اسلام آباد : انسداد دہشت گردی عدالت کا کہنا ہے کہ بانی پی ٹی آئی کا پولی گرافک ٹیسٹ سے انکار ٹرائل سے بچنے کی کوشش ہے، 2 مواقع دیے تھے ، تیسرا موقع نہیں ملے گا۔
تفصیلات کے مطابق انسداد دہشت گردی عدالت لاہور نے بانی کا پولی گرافک ،فوٹوگرامیٹک ٹیسٹ کروانے کی درخواست کا تحریری فیصلہ جاری کردیا۔
جج منظر علی گل نے 3 صفحات پر مشتمل تحریری فیصلہ جاری کیا ، جس میں کہا ہے کہ عدالت نے عمران خان کو بے گناہی ثابت کرنے کیلئے بڑا منصفانہ موقع دیا، ملزم کے ٹیسٹ سے انکار کی وجہ سے کوئی نتائج حاصل نہیں ہوسکے۔
عدالت کا کہنا تھا کہ عام ملزم کے پاس ٹیسٹ کروانے سے انکار کرنے کا چانس نہیں ہوتا لیکن ملزم نے نہ صرف ٹیسٹ کروانے سے انکارکیا بلکہ تفتیشی ٹیم سے بھی نہیں ملا،عدالت یہ قانونی نقطہ سمجھنے سے قاصر ہے کہ تفتیش کس طرح مکمل کی جائے گی۔
مزید پڑھیں : بانی پی ٹی آئی کا پولی گرافک اور فوٹو گرامیٹک ٹیسٹ، عدالت نے پولیس کی درخواست پر فیصلہ سنا دیا
تحریری فیصلے میں کہا گیا کہ عدالت سمجھتی ہے ملزم ٹیسٹ سے انکار کرکے ٹرائل کا سامنا کرنے سے گریز کر رہا ہے، عدالت اب ٹیسٹ کروانے کے لیے تیسرا موقع نہیں دے گی، تیسرے موقع میں عدالت کو کوئی مثبت امید نہیں۔
عدالت نے مزید کہا کہ ٹیسٹ کروانے کے عمران خان کو 2 مواقع دیے، بانی پی ٹی آئی کو خود کو معصوم ثابت کرنے کے 2 مواقع دیے تھے۔
فیصلے کے مطابق ظاہر ہوتا ہے بانی پی ٹی آئی نے تفتیشی ٹیم سے تعاون نہیں کیا، تفتیشی افسران تفتیش کو ٹیکنیکل گراؤنڈزپر مکمل کریں، پراسیکیوشن نے بانی کے ٹیسٹ کروانے کے لیے درخواست دائر کی تھی۔
