لاہور: شہباز شریف کے داماد عمران علی یوسف نجی بینک کے ڈیفالٹر نکلے، بینک نے عدالت سے عمران علی کی جائیداد نیلام کرانے کی ڈگری حاصل کر لی۔
تفصیلات کے مطابق ڈی ایچ اے لاہور میں عمران علی یوسف کی 2 کنال کی جائیداد نیلام کی جائے گی، معلوم ہوا ہے کہ میاں شہباز شریف کے داماد نجی بینک کے ڈیفالٹر ہیں، اس سلسلے میں بینک نے نیلامی ڈگری بھی حاصل کر لی ہے۔
بینکنگ کورٹ نے حکم دیا ہے کہ 27 مارچ کو عمران علی یوسف کی مذکورہ جائیداد نیلام کی جائے، 2 کنال اراضی کے لیے 4 کروڑ 80 لاکھ روپے کی بولی رکھی گئی ہے، بینکاری عدالت کے حکم پر یہ جائیداد 27 مارچ کو نیلام کر دی جائے گی۔
ڈونگا گلی میں شہباز شریف کا بڑا گھر سیل
یاد رہے کہ ماضی میں شہباز شریف کے داماد کے نام پر اربوں روپے کی جائیداد کا انکشاف ہوا تھا، بعد ازاں احتساب عدالت نے ان کی جائیداد ضبط کرنے کا حکم جاری کیا، احتساب عدالت کی جانب سے انھیں اشتہاری بھی قرار دیا گیا تھا۔ عدالتی حکم نامے کے مطابق عمران علی یوسف پر پنجاب پاور ڈویلپمنٹ کمپنی سے 13 کروڑ رشوت لینے کا الزام تھا۔
گزشتہ برس 20 دسمبر کو آمدن سے زائد اثاثہ جات کیس میں نیب کے حکم پر گلیات ڈویلپمنٹ اتھارٹی نے ڈونگا گلی، ایبٹ آباد میں تعمیر شدہ سابق وزیر اعلیٰ پنجاب شہباز شریف کا 9 کنال، ایک مرلے کا گھر بھی سیل کر دیا تھا۔ اس سے ایک ہفتہ قبل احتساب عدالت نے شہباز شریف فیملی کے اثاثے منجمد کرنے کا حکم بھی جاری کر دیا تھا۔
