ARYNews.tv | Urdu – Har Lamha Bakhabar

Tag: عمران خان کی خبریں

  • کے پی میں پہلے سے بہتر کام کرنا ہوگا، وزرا کی کارکردگی خود مانیٹر کروں گا: عمران خان

    کے پی میں پہلے سے بہتر کام کرنا ہوگا، وزرا کی کارکردگی خود مانیٹر کروں گا: عمران خان

    اسلام آباد: وزیراعظم کی زیرصدارت بنی گالا میں خیبرپختونخواہ پارلیمانی پارٹی کا اہم اجلاس منعقد ہوا۔

    اجلاس میں صوبائی کابینہ کی تشکیل کےمعاملے پرمشاورت کی گئی، وزیراعلیٰ خیبرپختونخواہ محمودخان کی ترقیاتی منصوبوں پربریفنگ دی۔ 

    اس موقع پر وزیراعظم نے سادگی اورکفایت شعاری اختیار کرنے، اخراجات کم کرنے اور ترقیاتی منصوبوں کومکمل کرنے کی ہدایت کی۔

    اجلاس میں نامزدگورنرخیبرپختونخواہ شاہ فرمان کے ساتھ ساتھ شہرام ترکئی،عاطف خان اورتیمورجھگڑا بھی شریک ہوئے۔

    اس اہم اجلاس میں صوبائی کابینہ کے لئےشارٹ لسٹ 28ارکان کے انٹرویوز مکمل کیے گئے۔ وزیراعظم نے امیدواروں سے وزارت سےمتعلق سوال جواب کیے۔

    اس موقع پر عمران خان کا کہنا تھا کہ خیبر پختونخواہ کےعوام نے ہمیں ایک بار پھر مینڈیٹ دیا ہے، پہلے 100روز میں حقیقی اورمؤثر تبدیلی نظر آنی چاہیے، میرٹ پرسمجھوتا کیا ہے، نہ ہی کریں گے، خیبر پختونخوا ہ میں پہلے سے بہتر کام کرنا ہوگا۔

    انھوں نے کہا کہ کے پی میں جاری منصوبوں کی بروقت تکمیل یقینی بنائی جائے، وزراکی کارکردگی کو خود مانیٹر کروں گا، وزرابا اختیار ہونے کےساتھ جواب دہ بھی ہوں گے۔

    مزید پڑھیں: پنجاب کی عوام نے نئے پاکستان کی آواز پر لبیک کہا ہے ،وزیراعظم عمران خان

    یاد رہے کہ آج عمران خان سے وزیراعلیٰ پنجاب سردار عثمان بزدار نے ملاقات کی، ملاقات میں عمران خان نے وزیراعلیٰ منتخب ہونے پر عثمان بزدار کو مبارک باد دی۔

    ملاقات میں پنجاب کابینہ کی تشکیل پر مشاورت ہوئی اور رکن پنجاب اسمبلی علیم خان بھی ملاقات میں موجود تھے۔

  • کپتان اسپیکر کے الیکشن میں کامیابی کے لیے پُرامید، جہانگیر ترین کو خصوصی ہدایت

    کپتان اسپیکر کے الیکشن میں کامیابی کے لیے پُرامید، جہانگیر ترین کو خصوصی ہدایت

    اسلام آباد: پی ٹی آئی چیئرمین عمران خان نے امید ظاہر کی ہے کہ ان کا نامزد کردہ امیدوار اسپیکر کے انتخاب میں‌ 180 سے زائد ووٹ لینے میں‌ کامیاب رہے گا.

    تفصیلات کے مطابق کپتان اسپیکر کے انتخاب میں‌ کامیابی کے لیے پرامید ہیں، اس ضمن میں پارٹی کے سینئر رہنما جہانگیر ترین کو خصوصی ہدایت جاری کی گئی ہے.

    آج عمران خان سے پارٹی رہنماؤں کی اہم ملاقاتیں ہوئیں. جہانگیرترین، اسدعمر،نعیم الحق، عمران اسماعیل اور علی زیدی بنی گالا میں کپتان سے ملے.

    ان ملاقاتوں میں اسپیکراورڈپٹی اسپیکرقومی اسمبلی کے انتخاب اور حکومت سازی پر تبادلہ خیال ہوا، اس موقع پر عمران خان نے جہانگیرترین کو اتحادیوں اورآزاد ارکان سے رابطوں کی ہدایت کی.

    اسپیکر اور ڈپٹی اسپیکر کا انتخاب، چار امیدواروں میں سخت مقابلہ متوقع

    عمران خان نے تمام ارکان کو اسمبلی میں 100 فی صد حاضری یقینی بنانے کی ہدایت کی ہے اور امید ظاہر کی ہے کہ پی ٹی آئی کا امیدوار 180سے زائدووٹ لینے میں‌ کامیاب رہے گا.

    واضح رہے کہ قومی اسمبلی میں‌ اسپیکر اور ڈپٹی اسپیکر کا انتخاب 15 اگست بہ روز بدھ ہوگا۔

    پی ٹی آئی کی جانب سے اسد قیصر، جب کہ متحدہ اپوزیشن کی جانب سے خورشید شاہ کو نامزد کیا گیا ہے۔

  • مستونگ دھماکہ: عمران خان کا مستونگ جانے کا اعلان

    مستونگ دھماکہ: عمران خان کا مستونگ جانے کا اعلان

    اسلام آباد: پاکستان تحریک انصاف کے چیئرمین عمران خان کا کہنا ہے کہ سانحہ مستونگ پر دکھ ہے پہلی فرصت میں مستونگ جاؤں گا۔

    تفصیلات کے مطابق پاکستان تحریک انصاف کے چیئرمین عمران خان نے گزشتہ روز بلوچستان کے ضلع مستونگ میں بلوچستان عوامی پارٹی کی کارنر میٹنگ میں ہونے والے دھماکے پر شدید دکھ کا اظہار کیا ہے۔

    عمران خان نے کہا ہے کہ وہ پہلی فرصت میں مستونگ جائیں گے۔

    دوسری جانب پاکستان پیپلز پارٹی کے چیئرمین بلاول بھٹو نے بھی سماجی رابطے کی ویب سائٹ ٹویٹر پر کہا کہ معصوم پاکستانیوں پر مسلسل حملوں پر غمزدہ ہوں۔

    انہوں نے کہا کہ سراج رئیسانی سمیت بے گناہ شہریوں کا خون رائیگاں نہیں جانا چاہیئے۔ اس مائنڈ سیٹ کی شکست کو یقینی بنایا جائے۔

    بلاول بھٹو کا کہنا تھا کہ اظہار یکجہتی کے لیے سیاسی سرگرمیاں معطل کردی ہیں۔

    خیال رہے کہ گزشتہ روز ضلع مستونگ میں بلوچستان عوامی پارٹی کی کارنر میٹنگ میں خوفناک دھماکہ ہوا تھا جس میں بی اے پی کے انتخابی امیدوار سراج رئیسانی سمیت 129 افراد شہید ہوگئے۔

    رواں سال انتخابات کے دوران انتخابی امیدواروں پر کیا جانے والا یہ تیسرا حملہ ہے۔

    بنوں میں گزشتہ روز متحدہ مجلس عمل کے امیدوار اکرم درانی کے قافلے پر بم حملہ کیا گیا تھا جس کے نتیجے میں 4 افراد جاں بحق اور 35 زخمی ہوئے جبکہ اکرم درانی محفوظ رہے۔

    واضح رہے کہ اس سے قبل 10 جولائی کو پشاور کے علاقہ یکہ توت میں عوامی نیشنل پارٹی کی انتخابی مہم کے دوران خودکش دھماکہ ہوا تھا جس میں اے این پی کے امیدوار ہارون بلور شہید ہوگئے تھے۔ دھماکے میں مزید 21 افراد بھی شہید ہوئے تھے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • نوازشریف نے خود کو بچانے کے لئے احتساب کا نظام تباہ کیا: عمران خان

    نوازشریف نے خود کو بچانے کے لئے احتساب کا نظام تباہ کیا: عمران خان

    لاہور: پاکستان تحریک انصاف کے چیئرمین عمران خان نے کہا ہے کہ نوازشریف نے خود کو بچانے کے لئے احتساب کا نظام تباہ کیا.

    ان خیالات کا اظہار انھوں نے لاہور میں ایون فیلڈ ریفرنس میں فیصلے پر ردعمل دیتے ہوئے کیا. ان کا کہنا تھا کہ عوام نیلسن منڈیلا جیسے لوگوں کے پیچھے نکلتے ہیں، نواز شریف کے لیے نہیں.

    انھوں نے مزید کہا کہ 56 کمپنیز اور میٹروکرپشن میں شہبازشریف کانام ہے، حدیبیہ پیپز مل میں شہبازشریف کا نام بھی ہے، ملتان میٹرو کرپشن میں شہبازشریف ملوث ہیں.

    عمران خان نے کہا کہ یہ چھوٹے چور نہیں، یہ بڑے ڈاکو ہیں، جو ملک کو لوٹتے ہیں، انھوں نے خود کو بچانے کے لئے احتساب کا نظام تباہ کر دیا، ہزاروں کی نہیں، اربوں کی چوری ہوئی، اس سے ملک تباہ ہوا.

    ان کا کہنا تھا کہ جو قانون عام شہریوں کے لئے ہے، وہی نوازشریف کے لئے بھی ہونا چاہیے، کسی پاکستانی ملزم کو یہ چھوٹ نہیں ملتی کہ وہ باہرجا سکیں، قانون سب کے لئے ایک برابرہونا چاہیے.

    عمران خان نے کہا کہ نوازشریف کو سپریم کورٹ نے گاڈ فادر کہا تھا، آصف زرداری اور نوازشریف نےمک مکا کر رکھا تھا، نوازشریف ساتھ نہ دیتا تو آصف زرداری بہت پہلےجیل میں ہوتا، پیپلزپارٹی ،ن لیگ ایک دوسرے کی کرپشن بچاتے رہے.

    ایون فیلڈ ریفرنس: نوازشریف / مریم نوازکو قید کی سزا

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • قوم شریف خاندان کے خلاف مقدمات کے فیصلے کی منتظرہے: عمران خان

    قوم شریف خاندان کے خلاف مقدمات کے فیصلے کی منتظرہے: عمران خان

    کراچی: پاکستان تحریک انصاف کے چیئرمین عمران خان نے کہا ہے کہ 30 سال سے باریاں لینے والوں نے کراچی کے لئے کچھ نہیں کیا.

    ان خیالات کا اظہار انھوں نے کراچی میں مختلف مقامات پر خطاب کرتے ہوئے کیا. عمران خان کا کہنا تھا کہ باریاں لینے والے آئندہ پانچ سال بھی عوام کے لئے کچھ نہیں‌ کریں گے.

    [bs-quote quote=” 25 جولائی فیصلے اور کارچی کو روشنیوں کا شہربنانے کا دن ہے، مسیحی برادری اور دیگر اقلیتیں بھی الیکشن میں بھرپورشرکت کریں” style=”style-2″ align=”left” author_name=”عمران خان”][/bs-quote]

    پی ٹی آئی چیئرمین نے کہا کہ جو لوگ نظام کو تباہ کرتے ہیں، وہ کبھی اسے ٹھیک نہیں کرسکتے، سندھ پولیس کے نظام کو تباہ کرنے والے خود اسے ٹھیک نہیں کریں گے، کرپشن انتہا کی ہوئی، نظام پرکوئی توجہ نہیں دی گئی.

    عمران خان کا کہنا تھا کہ دبئی میں 900 ارب روپے کی پاکستانیوں نے پراپرٹی خریدی، اس 900 ارب میں 9 ارب کراچی پر استعمال ہوجاتا تو حالات مختلف ہوتے.

    ان کا کہنا تھا کہ ملک اس وقت ترقی نہیں کرتا، جب کرپشن ادارے تباہ کررہی ہو، کرپشن ملک کی بنیاد کو کھوکھلی کردیتی ہے. کرپشن کا خاتمہ ہوگا تو ملک کا نظام تبدیل ہوجائے گا.

    ان کا کہنا تھا کہ 25 جولائی فیصلے اور کراچی کو روشنیوں کا شہربنانے کا دن ہے، مسیحی برادری اور دیگر اقلیتیں بھی الیکشن میں بھرپورشرکت کریں.

    انھوں نے کہا کہ کراچی سے الیکشن لڑ رہا ہوں، ہم ایسا وفاق نہیں چاہتے، جو کراچی کی فکر نہ کرے، 30 سال سے سندھ میں پیپلزپارٹی اور ایم کیوایم کی حکومت ہے، ایم کیو ایم کہتی ہے کہ ہمارے پاس اختیار نہیں، پیپلزپارٹی کی حکومت کو کراچی کی فکر نہیں.

    انھوں نے کہا کہ کراچی کو پانی دینے کا پلان ہے، کوڑاکرکٹ سے بجلی بنائیں گے، سمندر کا پانی صاف کر کے کراچی کے عوام کو دیں گے، بچوں کے مستقبل کے لئے 25 جولائی تک مہم چلانی ہے.

    کیا کراچی صوبہ بننا چاہیے؟

    بعد ازاں انھوں نے کراچی ایئرپورٹ پر میڈیا سے گفتگو کرتے ہوئے کہا کہ پرامید ہوں، کراچی کےعوام پی ٹی آئی کو کامیاب کرائیں گے، پی ٹی آئی چاہتی ہے کہ 25 جولائی کا میچ نیوٹرل امپائر کے ساتھ کھیلا جائے گا۔

    انھوں نے کہا کہ شریف خاندان کو صرف دو سوالات کے جواب دینے تھے، نوازشریف کے بیٹے نے کہا، الحمدللہ اپارٹمنٹ ہمارے ہیں، شریف خاندان نے عدالتوں میں جھوٹ پر جھوٹ بولا، مقدمات کا فیصلہ اب آنا چاہیے، قوم شریف خاندان کے خلاف مقدمات کے فیصلے کی منتظرہے۔

    انھوں نے کہا کہ ساڑھے چار ہزار درخواستیں آئیں، سب کو ٹکٹ نہیں دے سکتے تھے، ان کھلاڑیوں کو ٹکٹ دیے ہیں جو میدان میں اچھی پرفارمنس دیں،عمران خان پی ٹی آئی حکومت میں آئے گی، تو ہی نظام کو ٹھیک کیا جاسکتا ہے۔

    ایک سوال کے جواب میں پی ٹی آئی چیئرمین نے کہا کہ کراچی کو صوبہ بننے کے بجائے میٹروپولیٹن بلدیاتی نظام کی ضرورت ہے۔

    عمران خان نے زلفی بخاری کو انتخابی مہم کا انچارج مقرر کردیا

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • عمران خان نے زلفی بخاری کو انتخابی مہم کا انچارج مقرر کردیا

    عمران خان نے زلفی بخاری کو انتخابی مہم کا انچارج مقرر کردیا

    کراچی: تحریک انصاف کے چیئرمین عمران خان نے اپنے قریبی دوست زلفی بخاری کو انتخابی مہم کا انچارج مقرر کردیا۔

    ذرائع کے مطابق زلفی بخاری قومی اسمبلی کے حلقہ این اے 53 میں عمران خان کی انتخابی مہم چلائیں گے اور تمام سیاسی اجتماعات و پارٹی مٹینگز میں شرکت کریں گے۔

    ذرائع کا کہنا ہے کہ زلفی بخاری کو چیئرمین تحریک انصاف نے اپنے حلقے کی انتخابی مہم چلانے اور تمام سیاسی امور دیکھنے کا سربراہ مقرر کردیا۔

    واضح رہے کہ برطانیہ میں مقیم عمران خان کے قریبی دوست گزشتہ ماہ پاکستان تشریف لائے تھے اور وہ کپتان کے ہمراہ عمرہ ادائیگی کے لیے جارہے تھے کہ ائیرپورٹ پر انہیں روک دیا گیا تھا۔

    مزید پڑھیں: زلفی بخاری کا نام بلیک لسٹ سے نکالنے سے متعلق فیصلہ محفوظ

    کچھ دیر بعد زلفی بخاری کو وزارتِ داخلہ نے مراسلہ جاری کر کے بیرونِ ملک سفر کی مشروط اجازت دی تھی جس کے تحت وہ چار روز کے بعد پاکستان واپس پہنچ گئے۔

    عمران خان کے قریبی دوست کا نام بلیک لسٹ تھا جس کی بنیاد پر انہیں سول ایوی ایشن کے حکام نے ائیرپورٹ پر روک لیا تھا مگر وزارتِ داخلے کا حکم نامہ سامنے آتے ہی قانون کے تحت انہیں اجازت دے دی گئی تھی۔

    یہ قیاس کیا جارہا تھا کہ زلفی بخاری کا نام ای سی ایل میں شامل تھا جسے نکلوانے میں عمران خان نے کردار ادا کیا مگر وزارتِ داخلہ کے حکام نے سینیٹ کمیٹی کے سامنے وضاحت کی کہ اُن کا نام بلیک لسٹ میں شامل تھا اور نہ ہی تحریک انصاف کے چیئرمین نے اس ضمن میں کوئی کردار ادا کیا۔

    اسے بھی پڑھیں: زلفی بخاری کا نام بلیک لسٹ میں تھا، سیکریٹری داخلہ

    ایک روز قبل 3 جولائی کو اسلام آباد ہائی کورٹ میں چیئرمین پی ٹی آئی عمران خان کے قریبی دوست زلفی بخاری کا نام بلیک لسٹ سے نکالنے سے متعلق کیس کی سماعت ہوئی تھی، عدالت نے فریقین کے دلائل مکمل ہونے کے بعد درخواست پر فیصلہ محفوظ کرلیا۔

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ٹکٹوں کی واپسی سے ن لیگ کا زوال شروع ہوگیا ہے: شاہ محمود قریشی

    ٹکٹوں کی واپسی سے ن لیگ کا زوال شروع ہوگیا ہے: شاہ محمود قریشی

    لاہور: پاکستان تحریک انصاف کے نائب چیئرمین شاہ محمود قریشی نے کہا ہے کہ اللہ کے فضل وکرم سے بلے کی ہواچل پڑی ہے.

    شاہ محمود قریشی نے میڈیا سے گفتگو کرتے ہوئے کہا کہ شہبازشریف کا بیانیہ نواز شریف کے بیانیے کا متضاد ہے.

    ان کا کہنا تھا کہ لوگ مختلف وجوہات پرن لیگ سے علیحدگی اختیارکر رہے ہیں، ٹکٹوں کی واپسی سے ن لیگ کا زوال شروع ہوگیا ہے، پیپلزپارٹی کا پنجاب میں زوال اوج پرہے.

    ان کا کہنا تھا کہ دو پرانی جماعتوں کے زوال سے نئے پاکستان کا اشارہ مل گیا، مسلم لیگ ن نظریاتی طورپردو حصوں میں تقسیم ہوچکی ہے.

    انھوں نے کہا کہ پی ٹی آئی کے کارکنو، یہ ذاتی نہیں نظریاتی لڑائی ہے، عمران خان کی جدوجہدپایہ تکمیل کو پہنچنے والی ہے، سب کو یہی کہوں‌ گا کہ غصہ تھوک کرعمران خان کا ساتھ دیں.

    واضح رہے کہ گذشتہ دنوں انھوں نے ایک بیان میں کہا تھا کہ مسلم لیگ ن واضح طور پر دو حصوں میں تقسیم ہوچکی، امیدواران سمجھ چکے کہ شیر کا نشان زحمت ہے اس لیے وہ آزاد حیثیت سے الیکشن لڑ رہے ہیں۔

    شیر کا نشان زحمت بن گیا، مسلم لیگ ن کے امیدواران ٹکٹ واپس کررہے ہیں، شاہ محمود

    خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • پانامالیکس میں شریف خاندان رنگے ہاتھوں پکڑا گیا، اقتدارملا، تو کرپشن کاخاتمہ کردیں گے: عمران خان

    پانامالیکس میں شریف خاندان رنگے ہاتھوں پکڑا گیا، اقتدارملا، تو کرپشن کاخاتمہ کردیں گے: عمران خان

    لاہور: پی ٹی آئی چیئرمین عمران خان نے کہا ہے کہ زندگی میں کبھی ہارنا نہیں سیکھا، بھرپور تیاری کے ساتھ الیکشن میں حصہ لے رہے ہیں.

    ان خیالات کا اظہار انھوں نے لاہور میں ورکرز کنویشن سے خطاب کرتے ہوئے کیا، ان کا کہنا تھا کہ پاکستانیو! تبدیلی کاوقت آچکا ہے، اقتدارملا، تو ملک سے کرپشن کا خاتمہ کریں گے.

    عمران خان نے کہا کہ ٹکٹوں کے لئےکارکنوں کے احتجاج پربہت دکھ ہوا، کئی امیدوارتھے، کسی ایک امیدوار ہی کو ٹکٹ دے سکتے تھے.

    انھوں نے کہا کہ اربوں روپے منی لانڈرنگ کےذریعے باہر بھیجا گیا، باپ بیٹی یہی کہہ رہے ہیں، ہمارے ساتھ ناانصافی ہوئی، نوازشریف اورمریم بتادیں، جائیدادیں کیسے خریدیں؟

    ان کا کہنا تھا کہ کمزوروں کوچھوٹی چوری پرجیل میں ڈال دیاجاتا ہے، اللہ نے اس الیکشن میں ملک کی تقدیر بدلنے کا موقع دیا ہے، پانامالیکس میں شریف خاندان رنگے ہاتھوں پکڑا گیا، اسحاق ڈاراربوں کی چوری کرکے لندن کے اسپتال کے بسترپرپڑ گیا.

    انھوں نے کہا کہ پاکستان کے قرضوں میں بے پناہ اضافہ ہوا، شریف اور زرداری خاندان کا پیسہ ملک سے باہر ہے، شریف اورزرداری خاندان کا جینا مرنا پاکستان میں نہیں، برطانوی اخبارنے شریف خاندان کی مزیدجائیدادوں کا بھانڈ اپھوڑ دیا۔

    لاہور پنجاب کا اور پنجاب پاکستان کا فیصلہ کرے گا: عمران خان

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔ 

  • میری جنگ ہمیشہ کرپشن کے خلاف رہی ہے: عمران خان

    میری جنگ ہمیشہ کرپشن کے خلاف رہی ہے: عمران خان

    اسلام آباد: چیئرمین تحریک انصاف عمران خان نے کہا ہے کہ گذشتہ انتخابات میں ناتجربہ کاری کی وجہ سے زیادہ سیٹیں نہیں لے سکے تھے، تحریک انصاف اس بار بھرپورتیاری کے ساتھ الیکشن میں حصہ لے گی.

    ان خیالات کا اظہار انھوں نے سرکاری ٹی وی کو انٹرویو دیتے ہوئے کیا. ان کا کہنا تھا کہ میری جنگ ہمیشہ کرپشن کے خلاف رہی ہے.

    [bs-quote quote=”سب سے زیادہ خیرات دینی والی پاکستانی قوم سب سےکم ٹیکس دیتی ہے” style=”style-2″ align=”right” author_name=”عمران خان”][/bs-quote]

    انھوں نے کہا کہ سچا اور کھرا لیڈرہی ملک کو ترقی کی راہ پر گامزن کرسکتا ہے، خیبرپختونخواہ میں ادارے مضبوط کئے، پولیس نظام بہترکیا.

    عمران خان نے کہا کہ سروے کے مطابق خیبرپختونخواہ میں سب سےکم کرپشن ہوئی، پنجاب میں تحریک انصاف کا گراف اوپر آرہا ہے.

    چیئرمین تحریک انصاف کا کہنا تھا کہ قومی اسمبلی نشستوں کے لئے 232 ٹکٹ جاری کرچکے ہیں، کے پی میں15 نئےاسپتال بنائے، پرانے اسپتالوں کواپ گریڈ کیا، میٹروبس منصوبے سے سالانہ 15 سے 20 ارب کا خسارہ ہورہا ہے.

    ان کا کہنا تھا کہ ٹیکس وصولیوں میں بہتری لائے بغیر معاشی استحکام ممکن نہیں، سب سے زیادہ خیرات دینی والی پاکستانی قوم سب سےکم ٹیکس دیتی ہے، اس وقت مالیاتی خسارہ ملکی تاریخ کی بلند ترین سطح پر پہنچ چکا ہے، جس کا سدباب ضروری ہے.

    این اے95میانوالی سے عمران خان الیکشن لڑنے کے لیے اہل قرار

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔

  • جو امیدوار الیکشن لڑنے کی سائنس جانتا ہے، ٹکٹ اسے ہی دیں گے: عمران خان

    جو امیدوار الیکشن لڑنے کی سائنس جانتا ہے، ٹکٹ اسے ہی دیں گے: عمران خان

    اسلام آباد: پی ٹی آئی چیئرمین عمران خان نے کہا ہے کہ ہے جو امیدوار الیکشن لڑنے کی سائنس جانتا ہے، ٹکٹ اسے ہی دیں گے.

    ان خیالات کا اظہار انھوں نے بنی گالہ کے باہر احتجاج کرنے والے کارکنوں سے خطاب کرتے ہوئے کیا. ان کا کہنا تھا کہ ٹکٹ کے معاملے پر مکمل دیانت داری سے کام لے رہا ہوں.

    [bs-quote quote=”یہ الیکشن ہم جیتنے کےلئے لڑ رہے ہیں، الیکشن جیتیں گے تو ملک میں تبدیلی لے کر آسکیں گے” style=”style-2″ align=”left” author_name=”عمران خان”][/bs-quote]

    ان کا کہنا تھا کہ ٹکٹ دینے میں ناانصافی ہوئی، تو احتجاج کرنا آپ کا حق ہے، زندگی میں کبھی تین ہفتے اتنی مشکل سے نہیں گزارے، ساڑھے چار ہزار لوگوں نے ٹکٹ کے لئے درخواست دی تھی، ابھی تک 550 افراد کو ٹکٹ دیے ہیں.

    عمران خان کا کہنا تھا کہ ٹکٹ جاری کرنے کے بعد احتجاج پر نظرثانی کی، مجھے کسی انسان سے ڈرنہیں صرف اللہ سے ڈرتا ہوں، چاہتا ہوں کہ کسی کے ساتھ ناانصافی نہ ہو.

    پی ٹی آئی چیئرمین نے کہا کہ زیادہ تر حلقوں میں واضح تھا کہ ٹکٹ کسے ملنا چاہیے، یہ الیکشن ہم جیتنے کےلئے لڑ رہے ہیں، الیکشن جیتیں گے تو ملک میں تبدیلی لے کر آسکیں گے.

    انھوں نے کہا کہ دیانت داری سے کام لیا، جو الیکشن کی سائنس جانتا ہے، اسے ٹکٹ دیا. میرے کسی رشتے دار یا دوست کو ٹکٹ نہیں دیا، ٹکٹوں کےمعاملے پر پی ٹی آئی ایک طرف، دیگرجماعتیں دوسری طرف ہیں.

    عمران خان کا کہنا تھا کہ سب سے مشکل کام خواتین کو ٹکٹ دینے کے معاملے پر ہے، اسمبلی میں پڑھی لکھی خواتین کو آنا چاہیے.

    انھوں نے مزید کہا کہ ن لیگ میں ٹکٹوں کے معاملے پر کوئی میرٹ نہیں، ن لیگ میں کسی کی بیوی، بہن یا رشتے داروں کوٹکٹ دیے گئے، ہم دو سے تین دن میں امیدواروں کی فائنل فہرست جاری کردیں گے، امید ہے کہ زیادہ سے زیادہ کارکنان فہرست سے مطمئن ہوں گے.

    ان کا کہنا تھا کہ انصاف کے لئے ہم نے ڈی چوک پر 126 دن گزارے تھے، اپنی ذات کے لئے نہیں، چاہتے تھے 2013 کے الیکشن میں انصاف ملے، ہم نے توڑ پھوڑنہیں کی تھی، ن لیگ نےپولیس کےذریعے ہم پرحملہ کرایا تھا۔

    عمران خان کا میانوالی سے ملگ گیر انتخابی مہم شروع کرنے کا اعلان

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔