عمران خان، جنھیں آج کال پاکستان کے میڈیا میں بانی پی ٹی آئی بھی کہا جاتا ہے، پاکستان کی سب سے بڑی جماعت پاکستان تحریک انصاف کے سربراہ ہیں۔ وہ ۲۰۱۸ سے ۲۰۲۲ تک اقتدار میں بھی رہے مگر آج کل پابند سلاسل ہیں
سیاست سے پہلے ان کا تعارف ایک مایہ ناز کرکٹر کا تھا جو کہ پاکستان کو ون ڈے کرکٹ ورلڈکپ کا فاتح بناگئے
لاہور : بانی پی ٹی آئی نے جناح ہاوس حملہ سمیت نو مئی کے 8 مقدمات میں ضمانت کیلئے لاہور ہائیکورٹ سے رجوع کر لیا۔
تفصیلات کے مطابق بانی پی ٹی آئی نے نو مئی کے 8 مقدمات میں ضمانت کیلئے لاہور ہائیکورٹ میں درخواست دائر کردی۔
عمران خان نے بیرسٹر سلمان صفدر کے ذریعے جناح ہاؤس حملہ سمیت دیگر مقدمات میں درخواست ضمانت دائر کیں۔
درخواستوں میں موقف اختیار کیا گیا ہے کہ 9 مئی کو بانی پی ٹی آئی اسلام آباد میں نیب کی تحویل میں تھ، نو مئی کے واقعات میں ان کا کوئی کردار نہیں مگر سازش کا الزام لگا اور مقدمات میں نامزد کیا گیا ہے۔
درخواستوں میں مزید کہا گیا ہے کہ 2 برس سے مقدمات کا سامنا کر رہے ہیں، ان کے خلاف انتقامی کارروائی کی جا رہی ہے، ماتحت عدالت نے بھی حقائق کو نظر انداز کر کے ضمانتیں مسترد کیں۔
درخواست میں استدعا کی گئی کہ 8 مقدمات میں رہائی کیلئے ضمانت کی درخواستیں منظور کی جائے۔
اس سے قبل عمران خان نے ضمانت کیلئے انسداد دہشت گردی عدالت سے رجوع کیا تھا، بعد ازاں انسداد دہشت گردی عدالت نے 12 مقدمات میں سے 4 مقدمات میں ضمانت منظور کی تھی اور 8 مقدمات میں ضمانت کی درخواستیں مسترد کر دیں تھیں۔
راولپنڈی : پاکستان تحریک انصاف (پی ٹی آئی) کے بانی نے شیر افضل مروت کی جانب سے پارٹی کے سیکرٹری جنرل سلمان اکرم راجہ کے خلاف دیئے حالیہ ریمارکس پر ناراضگی کا اظہار کیا۔
تفصیلات کے مطابق پاکستان تحریک انصاف (پی ٹی آئی) کے بانی عمران خان نے پارٹی کے سیکرٹری جنرل سلمان اکرم راجہ کیخلاف شیر افضل مروت کے حالیہ ریمارکس پر بریمی کا اظہار کیا۔
صحافیوں سے بات کرتے ہوئے پی ٹی آئی کے چیئرمین بیرسٹر گوہر علی خان نے راجہ کی بطور سیکرٹری جنرل تقرری کا دفاع کرتے ہوئے کہا کہ یہ پارٹی کا اندرونی معاملہ ہے۔
گوہر نے اس بات پر زور دیا کہ سلمان اکرم راجہ کی تقرری براہ راست عمران خان نے کی ہے، بانی کی ہدایات ہی پارٹی کا آئین ہوتا ہے۔
چیرمین تحریک انصاف نے واضح کیا کہ مذاکراتی اورسیاسی کمیٹی کے ارکان کےعلاوہ مذاکرات پر رائے ذاتی تصور ہوگی۔
خیال رہے پاکستان تحریک انصاف میں اس وقت لفظوں کی جنگ چھڑ گئی جب پی ٹی آئی کے جنرل سیکریٹری سلمان اکرم راجہ نے اے آر وائی نیوز کے پروگرام "آف دی ریکارڈ” میں انٹرویو کے دوران حکومتی کمیٹی سے مذاکرات کے حوالے سے شیر افضل کے بیان کی تردید کی۔
راجہ نے کہا تھا کہ وہ مروت کے تبصرے کو پی ٹی آئی کے سرکاری موقف کی نمائندگی کے لیے نہیں سمجھتے، پی ٹی آئی ایک بڑی جماعت ہے اور ہر فرد کا بیان پارٹی پوزیشن کی عکاسی نہیں کرتا۔ خان اور پارٹی کی طرف سے بات کرنے کے لیے صرف چند منتخب افراد کو اختیار ہے، جن میں وہ خود بھی شامل ہیں۔
اکرم راجہ کے تبصروں کا جواب دیتے ہوئے رہنما شیر افضل مروت نے اے آر وائی نیوز کے پروگرام "خبر” میں کہا تھا کہ سلمان اکرم راجہ ہیں کون،ایک سال ہوا پارٹی میں آئےاور جنرل سیکریٹری بن گیا،نومئی کے بعدیہ لوگ ڈھونڈےسےنہیں مل رہے تھے۔
انھوں نے پارٹی کے جنرل سیکرٹری کے طور پر راجہ کی اسناد پر سوال اٹھاتے ہوئے پوچھا کہ کیا انہیں ان کی تقرری کے بارے میں باضابطہ طور پر مطلع کیا گیا تھا۔ مروت نے راجہ پر ایک بیرونی شخص ہونے کا الزام بھی لگایا، جو حال ہی میں پارٹی میں شامل ہوا تھا اور اب شرائط طے کرنے کی کوشش کر رہا تھا۔
راولپنڈی : بانی پی ٹی آئی کی بہن علیمہ خان کا کہنا ہے کہ بانی پی ٹی آئی نے اپنا کیس انٹر نیشنل ہیومن رائٹس آرگنائزیشن لے کر جانے کا فیصلہ کیا ہے۔
تفصیلات کے مطابق پاکستان تحریک انصاف کے بانی کی ہمشیرہ علیمہ خان نے اڈیالہ جیل کے باہر میڈیا سے گفتگو کرتے ہوئے کہا کہ بانی پی ٹی آئی کواپنےبچوں سےبات نہیں کرنےدیتے، ان کومعالج سےنہیں ملنےدیتے، ان کیساتھ یہ رویہ ٹارچرکےزمرےمیں آتا ہے۔
علیمہ خانم کا کہنا تھا کہ بانی پی ٹی آئی جوچیزمانگتےہیں وہ نہیں دیتے، کوئی عدالت ہماراکیس پٹیشن سننےکوتیارنہیں، بانی پی ٹی آئی نےکہاہےاب ہمارے پاس کوئی راستہ نہیں، اب اپناکیس انٹرنیشنل ہیومن رائٹس آرگنائزیشن لیکرجائیں گے.
انھوں نے بتایا کہ ہماری فیملی کودھمکیاں دی جاتی ہیں وارننگ آتی ہیں، ہماری فیملی نےایک ذمہ داری اٹھائی ہے، ہم سےکہاگیا’’اے آئی‘‘سےبنائی گئی ویڈیونکال لیں گے.
عمران خان کی ہمشیرہ نے کہا کہ آج جیل حکام نےاندر نہیں جانے دے دیاتو ہم احتجاجاً اندر پیدل چلے گئے، جیل حکام کی جانب سے کہا کہ ڈاکٹر عظمیٰ کو اندر بھیج دیں اور مجھے نہیں ، بانی پی ٹی آئی کے کہنے پر مجھے اندر بلایا گیا.
انھوں نے بتایا کہ القادر ٹرسٹ کیس میں کیا سزا ہونی ہے ان کو پہلے ہی پتہ ہے، بانی پی ٹی آئی بچوں کو مفت تعلیم دے رہا تھا یہ اس کا جرم ہے.
مذاکرات کے حوالے سے علیمہ خانم کا کہنا تھا کہ حکومتی اراکین نے کہا بانی پی ٹی آئی نے ٹویٹ کیا ہےشاید اس لئےمذاکرات رک گئے، جب یہ کچھ کرنا چاہتےہیں تو صبح 7بجے جیل بھی کھل جاتی ہے، بانی پی ٹی آئی نے باہر آنا ہوا تو انشااللہ فجر کے وقت جیل کا دروازہ کھل جائے گا۔
انھوں نے مزید کہا کہ مجھے امید ہے کہ بانی پی ٹی آئی کا یہ جو کیس ہائی کورٹ میں جائے گا، ساری دنیا کو پتہ چلے گا یہ کتنا بڑا مذاق ہے توکیسے جیل میں رکھ سکتے ہیں.
صحافی نے سوال کیا کیا مذاکرات کے تھرو بانی پی ٹی آئی باہر نہیں آ رہے تو علیمہ خانم کا کہنا تھا کہ نہیں بانی پی ٹی آئی ان کیسز سے بری ہوں گے ، بانی پی ٹی آئی نے آج بھی اپنی بات پر قائم ہیں کہ کیسز کا سامنا کروں گا ، ساری قوم اور ہم نے بانی پی ٹی آئی کا ساتھ دیا ہے.
بانی کی بہن نے بتایا کہ بانی پی ٹی آئی نے سلمان اکرم راجہ کو اپوائنٹ کیا انہوں نےوہی کہنا ہے جو بانی کہیں گے، بانی پی ٹی آئی نے کہا مذاکراتی کمیٹی سے ملاقات سےجیل حکام نے صبح ہی منع کر دیا تھا، یہ پارٹی صرف بانی پی ٹی آئی کے ساتھ کھڑی ہے اور کسی کے قبضے میں نہیں۔
راولپنڈی : پاکستان تحریک انصاف (پی ٹی آئی) کی مذاکراتی کمیٹی کی آج اڈیالہ جیل میں بانی سے ملاقات متوقع ہیں، جس میں کمیٹی تحریری مسودے پر بات کرے گی۔
تفصیلات کے مطابق پاکستان تحریک انصاف کی مذاکراتی کمیٹی کی آج اڈیالہ جیل میں بانی سے ملاقات کا امکان ہے۔
وکیل فیصل چوہدری نے کہا کہ اسلام آباد ہائی کورٹ کے احکامات کے مطابق آج ملاقاتوں کا دن ہے، مذاکراتی کمیٹی کی بانی سے ملاقاتوں سے متعلق جیل حکام سے رابطے میں ہیں۔
انھوں نے بتایا کہ جیل سپرنٹنڈنٹ کا کہنا ہے جیسے ہی کوئی جواب موصول ہوگا تو آپ کوآگاہ کیا جائے گا۔
ذرائع کا کہنا ہے کہ آج عمران خان سے ممکنہ ملاقات کےدوران مذاکراتی کمیٹی تحریری مسودے پر بات کرے گی۔
ذرائع نے کہا کہ حکومتی اور ذرائع کی مذاکراتی کمیٹیوں کے درمیان مذاکرات کے 2 دور ہوچکے ہیں، حکومتی کمیٹی کی جانب سے پاکستان تحریک انصاف کی کمیٹی کو تحریری مطالبات پیش کرنے کا کہا گیا ہے۔
یاد رہے گذشتہ روز بانی پاکستان تحریک انصاف نے کمیٹی کو تحریری مطالبات دینے کی اجازت دے دی تھی۔
اس حوالے سے چیئرمین بیرسٹر گوہر نے بتایا تھا کہ عمران خان نے دونوں مطالبات تحریری طور پر دینے کی اجازت دی ، ان کی ہدایت پر مطالبات تحریری طور پر دیں گے۔
چیئرمین پاکستان تحریک انصاف کا کہنا تھا کہ عمران خان نے کہا ہے کہ مذاکرات کیلئے ایک اور نشست ہونا ضروری ہے، اس بار ملاقات نہ ہوئی تو مذاکرات آگے نہیں بڑھ سکیں گے۔
راولپنڈی : بانی پی ٹی آئی نے کمیٹی کو تحریری مطالبات دینے کی اجازت دے دی اور کہا اس بار ملاقات نہ ہوئی تو مذاکرات آگے نہیں بڑھ سکیں گے۔
تفصیلات کے مطابق پاکستان تحریک انصاف کے چیئرمین بیرسٹر گوہر نے میڈیا سے گفتگو کرتے ہوئے کہا کہ بانی پی ٹی آئی نے تحریری مطالبات دینے کی اجازت دے دی ہے ، ان کی ہدایت پر مطالبات تحریری طور پر دیں گے۔
چیئرمین پی ٹی آئی کا کہنا تھا کہ عمران خان نے دونوں مطالبات تحریری طور پر دینے کی اجازت دی اور کہا مذاکرات کیلئے ایک اور نشست ہوناضروری ہے، اس بار ملاقات نہ ہوئی تو مذاکرات آگے نہیں بڑھ سکیں گے۔
ڈیل سے متعلق سوال پر ان کا کہنا تھا کہ مذاکرات کسی ڈیل کیلئےنہیں ملک اور قوم کے لیے کررہے ہیں۔
خیال رہے پی ٹی آئی کی مذاکراتی کمیٹی کی اب تک عمران خان سے ملاقات نہ ہوسکی ،چیئرمین پی ٹی آئی بیرسٹر گوہر نے کہا تھا کہ تیسری میٹنگ تب ہوگی جب بانی سے ملنے دیں گے جبکہ عمر ایوب نے بھی مطالبہ کیا تھا کہ بانی سے آزادانہ ماحول میں ملاقات کرائی جائے۔
دوسری جانب پاکستان تحریک انصاف کے مرکزی سیکریٹری اطلاعات شیخ وقاص اکرم نے اپنے بیان میں کہا تھا کہ دوسری میٹنگ کے بعد واضح طور پر عمران خان سے ملاقات کی اہمیت کا بتایا گیا تھا، مذاکراتی ٹیم کے لیے بانی سے بغیرملاقات کوئی قدم اٹھانا ممکن نہیں ہے۔
اڈیالہ جیل میں قید بانی پی ٹی آئی کو رہائی کی آفر ہوئی یا نہیں اس حوالے سے تحریک انصاف کے رہنما اسد قیصر نے بتا دیا۔
اس وقت ملک میں وزیر داخلہ محسن نقوی کی جانب سے بانی پی ٹی آئی عمران خان کو رہائی کے لیے آفرز سے متعلق افواہیں گردش کر رہی ہیں۔ اس حوالے سے جب اسلام آباد میں پاکستان تحریک انصاف کے رہنما اور سابق اسپیکر قومی اسمبلی اسد قیصر سے سوال کیا گیا تو انہوں نے اس کا دوٹوک جواب دیا۔
اسد قیصر سے صحافی نے سوال کیا کہ کیا وزیر داخلہ محسن نقوی نے بانی پی ٹی آئی عمران خان کو رہائی کی آفر کی تھی۔ اس پر سابق اسپیکر قومی اسمبلی نے دوٹوک جواب دیا کہ نہیں ایسی کوئی بات نہیں ہوئی۔
پی ٹی آئی رہنما نے مزید گفتگو کرتے ہوئے کہا کہ حکومت سے مذاکرات اس لیے ڈیڈ لاک کا شکار ہوئے کیونکہ اب تک ہماری عمران خان سے ملاقات نہیں کرائی گئی۔ جب تک ان سے ملاقات نہیں ہوگی، تب تک بات چیت آگے نہیں بڑھ سکتی، ہمارا مطالبہ ہے کہ حکومت سنجیدگی دکھائے اور جلد از جلد بانی پی ٹی آئی سے ملاقات کرائی جائے۔
ان کا مزید کہنا تھا کہ ملٹری کورٹ میں سویلین کے ٹرائل کیسے ہو سکتے ہیں۔ اس حوالے سے کیس سپریم کورٹ میں چل رہا ہے، جہاں ہم اپنا موقف رکھیں گے کہ آپ عوام کے لیے انصاف کے دروازے بند کر رہے ہیں۔ اس وقت عوام کو کوئی امید ہے تو عدالتوں سے ہے، اگر انصاف کے دروازے بند کر دیں گے تو عوام کہاں جائیں گے۔
اسد قیصر نے کہا کہ اس وقت پاکستان میں کوئی آئین اور قانون نہیں ہے۔ اسمبلیوں میں فارم 47 کی حکومت بیٹھی ہے جو عوام کی ترجمانی نہیں کرتی اور اسمبلیوں سے عوامی مفاد کے خلاف قانون سازی ہو رہی ہے۔
اسلام آباد : پاکستان تحریک انصاف کی رہنما زرتاج گل نے دعویٰ کیا ہے کہ حکومت بانی پی ٹی آئی سے ڈیل مانگ رہی ہے لیکن بانی نے ڈیل کرنا ہوتی تو نواز شریف کی طرح بیرون ملک بھاگ چکے ہوتے۔
تفصیلات کے مطابق پاکستان تحریک انصاف کی رہنما زرتاج گل نے اسلام آباد میں جوڈیشل کمپلیکس میں میڈیا سے گفتگو کرتے ہوئے کہا جلسہ،ریلی کرنا پی ٹی آئی کا نہیں ہر سیاسی جماعت کا حق ہے، پاکستان میں 17 سیٹوں والی جماعت کی حکومت قائم ہے۔
رہنما پی ٹی آئی کا کہنا تھا کہ 9 مئی کو تحریک انصاف کو ختم کرنے کی کوشش کی گئی ، جنہوں نے پی ٹی آئی کو چھوڑا انہیں وزیر،مشیر بنادیاگیا اور تحریک انصاف میں جو رہ گیا انہیں 9 مئی میں ملوث کردیا۔
انھوں نے کہا کہ عمران خان کو نہ سننے سے ملک کا نقصان ہو رہا ہے، 9 مئی پرسینئرججز پر مشتمل جوڈیشل کمیشن بنایا جائے۔
بانی سے ملاقات کے حوالے سے تحریک انصاف کی رہنما نے کہا کہ مذاکراتی کمیٹی کو عمران خان سے ملاقات نہیں کرنے دی گئی، کمیٹی ملاقات نہیں کرے گی تو مذاکرات کیسے آگے بڑھیں گے کیونکہ مذاکرات کے حوالے سےفیصلہ عمران خان نے کرنا ہے۔
انھوں نے دعویٰ کیا کہ حکومت بانی پی ٹی آئی سے ڈیل مانگ رہی ہے، گُل بانی نے ڈیل کرنا ہوتی تونوازشریف کی طرح بھاگ جاتے، انصاف اتنا ناپید ہوگیاکہ ضمانت ملے تو ڈیل کہہ دی جاتی ہے۔
اسلام آباد : وزیر دفاع خواجہ آصف کا کہنا ہے بانی پی ٹی آئی کے حالیہ ٹوئٹ کے بعد مذاکرات کی کامیابی کے چانسز تقریبا ختم ہوگئے۔
تفصیلات کے مطابق وزیر دفاع خواجہ آصف نے نجی ٹی وی چینل کے پروگرام میں گفتگو کرتے ہوئے کہ بانی پی ٹی آئی کے ٹوئٹ کے بعد مذاکرات بےمعنی مشق ہیں، بانی کی گفتگو کے بعد مذاکرات کی کامیابی کے چانسز تقریبا ختم ہوگئے ہیں.
وزیر دفاع نے دعویٰ کیا عمران خان امریکا کی نئی انتظامیہ سے این آّراومانگ رہے ہیں، وہ خودکہہ رہےہیں کہ وہ پنڈی سے بات کررہےہیں، اس قسم کی باتوں کے بعد کون ان سے بات کرے گا؟
انھوں نے مزید کہا کہ یہ لوگ اعتبار کے قابل نہیں لیکن پھربھی چاہتا ہوں مذاکرات کا سلسلہ جاری رہے۔
ایک سوال کے جواب میں وفاقی وزیر کا کہنا تھا کہ 190ملین پاؤنڈ کیس کا فیصلہ جلد آجانا چاہیے، امید ہے کہ یہ جلد آجائے گا۔
گذشتہ روز وزیراعظم کے مشیر برائے سیاسی امور رانا ثنا اللہ کا کہنا تھا کہ ہم نے بانی پی ٹی آئی کو کوئی آفر نہیں کی اگر محسن نقوی نے کی ہے تو وہ بتاسکتے ہیں۔
انہوں نے کہا تھا کہ اگر عمران خان کو اعتماد ہے تو اچھی بات ہے جیل کاٹنے کے لیے اعتماد ہونا چاہیے، انہوں نے خود مذاکرات کے لیے کمیٹی بنائی تھی اگر افسوس ہورہا ہے تو ختم کردینا چاہیے، مذاکرات تو پہلے بھی ہوتے رہے اور اب بھی ہو رہے ہیں ہم نے سوچا تھا مذاکرات باضابطہ طور پرہونے چاہئیں
راولپنڈی : پی ٹی آئی مذاکراتی کمیٹی کی آج اڈیالہ جیل میں بانی پی ٹی آئی سے ملاقات کا امکان ہے، وکلا نے جیل انتظامیہ کو ملاقات کی درخواست دے رکھی ہے۔
تفصیلات کے مطابق پاکستان تحریک انصاف کی مذاکراتی کمیٹی کی بانی پی ٹی آئی سے آج ملاقات کے معاملے پر پیش رفت سامنے آئی۔
ذرائع نے بتایا کہ حکومتی اجازت کے بعد 7 رکنی کمیٹی کا آج اڈیالہ جیل پہنچنے کا امکان ہے، ذرائع نے بتایا کہ پاکستان تحریک انصاف کی مذاکراتی کمیٹی کو تاحال ملاقات سےمتعلق آگاہ نہیں کیا گیا۔
ذرائع کا کہنا تھا کہ عمران خان کے وکلا نے کل جیل انتظامیہ کوملاقات کی درخواست بھی دی تھی، درخواست میں ملاقات کھلے ماحول میں کرانے کی اجازت مانگی گئی تھی ، بانی پی ٹی آئی کو کھولے ماحول سے مطابقت جگہ ملاقات کے لیے دئے جانے پر غور جاری ہے تاہم وکلاء کو جیل انتظامیہ کی طرف سے بھی تاحال کچھ نہیں بتایا گیا۔
ذرائع نے کہا کہ بانی سے ملاقات کے بغیر مذاکرات میں ڈیڈ لاک اور تاخیر کا شکار ہوسکتے ہیں، حکومتی کمیٹی سے مزاکرات کے تیسرے مرحلے سے قبل بانی سے ملاقات کی بات طے ہوئی تھی۔
گذشتہ روز وکیل فیصل چوہدری نے جیلر کو تحریری درخواست میں کہا تھا کہ عمران خان سے پارٹی کی مذاکراتی کمیٹی کی ملاقات آج کرائی جائے، کمیٹی کھلے ماحول میں ملنا چاہتی ہے۔
صاحبزادہ حامدرضا نے بھی کہا تھا کہ بانی سےملاقات کے بعد ہی بات آگے بڑھے گی، اپوزیشن لیڈرعمرایوب اسپیکرقومی اسمبلی سے رابطے میں ہیں۔
پی ٹی آئی کی مذاکراتی کمیٹی کے ترجمان حامد رضا کا کہنا ہے کہ مذاکرات کامیاب ہوں یا نہ ہوں بانی جیل سے باہر آرہے ہیں۔
یہ بات انہوں نے اے آر وائی نیوز کے پروگرام الیونتھ آور میں خصوصی گفتگو کرتے ہوئے کہی، ان کا کہنا تھا کہ بانی پی ٹی آئی کیخلاف قائم تمام مقدمات میں بری یا ضمانتیں ہوچکی ہیں، انہیں مزید جعلی مقدمات میں زیادہ دیر تک جیل میں نہیں رکھا جا سکتا۔
ایک سوال کے جواب میں انہوں نے کہا کہ ہمارے پاس ایسی کوئی اطلاع نہیں کہ آج ہماری بانی سے ملاقات کرائی جارہی ہے۔ خواجہ آصف کے بیان سے لگتا ہے ان کا سافٹ ویئر اپڈیٹ ہوگیا ہے
خواجہ آصف دو روز پہلے تک کہتے تھے کہ مذاکرات ہونے ہی نہیں چاہئیں، اب کہتے ہیں اگر خدانخواستہ مذاکرات ناکام ہوگئے، شکر ہے کہ خواجہ آصف حکومتی مذاکراتی کمیٹی میں نہیں ہیں،ورنہ پہلی میٹنگ ہی ناکام ہوجاتی۔
انہوں نے کہا کہ دو ڈھائی سال سے یہ کہا جاتا تھا کہ بانی پی ٹی آئی کے نام پر کاٹا لگ گیا ہے یا پی ٹی آئی ختم ہوگئی ہے، یہ بھی کہاجاتا تھا کہ ہم میں سے کچھ لوگ تو پاکستان میں بھی نہیں رہیں گے۔
صاحبزادہ حامد رضا نے کہا کہ آج یہ وقت آگیا ہے کہ ان ہی لوگوں کے ساتھ بیٹھ کر بات کی جارہی ہے، ہمارا مؤقف تھا کہ حکومت کے پاس فیصلہ سازی کا اختیار نہیں، حکومت نے باور کرایا ہے کہ ان کےپاس فیصلہ سازی کا اختیار ہے۔
مذاکرات سے متعلق ایک سوال پر انہوں نے بتایا کہ ہم نے حکومت کے سامنے2مطالبات رکھ دیئے ہیں، تناؤ برقرار رہے گا تو ہم پھر احتجاجی تحریک کی طرف جائیں گے۔
وزیر اعظم سے متعلق ان کا کہنا تھا کہ شہباز شریف کو مختلف محاذوں پر لڑنا پڑرہا ہے اس لیے انہیں بہت وسوسے آرہے ہیں، ان کو ڈر ہے کہ کہیں ان کے بھائی دوبارہ ’مجھے کیوں نکالا‘ نہ کہہ دیں۔
ہمارے مطالبات سنجیدہ ہیں، حکومت چاہے تو2،3ملاقاتوں میں مسئلے کا حل نکل سکتا ہے، بانی پی ٹی آئی سے ہماری ملاقات کرادی جاتی ہے تو تحریری مطالبات دے دیں گے، بانی پی ٹی آئی کی رہائی ان کی خواہش کے برعکس ہمارے مطالبات میں شامل ہے۔
