کراچی : عبداللہ ہارون روڈ صدر میں عمارت کی پہلی منزل پر اسلحہ ڈیلر کے گودام میں آگ لگ گئی، عمارت کی اوپری منزل میں لوگ رہائشی پذیر تھے۔
تفصیلات کے مطابق کراچی کی رہائشی عمارت میں آتشزدگی نے غیر قانونی دھندے کا پول کھول دیا، میزانائن فلور پر ڈمی اسلحہ کے دو گودام لپیٹ میں آگئے۔
صدر کے علاقے عبداللہ ہارون روڈ پر قائم عمارت میں شارٹ سرکٹ سے اچانک آگ بھڑک اٹھی، جس نے پوری عمارت کو اپنی لپیٹ میں لے لیا، عمارت کی اوپری منزل میں لوگ رہائشی پذیر تھے۔
اطلاع ملنے پر فائربریگیڈ کی دو گاڑیاں آگ بجھانے پہنچیں اور کافی جدوجہد کے بعد آگ پر قابو پالیا گیا تاہم خوش قسمتی سے کسی کے زخمی ہونے کی اطلاعات نہیں ہیں۔
اے آر وائی نیوز کے نمائندے سلمان لودھی کے مطابق دکانیں کھلیں تو لوگ ہکا بکا رہ گئے,کولنگ کے عمل کے بعد جب عمارت کی تلاشی لی گئی تو وہاں دو اسلحہ کے گودام تھے، ان گوداموں میں کئی ایئر گنز بھی موجود تھیں جو جل کر خاکستر ہوگئیں۔
اس حوالے سے پولیس کا کہنا ہے کہ گوادم مالک کو اسلحہ کے تمام ریکارڈ کے ساتھ طلب کرلیا ہے، اس کی مکمل تحقیقات کی جائیں گی، گودام مالک کے مطابق کچھ کھلونا اسلحہ بھی گودام میں موجود تھا۔
واضح رہے کہ محکمہ داخلہ سندھ کی جانب سے ڈمی اورکھلونا اسلحے کی خرید و فروخت پر پہلے ہی پابندی لگا رکھی ہے۔ اس کے باوجود گودام کیسے بن گیا؟ پولیس کی جانب سے کوئی کارروائی کیوں نہیں کی گئی؟ کتنے عرصے سے یہ غیر قانونی کام چل رہا تھا؟
