Tag: عمران اسماعیل

کراچی: گورنر سندھ عمران اسماعیل نے کہا ہے کہ خیبرپختونخواہ میں پہلے چاند نظر آنے کا سلسلہ بہت پرانا ہے، یہ دینی معاملہ ہے جسے علمائے کرام پر چھوڑنا چاہیے۔

تفصیلات کے مطابق نمازِ عید کی ادائیگی کے بعد میڈیا سے گفتگو کرتے ہوئے گورنر سندھ نے تمام پاکستانیوں کوعید کی مبارکبادی۔ اُن کا کہنا تھا کہ حکومت نے رواں سال کوشش کی کہ ایک عید ہو مگر ایسا ممکن نہیں ہوسکا مگر آئندہ سال سے پورا ملک ایک ساتھ عید منائے گا۔

اُن کا کہنا تھا کہ کافی عرصے سے خیبرپختونخواہ میں عید اور رمضان کا چاند پہلے نظر آجاتا ہے، یہ ایک دینی معاملہ ہے جسے علمائے کرام پر چھوڑ دینا چاہیے۔

مزید پڑھیں: تمام جید علماء رویت ہلال کمیٹی پر متفق ہیں، دین آئین کے تابع نہیں، مفتی منیب الرحمٰن

گورنر سندھ کا کہنا تھا کہ پاکستان اس وقت کڑےامتحان سےگزررہاہے، وزیراعظم اوران کی فنانشل ٹیم پاکستان کیلئےمحنت کر رہے ہیں اور جلد اس کے ثمرات قوم کو نظر بھی آئیں گے۔

دوسری جانب میئر کراچی وسیم اختر کا کہنا تھا کہ ہمیں قائداعظم کےافکارکاپرچارکرنااور ملک کومشکلات سےنکالنےکے لیے اجتماعی کوششیں کرناچاہئیں۔ انہوں نے انکشاف کیا کہ سندھ حکومت نے عید کے موقع پر بلدیاتی ملازمین کو تنخواہ ادا نہیں کی جو بہت بڑا ظلم ہے۔

یاد رہے کہ خیبرپختونخواہ حکومت نے گزشتہ روز عید منائی تھی، مسجد قاسم کے مفتی پوپلزئی کو موصول ہونے والی 100 سے زائد شہادتوں کے بعد صوبائی وزیر اطلاعات نے عید منانے کا سرکاری اعلان کیا تھا۔

حیدرآباد: گورنر سندھ عمران اسماعیل نے کہا ہے کہ وفاق کو جامعہ بنانے کے لیے صوبوں سے رابطے یا انہیں اعتماد میں لینے کی ضرورت نہیں، حیدرآباد میں بحریہ یونیورسٹی کی بھی پیش کش ہے۔

حیدرآباد میں میڈیا سے گفتگو کرتے ہوئے گورنر سندھ کا کہنا تھا کہ عمران خان کےکراچی پیکج کے تحت ہونے والےکاموں کو کوئی نہیں روک سکتا، صوبائی حکومت کو پیکج پر اعتراض کرنے کے بجائے وفاق کا ساتھ دینا چاہیے۔ اُن کا کہنا تھا کہ حیدرآبادمیں بحریہ یونیورسٹی بنانے کی بھی پیش کش ہے، وفاق کوجامعہ بنانےکیلئےصوبے سے رابطہ یا بات کرنے کی ضرورت نہیں ہے۔

مزید پڑھیں: حیدرآباد یونیورسٹی بن کر رہے گی، روک سکو تو روک لو، گورنر سندھ

گورنر سندھ کا کہنا تھا کہ عمران خان صرف اسلام آباد نہیں بلکہ پورے ملک کے وزیر اعظم ہیں، وہ ملک کے تمام علاقوں میں بسنے والے عوام کے وزیر اعظم ہیں اور تمام علاقوں کے لیے ہی ترقیاتی پیکج کا اعلان کریں گے۔

یاد رہے کہ وزیراعظم عمران خان نے گزشتہ دنوں اسلام آباد میں حیدرآباد یونیورسٹی کا سنگِ بنیاد رکھا تھا، تقریب سے خطاب کرتے ہوئے اُن کا کہنا تھا کہ ’وہی قومیں ترقی کرتی ہیں جو تعلیم کو فروغ دیتی ہیں‘۔

عمران خان نے یونیورسٹی کے تعمیراتی کام جلد شروع کرنے کی ہدایت کرتے ہوئے ایم کیوایم کے رہنما اور وفاقی وزیر کو مخاطب کرتے ہوئے دریافت کیا تھا کہ یونیورسٹی بنانے میں کون لوگ مشکلات کھڑی کررہے ہیں۔

وزیراعظم نے یہ بھی اعلان کیا تھا کہ مستقبل میں صوفی ازم اور ٹیکنالوجی کو فروغ دینے کے لیے ایک یونیورسٹی کا قیام عمل میں لایا جائے گا جہاں صرف یہی دو مضامین پڑھائے جائیں گے۔

یہ بھی پڑھیں: حیدرآباد یونیورسٹی کا سنگِ بنیاد، سائنس اور صوفی ازم کو فروغ دینے کا عزم، وزیراعظم کا ایک اور یونیورسٹی بنانے کا اعلان

یونیورسٹی کا سنگِ بنیاد رکھنے کے بعد سندھ حکومت نے وفاق پر شدید الفاظ میں تنقید کی تھی۔ جس کے بعد ایم کیو ایم پاکستان کے ترجمان نے پی پی حکومت کو آئینہ دکھاتے ہوئے کہا تھا کہ اتنے سالوں سے جس حکومت نے کچھ نہیں کیا وہ اب تعلیم دشمنی دکھا رہی ہے۔

کراچی: گورنر سندھ عمران اسماعیل نے کہا ہے کہ نیشنل ایکشن پلان پر من و عن عمل ہورہا ہے، سندھ میں وزیر داخلہ کی تقرری کو لازمی سمجھتا ہوں۔

تفصیلات کے مطابق گورنر سندھ عمران اسماعیل نے کراچی میں فائرنگ سے ہلاکتوں پر میڈیا سے گفتگو کرتے ہوئے کہا کہ مولانا تقی عثمانی پہلے بھی سیکیورٹی خدشات کا اظہار کرچکے ہیں، ڈرائیور، اہلکارنے زخمی ہونے کے باوجود بہادری دکھائی۔

انہوں نے کہا کہ آئی جی سندھ سید کلیم امام اور ڈی جی رینجرز سندھ میجر جنرل محمد سعید بہترین کام کررہے ہیں، صوبائی حکومت اپنے معاملات بہتر جانتی ہے، سندھ حکومت کو اختیار ہیں مگر آئی جی سندھ کو بھی اختیار ملنا چاہئے۔

گورنر سندھ نے کہا کہ جب تک آئی جی سندھ کے پاس اختیارات نہیں ہوں گے وہ اپنا کام درست نہیں کرپائیں گے، پی ایس ایل کے حوالے سے انہوں نے کہا کہ پاکستان سپر لیگ پر بھارت اور کچھ نادیدہ قوتیں خوش نہیں ہیں۔

مزید پڑھیں: کراچی میں فائرنگ ، مفتی تقی عثمانی قاتلانہ حملےمیں محفوظ رہے

واضح رہے کہ نماز جمعہ سے قبل کراچی میں فائرنگ کے دو واقعات پیش آئے تھے نیپا چورنگی کے قریب مولانا تقی عثمانی کی گاڑی پر فائرنگ کے نتیجے میں دو سیکیورٹی گارڈز جاں بحق ہوگئے تھے جبکہ مولانا تقی عثمانی حملے میں محفوظ رہے تھے۔

فائرنگ کا دوسرا واقعہ شاہراہ فیصل نرسری کے قریب پیش آیا تھا جہاں دارالعلوم کی گاڑی کو نشانہ بنایا گیا تھا جس کے نتیجے میں 2 افراد زخمی ہوگئے تھے۔

مفتی تقی عثمانی اپنی اہلیہ اور دو پوتوں کے ہمراہ گلشن اقبال میں واقع مسجد بیت المکرم میں نماز جمعہ کا خطبہ دینےکے لیے جارہے تھے کہ یہ سانحہ رونما ہوا۔ سانحے میں مفتی شہاب کے بیٹے مولانا عامر شہاب اللہ شدید زخمی ہوئے ہیں۔

اسلام آباد: صدر مملکت عارف علوی نے کہا ہے کہ پی آئی اے میں ترقی کا سفر جاری رہے گا، پی آئی اے کو جلد منافع بخش ادارہ بنائیں گے، وہ دن دور نہیں جب قومی ایئرلائن جلد منافع بخش ادارہ بن جائے گا۔

تفصیلات کے مطابق صدر مملکت عارف علوی نے پی آئی اے ہیڈ آفس کا دورہ کیا اس موقع پر پی آئی اے کے صدر و چیف ایگزیکٹو آفیسر ایئر مارشل ارشد ملک نے صدر مملکت اور گورنر سندھ عمران اسماعیل کا استقبال کیا اور انہیں پی آئی اے کے بارے میں تفصیلی بریفنگ دی۔

صدر مملکت عارف علوی نے کہا کہ حکومت پی آئی اے کی حالیہ کارکردگی سے مطمئن ہے، ایئر مارشل ارشد ملک کے جذبے کو قدر کی نگاہ سے دیکھتے ہیں، پی آئی اے کی نجکاری نہیں ہوگی۔

انہوں نے کہا کہ پی آئی اے کو جلد منافع بخش ادارہ بنائیں گے، تمام امور میں میرٹ برقرار رکھا جائے، سفارشی کلچر کا خاتمہ کیا جائے، پی آئی اے قومی ادارہ ہے اس کی ترقی چاہتے ہیں۔

عارف علوی نے کہا کہ قومی ایئرلائن واحد ایئرلائن ہے جس نے دنیا کی بعض ایئرلائنز کو بنایا، پی آئی اے کی بحالی کیلئے ہر ممکن اقدام کریں گے، وزیر اعظم عمران خان کا ویژن ہے کہ پی آئی اے کو اس کا کھویا ہوا مقام واپس دلائیں۔

پی آئی اے کو درپیش پانی اور بجلی کے مسائل حل کرنے کے لیے گورنر سندھ عمران اسماعیل نے واٹر بورڈ اور کے الیکٹرک کو خصوصی ہدایت دی۔

پی آئی اے کے سی ای او ایئرمارشل ارشد ملک نے صدر مملکت عارف علوی اور گورنر سندھ عمران اسماعیل کا شکریہ ادا کیا۔