں آئے۔ میرے خاندان میں بھی کوئی سیاست میں نہیں تھا۔ لوگوں کو آج تک سمجھ نہیں آیا شپنگ کتنی بڑی صنعت ہے۔

    انہوں نے کہا کہ میں نے بہت کچھ سیکھا ہے اور آج بھی سیکھ رہا ہوں، پاکستان میں زیادہ تر لوگوں کو اندازہ نہیں بلیو اکانومی کیا ہوتی ہے۔ بلیو اکانومی کو دنیا میں بہت اہمیت دی جاتی ہے۔

    علی زیدی کا کہنا تھا کہ اب ہم لوگ شپنگ پالیسی لے کر آرہے ہیں۔ اچھی تجاویز پر عمل کے لیے حکومت میں آنا ضروری ہے۔ آئندہ کابینہ اجلاس میں شپنگ پالیسی سامنے لائیں گے۔ پٹرول پمپ اور شادی ہالز بنانے والا آج ہیوسٹن میں بیٹھا کھا رہا ہے، فشریز کے سابق وزیر نے اس ادارے کا بیڑہ غرق کردیا۔

    انہوں نے کہا کہ ایک زمانہ تھا جب ہر کوئی پاکستان میں شپنگ انڈسٹری سے جڑا تھا، فشریز کے سابق وزیر نے اس ادارے کا بیڑہ غرق کردیا۔

    وفاقی وزیر کا کہنا تھا کہ پالیسی کے تحت پرائیوٹ سیکٹرز کو جہاز خریدنے کا مواقع دے رہے ہیں، آپ جہاز خرید کر پاکستانی پرچم کے ساتھ بغیر کسٹم ڈیوٹی چلائیں۔ اگر پاکستانی جہاز ہوگا تو اسے پورٹ پر پہلے موقع ملے گا۔ نئے پالیسی سے ڈیمریج کا مسئلہ نہیں ہوگا۔ میں پرائیوٹ سیکٹر کو کہوں گا اپنا ذاتی جہاز خریدیں۔

    انہوں نے کہا کہ پورٹ پر ہونے والی ٹریڈ پاکستانی کرنسی میں کی جائے گی۔ یاد رکھیں شہر نہیں ملک کو پورٹ چلاتے ہیں۔ پرویز مشرف کے دور میں کے پی ٹی پر پل بنایا گیا۔ کے پی ٹی انڈر پاس بنا دیا گیا تو اب اس کا خیال بھی رکھنا چاہیئے۔ سندھ حکومت نے مان لیا کہ سندھ میں کچرا ہے، شکریہ ادا کرتا ہوں۔ سندھ حکومت کے پاس مشینری، پیسہ اور لوگ بھی موجود ہیں۔

    علی زیدی کا کہنا تھا کہ پورٹ کا خیال نہیں کریں گے تو سب تباہ ہوجائے گا، کچرا اٹھانا میری منسٹری کا کام نہیں ہے۔ باتیں شروع کردی گئیں کہ میں نے کچرا پھینک دیا، میں نے تو لوگوں کو تیار کیا کہ کچرا اٹھاتے ہیں۔ ایف ڈبلیو او سے تعاون کی اپیل کی ان کا شکریہ کرتا ہوں۔

    انہوں نے مزید کہا کہ 70 ملی میٹر کی بارش میں کراچی شہر ڈوب گیا، اگلی بارش 170 ملی میٹر ہوئی مگر شہر نہیں ڈوبا۔ شہر میں کوئی علاقہ ایسا نہیں جس کے ایک کلو میٹر فاصلے پر کچی آبادی نہ ہو، چیلنج یہ ہے کہ جتنا اللہ نے نوازا ہے اتنی ذمہ داری بھی بنتی ہے۔

  • خوشی ہے 11سال بعد کراچی کیلئے سندھ حکومت کو ہوش آہی گیا ، علی زیدی

    خوشی ہے 11سال بعد کراچی کیلئے سندھ حکومت کو ہوش آہی گیا ، علی زیدی

    کراچی : وفاقی وزیر علی زیدی کا کہنا ہے کہ خوشی ہے 11سال بعدکراچی کیلئےسندھ حکومت کو ہوش آہی گیا ، کراچی کی صفائی کے بعد سندھ کے دیگر شہروں پر بھی توجہ دیں، دعا ہے قسمت آپ کا ساتھ دے اور آپ مہم میں کامیاب ہوں۔

    تفصیلات کے مطابق وفاقی وزیر علی زیدی نے سماجی رابطے کی ویب سائٹ ٹوئٹر پر وزیربلدیات سندھ ناصر حسین شاہ کی صفائی مہم پر ردعمل دیتے ہوئے کہا خوشی ہے 11سال بعد کراچی کے لئے سندھ حکومت کو ہوش آہی گیا اور سندھ حکومت کو اپنی ذمہ داریاں کا احساس ہوا۔

    وفاقی وزیر کا کہنا تھا کہ سندھ سالڈویسٹ مینجمنٹ بورڈکے پاس افرادی، مالی، تکنیکی وسائل ہیں، اس اقدام پر میں ناصر شاہ کا شکر گزار ہوں، پرانے وزیر بلدیات اور ان کے ساتھی کو مہم سے دور رکھنا نہ بھولیں۔

    علی زیدی کا کہنا تھا کہ کراچی کی صفائی کے بعد سندھ کے دیگر شہروں پر بھی توجہ دیں، حیدر آباد، میرپورخاص، بدین،سکھر، لاڑکانہ ، شکارپور، جیکب آباد، گھوٹکی و دیگر شہروں کی بھی میں بھی صفائی کرائیں ، تمام اضلاع بھی ہمارے عظیم صوبے کا حصہ ہیں، سندھ کے دیگر علاقوں کے حالات بھی افسوسناک حد تک خراب ہیں، دعا ہے قسمت آپ کا ساتھ دے اور آپ مہم میں کامیاب ہوں۔

  • کراچی میں کچرے سے ہماری جنگ جاری رہے گی: علی زیدی

    کراچی میں کچرے سے ہماری جنگ جاری رہے گی: علی زیدی

    کراچی: وفاقی وزیر علی زیدی نے کہا ہے کہ کراچی میں کچرے سے ہماری جنگ جاری ہے.

    ان خیالات کا اظہار انھوں نے کراچی میں ایک نجی تقریب میں خطاب کرتے ہوئے کیا. علی زیدی نے کہا کہ کچرا اٹھانا میری دنیاوی یا حکومتی ذمہ داری نہیں، ضمیر کی آواز پر کچرا اٹھانے کی مہم شروع کی.

    انھوں نے کہا کہ یہ ضمیر کی آواز تھی، کچرے کے باعث کراچی شہر میں دفتر سے گھر پہنچنا ایک مسئلہ تھا، نارتھ ناظم آباد میں بچے بجلی کے کھمبے سے کرنٹ لگ کر مر گئے، ایسے اور بھی واقعات ہوئے۔

    وفاقی وزیر کا کہنا تھا کہ کشمیر میں مودی سے لڑائی ہے، کراچی میں ہم کچرے سے جنگ لڑ رہے ہیں، جو جاری رہے گی.

    مزید پڑھیں: شہر کی مکمل صفائی تک کلین کراچی مہم جاری رہے گی: علی زیدی

    علی زیدی نے ماضی یاد کرتے ہوئے کہا کہ میں ا شہر میں 3 الیکشن ہارنے کے بعد چوتھا الیکشن جیتا، لوگ پہلا  الیکشن ہار کر بھاگ جاتے ہیں، مگر میں نے مقابلہ کیا.

    خیال رہے کہ علی زیدی نے چند روز قبل اپنے ایک بیان میں واضح کیا تھا کہ کراچی کا کچرا ختم ہونے تک یہ مہم جاری رہے گی. اس ضمن میں‌میڈیا پر چلنے والی خبروں‌میں کوئی صداقت نہیں.

  • شہر کی مکمل صفائی تک کلین کراچی مہم جاری رہے گی: علی زیدی

    شہر کی مکمل صفائی تک کلین کراچی مہم جاری رہے گی: علی زیدی

    کراچی: وفاقی وزیر علی زیدی نے کہا ہے کہ کلین کراچی مہم کا کراچی کی صفائی سے پہلے رکنے کا سوال ہی نہیں پیدا ہوتا.

    ان خیالات کا اظہار انھوں نے کلین کراچی مہم سے متعلق میڈیا خبروں پر ردعمل دیتے ہوئے کیا. علی زیدی نے کہا کہ بارش کے دوران نالوں کی صفائی کچھ دیر کے لئے روکی گئی.

    وفاقی وزیر بحری امور  نے کہا کہ نالے صاف کر کے پانی کا بہاؤ بحال کیا گیا، گورنرسندھ کی درخواست پرمحرم جلوسوں کے راستے صاف کر رہے ہیں، کوشش ہےمحرم میں کچرےکی وجہ سےمشکلات نہ ہوں.

    علی زیدی نے مزید کہا کہ فنڈنگ کی قلت سے متعلق افواہوں میں کوئی صداقت نہیں، کام جاری رہے گا.

    مزید پڑھیں: کراچی کوٹھیک کرنے کے لیے یہاں ایمرجنسی نافذ کی جانی چاہیے، علی زیدی

    خیال رہے کہ میڈیا میں یہ خبریں گردش کر رہی تھیں کہ کراچی میں علی زیدی کی جانب سےکلین کراچی مہم روک دی گئی ہے اور نالوں کی صفائی کا کام یکم ستمبرسے بند ہے.

    البتہ وفاقی وزیر علی زیدی نے ان کی تردید کرتے ہوئے واضح‌ کیا ہے کہ یہ سلسلہ کراچی کی مکمل صفائی تک جاری رہے گا، فنڈز کی کمی کا تاثر غلط ہے.

    وفاقی وزیرعلی زیدی نے بارشوں کی تباہ کاری کے بعد 4 اگست کوکلین کراچی مہم کا آغاز کیا تھا.