لاہور : انسدادِ دہشت گردی عدالت نے جناح ہاؤس حملہ کیس میں بانی پی ٹی آئی کے بھانجے شاہ ریز خان کو جوڈیشل ریمانڈ پر جیل بھیج دیا۔

تفصیلات کے مطابق انسدادِ دہشت گردی عدالت کے جج منظر علی گل نے علیمہ خانم کے بیٹے شاہ ریز خان کے جسمانی ریمانڈ سماعت کی، پولیس نے 8 روزہ جسمانی ریمانڈ مکمل ہونے پر ملزم شاہ ریز خان کو عدالت میں پیش کیا اور مزید جسمانی ریمانڈ کی استدعا کی۔

تفتیشی افسر نے عدالت کو بتایا کہ شاہ ریز خان سے ڈنڈا برآمد کیا گیا ہے جبکہ فوٹو گرامیٹک ٹیسٹ بھی کرایا جا چکا ہے، اس لیے وقوعہ کی مزید تفتیش کے لیے مزید جسمانی ریمانڈ دیا جائے۔

دورانِ سماعت شاہ ریز خان کے وکیل سلمان اکرم راجہ نے مؤقف اپنایا کہ ملزم 9 مئی کو لاہور میں موجود نہیں تھے بلکہ دوستوں کے ہمراہ چترال گئے ہوئے تھے۔ اس سلسلے میں شاہ ریز خان کے دوستوں کے بیان حلفی بھی عدالت میں جمع کرائے گئے۔

وکیل کے مطابق عمران خان کے بھانجے ملک کے بہترین ایتھلیٹ ہیں اور انہیں صرف بانی پی ٹی آئی کا بھانجا ہونے کی وجہ سے مقدمے میں ملوث کیا گیا ہے استدعا ہے کہ شاہ ریز خان کو مقدمے سے ڈسچارج کیا جائے۔

عدالت نے فریقین کے دلائل سننے کے بعد عمران خان کے بھانجے کو 14 روزہ جوڈیشل ریمانڈ پر جیل بھیجنے کا حکم دے دیا۔

سماعت کے موقع پر شاہ ریز خان کی والدہ علیمہ خانم، خالہ عظمیٰ خانم اور تحریک انصاف کے دیگر رہنما بھی عدالت میں موجود تھے

لاہور : پنجاب اسمبلی میں اپوزیشن لیڈر کی نامزدگی کے معاملے پر پاکستان تحریک انصاف نے اپنی سیاسی کمیٹی کے ذریعے پانچ نام بانی چیئرمین کو بھجوا دیے ہیں۔

تفصیلات کے مطابق پنجاب اسمبلی میں نئے قائد حزب اختلاف کی نامزدگی کیلئے پی ٹی آئی سیاسی ٹیم نے بانی تحریک انصاف کو پانچ نام بھجوا دئیے ہیں۔

ذرائع نے بتایا کہ بھیجے گئے ناموں میں سے تحریک انصاف کے بانی آئندہ ہونےوالی اپنے وکلاء یا فیملی کے ساتھ ملاقات میں ایک نام فائنل کریں گے۔

ذرائع کا کہنا ہے کہ سیاسی کمیٹی نےمعین ریاض قریشی، علی امتیاز وڑائچ ، اوعجاز شفیع ، شیخ امتیاز اور رانا شہباز کا نام دیئے ہیں، بانی پانچ ناموں میں سے کسی ایک کا نام اپوزیشن لیڈرپنجاب اسمبلی کے لئے تجویز کریں گے۔

ذرائع کے مطابق پی ٹی آئی کی کوشش ہے کہ پنجاب اسمبلی کے آئندہ اجلاس سے قبل اپوزیشن لیڈر کا نام فائنل کر لیا جائے تاکہ اسمبلی میں مؤثر نمائندگی یقینی بنائی جا سکے۔

مزید پڑھیں‌: پی ٹی آئی میں مبینہ اختلاف، محمود اچکزئی کی بطور اپوزیشن لیڈر نامزدگی روک دی گئی

یاد رہے کہ اس سے قبل پی ٹی آئی نے قومی اسمبلی اور سینیٹ میں قائدِ حزبِ اختلاف کے نامزدگی کے عمل کو مؤخر کر دیا تھا۔ پارٹی کمیٹی نے اعلان کیا تھا کہ محمود خان اچکزئی اور اعظم سواتی کی نامزدگی کو اس وقت تک روکا گیا ہے جب تک عمر ایوب اور شبلی فراز کی اپیلوں پر فیصلہ نہیں ہو جاتا۔

پی ٹی آئی کے سیکرٹری جنرل سلمان اکرم راجہ نے کہا تھا کہ پارٹی قیادت موجودہ اپوزیشن لیڈروں کے ساتھ کھڑی ہے، پارٹی بانی عمران خان نے نئے نام تجویز کیے ہیں، اور امید ہے کہ عدالت کا فیصلہ پی ٹی آئی کے حق میں آئے گا۔

واضح رہے کہ قومی اسمبلی میں محمود خان اچکزئی کو اپوزیشن لیڈر نامزد کرنے کے عمران خان کے فیصلے پر پارٹی کے اندر اختلافات بھی سامنے آئے تھے۔

متعدد رہنماؤں نے اس فیصلے پر اعتراض کرتے ہوئے کہا تھا کہ پارٹی کے پاس اپنے کئی اہل امیدوار موجود ہیں، تاہم بعض اراکین کا مؤقف تھا کہ عمران خان کا فیصلہ حتمی اور قابلِ عمل ہونا چاہیے۔

لاہور : جناح ہاؤس حملہ کیس میں بانی پی ٹی آئی کے بھانجے اور علیمہ حانم کے دوسرے بیٹے شیر شاہ کو 5 روزہ جسمانی ریمانڈ پر پولیس کے حوالے کردیا۔

تفصیلات کے مطابق لاہور کی انسداد دہشت گردی کی عدالت میں جناح ہاؤس حملہ کیس میں بانی پی ٹی آئی عمران خان کے بھانجے شیر شاہ کے جسمانی ریمانڈ کی درخواست پر سماعت ہوئی۔

سماعت کے دوران تفتیشی افسر نے مؤقف اپنایا کہ ملزم موقع پر موجود تھا جس کے ویڈیو شواہد موجود ہیں، عدالت میں جناح ہاؤس کی ویڈیو بھی چلائی گئی جس میں شیرشاہ کو دیکھا جا سکتا ہے۔

تفتیشی افسر نے کہا کہ ملزم کا فوٹوگرامیٹک اور پولی گرافک ٹیسٹ کروانا ہے، لہٰذا عدالت 30 روزہ جسمانی ریمانڈ دے۔

مزید پڑھیں : بانی پی ٹی آئی کی بہن علیمہ خانم کا دوسرا بیٹا بھی زیر حراست

دوسری جانب ملزم کے وکیل سلمان اکرم راجہ نے عدالت میں مؤقف اختیار کیا کہ 27 ماہ بعد یاد آیا ہے کہ ملزم کو گرفتار کیا جائے، اس سے قبل بھی عدالتیں تاخیر سے گرفتاری پر ملزمان کو ڈسچارج کر چکی ہیں۔

وکیل کا کہنا تھا کہ اگر یہ سلسلہ جاری رہا تو پورے شہر کو گرفتار کر لیا جائے گا۔ عدالت سے استدعا ہے کہ ملزم کو جسمانی ریمانڈ پر نہ دیا جائے بلکہ ڈسچارج کیا جائے۔

عدالت نے دلائل سننے کے بعد عمران خان کے بھانجے کے جسمانی ریمانڈ کے حوالے سے فیصلہ محفوظ کر لیا اور بعد ازاں فیصلہ سناتے ہوئے شیر شاہ کا 5 روزہ جسمانی ریمانڈ منظور کرلیا اور ملزم کو پولیس کے حوالےکردیا۔

اسلام آباد : بانی پی ٹی آئی کی جانب سے قومی اسمبلی اور سینیٹ میں اپوزیشن لیڈر کے لئے نامزد نام سامنے آگئے۔

تفصیلات کے مطابق بانی پاکستان تحریک انصاف (پی ٹی آئی) عمران خان نے قومی اسمبلی اور سینیٹ میں اپوزیشن لیڈر کے لیے نئے نام فائنل کر دیے ہیں۔

قومی اسمبلی میں محمود خان اچکزئی کو اپوزیشن لیڈر نامزد کیا گیا ہے، جب کہ سینیٹ میں اعظم خان سواتی کو قائد حزب اختلاف کے طور پر آگے لایا گیا ہے۔

پی ٹی آئی کے سیکریٹری جنرل سلمان اکرم راجا نے تصدیق کی کہ عمران خان نے عمر ایوب اور شبلی فراز کی جگہ یہ فیصلے کیے ہیں۔

انہوں نے مزید بتایا کہ ضمنی انتخابات میں حصہ لینے کا معاملہ پی ٹی آئی کی سیاسی کمیٹی کو سونپ دیا گیا ہے، جس کا اجلاس آج طلب کیا گیا ہے تاکہ حتمی حکمت عملی طے کی جا سکے۔

ان کا کہنا تھا کہ عمران خان نے پنجاب اسمبلی میں اپوزیشن لیڈر کے لیے بھی 5 نام مانگے ہیں، جن میں سے ایک کا انتخاب وہ خود کریں گے۔

واضح رہے کہ 5 اگست کو الیکشن کمیشن آف پاکستان (ای سی پی) نے سینیٹ میں اپوزیشن لیڈر شبلی فراز، قومی اسمبلی میں عمر ایوب اور دیگر 7 ارکان کو نااہل قرار دیا تھا۔

اسلام آباد : سپریم کورٹ نے نو مئی مقدمات میں بانی پی ٹی آئی کی ضمانت کی اپیلوں پر پنجاب حکومت کو نوٹسز جاری کردیئے ہیں اور چیف جسٹس نےضمانت کی درخواستیں خارج کرنے کے فیصلے پر سوالات اٹھا دیے۔

تفصیلات کے مطابق سپریم کورٹ میں چیف جسٹس یحییٰ آفریدی کی سربراہی میں تین رکنی بینچ نے بانی پی ٹی آئی کی نو مئی مقدمات میں آٹھ ضمانت کی اپیلوں پر سماعت کی۔

دوران سماعت اسپیشل پراسیکیوٹر پنجاب ذوالفقار نقوی اور  عمران خان  کے وکیل سلمان صفدر عدالت میں پیش ہوئے۔

چیف جسٹس نے لاہور ہائیکورٹ کے فیصلے پر سوال اٹھاتے ہوئے کہا کہ کیا ضمانت کے کیس میں حتمی آبزرویشنز دی جا سکتی ہیں؟ “فی الحال ہم اس فیصلے کی فائنڈنگز کو ٹچ نہیں کریں گے، کیونکہ اگر ابھی قانونی فائنڈنگز پر بات کی تو کسی ایک فریق کا کیس متاثر ہو سکتا ہے۔”

چیف جسٹس نے واضح کیا کہ سپریم کورٹ ایسی کوئی فائنڈنگ نہیں دے گی جس سے کسی کا مقدمہ متاثر ہو۔ دونوں فریقین کے وکلاء کو آئندہ سماعت تک قانونی سوالات پر تیاری کرنے کی ہدایت دی گئی۔

سماعت کے دوران  عمران خان کے وکیل سلمان صفدر نے دلائل دینے کی اجازت مانگی، تاہم چیف جسٹس نے اس وقت انہیں بولنے کی اجازت نہ دی۔

عدالت نے پنجاب حکومت کو نوٹسز جاری کرتے ہوئے کیس کی مزید سماعت 19 اگست تک ملتوی کردی۔

واشنگٹن : نائب وزیراعظم اسحاق ڈار  نے بانی پی ٹی آئی سے متعلق انکشاف کرتے ہوئے کہا بانی پی ٹی آئی سے دوستی تھی، وہ سیاست میں آنے سے قبل اسپتال کا چندہ لینے آتے تھے۔

تفصیلات کے مطابق امریکی تھنک ٹینک اٹلانٹک کونسل میں بانی پی ٹی آئی سے متعلق سوال پرنائب وزیراعظم اسحاق ڈار نے جواب دیتے ہوئے کہا کوئی مقبول ہے تو اس کا یہ مطلب نہیں وہ سیکیورٹی تنصیبات پر حملہ کرتا پھرے۔

نائب وزیراعظم کا کہنا تھا کہ موجودہ حکومت کا  عمران خان  کے مقدمات سے تعلق نہیں، بانی پی ٹی آئی کیخلاف تمام کیسز عدالتوں میں زیرسماعت ہیں، بانی پر مقدمات کا فیصلہ عدالت کرے گی۔

انھوں نے کہا کہ پی ٹی آئی نے 2014 میں 126 دن کا دھرنا دیا، جس سے معیشت متاثرہوئی۔

وفاقی وزیر کا مزید کہنا تھا کہ سانحہ 9 مئی پر قانون اپنا راستہ لے گا اور ذمہ داروں کو سزا ہوگی، عمران خان نے جو کیا وہ افسوسناک ہے، ایسا نہیں کرنا چاہیے تھا۔

انھوں نے انکشاف کیا بانی پی ٹی آئی سے دوستی تھی، وہ سیاست میں آنے سے قبل اسپتال کاچندہ لینے آتے تھے۔