Tag: عمران خان کے قافلے

اسلام آباد: گجرات میں جلسے سے واپسی پر پی ٹی آئی چیئرمین عمران خان کے قافلہ میں شامل گاڑی میں اچانک آگ لگ گئی، گاڑی میں سوارافراد نے گاڑی سے کود کر جانیں بچائیں۔

تفصیلات کے مطابق چیئرمین تحریک انصاف کے چیئرمین عمران خان کے قافلے میں شامل گاڑی کو روات کے قریب حادثہ پیش آیا۔

جہاں عمران خان کے قافلہ میں شامل گاڑی میں اچانک آگ لگ گئی، گاڑی میں سوار افراد نے گاڑی سے کود کر جانیں بچائیں تاہم گاڑی مکمل تباہ ہوگئی۔

آتشزدگی کا شکار ہونے والی گاڑی عمران خان کی گاڑی کے آگے چل رہی تھی، عمران خان کا قافلہ گجرات میں جلسے کے بعد اسلام آباد واپس جارہا تھا۔

ذرائع کا کہنا ہے کہ عمران خان کے قافلہ میں شامل گاڑی میں آگ لگنے کی وجوہات نہ پتہ چل سکیں۔

یاد رہے چیئرمین پی ٹی آئی نے گجرات میں جلسے سے خطاب کرتے ہوئے کہا تھا کہ نوجوانوں تیار ہو جاؤ ہم نے ظلم کا مقابلہ کرنا ہے، یہ ہمارے خلاف جتنی ایف آئی آر کاٹیں گے کوئی فائدہ نہیں ہوگا، قانون کارروائی کا مطالبہ کرنے پر میرے خلاف دہشت گردی کا مقدمہ بنا دیا گیا، پی ڈی ایم سمیت سب جو مرضی کر لو اب جیت نہیں سکتے۔

عمران خان کا کہنا تھا کہ غلام اوپر نہیں جا سکتے صرف اچھے غلام بن سکتے ہیں، آزاد لوگ ہی علامہ اقبال کے شاہین بنتے ہیں، پاکستان عظیم لوگوں کا ملک ہے۔ کسی ملک سے بھیک مانگنے کی ضرورت نہیں۔

سابق وزیراعظم نے حکومت کو خبردار کرتے ہوئے کہا تھا کہ جو حربے استعمال کر رہے ہیں وہ روک دیں ورنہ ہماری تحریک اسلام آباد کی طرف آئے گی اور آپ کو چھپنے کی جگہ نہیں ملے گی۔